NUMERA

1 Aigupito tanona amo idia raka-lasi lagani iharuana, ena hua iharuana ena dina ginigunana ai,+ Sinai ena taunimanima lasi gabuna ai+ Iehova ese hebou dubu lalonai+ Mose ia hereva henia, ia gwau: 2 “Israela taudia* ibounai ta ta do oi duahia,+ edia famili bona edia iduhu hegeregerena, bona oi duahia tatau ta ta ibounai edia ladana oi torea. 3 Oi bona Arona ese mauri lagani 20 bona unai lagani idia hanaia tatau ibounai be edia orea ta ta* hegeregerena do umui rejista,+ Israela ai tuari lalonai idia vareai diba taudia unai.

4 “Umui ese iduhu ta ta amo tau ta do umui abia hidi, edia iduhu kwaradia ai idia lao totona.+ 5 Umui do idia durua tatau edia ladadia be inai: Rubena iduhu amo be Elisuru,+ ia be Sedeuru ena natuna. 6 Simeona iduhu amo be Selumiele,+ ia be Surisadai ena natuna. 7 Iuda iduhu amo be Nasona,+ ia be Aminadaba ena natuna. 8 Isakara iduhu amo be Netanele,+ ia be Suara ena natuna. 9 Sebuluno iduhu amo be Eliaba,+ ia be Helona ena natuna. 10 Iosepa ena natudia: Eparaima+ iduhu amo be Elisama, ia be Amihuda ena natuna. Manase iduhu amo be Gamaliela, ia be Pedasuru ena natuna. 11 Beniamina iduhu amo be Abidana,+ ia be Gideoni ena natuna. 12 Dano iduhu amo be Ahiesere,+ ia be Amisadai ena natuna. 13 Asere iduhu amo be Pagiele,+ ia be Okarana ena natuna. 14 Gado iduhu amo be Eliasapa,+ ia be Deuele ena natuna. 15 Napatali iduhu amo be Ahira,+ ia be Enana ena natuna. 16 Unai tatau ibounai be Israela taudia amo idia boiria. Idia be Israela taudia tausen momo edia iduhu gunalaia taudia.”+

17 Vadaeni Mose bona Arona be Dirava ese ia abia hidi tatau idia abidia. 18 Bona idia ese hua iharuana ena dina ginigunana ai Israela taudia ibounai idia haboua. Unai amo Israela taudia be edia famili bona iduhu hegeregerena idia rejistaia. Edia mauri lagani 20 bona unai lagani ia hanaia tatau ibounai ta ta edia ladana idia torea,+ 19 Iehova ese Mose ia oda henia hegeregerena. Sinai ena taunimanima lasi gabuna ai idia ia rejistaia.+

20 Israela ena vara guna natuna Rubena ena bese+ ese lista ai edia ladana, edia famili, bona edia iduhu edia ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 21 bona Rubena iduhu amo idia rejistaia tatau ibounai be 46,500.

22 Simeona ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 23 bona Simeona iduhu amo idia rejistaia tatau ibounai be 59,300.

24 Gado ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 25 bona Gado iduhu amo idia rejistaia tatau ibounai be 45,650.

26 Iuda ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 27 bona Iuda iduhu amo idia rejistaia tatau ibounai be 74,600.

28 Isakara ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 29 bona Isakara iduhu amo idia rejistaia tatau ibounai be 54,400.

30 Sebuluno ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 31 bona Sebuluno iduhu amo idia rejistaia tatau ibounai be 57,400.

32 Iosepa ena bese taudia, Eparaima amo+ ese edia ladana, edia famili, bona edia iduhu ladadia be lista dekenai idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 33 bona Eparaima iduhu amo idia rejistaia tatau ibounai be 40,500.

34 Manase ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 35 bona Manase iduhu amo idia rejistaia taudia ibounai be 32,200.

36 Beniamina ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 37 bona Beniamina iduhu amo idia rejistaia tatau ibounai be 35,400.

38 Dano ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 39 bona Dano iduhu amo idia rejistaia tatau ibounai be 62,700.

40 Asere ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 41 bona Asere iduhu amo idia rejistaia tatau ibounai be 41,500.

42 Napatali ena bese+ ese lista ai edia ladana, edia famili, bona edia iduhu ladadia idia torea. To edia mauri lagani 20 bona unai lagani ia hanaia tatau ibounai idia duahia, tuari lalonai idia vareai diba taudia unai, 43 bona Napatali iduhu amo idia rejistaia tatau ibounai be 53,400.

44 Unai rejista gaukara be Mose bona Arona bona Israela ena iduhu gunalaia taudia 12 ese idia karaia, idia ta ta be edia iduhu totona idia gaukara. 45 Edia mauri lagani 20 bona unai lagani ia hanaia Israela tatau ibounai be edia iduhu hegeregerena idia rejistaia, tuari lalonai idia vareai diba taudia unai, 46 bona idia rejista tatau ibounai be 603,550.+

47 To Levi taudia+ be edia tamadia edia iduhu ladana amo iduhu ma haida ida edia ladana idia rejista lasi.+ 48 Vadaeni Iehova ese Mose ia hamaoroa: 49 “Levi iduhu sibona do oi rejistaia lasi, bona edia namba be Israela taudia ma haida ida do oi torea hebou lasi.+ 50 Namona be Levi taudia oi abia hidi Taravatu Maua ia noho Palai Dubu helagana bona ena kohu ibounai idia naria totona.+ Idia ese Palai Dubu bona ena kohu ibounai do idia huaia,+ bona Palai Dubu ai hesiai gaukara do idia karaia,+ bona edia palai rumadia be Palai Dubu badinai do idia haginia hegege.+ 51 Palai Dubu be gabu ma ta dekenai idia abia lao neganai, Levi taudia ese idia kokia be namo.+ Bona Palai Dubu idia haginia lou neganai, Levi taudia ese idia haginia be namo. Bema Levi iduhu amo ia mai lasi tauna* be Palai Dubu kahirakahira ia mai, ia idia hamasea be namo.+

52 “Israela taudia ta ta ese edia palai ruma be idia henia gabudia ta ta ai idia haginia be namo, edia iduhu toi hegeregerena,+ orea ta ta* ai. 53 Namona be Levi taudia ese edia palai ruma be Palai Dubu badinai idia haginia hegege, unai Palai Dubu lalonai Taravatu Maua ia noho, unai amo Israela taudia dekenai egu badu do ia hedinarai lasi.+ Bona Levi taudia ese Taravatu Maua ia noho Palai Dubu naria gaukara do idia karaia.”+

54 Israela taudia ibounai be Iehova ese Mose dekenai ia henia oda hereva ibounai idia badinaia. Idia be unai hegeregerena idia kara.

2 Iehova be Mose bona Arona dekenai ia gwau: 2 “Israela taudia be iduhu toi dekenai idia kamepa be namo,+ oibe, idia ta ta be ena iduhu ena saini kahirakahira ai do idia kamepa. Namona be edia palai rumadia ese hebou dubu idia hagegea.

3 “Ist ena dina daekau kahanai be Iuda ena kamepa. Iduhu toi be unuseniai do idia noho, edia orea ta ta* dekenai idia henia gabuna ai. Bona Iuda iduhu be ginigunana. Iuda bese ena gunalaia tauna be Nasona,+ ia be Aminadaba ena natuna. 4 Iena tuari oreana totona idia rejista tatau ibounai be 74,600.+ 5 Iuda iduhu taudia badinai be Isakara iduhu. Isakara bese ena gunalaia tauna be Netanele,+ ia be Suara ena natuna. 6 Iena tuari oreana totona idia rejista tatau ibounai be 54,400.+ 7 Gabeai be Sebuluno iduhu. Sebuluno besena ena gunalaia tauna be Eliaba,+ ia be Helona ena natuna. 8 Iena tuari oreana totona idia rejista tatau ibounai be 57,400.+

9 “Iuda iduhu ena kamepa amo tuari oreana totona idia rejista tatau ibounai be 186,400. Namona be idia ese kamepa idia rakatania guna.+

10 “Saut kahanai be Rubena ena kamepa. Iduhu toi be unuseniai do idia noho,+ edia tuari oreana dekenai idia henia gabuna ai. Rubena bese ena gunalaia tauna be Elisuru,+ ia be Sedeuru ena natuna. 11 Iena tuari oreana totona idia rejista tatau ibounai be 46,500.+ 12 Rubena iduhu badinai be Simeona iduhu. Simeona besena ena gunalaia tauna be Selumiele,+ ia be Surisadai ena natuna. 13 Iena tuari oreana totona idia rejista tatau ibounai be 59,300.+ 14 Gabeai be Gado iduhu. Gado besena ena gunalaia tauna be Eliasapa,+ ia be Reuele ena natuna. 15 Iena tuari oreana totona idia rejista tatau ibounai be 45,650.+

16 “Rubena iduhu ena kamepa amo tuari oreana totona idia rejista tatau ibounai be 151,450, bona idia be kamepa idia rakatania orea iharuana.+

17 “Hebou dubu idia abia lao neganai,+ Levi taudia be kamepa ma haida huanai idia lao be namo.

“Edia orea ta ta dekenai idia kamepa hegeregerena idia lao be namo,+ idia ta ta be edia iduhu toi dekenai do idia lao.

18 “West kahanai be Eparaima ena kamepa. Iduhu toi be unuseniai do idia noho, edia tuari oreana dekenai idia henia gabuna ai. Eparaima bese ena gunalaia tauna be Elisama,+ ia be Amihuda ena natuna. 19 Iena tuari oreana totona idia rejista tatau ibounai be 40,500.+ 20 Eparaima iduhu badinai be Manase iduhu.+ Manase bese ena gunalaia tauna be Gamaliela,+ ia be Pedasuru ena natuna. 21 Iena tuari oreana totona idia rejista tatau ibounai be 32,200.+ 22 Manase iduhu badinai be Beniamina iduhu. Beniamina bese ena gunalaia tauna be Abidana,+ ia be Gideoni ena natuna. 23 Iena tuari oreana totona idia rejista tatau ibounai be 35,400.+

24 “Eparaima kamepa amo tuari oreana totona idia rejista tatau ibounai be 108,100, bona idia be kamepa idia rakatania orea ihatoina.+

25 “Not kahanai be Dano ena kamepa. Iduhu toi be unuseniai do idia noho, edia tuari oreana dekenai idia henia gabuna ai. Dano bese ena gunalaia tauna be Ahiesere,+ ia be Amisadai ena natuna. 26 Iena tuari oreana totona idia rejista tatau ibounai be 62,700.+ 27 Dano iduhu badinai be Asere iduhu. Asere bese ena gunalaia tauna be Pagiele,+ ia be Okarana ena natuna. 28 Iena tuari oreana totona idia rejista tatau ibounai be 41,500.+ 29 Asere iduhu badinai be Napatali iduhu. Napatali bese ena gunalaia tauna be Ahira,+ ia be Enana ena natuna. 30 Iena tuari oreana totona idia rejista tatau ibounai be 53,400.+

31 “Dano ena kamepa ai idia rejista tatau ibounai be 157,600. Idia be kamepa idia rakatania orea ginigabena,+ edia iduhu toi hegeregerena.”

32 Unai be edia iduhu ta ta hegeregerena idia rejista Israela taudia. Oibe, edia kamepa dekenai tuari totona idia rejista tatau ibounai be 603,550.+ 33 To Levi taudia be Israela taudia ma haida ida idia rejistaia lasi,+ Iehova ese Mose ia oda henia hegeregerena. 34 Iehova ese Mose dekenai ia henia oda hereva ibounai be Israela taudia ese idia badinaia. Idia be edia famili bona edia iduhu hegeregerena idia kamepa, iduhu toi toi ai idia kamepa+ bona unai dala ai edia kamepa idia kokia.+

3 Iehova ese Sinai Ororo ai Mose ia hereva henia negana ai, Mose bona Arona edia bese taudia* be inai.+ 2 Arona ena natudia edia ladadia be inai: Vara guna be Nadaba, bena Abihu,+ Eleasara,+ bona Itamara.+ 3 Unai be Arona ena natudia edia ladadia. Idia be hahelaga gaukara karaia totona idia abia hidi.*+ 4 To, Nadaba bona Abihu be Iehova vairanai idia mase, badina idia ese Sinai ena taunimanima lasi gabuna ai taravatu ese ia gwauraia lasi lahi be Iehova vairanai idia henia.+ Idia be mai edia natudia memero lasi. To Eleasara+ bona Itamara+ be edia tamana Arona ida hahelaga gaukara idia karaia noho.

5 Bena Iehova be Mose dekenai ia gwau: 6 “Levi iduhu taudia+ oi mailaia bona hahelaga tauna Arona vairanai idia gini, bona ia do idia hesiai henia.+ 7 Idia be hebou dubu vairanai hesiai gaukara do idia karaia, unai amo inai Palai Dubu ai ia bona Israela taudia ibounai totona edia maduna idia hagugurua diba. 8 Idia ese hebou dubu ena kohu ibounai do idia naria+ bona palai ruma ena gaukara ibounai do idia karaia, unai amo edia maduna Israela taudia totona do idia hagugurua.+ 9 Oi ese Levi taudia be Arona bona ena natudia dekenai do oi henia. Oibe, Israela taudia ese idia be Arona dekenai idia henia harihari gaudia bamona.+ 10 Oi ese Arona bona ena natudia do oi abia hidi, bona namona be idia ese edia hahelaga gaukara idia karaia.+ Bema hahelaga gaukara ia karaia lasi tauna* be dubu helaga kahirakahira ia mai, ia idia hamasea be namo.”+

11 Iehova be Mose dekenai ma ia gwau: 12 “Kamonai! Lau ese Israela taudia edia amo Levi taudia lau abia. Idia ese Israela taudia edia vara guna natudia ibounai edia gabu do idia abia,+ bona Levi taudia be lauegu. 13 Badina vara guna ibounai be lauegu.+ Lau ese guna Aigupito tanona ai vara guna ibounai lau hamasea negana ai,+ Israela ai vara guna ibounai, taunimanima amo ela bona animal be lau sibona totona lau hahelagaia.+ Idia be lauegu. Lau be Iehova.”

14 Iehova be Sinai ena taunimanima lasi gabuna ai Mose dekenai ma ia gwau:+ 15 “Levi taudia do oi rejistaia, edia iduhu bona famili hegeregerena. Namona be hua tamona bona idia hanaia memero bona tatau ibounai do oi rejistaia.”+ 16 Vadaeni Iehova ena oda dainai Mose ese idia ia rejistaia, oibe, iena oda hegeregerena ia karaia. 17 Levi ena natudia edia ladadia be inai: Geresone, Kohata, bona Merari.+

18 Geresone ena natudia memero be Libini bona Simei.+ Idia ese edia ladana be idia amo idia vara besedia dekenai idia henia.

19 Kohata ena natudia memero be Amarama, Isahara, Heberona bona Usiele.+ Idia ese edia ladana be idia amo idia vara besedia dekenai idia henia.

20 Merari ena natudia memero be Mali+ bona Musi.+ Idia ese edia ladana be idia amo idia vara besedia dekenai idia henia.

Unai be Levi taudia edia bese, edia iduhu ta ta hegeregerena.

21 Geresone amo Libini bona Simei taudia edia bese idia vara.+ Idia be Geresone ena bese taudia. 22 Hua tamona bona idia hanaia memero bona tatau ibounai idia rejistaia, idia ibounai be 7,500.+ 23 Geresone ena bese taudia be Palai Dubu ena murina kahanai idia kamepa,+ west kahana dekenai. 24 Geresone ena iduhu gunalaia tauna be Eliasapa, ia be Laele ena natuna mero. 25 Geresone ena bese taudia+ edia maduna be hebou dubu lalonai inai gaudia do idia naria:+ Palai Dubu+ bona ena koua gaudia idauidau,+ hebou dubu ena vareai gabuna ena keten, 26 ariara ena dabua maguna,+ ariara ena vareai gabuna ena keten,+ unai be Palai Dubu bona boubou patana ia hagegea gauna, bona ena palai varodia, bona unai gaudia ibounai edia gaukara danu.

27 Kohata amo Amarama bese, Isahara bese, Heberona bese, bona Usiele bese idia mai. Idia be Kohata ena bese taudia.+ 28 Hua tamona bona idia hanaia memero bona tatau ibounai edia namba be 8,600. Edia maduna be helaga gabuna idia naria.+ 29 Kohata ena bese taudia be Palai Dubu ena saut kahana dekenai idia kamepa.+ 30 Kohata iduhu gunalaia tauna be Elisapana, ia be Usiele ena natuna mero.+ 31 Edia maduna be inai gaudia do idia naria: Maua,+ teibolo,+ lamepa atoa gauna,+ boubou patadia,+ helaga gabuna ai idia gaukaralaia kohu idauidau,+ keten,+ bona unai gaukara totona idia gaukaralaia gaudia ibounai.+

32 Levi iduhu ena gunalaia tauna badana be Eleasara,+ hahelaga tauna Arona ena natuna, ia ese helaga gabuna ena gaukara idauidau idia karaia taudia ia naria.

33 Merari ena amo Mali besena bona Musi besena idia mai. Idia be Merari ena bese taudia.+ 34 Hua tamona bona idia hanaia memero bona tatau ibounai idia rejistaia, idia ibounai be 6,200.+ 35 Merari bese ena gunalaia tauna be Suriele, ia be Abihaili ena natuna mero. Idia be Palai Dubu ena not kahana dekenai idia kamepa.+ 36 Merari ena bese taudia edia maduna be inai gaudia do idia naria: Palai Dubu ena freim,+ ena au latadia,+ ena du,+ ena sikoea gaudia mai edia matu, ena kohu ibounai,+ bona unai gaudia ibounai edia gaukara danu,+ 37 ariara idia hagegea du ibounai bona edia sikoea gaudia mai edia matu,+ edia palai ikokodia, bona edia palai varodia danu.

38 Ist ena dina daekau kahanai, Palai Dubu ena vairanai, oibe, hebou dubu ena vaira kahanai Mose bona Arona bona ena natudia idia kamepa. Edia maduna be dubu helaga do idia naria, unai be edia maduna Israela taudia dekenai. Bema hahelaga gaukara ia karaia lasi tauna* be dubu helaga kahirakahira ia mai, ia be do idia hamasea.+

39 Iehova ena oda dainai Mose bona Arona ese Levi iduhu amo hua tamona bona ia hanaia memero bona tatau ibounai idia rejistaia, edia bese hegeregerena, idia ibounai be 22,000.

40 Bena Iehova be Mose dekenai ia gwau: “Israela taudia edia vara guna memero ibounai, hua tamona bona ia hanaia memero bona tatau do oi rejistaia,+ idia do oi duahia bona edia ladana oi torea. 41 Oi ese Levi taudia be lau totona do oi henia, idia be Israela taudia edia vara guna edia gabu do idia abia.+ Bona Levi taudia edia vara guna animal be lau dekenai do oi henia, idia be Israela taudia edia vara guna animal edia gabu do idia abia.+ Lau be Iehova.” 42 Vadaeni Mose ese Israela taudia huana amo vara guna ibounai ia rejistaia, Iehova ese ia oda henia hegeregerena. 43 Edia ladadia idia rejistaia vara guna ibounai, hua tamona bona ia hanaia memero bona tatau ibounai be 22,273.

44 Iehova be Mose dekenai ma ia gwau: 45 “Levi taudia do oi abia, idia be Israela taudia edia vara guna ibounai edia gabu do idia abia. Bona Levi taudia edia animal do oi abia, idia be Israela taudia edia animal edia gabu do idia abia, bona Levi taudia be lauegu. Lau be Iehova. 46 Israela taudia edia vara guna ese Levi taudia edia namba ia hereaia dainai,+ unai vara guna natudia 273 hoia lou totona,+ 47 namona be idia ta ta amo 5 siliva sikel* do oi abia,+ helaga gabuna ena sikel* amo idia hahetohoa. Sikel ta be 20 gera.*+ 48 Oi ese unai moni be Arona bona ena natudia dekenai do oi henia, Levi taudia edia namba ia hereaia taudia hoia lou monina hegeregerena.” 49 Vadaeni Mose ese unai moni ia gogoa, unai moni be Levi taudia edia namba ia hereaia taudia hoia lou totona. 50 Ia ese unai moni be Israela taudia edia vara guna amo ia abia, unai moni ena metau be 1,365 sikel, helaga gabuna ena sikel amo idia hahetohoa. 51 Bena Iehova ena hereva hegeregerena Mose ese unai moni be Arona bona ena natudia dekenai ia henia, Iehova ese Mose ia oda henia hegeregerena.

4 Iehova be Mose bona Arona dekenai ma ia gwau: 2 “Namona be Levi besena amo Kohata besena+ umui duahia bona edia ladana umui torea, edia famili bona iduhu ta ta hegeregerena, 3 edia mauri lagani be 30+ ia lao 50 tatau ibounai,+ hebou dubu ena gaukara idia karaia taudia unai.+

4 “Inai be Kohata besena edia gaukara, hebou dubu lalonai.+ Idia ese helaga herea gaudia idia naria. 5 Israela taudia be gabu ta idia rakatania neganai, Arona bona ena natudia memero do idia lao bona keten idia kokia+ bona Taravatu Maua idia koua.+ 6 Idia ese maua ataiai davara animal* ena kopina do idia atoa bona dabua bulu amo do idia koua bona ena huaia audia be rini lalonai do idia atoa.+

7 “Danu, idia ese dabua bulu amo paraoa helagana* atoa teibolo do idia koua,+ bona ia latanai kapusi, disi, bona hodu do idia atoa, unai be wain boubou totona.+ Bona paraoa helagana+ be nega ibounai teibolo latanai ia noho be namo. 8 Idia ese unai gaudia be dabua kakakaka amo do idia koua, bona ena ataiai davara animal ena kopina idia atoa bona teibolo ena huaia audia be edia rini lalonai idia atoa.+ 9 Bena idia ese dabua bulu amo inai gaudia idia koua: Lamepa atoa gaudia,+ lamepa ena wiki dogoatao gaudia,+ idia gabua ore wiki udaia gaudia,+ bona hodu ibounai, lamepa ai oela bubua totona. 10 Idia ese lamepa atoa gauna bona ena kohu ibounai be davara animal ena kopina amo do idia kumia bona huaia auna latanai idia atoa. 11 Bona golo boubou patana+ latanai dabua bulu idia atoa, bena davara animal ena kopina amo idia koua, bona pata huaia audia be edia rini lalonai idia atoa.+ 12 Bena idia ese hesiai gaukara ena kohu ibounai,+ hanaihanai helaga gabuna ai idia gaukaralaia kohu unai, do idia abia bona dabua bulu lalonai idia atoa bona davara animal ena kopina amo idia koua bona huaia auna latanai do idia atoa.

13 “Namona be idia ese boubou patana amo lahi kahu* idia kokia+ bona ena ataiai wulu pepol idia atoa. 14 Boubou patana ai idia gaukaralaia kohu ibounai be ia latanai do idia atoa: Idia gabua ore wiki udaia gaudia, foka, savolo, disi, bona pata ena kohu ibounai.+ Bona unai gaudia ibounai be davara animal ena kopina amo idia koua bona boubou patana ena huaia audia be edia rini lalonai idia atoa.+

15 “Arona bona ena natudia ese helaga gabuna ena kohu ibounai idia koua.+ Bena Kohata besena do idia lao unai gaudia huaia totona,+ to namona be helaga gabuna ena kohu ta idia dogoatao lasi, do idia mase garina.+ Kohata besena be hebou dubu dekenai unai maduna* do idia huaia.

16 “Hahelaga tauna Arona ena natuna, Eleasara,+ ena maduna be lamepa ena oela,+ bonana namo muramura,+ hanaihanai idia henia aniani boubou, bona dehoro helagana do ia naria.+ Ia ese Palai Dubu bona ia lalonai idia noho gaudia ibounai, helaga gabuna bona ena kohu ibounai danu do ia naria.”

17 Iehova be Mose bona Arona dekenai ma ia gwau: 18 “Namo lasi Levi taudia huana amo Kohata besena+ ia boio. 19 To idia totona inai umui karaia, unai amo helaga herea gaudia kahirakahira idia lao neganai, do idia mase lasi.+ Arona bona ena natudia be Palai Dubu lalonai do idia vareai bona idia ta ta dekenai edia gaukara do idia henia, bona do idia huaia gaudia be idia dekenai do idia herevalaia. 20 Palai Dubu lalonai idia vareai neganai, helaga gaudia idia itaia lasi be namo, idia mase garina.”+

21 Bena Iehova be Mose dekenai ia gwau: 22 “Namona be Geresone besena+ umui duahia bona edia ladana umui torea, edia iduhu bona famili ta ta hegeregerena, 23 edia mauri lagani be 30 ia lao 50 tatau ibounai oi rejistaia, hebou dubu ena gaukara idia karaia taudia ibounai unai. 24 Geresone besena ese do idia naria bona huaia gaudia be inai:+ 25 Palai Dubu ena palai dabuadia,+ hebou dubu ena dabua, davara animal ena kopina amo idia karaia palai dabua, bona ena henunai ia noho palai dabua.+ Bona hebou dubu ena vareai gabuna ena keten,+ 26 ariara ena dabua maguna,+ ariara ena vareai gabuna ena keten,+ unai be Palai Dubu bona boubou patana ia hagegea keten, edia palai varodia, bona Palai Dubu ena gaukara totona idia gaukaralaia kohu ibounai do idia huaia. Unai be edia gaukara. 27 Arona bona ena natudia edia hakaua henunai, Geresone besena+ ese edia gaukara ibounai idia karaia bona kohu idia huaia. Umui ese idia dekenai unai kohu huaia gaukara ibounai do umui henia, unai be edia maduna. 28 Geresone besena be hebou dubu totona unai gaukara do idia karaia,+ bona edia maduna ibounai be Itamara ena hakaua henunai do idia karaia,+ ia be hahelaga tauna Arona ena natuna.

29 “To Merari besena+ be edia famili bona iduhu ta ta hegeregerena oi rejistaia, 30 edia mauri lagani be 30 ia lao 50 tatau ibounai do oi rejistaia, hebou dubu ena gaukara idia karaia taudia ibounai unai. 31 Hebou dubu ena gaukara totona, idia edia maduna be inai gaudia do idia huaia:+ Palai Dubu ena freim,+ ena au latadia,+ ena du,+ ena sikoea gaudia mai edia matu,+ 32 ariara idia hagegea du,+ edia sikoea gaudia mai edia matu,+ edia palai ikokodia,+ edia palai varodia mai edia kohu ibounai, bona unai gaudia ibounai edia gaukara danu. Umui ese umui abia hidi kohu ta ta be idia ese idia huaia. 33 Merari besena edia famili ta ta+ be unai dala ai hebou dubu dekenai do idia gaukara, hahelaga tauna Arona ena natuna, Itamara, ena hakaua henunai.”+

34 Mose bona Arona bona Israela taudia edia iduhu gunalaia taudia+ ese Kohata besena be edia famili bona iduhu ta ta hegeregerena idia rejistaia,+ 35 edia mauri lagani be 30 ia lao 50 tatau ibounai, hebou dubu ena gaukara idia karaia taudia ibounai unai.+ 36 Edia famili hegeregerena idia rejistaia taudia ibounai be 2,750.+ 37 Idia be Kohata taudia edia famili ta ta amo idia rejistaia, hebou dubu dekenai gaukara idia karaia taudia ibounai unai. Iehova ese Mose dekenai ia henia oda hegeregerena, Mose bona Arona ese idia rejistaia.+

38 Geresone besena+ be edia famili bona iduhu ta ta hegeregerena idia rejistaia, 39 edia mauri lagani be 30 ia lao 50 tatau ibounai, hebou dubu dekenai gaukara idia karaia taudia ibounai unai. 40 Edia famili bona iduhu ta ta hegeregerena idia rejistaia taudia ibounai be 2,630.+ 41 Geresone taudia edia famili ta ta be unai hegeregerena idia rejistaia, hebou dubu dekenai gaukara idia karaia taudia ibounai unai. Iehova ena oda hegeregerena, Mose bona Arona ese idia rejistaia.+

42 Merari besena be edia famili bona iduhu ta ta hegeregerena idia rejistaia, 43 edia mauri lagani be 30 ia lao 50 tatau ibounai, hebou dubu dekenai gaukara idia karaia taudia ibounai unai.+ 44 Edia famili hegeregerena idia rejistaia taudia ibounai be 3,200.+ 45 Merari taudia edia famili ta ta be unai hegeregerena idia rejistaia, Iehova ena oda hegeregerena, Mose bona Arona ese idia rejistaia.+

46 Mose bona Arona bona Israela ena iduhu gunalaia taudia ese unai Levi taudia ibounai idia rejistaia, edia famili bona iduhu ta ta hegeregerena, 47 edia mauri lagani be 30 ia lao 50 tatau ibounai, bona idia ibounai idia abia hidi hebou dubu totona gaukara do idia karaia bona kohu do idia huaia.+ 48 Idia rejistaia taudia ibounai be 8,580.+ 49 Iehova ese Mose amo ia henia oda hegeregerena idia rejistaia, idia ta ta totona idia abia hidi gaukara bona idia huaia gaudia hegeregerena. Oibe, Iehova ese Mose ia oda henia hegeregerena idia rejistaia.

5 Iehova be Mose dekenai ma ia gwau: 2 “Israela taudia oi oda henia idia ese lepera taudia ibounai+ bona mai edia hura taudia ibounai+ bona mase tauna idia dogoatao dainai idia miro taudia ibounai+ be kamepa amo do idia siaia raka-lasi. 3 Herevana unai be tau eiava hahine, to idia be kamepa ena murimuri ai umui siaia raka-lasi be namo, unai amo kamepa do idia hamiroa lasi,+ badina lau be unai kamepa huanai lau noho.”+ 4 Unai dainai, Israela taudia be unai bamona idia karaia bona unai taudia be kamepa murimuri ai idia siaia lao. Iehova ese Mose ia hamaoroa hegeregerena, Israela taudia be unai bamona idia karaia.

5 Iehova be Mose dekenai ma ia gwau: 6 “Israela taudia oi hamaoroa, ‘Bema tau eiava hahine ta be vaia taunimanima ese idia karaia kara dika ta ia karaia bona Iehova dekenai badinaia karana ia hahedinaraia lasi, unai tauna be ia kerere vadaeni.+ 7 Namona be ia* ese ena kara dika ia* gwauraia hedinarai,+ bona ena kerere davana ibounai ia haloua, bona 20 pesen do ia atoa kau danu,+ bona ia kara dika henia tauna dekenai unai do ia henia. 8 To bema ia kara dika henia tauna ia mase vadaeni, bona ena varavara korikorina ta ia noho lasi unai davana ia abia totona, Iehova dekenai unai ia haloua be namo bona hahelaga tauna ese do ia abia. Bona iena kara dika davana karaia totona ia henia mamoe tau danu be hahelaga tauna ese do ia bouboulaia.+

9 “‘Israela taudia ese hahelaga tauna dekenai idia henia kontribusen ibounai+ be hahelaga tauna ena.+ 10 Taunimanima ta ta ese idia henia helaga gaudia be hahelaga tauna ena. Ena be dahaka gaudia idia henia, unai be hahelaga tauna ena.’”

11 Iehova be Mose dekenai ma ia gwau: 12 “Israela taudia oi hereva henia bona idia dekenai oi gwau, ‘Bema tau ta ena adavana ia kara dika bona ia heudahanai, 13 bona tau ma ta be ia ida ia mahuta hebou+ bona unai amo ia sibona ia hamiroa, to ena tau be unai ia diba lasi bona unai be ia hunia noho, bona ta ese unai ia hamomokania lasi bona ta ese ia itaia lasi, vadaeni inai idia karaia be namo: 14 Unai hahine be sibona ia hamiroa murinai, bema ena tau ia mama bona ia laloa ena hahine ia heudahanai, eiava ena be unai hahine be sibona ia hamiroa lasi, to ena tau be ia mama bona ia laloa ena hahine ia heudahanai, 15 unai tau ese ena hahine be hahelaga tauna dekenai ia hakaua lao bona ena hahine ena boubou gauna danu ia abia lao be namo, unai be bali paraoa ifa ta ena 10 pesen.* Ia ese unai paraoa latanai oela do ia bubua lasi bona frenkinsens* do ia atoa lasi, badina unai be mama aniani boubou, kara dika laloatao totona ia henia aniani boubou unai.

16 “‘Hahelaga tauna ese unai hahine do ia hakaua lao Iehova vairanai ia gini totona.+ 17 Bena hahelaga tauna ese hodu amo ranu helagana do ia abia bona palai dubu ena floa amo tano kahuna do ia abia bona ranu lalonai ia atoa. 18 Bona hahelaga tauna ese unai hahine be Iehova vairanai do ia mailaia bona hahine ena huina ia ruhaia bona ena imana lalonai aniani boubou do ia atoa, unai amo hahine ia laloatao unai be mama aniani boubou,+ bona hahelaga tauna ena imana ai dika ia mailaia ranu iditana ia dogoatao be namo.+

19 “‘Bena hahelaga tauna ese unai hahine do ia hamaoroa gwauhamata ia karaia totona, hahine dekenai do ia gwau: “Bema emu tau ena siahu henunai oi noho lalonai, tau ma ta ida oi mahuta hebou lasi,+ bona oi kara dika lasi bona oi sibona oi hamiroa lasi, inai ranu iditana ia mailaia dika ese oi do ia hadikaia lasi. 20 To bema emu tau ena siahu henunai oi noho lalonai, oi sibona oi hamiroa bona tau ma ta ida oi mahuta hebou. . . .”+ 21 Hahelaga tauna ese hahine do ia hamaoroa gwauhamata metauna ia gwauraia totona, bema unai kara ia karaia momokani, ia be dika do ia davaria. Bona hahelaga tauna be unai hahine dekenai do ia gwau: “Iehova ese oi be haheitalai dikana bamona do ia halaoa. Emu taunimanima ese edia gwauhamata mai edia hadikaia hereva idia gwauraia neganai, emu ladana do idia gwauraia. Iehova ese emu natuna havaraia dalana do ia koua bona emu bogana do ia gudu. 22 Inai dika ia mailaia ranuna be emu bogarau lalonai do ia vareai bona emu bogana do ia gudu bona natuna havaraia dalana do ia koua.” Unai neganai hahine do ia gwau: “Amen! Amen!”*

23 “‘Bena hahelaga tauna ese unai hadikaia herevadia be buka dekenai do ia torea bona ranu iditana lalonai do ia huria oho. 24 Ia ese hahine do ia hamaoroa ranu iditana ia inua totona, dika ia mailaia ranuna unai, bona unai ranu be ia lalonai do ia diho bona mamina dikana do ia havaraia. 25 Bona hahelaga tauna ese hahine ena imana amo mama aniani boubou do ia abia+ bona Iehova vairanai unai aniani boubou do ia davea lao mai, bona boubou patana kahirakahira do ia abia lao. 26 Bena hahelaga tauna ese aniani boubou sisina do ia abia, unai be boubou ibounai ia laulaulaia gauna, bona boubou patana latanai do ia gabua,+ unai amo ena kwalahu do ia daekau, unai murinai hahine do ia hamaoroa unai ranu ia inua totona. 27 Unai hahine ese ranu ia inua neganai, bema ia sibona ia hamiroa bona ia heudahanai, dika ia mailaia ranuna be ia lalonai do ia diho bona mamina dikana do ia havaraia, bena ena bogana do ia gudu bona natudia do ia havaraia lasi. Bona ena taunimanima ese haida hadikaia hereva idia gwauraia neganai, idia ese iena haheitalai dikana do idia gaukaralaia. 28 To bema unai hahine be ia goeva bona sibona ia hamiroa lasi, unai bamona panisi do ia davaria lasi, do ia rogorogo diba bona natuna do ia havaraia.

29 “‘Unai be mama taravatuna,+ bema hahine ta be ena tau ena siahu henunai ia noho lalonai, ia kara dika bona ia sibona ia hamiroa, 30 eiava bema tau ta ia mama bona ia laloa ena hahine ia heudahanai, ia ese ena hahine be Iehova vairanai do ia haginia bona hahelaga tauna be unai taravatu ese idia gwauraia gaudia be ia dekenai ia karaia be namo. 31 Tau be do ia kerere lasi, to ena hahine be ena kerere dainai idia panisia be namo.’”

6 Iehova be Mose dekenai ma ia gwau: 2 “Israela taudia oi hamaoroa, ‘Bema tau eiava hahine ta ia gwauhamata Iehova dekenai Nasiri tauna* ai ia lao totona,+ 3 ia ese wain bona alkahol ma haida do ia inua lasi. Ia ese wain iditana eiava alkahol ma haida edia ranu iditana do ia inua lasi.+ Ia ese greips amo idia karaia inuinu gaudia do ia inua lasi, eiava greips do ia ania lasi, herevana idia gogoa matamata eiava idia kaukau gaudia. 4 Ia be Nasiri tauna ai ia lao negana amo, ia ese vain huahua amo idia karaia gaudia ibounai do ia ania lasi, idia mage lasi greips bona edia kopina danu.

5 “‘Nasiri gwauhamata henunai ia noho dinadia ibounai lalonai, reisa amo ena kwarana huina do idia kakasia lasi.+ Do ia helaga noho totona ena huina do ia utua lasi ela bona Iehova dekenai ia gwauhamata dinadia idia ore. 6 Iehova dekenai ia gwauhamata dinadia ibounai lalonai, namo lasi mase tauna kahirakahira ia lao. 7 Ena be ena tamana, ena sinana, ena tadikaka, eiava ena taihuna ia mase, to namo lasi sibona ia hamiroa,+ badina ia ese Dirava hesiai henia gwauhamatana ia karaia bona ena kwarana huina amo unai toa ia hahedinaraia.

8 “‘Nasiri gaukara ia karaia dinadia ibounai lalonai, Iehova dekenai ia be helaga. 9 To bema ta be ia badinai ia mase+ bona iena huina ia hamiroa, ena gwauhamata ena toana Dirava dekenai ia hamiroa unai, namona be ena goeva karana hamomokania dinana ai ena kwarana ia sevia.+ Unai be dina namba 7 ai do ia karaia. 10 Bona dina namba 8 ai, namona be ia ese hebou dubu ena vareai gabuna ai hahelaga tauna dekenai kerea manu rua eiava pune manu natudia rua ia mailaia. 11 Hahelaga tauna ese manu ta be kara dika boubou totona do ia hegaegaelaia bona ma ta be gabua boubou totona, badina ia be mase tauna ese ia hamiroa, unai dainai hahelaga tauna be ia totona kara dika davana do ia karaia.+ Bena unai dina ai Nasiri tauna be sibona* do ia hahelagaia. 12 Bona Iehova totona ena Nasiri gaukara ia hamatamaia lou, bona ia ese mauri lagani tamona mamoe natuna mero do ia mailaia, kerere boubou totona. To guna ia karaia gaukara dinadia do ia duahia lasi, badina ia be ena Nasiri gwauhamata ia hadikaia.

13 “‘Nasiri tauna ena taravatu be inai: Ia ese Nasiri gaukara dinadia ia hagugurua neganai,+ ia be hebou dubu ena vareai gabuna dekenai do idia hakaua mai. 14 Unuseniai Iehova dekenai inai boubou gaudia ia henia be namo: Gabua boubou totona mamoe natuna mero namona, mauri lagani tamona gauna,+ bona kara dika boubou totona mamoe natuna kekeni namona, mauri lagani tamona gauna,+ maino karaia boubou totona mamoe tau namona,+ 15 bosea lalonai idia noho isti lasi paraoa, edia toana be rini bamona, unai be oela ida idia mikisia paraoa namona amo idia karaia, bona oela amo idia dahua isti lasi paraoa palakadia, bona edia aniani boubou+ bona edia wain boubou.+ 16 Hahelaga tauna ese Iehova vairanai unai gaudia do ia henia, bona ena kara dika boubou bona gabua boubou do ia henia. 17 Hahelaga tauna ese Iehova dekenai mamoe tau be maino karaia boubou bamona do ia henia bona bosea lalonai idia noho isti lasi paraoa danu. Bona unai mamoe tau ida aniani boubou+ bona wain boubou do ia henia danu.

18 “‘Bena Nasiri tauna be hebou dubu ena vareai gabuna ai ena kwarana huina do ia sevia,+ unai be ena Nasiri negana ai ia tubu huina. Bona unai huina be maino karaia boubou ia gabua lahi latanai do ia atoa. 19 Bona hahelaga tauna ese mamoe tau ena pagana do ia abia, nadua gauna unai,+ bosea amo isti lasi paraoa ta, ena toana be rini bamona, bona isti lasi paraoa palakana ta ia abia bona Nasiri tauna ena imana dekenai ia atoa, unai be ena huina idia sevia murinai. Unai huina be ena Nasiri gaukara ena toana ia hahedinaraia. 20 Bona hahelaga tauna ese unai gaudia do ia davea lao mai, unai be davea boubou Iehova vairanai.+ Unai be helaga gauna hahelaga tauna totona, bona davea boubou ena kemena bona harihari gauna bamona idia henia aena danu be helaga.+ Unai murinai, Nasiri tauna ese wain ia inua diba.

21 “‘Gwauhamata ia karaia Nasiri tauna ena taravatu be inai:+ Bema ia gwauhamata Nasiri tauna ese do ia henia boubou gaudia latanai boubou gaudia ma haida be Iehova dekenai ia henia, vadaeni Nasiri tauna ena taravatu dainai, namona be ena gwauhamata ia badinaia.’”

22 Bena Iehova be Mose dekenai ia gwau: 23 “Arona bona ena natudia memero oi hamaoroa, ‘Inai dala ai Israela taudia umui hanamoa be namo.+ Idia dekenai umui gwau:

24 “Iehova ese umui do ia hanamoa+ bona gimaia.

25 Iehova ena vairana be umui latanai ia diari,+ bona ia ese umui do ia lalonamo henia.

26 Iehova ese umui ia hebogahisi henia* bona umui dekenai maino do ia henia.”’+

27 Bona namona be idia ese Israela taudia latanai egu ladana idia hatoa,+ unai amo idia lau hanamoa diba.”+

7 Mose ese Palai Dubu ia haginia ore dinana ai,+ Palai Dubu bona ena kohu ibounai dekenai dehoro ia bubua+ bona ia hahelagaia,* bona boubou patana bona ena kohu ibounai danu ia hahelagaia.+ Unai gaudia ia hahelagaia neganai,+ 2 Israela ena iduhu gunalaia taudia,+ edia bese kwaradia unai, ese boubou gaudia idia henia. Idia ese rejista gaukara idia naria. 3 Unai taudia ese Iehova vairanai edia boubou gaudia idia mailaia, treila 6 bona boromakau 12, treila ta be iduhu gunalaia taudia rua totona, bona boromakau ta be idia ta ta totona. Bona unai gaudia be palai dubu vairanai idia henia. 4 Iehova be Mose dekenai ia gwau: 5 “Idia amo unai gaudia oi abia dae, badina unai be hebou dubu ena hesiai gaukara totona do idia gaukaralaia, bona Levi taudia dekenai oi henia be namo, idia ta ta ena gaukara hegeregerena.”

6 Vadaeni Mose ese treila bona boromakau ia abia dae bona Levi taudia dekenai ia henia. 7 Ia ese treila rua bona boromakau 4 be Geresone ena bese taudia dekenai ia henia, edia gaukara hegeregerena.+ 8 Ia ese treila 4 bona boromakau 8 be Merari ena bese taudia dekenai ia henia, edia gaukara hegeregerena. Unai gaukara be hahelaga tauna Arona ena natuna, Itamara, ena hakaua henunai idia karaia.+ 9 To ia ese Kohata ena bese taudia dekenai gau ta ia henia lasi, badina idia be helaga gabuna ai idia gaukara+ bona helaga gaudia be edia pagana ai idia huaia.+

10 Boubou patana dekenai dehoro idia atoa bona hahelagaia* dinana ai,+ iduhu gunalaia taudia ese edia boubou gaudia idia henia. Iduhu gunalaia taudia be boubou patana vairanai edia boubou gaudia idia henia neganai, 11 Iehova be Mose dekenai ia gwau: “Dina ta ta ai iduhu gunalaia tauna ta ese ena boubou gauna do ia henia, boubou patana hahelagaia totona.”

12 Dina ginigunana ai ena boubou gaudia ia henia tauna be Nasona,+ ia be Aminadaba ena natuna, Iuda iduhu amo. 13 Iena boubou gaudia be inai: Siliva mereki ta, ena metau be 130 sikel* bona siliva disi ta, ena metau be 70 sikel, helaga gabuna ena sikel* amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 14 Bona golo kapusi* ta ena metau be 10 sikel, ia be bonana namo muramura amo ia honu, 15 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona,+ 16 nanigosi natuna ta, kara dika boubou totona,+ 17 bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Nasona ena boubou gaudia, ia be Aminadaba ena natuna mero.+

18 Dina iharuana ai, Suara ena natuna Netanele,+ Isakara iduhu ena gunalaia tauna unai, ese boubou gaudia ia henia. 19 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 20 Bona golo kapusi ta ena metau be 10 sikel, ia be bonana namo muramura amo ia honu, 21 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 22 Bona nanigosi natuna ta, kara dika boubou totona.+ 23 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Netanele ena boubou gaudia, ia be Suara ena natuna mero.

24 Dina ihatoina ai, Sebuluno ena bese taudia edia gunalaia tauna Eliaba+ ese ena boubou gaudia ia henia, ia be Helona ena natuna mero. 25 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 26 Bona golo kapusi ta ena metau be 10 sikel, ia be bonana namo muramura amo ia honu, 27 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 28 Bona nanigosi natuna ta, kara dika boubou totona.+ 29 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Eliaba+ ena boubou gaudia, ia be Helona ena natuna mero.

30 Dina namba 4 ai, Rubena ena bese taudia edia gunalaia tauna Elisuru+ ese ena boubou gaudia ia henia, ia be Sedeuru ena natuna mero. 31 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 32 Bona golo kapusi ta ena metau be 10 sikel, ia be bonana namo muramura amo ia honu, 33 boromakau natuna ta, mamoe tau ta, bona mamoe natuna mero ta, mauri lagani tamona gauna, gabua boubou totona.+ 34 Bona nanigosi natuna ta, kara dika boubou totona.+ 35 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Elisuru+ ena boubou gaudia, ia be Sedeuru ena natuna mero.

36 Dina namba 5 ai, Simeona ena bese taudia edia gunalaia tauna Selumiele+ ese ena boubou gaudia ia henia, ia be Surisadai ena natuna mero. 37 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 38 Bona golo kapusi ta ena metau be 10 sikel, ia be bonana namo muramura amo ia honu, 39 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 40 Bona nanigosi natuna ta, kara dika boubou totona.+ 41 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Selumiele+ ena boubou gaudia, ia be Surisadai ena natuna mero.

42 Dina namba 6 ai, Gado ena bese taudia edia gunalaia tauna Eliasapa+ ese boubou gaudia ia henia, ia be Deuele ena natuna. 43 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 44 Bona golo kapusi ta ena metau be 10 sikel, ia be bonana namo muramura amo ia honu, 45 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 46 Bona nanigosi natuna ta, kara dika boubou totona.+ 47 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Eliasapa+ ena boubou gaudia, ia be Deuele ena natuna mero.

48 Dina namba 7 ai, Eparaima ena bese taudia edia gunalaia tauna Elisama+ ese ena boubou gaudia ia henia, ia be Amihuda ena natuna. 49 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 50 Bona golo kapusi ta ena metau be 10 sikel, ia be bonana namo muramura amo ia honu, 51 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 52 Bona nanigosi natuna ta, kara dika boubou totona.+ 53 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Elisama+ ena boubou gaudia, ia be Amihuda ena natuna mero.

54 Dina namba 8 ai, Manase ena bese taudia edia gunalaia tauna Gamaliela+ ese ena boubou gaudia ia henia, ia be Pedasuru ena natuna mero. 55 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 56 Bona golo kapusi ta ena metau be 10 sikel, ia be bonana namo muramura amo ia honu, 57 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 58 Bona nanigosi natuna ta, kara dika boubou totona.+ 59 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Gamaliela+ ena boubou gaudia, ia be Pedasuru ena natuna mero.

60 Dina namba 9 ai, Beniamina ena bese taudia edia gunalaia tauna+ Abidana+ ese ena boubou gaudia ia henia, ia be Gideoni ena natuna mero. 61 Ia henia boubou gauna be siliva mereki ta, ena metau be 120 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 62 Bona golo kapusi ta ena metau be 10 sikel, ia be bonana namo muramura amo ia honu, 63 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 64 Bona nanigosi natuna ta, kara dika boubou totona.+ 65 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Abidana+ ena boubou gaudia, ia be Gideoni ena natuna mero.

66 Dina namba 10 ai, Dano ena bese taudia edia gunalaia tauna Ahiesere+ ese boubou gaudia ia henia, ia be Amisadai ena natuna mero. 67 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 68 Bona golo kapusi ta ena metau be 10 sikel, ia be bonana namo muramura amo ia honu, 69 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 70 Bona nanigosi natuna ta, kara dika boubou totona.+ 71 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Ahiesere+ ena boubou gaudia, ia be Amisadai ena natuna mero.

72 Dina namba 11 ai, Asere ena bese taudia edia gunalaia tauna Pagiele+ ese boubou gaudia ia henia, ia be Okarana ena natuna mero. 73 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 74 Bona golo kapusi ta ena metau be 10 sikel, ia be bonana namo muramura amo ia honu, 75 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 76 Bona nanigosi natuna ta, kara dika boubou totona.+ 77 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Pagiele+ ena boubou gaudia, ia be Okarana ena natuna mero.

78 Dina namba 12 ai, Napatali ena bese taudia edia gunalaia tauna Ahira+ ese boubou gaudia ia henia, ia be Enana ena natuna mero. 79 Ia henia boubou gaudia be siliva mereki ta, ena metau be 130 sikel bona siliva disi ta, ena metau be 70 sikel, helaga gabuna ena sikel amo idia hahetohoa.+ Idia be paraoa namona amo idia honu, unai paraoa be oela ida idia mikisia gauna, unai be aniani boubou totona.+ 80 Bona golo kapusi ta ena metau be 10 sikel, ia be bonana namo muramura amo ia honu, 81 boromakau natuna ta, mamoe tau ta, bona mamoe natuna mero ta, mauri lagani tamona gauna, unai be gabua boubou totona.+ 82 Bona nanigosi natuna ta, kara dika boubou totona.+ 83 Bona maino karaia boubou+ totona boromakau rua, mamoe tatau 5, nanigosi tatau 5, bona mamoe natudia memero 5, mauri lagani tamona gaudia. Unai be Ahira+ ena boubou gaudia, ia be Enana ena natuna mero.

84 Boubou patana dekenai dehoro idia atoa bona hahelagaia neganai,+ Israela ena iduhu gunalaia taudia ese idia mailaia harihari gaudia be inai: Siliva mereki 12, siliva disi 12, bona golo kapusi 12.+ 85 Siliva mereki ta ta ena metau be 130 sikel, bona siliva disi ta ta ena metau be 70 sikel, unai kohu edia siliva ibounai edia metau be 2,400 sikel, unai be helaga gabuna ena sikel amo idia hahetohoa.+ 86 Bona bonana namo muramura amo idia honu golo kapusi 12, idia ta ta edia metau be 10 sikel, helaga gabuna ena sikel amo idia hahetohoa, unai kapusi edia golo ena metau ibounai be 120 sikel. 87 Gabua boubou ena animal ibounai be boromakau 12, mamoe tatau 12, mamoe natudia memero 12, mauri lagani tamona gaudia, bona edia aniani bouboudia. Bona nanigosi natudia 12 be kara dika boubou totona. 88 Bona maino karaia boubou totona idia henia animal ibounai be boromakau 24, mamoe tatau 60, nanigosi tatau 60, bona mamoe natudia memero 60, mauri lagani tamona gaudia. Boubou patana dekenai dehoro idia atoa bona idia hahelagaia+ murinai, unai gaudia idia henia.+

89 Mose be palai ruma dekenai Dirava ida ia herevahereva totona ia vareai negadiai,+ Taravatu Maua ena koua gauna ena ataiai amo gado ta ia kamonai, unai gadona be ia ida ia herevahereva.+ Dirava be kerubi rua+ edia huana amo Mose ia hereva henia.

8 Iehova be Mose dekenai ia gwau: 2 “Arona oi hamaoroa, lamepa atoa gauna dekenai idia noho lamepa 7 ia gabua neganai, unai ese lamepa atoa gabuna ena vairana kahana ia hadiaria be namo.”+ 3 Vadaeni Arona be unai bamona ia karaia. Ia ese lamepa atoa gauna ena lamepa ia gabudia, lamepa atoa gauna ena vairana kahana hadiaria totona,+ Iehova ese Mose ia oda henia hegeregerena. 4 Lamepa atoa gauna be inai bamona idia karaia: Hama amo idia botaia golo amo idia karaia, ena badina amo ela bona ena flaoaflaoa.+ Iehova ese matahanai ai Mose dekenai ia hahedinaraia hegeregerena idia karaia.+

5 Iehova be Mose dekenai ma ia gwau: 6 “Israela taudia huana amo Levi taudia oi abia siri, bona idia oi hagoevaia.+ 7 Idia be inai bamona do oi hagoevaia: Kara dika hagoevaia ranuna be edia latanai sisina sisina oi negea lao mai, bona idia ese edia kopina huina ibounai be reisa amo idia sevia, edia dabua idia huria, bona sibona idia hagoevaia be namo.+ 8 Bena idia ese boromakau natuna+ bona aniani boubou+ do idia abia. Unai aniani boubou be oela ida idia mikisia paraoa namona. Bona oi ese boromakau natuna ma ta do oi abia, kara dika boubou totona.+ 9 Bona oi ese Levi taudia be hebou dubu ena vairanai do oi hakaua mai bona Israela taudia ibounai do oi haboua.+ 10 Levi taudia be Iehova vairanai oi henia neganai, Israela taudia ese edia imana be Levi taudia edia latanai do idia atoa.+ 11 Bona Arona ese Levi taudia be Iehova vairanai do ia henia,* davea boubou+ bamona Israela taudia amo, bona idia ese Iehova ena hesiai gaukara do idia karaia.+

12 “Bena Levi taudia ese edia imana be boromakau ruaosi edia kwarana latanai do idia atoa.+ Unai murinai, boromakau ta be kara dika boubou totona bona ma ta be gabua boubou totona Iehova dekenai do idia henia, Levi taudia edia kara dika davana karaia totona.+ 13 Bona oi ese Levi taudia be Arona bona ena natudia memero edia vairanai do oi haginia bona Iehova dekenai oi henia,* davea boubou bamona. 14 Oi ese Levi taudia be Israela taudia huana amo oi hapararaia, idia be lauegu.+ 15 Unai murinai, Levi taudia be hebou dubu lalonai do idia vareai hesiai gaukara idia karaia totona. Namona be unai dala ai idia oi hagoevaia bona do oi henia,* davea boubou bamona. 16 Badina Israela taudia edia huana amo idia be harihari gaudia bamona lau dekenai umui henia. Idia ese Israela taudia edia vara guna natudia ibounai edia gabu idia abia,+ lau ese idia do lau abia, idia be lauegu. 17 Badina Israela taudia huanai vara guna ibounai be lauegu, taunimanima bona animal.+ Lau ese guna Aigupito ai vara guna ibounai lau hamasea dinana ai, lau sibona totona idia lau hahelagaia.+ 18 Lau ese Levi taudia do lau abia, bona idia ese Israela taudia edia vara guna natudia ibounai edia gabu do idia abia. 19 Bona lau ese Israela taudia huana amo Levi taudia be harihari gaudia bamona Arona bona ena natudia dekenai do lau henia. Idia be hebou dubu dekenai Israela taudia totona hesiai gaukara do idia karaia+ bona idia totona kara dika davana karaia boubou do idia henia, unai amo Israela taudia be helaga gabuna kahirakahira idia lao neganai panisi do idia abia lasi.”+

20 Mose bona Arona bona Israela taudia ibounai be Levi taudia dekenai unai bamona idia karaia. Iehova ese Mose amo Levi taudia totona ia gwauraia oda hegeregerena. 21 Vadaeni Levi taudia be sibona idia hagoevaia bona edia dabua idia huria,+ unai murinai Arona ese idia be Iehova vairanai ia henia,* davea boubou bamona.+ Bena Arona be idia totona kara dika davana karaia boubou ia henia, unai amo idia goeva.+ 22 Unai murinai, Levi taudia be hebou dubu dekenai idia vareai hesiai gaukara idia karaia totona, Arona bona ena natudia edia hahekau henunai. Iehova ese Levi taudia totona Mose dekenai ia henia oda hegeregerena, idia dekenai unai bamona idia karaia.

23 Iehova be Mose dekenai ia gwau: 24 “Levi taudia ese inai do idia badinaia: Ena mauri lagani 25 bona unai lagani ia hanaia tauna ese hebou dubu lalonai hesiai gaukara do ia karaia matamaia. 25 To mauri lagani 50 ia abia murinai, namona be ena hesiai gaukara amo do ia doko, bona do ia karaia lou lasi. 26 Ia ese ena tadikakadia do ia durua, hebou dubu dekenai maduna idauidau idia huaia taudia unai, to ia be unuseniai hesiai gaukara do ia karaia lasi. Oi ese Levi taudia bona edia maduna idauidau be unai dala ai do oi naria.”+

9 Iehova be Sinai ena taunimanima lasi gabuna ai Mose ia hereva henia, unai be lagani iharuana ena hua ginigunana ai,+ Israela taudia ese Aigupito tanona idia rakatania murinai. Ia gwau: 2 “Namona be Israela taudia ese Pasova boubou+ be ena nega korikorina ai idia hegaegaelaia.+ 3 Inai hua ena dina namba 14 ena dina diho ai, Pasova boubou be ena nega korikorina ai do umui hegaegaelaia. Ena taravatu bona karaia dalana ibounai hegeregerena do umui hegaegaelaia.”+

4 Vadaeni Mose ese Israela taudia ia hamaoroa Pasova boubou idia hegaegaelaia totona. 5 Bena hua ginigunana ai, unai hua ena dina namba 14 ena dina diho ai, Sinai ena taunimanima lasi gabuna dekenai Pasova boubou idia hegaegaelaia. Iehova ese Mose ia oda henia hegeregerena, Israela taudia be unai bamona idia karaia.

6 Tatau haida be mase tauanina idia dogoatao dainai idia miro,+ unai dainai unai dina ai Pasova boubou idia hegaegaelaia diba lasi. Vadaeni unai dina ai, unai tatau idia lao bona Mose bona Arona vairanai idia gini,+ 7 bona idia gwau: “Ai be mase tauanina ai dogoatao dainai ai miro. To ai danu ai ura Israela taudia edia huana amo Iehova dekenai boubou gauna be ena nega korikorina ai do ai henia.”+ 8 Unai neganai Mose be idia dekenai ia gwau: “Unuseniai umui naria, bona Iehova ese umui totona do ia gwauraia herevana lau kamonai guna.”+

9 Bena Iehova be Mose dekenai ia gwau: 10 “Israela taudia oi hamaoroa, ‘Herevana umui eiava emui uru gabedia huana amo tau ta be mase tauanina ia dogoatao dainai ia miro+ eiava gabu daudau dekenai ia lao, namona be Iehova dekenai Pasova boubou ia hegaegaelaia. 11 Namona be hua iharuana+ ena dina namba 14 ena dina diho ai idia hegaegaelaia. Bona unai be isti lasi paraoa bona raurau idita ida idia ania be namo.+ 12 Namo lasi idia alaia mase animal ena turia ta idia hamakohia,+ bona namo lasi ena vamu sisina do idia rakatania ela bona dabai.+ Namona be Pasova ena taravatu ibounai hegeregerena boubou gauna idia hegaegaelaia. 13 Bema tau ta ia goeva bona ia be gabu ta dekenai ia lao lasi, to Pasova boubou ia hegaegaelaia lasi, unai tauna idia hamasea be namo,+ badina ia ese Iehova ena boubou gauna be nega korikorina ai ia henia lasi. Unai tauna be ena kara dika dainai do idia panisia.

14 “‘Bona bema idau tauna ta be umui ida ia noho, ia danu ese Iehova dekenai Pasova boubou ia hegaegaelaia be namo.+ Ia ese Pasova ena taravatu bona ena karaia dalana hegeregerena do ia hegaegaelaia.+ Umui ese taravatu tamona umui badinaia be namo, umui bona idau taudia danu.’”+

15 Palai dubu idia haginia dinana ai,+ ori ese palai dubu, Taravatu Maua ena palai ruma unai, ia koua to hanuaboi ai, ori be lahi bamona palai dubu ataiai ia noho ela bona dabai.+ 16 Nega ibounai unai bamona ia vara. Dina ai ori ese palai dubu ia koua, bona hanuaboi ai ori be lahi bamona ena ataiai ia noho.+ 17 Ori be palai rumana amo ia daekau neganai, Israela taudia be maoromaoro unai gabu idia rakatania,+ bona ori ia doko gabuna ai, Israela taudia be unuseniai idia kamepa.+ 18 Iehova ena oda hegeregerena Israela taudia be gabu idia rakatania, bona Iehova ena oda hegeregerena idia kamepa.+ Ori be palai dubu ataiai ia noho negadia ai, edia kamepa idia kokia lasi. 19 Ori be palai dubu ataiai dina momo lalonai ia noho negadia ai, Israela taudia ese Iehova idia kamonai henia bona gabu idia rakatania lasi.+ 20 Nega haida ori be dina haida lalonai palai dubu ataiai ia noho. Iehova ena oda hegeregerena edia kamepa do idia kokia lasi, bona Iehova ena oda hegeregerena gabu do idia rakatania. 21 Nega haida ori be dina ia diho negana sibona ai ia noho ela bona dabai, bena daba ai ori ia daekau neganai, idia be gabu idia rakatania. Ena be ori be dina ai eiava hanuaboi ai ia daekau, idia ese gabu idia rakatania.+ 22 Herevana dina rua, hua tamona, eiava nega daudau ori be palai dubu ataiai ia noho, to Israela taudia be edia kamepa idia kokia lasi bona gabu idia rakatania lasi. To ori ia daekau neganai, idia ese gabu idia rakatania. 23 Iehova ena oda hegeregerena idia kamepa, bona Iehova ena oda hegeregerena gabu idia rakatania. Idia ese edia maduna Iehova dekenai idia hagugurua, Iehova ese Mose amo ia henia oda hegeregerena.

10 Bena Iehova be Mose dekenai ia gwau: 2 “Oi sibona totona kibi rua oi karaia.+ Idia be hama amo idia botaia siliva amo do oi karaia, bona taunimanima boiria eiava kamepa kokia negadia ai, unai oi gaukaralaia be namo. 3 Kibi rua idia hiriria neganai, Israela taudia ibounai be oi dekenai do idia mai hebou dubu ena vareai gabuna ai.+ 4 Bema kibi tamona sibona idia hiriria, iduhu gunalaia taudia sibona be oi ida do idia hebou, idia be Israela taudia tausen momo idia gunalaia taudia.+

5 “Kibi regena ia daekau bona ia diho neganai, ist kahana ai idia kamepa taudia+ ese gabu idia rakatania be namo. 6 Bona nega iharuana ai kibi regena be ia daekau bona ia diho neganai, saut kahana ai idia kamepa taudia+ ese gabu idia rakatania be namo. Idia ta ta idia lao negadia ai, kibi be unai dala ai idia hiriria be namo.

7 “Taunimanima umui haboua neganai, kibi umui hiriria be namo,+ to ena rege be do ia daekau bona diho lasi. 8 Arona ena natudia, hahelaga taudia unai, ese kibi idia hiriria be namo,+ bona emui uru ibounai lalonai unai kibi taravatu do umui badinaia.

9 “Bema umui idia hahisia taudia ida emui tano ai umui tuari, namona be tuari ena kibi regena umui hiriria,+ bona lau, Iehova emui Dirava, ese umui do lau laloatao bona emui inai taudia amo umui do lau hamauria.

10 “Danu emui moale negadiai,+ hegeregere emui aria idauidau+ bona hua matamatadia ai, emui gabua boubou+ bona maino karaia boubou+ vairanai kibi do umui hiriridia, unai kibi regena dainai lau, emui Dirava, ese umui do lau laloatao. Lau be Iehova emui Dirava.”+

11 Lagani iharuana ai, hua iharuana ena dina namba 20 ai,+ ori be Palai Dubu ena ataiai amo ia daekau,+ unai Palai Dubu lalonai Taravatu Maua ia noho. 12 Vadaeni Israela taudia be Sinai ena taunimanima lasi gabuna idia rakatania matamaia, vaia gabu idia rakatania dalana hegeregerena,+ bena idia lao ela bona ori ia ginidae gabuna ai, unai be Parana ena taunimanima lasi gabuna dekenai.+ 13 Unai be edia nega ginigunana gabu idia rakatania, Iehova ese Mose amo ia henia oda hegeregerena.+

14 Iuda ena kamepa ena iduhu toi be gabu idia rakatania guna edia orea ta ta* hegeregerena, bona Aminadaba ena natuna Nasona+ be Iuda iduhu taudia ia gunalaia. 15 Isakara iduhu taudia be Suara ena natuna Netanele+ ese ia gunalaia. 16 Sebuluno iduhu taudia be Helona ena natuna Eliaba+ ese ia gunalaia.

17 Palai Dubu idia kokia neganai,+ Geresone bona Merari bese taudia,+ Palai Dubu huaia taudia unai, ese gabu idia rakatania.

18 Bena Rubena ena kamepa ena iduhu toi be gabu idia rakatania edia orea ta ta* hegeregerena, bona Sedeuru ena natuna Elisuru+ ese Rubena iduhu taudia ia gunalaia. 19 Simeona iduhu taudia be Surisadai ena natuna Selumiele+ ese ia gunalaia. 20 Gado iduhu taudia be Deuele ena natuna Eliasapa+ ese ia gunalaia.

21 Bena Kohata taudia ese gabu idia rakatania, idia be dubu helaga ena helaga gaudia huaia taudia.+ Bona idia ginidae negana ai, Palai Dubu be idia haginia vadaeni.

22 Bena Eparaima ena kamepa ena iduhu toi ese gabu idia rakatania edia orea ta ta* hegeregerena, bona Amihuda ena natuna Elisama+ ese Eparaima iduhu taudia ia gunalaia. 23 Manase iduhu taudia be Pedasuru ena natuna Gamaliela+ ese ia gunalaia. 24 Beniamina iduhu taudia be Gideoni ena natuna Abidana+ ese ia gunalaia.

25 Bena Dano ena kamepa ena iduhu toi ese gabu idia rakatania edia orea ta ta* hegeregerena bona iduhu ibounai edia murinai idia raka bona idia gimaia, bona Amisadai ena natuna Ahiesere+ ese Dano iduhu taudia ia gunalaia. 26 Asere iduhu taudia be Okarana ena natuna Pagiele+ ese ia gunalaia. 27 Napatali iduhu taudia be Enana ena natuna Ahira+ ese ia gunalaia. 28 Israela taudia bona edia orea ta ta* ese gabu idia rakatania neganai, idia ese unai dala idia badinaia.+

29 Bena Mose ese ena ravana Reuele,*+ Midiana tauna unai, ena natuna Hobaba dekenai ia gwau: “Ai be Iehova ese ia gwauraia tano dekenai ai lao noho. Dirava ia gwau: ‘Lau ese unai tano be umui dekenai do lau henia.’+ Mani ai ida oi mai+ bona oi do ai kara namo henia, badina Iehova ese Israela totona gau namodia ia gwauhamatalaia.”+ 30 To Mose dekenai ia gwau: “Do lau lao lasi. Lau be egu tano bona egu varavara dekenai do lau giroa lou.” 31 Bena Mose ia gwau: “Mani ai oi rakatania lasi, badina taunimanima lasi gabuna ai kamepa gabudia oi diba bona oi be emai hakaua tauna* ai oi lao diba. 32 Bona bema ai ida oi mai,+ Iehova ese ai dekenai ia hahedinaraia gau namodia be oi dekenai do ai hahedinaraia.”

33 Vadaeni idia be Iehova ena ororo idia rakatania,+ unai be dina toi ena laolao. Bona unai dina toi lalonai Iehova ena Taravatu Maua danu be idia vairanai idia huaia lao,+ edia laga-ani gabuna tahua totona.+ 34 Bona kamepa idia kokia bona idia lao negadia ai, Iehova ena ori+ ese dina ai idia ia hakaua.

35 Idia ese Taravatu Maua idia abia lao negadia ai, Mose do ia gwau: “Iehova e, mani oi toreisi+ bona emu inai taudia oi lulua lao bona oi idia inai henia taudia be oi vairanai idia heau boio.” 36 Bona Taravatu Maua idia atoa diho neganai, Mose ia gwau: “Iehova e, mani Israela taudia tausen momo dekenai oi giroa lou.”+

11 Vadaeni taunimanima be edia noho dalana dainai Iehova vairanai idia maumau bada. Iehova ese unai ia kamonai neganai, ia badu momokani, bona Iehova ese idia latanai lahi ia siaia bona kamepa ena murimuri ai idia noho taudia haida ia gabua ore. 2 Vadaeni taunimanima be heduru totona Mose dekenai idia noinoi, bena Mose be Iehova dekenai ia guriguri+ bona lahi ia bodo. 3 Unai dainai unai gabu ena ladana idia gwauraia Tabera,* badina Iehova ena lahi be idia latanai ia diho.+

4 Idia huanai idia noho bese idauidau taudia+ be aniani totona idia mataganigani matamaia,+ bona Israela taudia danu idia taitai matamaia lou, idia gwau: “Daika ese ai dekenai vamu do ia henia ai ania totona?+ 5 Mai moale ida ai laloatao, ai be Aigupito dekenai ai noho neganai, gwarume ai ania davana lasi, kiukamba, meloni, oniani, bona galiki danu!+ 6 To hari emai goada ia ore ia lao noho. Bona gau ta ai itaia lasi, to mana sibona.”+

7 Mana+ be korienda* uhena bamona+ bona ena toana be bedolaka* bamona. 8 Taunimanima ese mana idia gogoa bona witi moia nadi amo idia moia eiava nadi disi lalonai idia botaia. Bena pani lalonai idia nadua eiava paraoa kuboruna idia karaia,+ bona ia be oela ida idia karaia keke bamona, mai ena digara. 9 Hanuaboi ai daba paripari be kamepa latanai ia diho neganai, mana danu be unuseni ia diho.+

10 Mose ia kamonai famili ibounai lalonai taunimanima idia taitai, idia ta ta be edia palai ruma ena vairanai idia gini. Bona Iehova be ia badu momokani,+ bona Mose danu ia lalohisihisi bada. 11 Bena Mose be Iehova dekenai ia gwau: “Dahaka dainai lau, emu hesiai tauna oi hahisia? Dahaka dainai lau oi lalonamo henia lasi bona inai taunimanima ibounai edia metau be lau dekenai oi atoa?+ 12 Lau be inai taunimanima ibounai edia sinana, a? Lau ese idia lau havaraia, a? Unai dainai lau oi hamaoroa, ‘naria tauna ese natuna maragina ia huaia bamona, idia do lau huaia’ ela bona edia sene taudia dekenai oi gwauhamatalaia tanona dekenai, a?+ 13 Lau ese vamu be edeseni amo do lau abia inai taudia ibounai dekenai lau henia totona? Badina idia be lau vairanai idia taitai noho, idia gwau, ‘Ai dekenai vamu oi henia ai ania totona!’ 14 Lau sibona ese inai taunimanima ibounai lau naria diba lasi, lau dekenai inai be maduna metauna.+ 15 Bema lau be inai bamona do oi kara henia, mani harihari lau oi hamasea.+ To, bema lau oi lalonamo henia, mani inai hisihisi lau itaia lasi be namo.”

16 Bena Iehova ese Mose ia hamaoroa: “Israela ena tau badadia amo tatau 70, oi dekenai idia be tau badadia bona taunimanima edia gunalaia taudia unai,+ be lau totona oi haboudia. Bona hebou dubu dekenai idia oi hakaua lao bona oi danu do idia gini hebou. 17 Do lau diho mai+ bona unuseniai oi do lau hereva henia.+ Bona oi dekenai lau henia lauma helaga ena siahu haida do lau kokia+ bona idia dekenai do lau henia, bona idia ese oi do idia durua taunimanima edia metau idia huaia totona, unai amo unai metau be oi sibona ese do oi huaia lasi.+ 18 Namona be taunimanima dekenai oi gwau, ‘Kerukeru totona umui sibona do umui hahelagaia,+ umui be vamu do umui ania, badina umui be Iehova vairanai umui taitai,+ umui gwau: “Daika ese ai dekenai vamu do ia henia ai ania totona? Aigupito dekenai emai noho be ia namo.”+ Iehova ese umui dekenai vamu do ia henia momokani, bona do umui ania.+ 19 Umui ese vamu do umui ania, to dina tamona, eiava dina rua eiava dina 5 eiava dina 10 eiava dina 20 lalonai lasi, 20 to hua tamona lalonai do umui ania, ela bona emui udu baubau amo do ia raka-lasi bona do umui inai henia,+ badina umui huanai ia noho Dirava, Iehova umui dadaraia, bona ia vairanai umui taitai, umui gwau: “Dahaka dainai ai be Aigupito amo ai raka-lasi?”’”+

21 Bena Mose ia gwau: “Lau be idia raka tatau 600,000 huanai,+ to oi gwau ‘Idia dekenai vamu do lau henia, bona hua tamona lalonai do idia ania’! 22 Bema boromakau bona mamoe ibounai idia alaia, unai be do ia hegeregere idia totona, a? Eiava bema davara ena gwarume ibounai idia abia, unai be idia totona do ia hegeregere, a?”

23 Bena Iehova be Mose dekenai ia gwau: “Iehova ena imana be ia kwadogi, a?+ Vadaeni do oi itaia bema hari lau herevalaia gaudia do idia momokani eiava lasi.”

24 Vadaeni Mose ia raka-lasi bona Iehova ena hereva be taunimanima dekenai ia gwauraia. Bena ia ese Israela taudia edia tau badadia amo tatau 70 ia haboua, bona idia ia hamaoroa palai ruma idia gini hagegea totona.+ 25 Bena Iehova be ori lalonai ia diho+ bona Mose ia hereva henia+ bona ia dekenai ia henia lauma helaga ena siahu haida ia kokia+ bona unai tau badadia 70 ta ta dekenai ia henia. Bona unai siahu idia abia neganai, idia be peroveta taudia bamona idia kara matamaia,*+ to gabeai unai idia karaia lou lasi.

26 Unai tau badadia amo rua be kamepa lalonai idia do noho, idia be Eledada bona Medada. Bona Dirava ena lauma be edia latanai ia diho, badina edia ladana be tau badadia edia lista ai ia noho, to idia be palai ruma dekenai idia lao lasi. Vadaeni kamepa lalonai idia be peroveta taudia bamona idia kara matamaia. 27 Bona tau matamata ta ia heau lao bona Mose dekenai ia gwau: “Eledada bona Medada be kamepa lalonai peroveta taudia bamona idia kara noho!” 28 Bena Nunu ena natuna Iosua,+ ia be ena matamata negana amo Mose ena hesiai gaukara ia karaia tauna, ia gwau: “Egu lohia Mose e, idia oi koua!”+ 29 To Mose be ia dekenai ia gwau: “Oi laloa unai ese lau do ia hahekwakwanaia, a? Lasi, unai bamona oi laloa lasi, lau ura Iehova ena taunimanima ibounai be peroveta taudia bona Iehova ese ena lauma be idia latanai ia atoa!” 30 Gabeai Mose be Israela ena tau badadia ida kamepa dekenai ia giroa lou.

31 Bena lai ta be Iehova amo ia mai bona kibi manudia be davara amo ia odaia lao bona kamepa dekenai idia diho,+ bona 2 kiubit* bamona tano ena ataiai idia roho, kamepa ena gabu ibounai dekenai. Bona idia koua gabu ena bada be dina ta ena laolao bamona, kamepa ena kahana ta amo ela bona ena kahana ma ta dekenai. 32 Vadaeni unai dina bona hanuaboi ibounai bona murina dinana ibounai lalonai, taunimanima idia laga-ani lasi, to kibi manu idia gogoa noho. Idia ta ta ese idia gogoa kibi manu ena momo be 10 homa* ia hanaia, bona kamepa ena gabu ibounai dekenai idia atoa, idia kaukau totona. 33 To vamu be edia isena huanai ia noho bona idia do ania lasi neganai, Iehova ena badu mai siahuna be idia latanai ia diho bona Iehova ese gorere ta amo idia momo herea ia hamasea.+

34 Vadaeni unai gabu ena ladana idia hatoa Kibiroto-hatava,*+ badina unuseniai aniani totona idia mataganigani taudia idia guria.+ 35 Vadaeni idia ese Kibiroto-hatava idia rakatania bona Haseroto dekenai idia lao, bona unuseniai idia noho.+

12 Miriama bona Arona be Mose dekenai idia maumau, badina ia ese Kusu hahine ia adavaia.+ 2 Idia gwau: “Iehova be Mose sibona amo ia hereva, a? Ia be ai amo ia hereva lasi, a?”+ Bona Iehova be ia kamonai noho.+ 3 Tanobada ai idia noho taudia ibounai amo, Mose be manau tauna momokani.+

4 Vadaeni Iehova be maoromaoro Mose, Arona, bona Miriama dekenai ia gwau: “Umui toiosi umui raka-lasi bona hebou dubu dekenai umui lao.” Vadaeni idia toiosi idia lao. 5 Bona Iehova be ori amo ia diho+ bona palai ruma ena vareai gabuna ai ia gini bena Arona bona Miriama ia boiria. Bona idia ruaosi idia raka lao. 6 Bena idia dekenai ia gwau: “Mani egu hereva umui kamonai. Bema lau, Iehova, egu peroveta tauna ta be umui huanai ia noho, lau ese matahanai ta amo lau sibona be ia dekenai do lau hahedinaraia,+ bona nihi lalonai ia do lau hereva henia.+ 7 To egu hesiai tauna Mose dekenai unai bamona lau karaia lasi! Ia dekenai maduna lau henia egu taunimanima ibounai ia naria totona.*+ 8 Mose lau hereva henia, tau ta ese ma ta ia hereva henia bamona.+ Lau herevalaia gaudia be ia lalopararalaia diba bona ia ese lau Iehova, egu noho ena toana ia itaia. Dahaka dainai umui gari lasi egu hesiai tauna Mose umui maumauraia totona?”

9 Vadaeni Iehova be idia dekenai ia badu momokani, bona idia ia rakatania. 10 Ori be palai ruma ena ataiai amo ia siri bona Miriama ese lepera gorere ia abia, ena kopina be ia kurokuro, sinou bamona.+ Arona be Miriama dekenai ia giroa neganai, ia itaia Miriama be lepera gorere ia abia.+ 11 Maoromaoro Arona be Mose dekenai ia gwau: “Egu lohia e, oi lau noinoi henia, inai kara dika dainai mani ai oi panisia lasi! Emai kara amo ai hahedinaraia ai be ai kavakava. 12 Mani Miriama oi durua, namo lasi bogana lalonai ia mase beibi ta bamona ia noho, ena tauanina kahana ia bodaga!” 13 Bona Mose be Iehova dekenai ia boiboi, ia gwau: “Dirava e, mani emu kara ena gorere oi hanamoa!”+

14 Iehova be Mose dekenai ia gwau: “Bema ena tamana ese ena vairana ia kanudia, ia be dina 7 lalonai do ia hemarai, ani? Namona be dina 7 lalonai ia be ma haida amo idia atoa siri, kamepa ena murimuri ai,+ to unai murinai ia idia hakaua vareai lou diba.” 15 Vadaeni Miriama be dina 7 lalonai ma haida amo idia atoa siri, kamepa ena murimuri ai,+ bona taunimanima ese gabu idia rakatania lasi ela bona Miriama idia hakaua vareai lou. 16 Bena taunimanima ese Haseroto+ idia rakatania bena idia lao, bona Parana ena taunimanima lasi gabuna ai idia noho matamaia.+

13 Iehova be Mose dekenai ia gwau: 2 “Tatau haida do oi siaia Kanana idia spai totona, unai tano be Israela taudia dekenai do lau henia. Iduhu ta ta amo iduhu gunalaia tauna ta do oi siaia.”+

3 Vadaeni Iehova ena oda hegeregerena, Mose ese Parana ena taunimanima lasi gabuna+ amo unai tatau ia siaia lao. Idia ibounai be Israela taudia edia kwarana taudia. 4 Edia ladana be inai: Rubena iduhu amo be Samua, ia be Sakuru ena natuna. 5 Simeona iduhu amo be Sapata, ia be Hori ena natuna. 6 Iuda iduhu amo be Kaleba,+ ia be Iepune ena natuna. 7 Isakara iduhu amo be Igala, ia be Iosepa ena natuna. 8 Eparaima iduhu amo be Hosahea,+ ia be Nunu ena natuna. 9 Beniamina iduhu amo be Paliti, ia be Rapu ena natuna. 10 Sebuluno iduhu amo be Gadiela, ia be Sodi ena natuna. 11 Iosepa iduhu+ amo, Manase iduhu+ totona, Gadidi idia abia hidi, ia be Susi ena natuna. 12 Dano iduhu amo be Amiele, ia be Gemali ena natuna. 13 Asere iduhu amo be Seturu, ia be Mikaela ena natuna. 14 Napatali iduhu amo be Nabi, ia be Vopisi ena natuna. 15 Gado iduhu amo be Gevele, ia be Maki ena natuna. 16 Mose ese unai tatau ia siaia tano idia spai totona. Bona Mose ese Hosahea dekenai inai ladana Iosua*+ ia henia, ia be Nunu ena natuna.

17 Mose ese idia ia siaia Kanana tano do idia spai neganai, idia dekenai ia gwau: “Inai dala amo Negebe dekenai umui daekau lao, bena ororo gabudia dekenai umui lao.+ 18 Namona be umui itaia ia be edena bamona tano,+ bona unai tano taudia be idia goada eiava idia manoka, idia be momo eiava lasi. 19 Bona tano be ia namo eiava ia dika, bona idia noholaia siti be mai ena magu aukadia eiava lasi. 20 Danu, umui itaia bema tano ese anina namona ia havaraia eiava lasi,+ bona bema tano dekenai au idia tubu eiava lasi. Namona be umui gari lasi+ bona tano ena huahua haida umui abia.” Unai nega be greips ginigunadia idia mage negana.+

21 Vadaeni idia lao bona tano idia itaia, Seni ena taunimanima lasi gabuna+ amo ia lao Rehoba,+ Lebo-hamata*+ kahirakahira. 22 Negebe dekenai idia daekau lao bona Heberona+ dekenai idia ginidae, unuseniai Ahimana, Sesai, bona Talamai besedia idia noho,+ idia be Anakima taudia.+ Aigupito ena siti Soana idia do haginia lasi neganai, Heberona be lagani 7 gunanai idia haginia vadaeni. 23 Esakolo Koura+ dekenai idia ginidae neganai, idia ese greips ena rigi tamona idia utua, bena tatau rua ese au ta dekenai idia atoa bona idia huaia, bona pomogranet* bona fig huahua haida idia abia danu.+ 24 Unai gabu idia gwauraia Esakolo* Koura,+ badina unuseniai Israela taudia ese greips mai ena rigi idia utua.

25 Unai tano idia spai bena dina 40 idia ore murinai idia giroa lou.+ 26 Vadaeni Mose bona Arona bona Israela taudia ibounai dekenai idia giroa lou, unai be Parana ena taunimanima lasi gabuna, Kadesi dekenai.+ Idia ese unuseniai idia noho taudia ibounai dekenai sivarai idia gwauraia bona idia dekenai unai tano ena huahua idia hahedinaraia. 27 Mose dekenai idia gwau: “Ai oi siaia tanona dekenai ai vareai, bona momokani unai tano be milika bona hani amo ia honu,+ bona unai tano ena huahua be inai.+ 28 To, unai tano dekenai idia noho taudia be goada taudia, bona edia siti mai magu aukadia be bada herea. Unuseniai Anakima taudia ai itaia danu.+ 29 Amaleka taudia+ be Negebe tanona ai idia noho,+ bona Hiti taudia, Iebusu taudia,+ bona Amoro taudia+ be ororo gabudia ai idia noho, bona Kanana taudia+ be davara kahirakahira bona Ioridane badinai idia noho.”+

30 Bena Kaleba ese Mose vairanai idia gini taudia edia hereva ia koua toho, ia gwau: “Namona be harihari ita daekau lao, bona unai tano do ita abia momokani, badina idia ita halusia diba.”+ 31 To ia danu idia daekau lao tatau idia gwau: “Ai be unai taudia ai tuari henia diba lasi, badina edia goada ese emai goada ia hereaia.”+ 32 Bona idia spai henia tanona ena sivarai dikana be Israela taudia dekenai idia gwauraia noho,+ idia gwau: “Ai spai tanona ese ena taunimanima ia hadikaia, bona unai gabu dekenai ai itaia taudia ibounai be tatau bada hereadia.+ 33 Bona unuseniai taunimanima badadia ai itaia, Anaki taudia,+ idia be Nefilim taudia* amo. Bona ai laloa edia matana dekenai ai be kwadi bamona, bona idia danu unai bamona idia laloa.”

14 Unai neganai taunimanima idia taitai bona edia gadona idia habadaia, bona hanuaboi ibounai lalonai idia taitai badabada.+ 2 Israela taudia ibounai be Mose bona Arona idia maumauraia matamaia,+ bona idia ibounai ese idia ruaosi idia gwau henia, idia gwau: “Bema guna Aigupito tanona dekenai eiava inai taunimanima lasi gabuna dekenai ai mase be namo! 3 Dahaka dainai Iehova ese inai tano dekenai ai ia hakaua lao tuari kaia amo ai mase totona?+ Emai hahine bona natudia be ai amo do idia kokia.+ Aigupito dekenai ai giroa lou be namo, ani?”+ 4 Danu idia be ta ta dekenai idia gwau: “Namona be gunalaia tauna ta ita abia hidi bona Aigupito dekenai ita giroa lou!”+

5 Vadaeni Mose bona Arona be idia haboua Israela taudia ibounai vairanai idia tui diho, bona edia kwarana be tano dekenai idia atoa. 6 Nunu ena natuna Iosua+ bona Iepune ena natuna Kaleba+ ese edia dabua idia darea, idia danu be tano spai totona idia lao taudia, 7 bona Israela taudia ibounai dekenai idia gwau: “Ai spai henia tano be tano namo herea.+ 8 Bema Iehova be ita dekenai ia moale, ia ese unai tano dekenai ita do ia hakaua vareai bona ita dekenai unai tano do ia henia, ia be milika bona hani amo ia honu.+ 9 To Iehova umui gwau-edeede henia lasi, bona unai tano taudia umui gari henia lasi,+ badina ita ese idia do ita halusia. Idia ia gimaia tauna ta be lasi, to Iehova be ita ida ia noho.+ Idia umui gari henia lasi.”

10 To, unuseni idia noho taudia ibounai idia ura idia ruaosi be nadi amo idia hodoa.+ To Iehova ena hairai be palai dubu latanai ia hedinarai, Israela taudia ibounai dekenai.+

11 Bena Iehova be Mose dekenai ia gwau: “Inai taunimanima ese lau do idia matauraia lasi ela bona edena negai?+ Ena be edia huanai toa momo lau hahedinaraia, to lau do idia abidadama henia lasi ela bona edena negai?+ 12 Idia dekenai gorere dikana do lau henia bona do lau hadikadia ore, bona oi be bese badana bona goadana ai do lau halaoa bona idia do oi hereaia.”+

13 To Mose be Iehova dekenai ia gwau: “Guna oi ese Aigupito taudia huana amo inai taudia be mai siahu ida oi hakaua raka-lasi. Vadaeni Aigupito taudia ese inai sivarai do idia kamonai,+ 14 bona idia ese inai tano taudia dekenai unai sivarai do idia gwauraia. Idia danu be idia kamonai oi, Iehova, be inai taunimanima huanai oi noho+ bona idia dekenai oi hedinarai.*+ Oi be Iehova, oiemu ori be edia kamepa ataiai ia noho, bona dina ai ori amo edia vairanai oi lao bona hanuaboi ai lahi amo idia oi hakaua.+ 15 Bema inai taunimanima ibounai be nega tamona* oi hamasea, oi karaia gaudia edia sivarai idia kamonai besedia do idia gwau: 16 ‘Iehova be ia hegeregere lasi inai taunimanima be ia gwauhamatalaia tanona dekenai ia hakaua lao, unai dainai taunimanima lasi gabuna ai idia ia hamasea.’+ 17 Vadaeni Iehova e, oi gwauhamata hegeregerena mani emu siahu badana oi hahedinaraia, badina oi gwau: 18 ‘Iehova be ia badu haraga lasi, ena lalokau* be bada herea,+ kerere bona kara dika ia gwauatao, to ia kerere momokani tauna do ia panisia, bona tamadia edia kerere dainai natudia do ia panisia, edia uru ihatoina bona uru namba 4 danu.’+ 19 Emu lalokau* hegeregerena, mani inai taudia edia kerere oi gwauatao, Aigupito amo ema bona hari edia kerere oi gwauatao hegeregerena.”+

20 Bena Iehova ia gwau: “Emu hereva hegeregerena edia dika lau gwauatao.+ 21 To lau mauri noho hegeregerena, tanobada ibounai be Iehova ena hairai ese do ia hahonua.+ 22 To, Aigupito ai bona taunimanima lasi gabuna ai egu hairai bona toa karadia idia itaia,+ to lau idia do tohoa noho*+ bona egu hereva idia kamonai lasi taudia ibounai+ 23 ese edia tamadia dekenai lau gwauhamatalaia tanona do idia itaia lasi. Oibe, mai hemataurai lasi ida lau idia kara henia taudia ese unai tano do idia itaia lasi.+ 24 To egu hesiai tauna Kaleba+ ena laloa dalana be idau, ia be mai kudouna ibounai ida lau ia badinaia noho, unai dainai ia lao vadaeni tanona dekenai ia do lau hakaua vareai bona ena bese taudia ese unai tano do idia abia.+ 25 Amaleka taudia bona Kanana taudia+ be koura dekenai idia noho dainai, namona be kerukeru umui giroa lou bona Davara Kakakaka ena dala amo taunimanima lasi gabuna dekenai umui lao.”+

26 Bena Iehova be Mose bona Arona dekenai ia gwau: 27 “Inai orea dikana ese lau do idia maumauraia ela bona edena negai?+ Israela taudia be lau dainai idia gwauraia maumau herevadia lau kamonai vadaeni.+ 28 Idia oi hamaoroa, ‘Iehova ia gwau, “Lau mauri noho hegeregerena, umui hereva gauna be do lau karaia!+ 29 Umui, idia rejista mauri lagani 20 bona unai lagani idia hanaia taudia, lau dekenai umui maumau taudia ibounai,+ be inai taunimanima lasi gabuna ai do umui mase ore.+ 30 Umui ta be lau gwauhamatalaia* tanona dekenai do ia vareai lasi,+ to Iepune ena natuna Kaleba bona Nunu ena natuna Iosua sibona do idia vareai.+

31 “‘“Bona lau ese emui natudia, umui gwau umui amo do idia kokia natudia unai, do lau hakaua lao+ bona umui dadaraia tanona do idia itaia.+ 32 To umui be inai taunimanima lasi gabuna ai do umui mase ore. 33 Lagani 40 lalonai emui natudia be taunimanima lasi gabuna ai edia mamoe do idia hakaua loaloa,+ bona emui abidadama lasi karadia* dainai davana do idia abia, ela bona umui ibounai be taunimanima lasi gabuna ai umui mase ore.+ 34 Dina 40 lalonai+ gwauhamata tanona umui spai henia hegeregerena, lagani 40 lalonai emui kerere davana do umui abia, dina ta be lagani ta, dina ta be lagani ta, unai amo lau umui inai henia karana* ese ia havaraia dika do umui diba.+

35 “‘“Lau Iehova be lau hereva vadaeni. Inai orea dikana, lau idia inai henia taudia, dekenai inai do lau karaia: Idia be taunimanima lasi gabuna ai do idia mase ore.+ 36 To unai tatau, guna Mose ese tano spai totona ia siaia tatau be idia giroa lou bona tano dainai sivarai dikana idia gwauraia, unai amo taunimanima ibounai idia doria Mose idia maumauraia totona.+ 37 Unai tano dainai sivarai dikana idia gwauraia tatau be panisi do idia abia bona Iehova vairanai do idia mase.+ 38 To unai tano spai taudia huanai idia noho tatau rua, Nunu ena natuna Iosua bona Iepune ena natuna Kaleba be do idia mauri noho.”’”+

39 Mose ese unai hereva be Israela taudia ibounai dekenai ia gwauraia neganai, idia taitai bada matamaia. 40 Danu, daba momokani idia toreisi bona idia ura ororo ena ataiai dekenai idia daekau, idia gwau: “Ai hegaegae vadaeni Iehova ese ia herevalaia gabuna dekenai ai daekau totona, badina ai kara dika vadaeni.”+ 41 To Mose ia gwau: “Dahaka dainai Iehova ena oda herevana umui badinaia lasi? Do umui kwalimu lasi. 42 Umui daekau lao lasi, badina Iehova be umui ida ia noho lasi, bona emui inai taudia ese umui do idia halusia.+ 43 Badina Amaleka taudia bona Kanana taudia be emui vairanai idia noho,+ bona tuari kaia dekenai do umui mase. Iehova ena hereva umui badinaia lasi dainai, Iehova be umui ida do ia noho lasi.”+

44 To idia hekokoroku bona ororo ataiai idia daekau,+ to Mose be kamepa ena huanai ia noho, Iehova ena Taravatu Maua danu.+ 45 Bena ororo ai idia noho Amaleka taudia bona Kanana taudia idia diho mai bona Israela taudia idia tuari henia bona idia lulua lao ela bona Horoma dekenai.+

15 Iehova be Mose dekenai ma ia gwau: 2 “Israela taudia oi hamaoroa, ‘Umui dekenai do lau henia tanona dekenai umui ginidae neganai,+ 3 boromakau eiava mamoe orea amo animal ta be lahi boubou totona umui henia Iehova dekenai, herevana ia be gabua boubou+ eiava gwauhamata ta hagugurua totona eiava harihari boubou+ eiava aria negadiai umui henia boubou,+ to unai boubou be Iehova dekenai bonana namo gaudia ai idia lao totona,+ 4 namona be boubou gauna ia henia tauna ese Iehova dekenai aniani boubou ia henia danu, unai be paraoa namona+ ifa ta ena 10 pesen* bona oela hin ta* ida ia mikisia gauna. 5 Danu, hin ta ena 25 pesen wain be boubou totona umui henia be namo, unai be gabua boubou+ ida eiava mamoe natuna mero ta ida do umui henia. 6 Eiava mamoe tau totona aniani boubou umui henia be namo, unai be paraoa namona ifa ta ena 20 pesen bona oela hin ta ena 33 pesen ida umui mikisia gauna. 7 Bona hin ta ena 33 pesen wain do umui henia boubou totona, unai be bonana namo gauna Iehova dekenai.

8 “‘To bema boromakau tau ta be lahi boubou+ totona eiava gwauhamata ta hagugurua totona+ eiava maino karaia totona umui henia Iehova dekenai,+ 9 namona be unai boromakau ida aniani boubou umui henia,+ unai be paraoa namona ifa ta ena 30 pesen bona oela hin ta ena 50 pesen ida umui mikisia gauna. 10 Danu, namona be hin ta ena 50 pesen wain be wain boubou totona umui henia,+ bona lahi ai umui bouboulaia, unai be bonana namo gauna Iehova dekenai. 11 Namona be boromakau ta, eiava mamoe tau ta, eiava mamoe natudia memero ta ta, eiava nanigosi tatau totona unai bamona do umui karaia. 12 Do umui bouboulaia animal edia namba hegeregerena, unai animal ta ta totona unai bamona do umui karaia. 13 Israela taudia ta ta be inai dala ai lahi boubou ia henia be namo, unai be bonana namona gauna Iehova dekenai.

14 “‘Bema idau tauna ta be umui ida ia noho eiava ta be nega daudau lalonai umui huanai ia noho, bema ia ura, ia ese lahi boubou ia henia danu, unai be bonana namo gauna Iehova dekenai, umui karaia bamona ia karaia be namo.+ 15 Umui bona umui ida ia noho idau tauna totona taravatu be tamona. Emui uru ibounai lalonai unai be noho daudau taravatu. Iehova vairanai, idau tauna be oi ida ia hegeregere.+ 16 Namona be umui bona umui ida ia noho idau tauna totona taravatu be tamona bona hahemaoro hereva be tamona.’”

17 Iehova be Mose dekenai ma ia gwau: 18 “Israela taudia oi hamaoroa, ‘Umui lau hakaua lao tanona dekenai umui ginidae 19 bona unai tano ena paraoa* umui ania neganai,+ namona be Iehova dekenai harihari gauna umui henia. 20 Namona be emui witi anina ginigunadia+ amo umui karaia rini bamona paraoa umui henia. Witi kwadia gabuna amo umui henia harihari gauna ena henia dalana hegeregerena umui henia. 21 Emui uru ibounai lalonai, emui witi anina ginigunadia haida be Iehova dekenai harihari gaudia bamona umui henia be namo.

22 “‘Bema umui kerere bona Iehova ese Mose amo ia henia oda hereva ibounai umui badinaia lasi, 23 oibe, Iehova ese Mose amo umui bona gabeai do idia mai uru totona ia henia oda herevana umui badinaia lasi, Iehova ese ia henia dinana amo ela bona gabeai do idia mai uru edia nega ai danu, 24 bona bema umui diba lasi dainai umui kerere, namona be umui ese boromakau natuna umui henia, gabua boubou totona, unai be bonana namo gauna Iehova dekenai, bona ena aniani boubou bona wain boubou ida umui henia, hanaihanai umui henia dalana hegeregerena,+ bona nanigosi natuna mero ta be kara dika boubou bamona umui henia.+ 25 Hahelaga tauna ese Israela taudia ibounai totona kara dika davana karaia boubou do ia henia, bona Dirava ese edia kara dika do ia gwauatao,+ badina idia diba lasi bona unai idia karaia. Vadaeni Iehova dekenai lahi boubou bona edia kerere dainai Iehova vairanai kara dika boubou idia mailaia. 26 Dirava ese Israela taudia ibounai bona edia huanai ia noho idau tauna ena kerere do ia gwauatao, badina idia ibounai be idia laloa lasi dainai unai kerere idia karaia.

27 “‘Bema ta ia laloa lasi dainai ia kara dika, vadaeni namona be nanigosi hahine, mauri lagani tamona, be kara dika boubou totona ia henia.+ 28 Bona unai tauna ia laloa lasi bona Iehova vairanai ia kara dika dainai, hahelaga tauna ese ia totona kara dika davana karaia boubou do ia henia, unai be ena kara dika davana karaia boubou, bona Dirava ese ena kara dika do ia gwauatao.+ 29 Bema Israela taudia eiava edia huanai ia noho idau tauna be ia laloa lasi dainai kara dika ta ia karaia, do idia badinaia taravatu be tamona.+

30 “‘To bema ta be mai ena ura ida ia kara dika,+ herevana ia be Israela tauna eiava idau tauna, ia be Iehova ena ladana ia hadikaia dainai, ia idia hamasea be namo. 31 Ia ese Iehova ena hereva ia dadaraia bona ena oda hereva ia badinaia lasi dainai, ia idia hamasea be namo.+ Ia ese sibona ena kerere davana do ia abia.’”+

32 Israela taudia be taunimanima lasi gabuna ai idia noho lalonai, tau ta idia davaria ia be Sabati dinana ai lahi au ia gogoa noho.+ 33 Unai tauna idia davaria taudia ese ia be Mose bona Arona bona idia hebou taudia ibounai dekenai idia hakaua lao. 34 Idia ese unai tauna idia ruhaia lasi,+ badina taravatu ese ia hahedinaraia lasi ia dekenai dahaka do idia karaia.

35 Bena Iehova be Mose dekenai ia gwau: “Inai tauna umui hamasea be namo,+ bona idia hebou taudia ese ia be kamepa ena murimuri ai nadi amo idia hodoa mase be namo.”+ 36 Vadaeni idia hebou taudia ibounai ese unai tauna be kamepa ena murimuri ai idia hakaua lao bona nadi amo idia hodoa mase, Iehova ese Mose ia oda henia hegeregerena.

37 Iehova be Mose dekenai ma ia gwau: 38 “Israela taudia oi hamaoroa, namona be edia dabua ena dorina ai herahera gaudia do idia turia, unai do idia karaia edia uru ibounai lalonai, bona unai herahera gaudia edia ataiai bulu varo do idia turia.+ 39 ‘Vadaeni unai herahera gaudia umui itaia neganai, Iehova ena oda hereva ibounai do umui laloatao bona badinaia.+ Namo lasi sibona emui kudouna ena ura bona matana ena ura umui badinaia, badina idia ese umui idia veria idau diravadia ida matabodaga karadia umui karaia totona.*+ 40 Umui dekenai unai oda hereva ibounai lau henia, unai amo egu oda hereva ibounai do umui laloatao bona badinaia bona lau, emui Dirava vairanai do umui helaga noho.+ 41 Lau be Iehova, emui Dirava, lau ese umui be Aigupito tanona amo lau hakaua raka-lasi, emui Dirava ai lau lao totona.+ Lau be Iehova emui Dirava.’”+

16 Bena Kora be Datana, Abirama, bona Onu edia kahanai ia lao, idia be Rubena+ besena amo. Kora+ be Isahara ena natuna,+ Isahara be Kohata ena natuna,+ bona Kohata be Levi ena natuna.+ Datana bona Abirama be Eliaba ena natudia.+ Bona Onu be Peletehe ena natuna. 2 Idia bona Israela tatau 250 be Mose idia gwau-edeede henia. Idia be iduhu gunalaia taudia, hebou ena kaunsolo taudia unai, mai edia ladana bada. 3 Vadaeni Mose bona Arona vairanai idia hebou+ bona idia gwau: “Ai be umui dekenai ai hesiku vadaeni. Idia hebou taudia ibounai be helaga,+ bona Iehova be idia huanai ia noho.+ Dahaka dainai Iehova ena bese taudia amo umui sibona umui abia isi?”

4 Mose be unai ia kamonai neganai, maoromaoro ia goru diho. 5 Bena Kora bona ena bamodia ibounai dekenai ia gwau: “Daba ai Iehova ese do ia hahedinaraia daika be iena,+ daika be helaga, bona daika be ia kahirakahira ia lao be namo.+ Bona ia abia hidi tauna+ be ia kahirakahira do ia lao. 6 Kora bona emu bamodia ibounai+ e, inai do umui karaia: Lahi gida udaia gaudia do umui abia,+ 7 bona idia lalonai lahi umui udaia bona idia latanai bonana namo muramura umui atoa, kerukeru unai bamona do umui karaia Iehova vairanai, bona Iehova ese do ia abia hidi tauna+ be helaga tauna. Umui Levi taudia+ be emui maka umui hanaia momokani!”

8 Bena Mose be Kora dekenai ma ia gwau: “Umui Levi besena e, mani umui kamonai! 9 Israela ena Dirava ese umui be Israela taudia amo ia hapararaia bona maoro ia henia ia kahirakahira umui lao,+ bona Iehova ena Palai Dubu ai hesiai gaukara umui karaia bona Israela taudia vairanai umui gini idia umui hesiai henia totona, umui laloa unai be gau maragina, a?+ 10 Bona ia ese oi bona emu tadikaka, Levi bese unai, be ia kahirakahira ia mailaia, oi laloa unai danu be gau maragina, a? Umui ura hahelaga tauna ena gaukara danu do umui karaia, a?+ 11 Unai badina dainai, oi bona emu bamodia ibounai be Iehova umui inai henia noho. Arona be daika, bona ia dekenai umui maumau noho?”+

12 Gabeai Mose be Eliaba ena natudia, Datana bona Abirama+ totona hereva ia siaia, to idia gwau: “Do ai mai lasi! 13 Oi ese milika bona hani amo ia honu tanona amo ai oi hakaua raka-lasi taunimanima lasi gabuna dekenai ai oi hamasea totona, oi laloa unai be gau maragina, a?+ Vadaeni hari oi ura oi sibona ese ai do oi lohiaia danu, a? 14 To oi ese milika bona hani amo ia honu tanona dekenai ai oi hakaua vareai lasi+ eiava ai dekenai tano bona vain umana oi henia lasi. Oi ura unai tatau be matakepulu taudia bamona oi do idia badinaia sibona, a? Ai be do ai mai lasi!”

15 Vadaeni Mose be ia badu dikadika bona Iehova dekenai ia gwau: “Edia aniani boubou oi abia dae lasi. Lau ese idia ta lau hadikaia lasi, eiava edia doniki ta danu lau abia lasi.”+

16 Bena Mose be Kora dekenai ia gwau: “Kerukeru oi bona emu bamodia ibounai bona Arona be Iehova vairanai do umui mai. 17 Umui ta ta ese emui lahi gida udaia gauna do umui abia bona ia latanai bonana namo muramura do umui atoa, bona ta ta ese ena lahi gida udaia gauna be Iehova vairanai do ia mailaia. Oi bona emu bamodia 250 bona Arona, umui ta ta be emui lahi gida udaia gaudia do umui dogoatao.” 18 Vadaeni idia ta ta ese ena lahi gida udaia gauna ia abia, bona idia latanai lahi bona bonana namo muramura idia atoa, bena idia be Mose bona Arona ida palai dubu ena vareai gabuna ai idia gini. 19 Kora ese ena bamodia be Mose bona Arona edia vairanai ia haboua,+ palai dubu ena vareai gabuna ai. Unai neganai Iehova ena hairai be hebou taudia ibounai dekenai ia hedinarai.+

20 Bena Iehova be Mose bona Arona dekenai ia gwau: 21 “Unai orea taudia amo umui raka siri, badina karaharaga idia do lau hadikaia ore.”+ 22 Unai neganai idia rua be tano dekenai edia kwarana idia atoa diho bona idia gwau: “Dirava e, taunimanima ibounai dekenai mauri oi henia Diravana e,+ tau tamona ena kara dika dainai idia hebou taudia ibounai dekenai do oi badu, a?”+

23 Bena Iehova be Mose dekenai ia gwau: 24 “Idia hebou taudia dekenai oi gwau, ‘Kora, Datana, bona Abirama edia palai rumadia kahirakahira amo umui siri!’”+

25 Bena Mose ia toreisi bona Datana bona Abirama dekenai ia lao, bona Israela ena tau badadia+ be ia danu idia lao. 26 Bona idia hebou taudia dekenai ia gwau: “Mani inai tatau dikadia edia palai rumadia amo umui raka siri bona edia kohu ta umui dogoatao lasi, edia kara dika dainai umui mase garina.” 27 Bena maoromaoro idia be Kora, Datana, bona Abirama edia palai rumadia amo idia raka siri, bena Datana bona Abirama idia raka-lasi bona edia palai ruma edia vareai gabuna ai idia gini, mai edia adavadia bona natudia ida.

28 Bena Mose ia gwau: “Inai amo do umui diba Iehova ese lau ia siaia inai gaudia ibounai lau karaia totona, inai be egu ura dainai lau karaia lasi. 29 Bema inai taudia be taunimanima ibounai idia mase hegeregerena idia mase, bona bema edia panisi be taunimanima ibounai edia panisi hegeregerena, anina be Iehova ese lau ia siaia lasi.+ 30 To bema Iehova ese idia dekenai kara idauna ta do ia karaia bona tano ia kehoa bona idia bona edia kohu ibounai ia hadonoa bona idia do mauri noho lalonai Mase Gurina* dekenai idia diho, do umui diba momokani inai tatau ese mai hemataurai lasi ida Iehova idia kara henia.”

31 Vadaeni Mose ese ena hereva ibounai ia hadokoa neganai, idia gini gabunai tano ia parara.+ 32 Bena tano ia kehoa bona idia, edia ruma bese taudia, bona Kora ena orea taudia+ bona edia kohu ibounai ia hadonoa. 33 Vadaeni idia bona edia kahana ai idia gini taudia ibounai be idia do mauri noho lalonai Mase Gurina* dekenai idia diho, bona tano ese idia ia koua, bona idia hebou taudia edia huana amo idia boio.+ 34 Unai taudia idia hagegea Israela taudia ibounai be edia boiboi dainai idia heau, idia gwau: “Ai gari, dika tano ese ai ia hadonoa!” 35 Bena lahi ta be Iehova amo ia mai+ bona bonana namo muramura idia henia tatau ibounai 250 ia gabua ore.+

36 Vadaeni Iehova be Mose dekenai ia gwau: 37 “Hahelaga tauna Arona ena natuna Eleasara oi hamaoroa, lahi gida udaia gaudia+ be lahi kahuna amo ia abidia siri, badina idia be helaga. Danu, ia oi hamaoroa lahi kahu be gabu daudau dekenai do ia negea. 38 Edia kara dika dainai idia mase taudia edia lahi gida udaia gaudia be kopa palakadia ai oi halaoa bona boubou patana oi koua,+ unai gaudia be helaga, badina idia be Iehova vairanai idia henia gaudia. Namona be idia be toa bamona Israela taudia dekenai.”+ 39 Vadaeni hahelaga tauna Eleasara ese lahi gida udaia kopa gaudia ia abia, unai gaudia be lahi ese ia gabua taudia edia, bena ia hapalakaia boubou patana koua totona, 40 Iehova ese Mose ia oda henia hegeregerena. Israela taudia ese unai idia itaia neganai, do idia laloatao hahelaga gaukara ia karaia lasi tauna,* Arona ena bese tauna lasi, be do ia lao lasi Iehova vairanai bonana namo muramura ia gabua totona,+ unai amo idia ta be Kora bona ena bamodia hegeregerena do idia karaia lasi.+

41 Murina dinana ai, Israela taudia ibounai be Mose bona Arona idia maumauraia matamaia,+ idia gwau: “Umui ruaosi ese Iehova ena taunimanima umui hamasea.” 42 Idia ibounai be Mose bona Arona vairanai idia haboua, bena hebou dubu dekenai idia giroa, bona itaia, ori ese hebou dubu ia koua bona Iehova ena hairai ia hedinarai matamaia.+

43 Mose bona Arona be hebou dubu ena vairanai idia lao,+ 44 bona Iehova be Mose dekenai ia gwau: 45 “Idia hebou taudia huana amo umui raka siri, unai amo karaharaga idia do lau hadikaia ore.”+ Unai neganai idia rua edia kwarana be tano dekenai idia atoa diho.+ 46 Unai murinai Mose be Arona dekenai ia gwau: “Lahi gida udaia gauna oi abia bona boubou patana ena lahi be ia lalonai oi atoa,+ bena ia latanai bonana namo muramura oi atoa bona hebou taudia dekenai oi lao haraga bona idia totona kara dika davana karaia boubou oi henia,+ badina Iehova ena badu ia hedinarai vadaeni. Bona gorere dikana ia matamaia vadaeni!” 47 Bena Mose ena hereva hegeregerena, Arona ese maoromaoro lahi gida udaia gauna ia abia bona hebou taudia huanai ia heau lao. Unai gorere dikana be idia huanai ia vara noho. Vadaeni bonana namo muramura be lahi gida udaia gauna latanai ia atoa, bona idia totona kara dika davana karaia boubou ia henia matamaia. 48 Ia be mase bona mauri taudia huanai ia gini ela bona unai gorere ia ore. 49 Unai gorere amo idia mase taudia ibounai be 14,700, to Kora ena kara dainai idia mase taudia edia namba be idau. 50 Vadaeni unai gorere ia ore murinai, Arona be hebou dubu ena vareai gabuna ai Mose dekenai ia giroa lou.

17 Iehova be Mose dekenai ia gwau: 2 “Israela taudia oi hereva henia bona edia iduhu ta ta amo itotohi oi abia, unai itotohi be iduhu gunalaia taudia amo oi abia,+ itotohi ibounai be 12. Idia ta ta ena ladana be ena itotohi dekenai oi torea. 3 Namona be Arona ena ladana be Levi ena itotohi dekenai oi torea. Iduhu kwaradia ta ta be mai edia itotohi ta. 4 Unai itotohi be hebou dubu lalonai oi atoa, Taravatu Maua vairanai,+ nega momo umui dekenai lau hedinarai gabuna ai.+ 5 Bona lau abia hidi tauna ena itotohi dekenai rigi matamata do idia tubu,+ bona Israela taudia ese lau idia maumauraia karana do lau hadokoa,+ idia be umui dekenai danu idia maumau noho.”+

6 Vadaeni Mose ese Israela taudia ia hereva henia, bona edia gunalaia taudia ibounai ese ia dekenai itotohi idia henia, itotohi ta ta be iduhu ta ta edia gunalaia taudia totona, ibounai be 12, bona Arona ena itotohi be edia itotohi huanai ia noho. 7 Bena Mose ese unai itotohi be Iehova vairanai ia atoa, Taravatu Maua ena palai ruma lalonai.

8 Murina dinana ai Mose be Taravatu Maua ena palai ruma lalonai ia vareai neganai, ia itaia Arona ena itotohi latanai rigi matamata idia tubu bena flaoaflaoa idia kehoa bona alamono magedia idia vara. Unai itotohi be Levi iduhu totona. 9 Bena Mose ese Iehova ena vairana amo itotohi ibounai ia abia raka-lasi, bona Israela taudia ibounai dekenai ia abia lao. Idia itaia bona ta ta ese edia itotohi idia abia.

10 Bena Iehova be Mose dekenai ia gwau: “Arona ena itotohi+ be Taravatu Maua vairanai oi atoa lou, inai be toa ta+ idia gwau-edeede besena dekenai,+ unai amo edia maumau karana lau dekenai do idia hadokoa bena do idia mase lasi.” 11 Mose be maoromaoro Iehova ena oda hegeregerena ia kara. Ia be Dirava ena hereva ibounai ia badinaia.

12 Bena Israela taudia be Mose dekenai idia gwau: “Hari do ai mase, ai be momokani do ai mase ore, ai ibounai do ai boio! 13 Iehova ena Palai Dubu kahirakahira ia mai tauna be do ia mase!+ Vadaeni ai ibounai be unai bamona do ai mase, a?”+

18 Bena Iehova be Arona dekenai ia gwau: “Dubu helaga totona idia atoa taravatu be ta ese ia utua neganai, oi, emu natudia, bona emu bese taudia ese kerere davana do umui abia.+ Bona oi bona emu natudia be emui hahelaga gaukara ena taravatu umui utua neganai, davana do umui abia.+ 2 Danu Levi iduhu amo emu tadikaka oi hakaua mai, idia be emu tamana ena iduhu taudia, unai amo idia ese oi do idia durua, bona oi bona emu natudia do idia hesiai henia,+ Taravatu Maua ena palai ruma vairanai.+ 3 Idia be oi vairanai edia hesiai gaukara ena maduna do idia hagugurua bona palai ruma lalonai edia hesiai gaukara ibounai do idia karaia.+ To namo lasi helaga gabuna ena kohu bona boubou patana kahirakahira idia mai, dika idia eiava umui be do umui mase.+ 4 Idia be oi do idia durua bona hebou dubu bona ena gaukara ibounai do idia karaia, to hahelaga gaukara ia karaia lasi tauna* be umui kahirakahira do ia mai lasi.+ 5 Namona be emui maduna, helaga gabuna+ bona boubou patana+ dekenai umui hagugurua, unai amo Israela taudia ese egu badu do idia mamia lasi.+ 6 Lau ese emui tadikaka, Levi taudia unai, be Israela taudia amo lau abia bona umui dekenai harihari gauna bamona lau henia.+ Idia be lau, Iehova totona umui henia hebou dubu ena gaukara idia karaia totona.+ 7 Oi bona emu natudia ese boubou patana bona keten* murinai idia noho gaudia umui naria,+ unai be emui hahelaga gaukara ena maduna, unuseniai hesiai gaukara do umui karaia.+ Lau ese hahelaga gaukara be harihari gauna bamona umui dekenai lau henia bona bema hahelaga gaukara ia karaia lasi tauna* be dubu helaga kahirakahira ia mai, ia idia hamasea be namo.”+

8 Iehova be Arona dekenai ma ia gwau: “Oi lau abia hidi lau dekenai idia henia harihari gaudia oi naria totona.+ Israela taudia ese idia henia helaga gaudia ibounai be oi bona emu natudia dekenai lau henia, inai be emui kahana, hanaihanai do umui abia gauna.+ 9 Lahi boubou amo umui abia helaga herea gaudia be umui emui. Gaudia be inai: Lau dekenai idia mailaia boubou gaudia ibounai, unai be aniani bouboudia,+ kara dika bouboudia,+ bona kerere bouboudia.+ Unai be helaga herea gaudia bona idia be oi bona emu natudia totona. 10 Unai gauna be helaga herea gabuna dekenai oi ania be namo.+ Tatau ibounai ese do idia ania. Ia be helaga gauna oi dekenai.+ 11 Israela taudia ese idia henia harihari gaudia+ bona davea boubou ibounai danu be oiemu.+ Lau ese unai gaudia be oi, emu natudia memero bona kekeni dekenai lau henia, inai be hanaihanai do idia abia gaudia.+ Emu ruma ai idia noho goeva taudia ibounai ese idia ania diba.+

12 “Israela taudia ese Iehova dekenai idia henia anina ginigunadia, hegeregere oela, wain, bona witi namo hereana be oi dekenai lau henia.+ 13 Israela taudia edia tano ai idia tubu gaudia ibounai edia anina ginigunadia, Iehova dekenai do idia mailaia gaudia unai, be oiemu.+ Emu ruma ai idia noho goeva taudia ibounai ese idia ania diba.

14 “Israela ai, gaukara helagana totona idia atoa siri gaudia ibounai be oiemu.+

15 “Iehova dekenai do idia henia mauri gaudia ibounai edia vara guna+ be oiemu, herevana idia be taunimanima eiava animal. To, namona be taunimanima bona idia goeva lasi animal edia vara guna do oi hoia lou.+ 16 Bema idia be hua tamona bona idia hanaia, namona be 5 siliva sikel* amo hoia lou davana do oi karaia,+ unai be helaga gabuna ena sikel* amo idia hahetohoa. Sikel ta be 20 gera.* 17 To namo lasi boromakau eiava mamoe eiava nanigosi edia vara guna oi hoia lou,+ badina idia be helaga. Namona be edia rara be sisina sisina boubou patana dekenai oi negea lao mai,+ bona edia digara be lahi dekenai oi gabua bona kwalahu do ia daekau. Unai be bonana namo gauna Iehova dekenai.+ 18 Bona edia vamu be oiemu. Davea boubou ena kemena bona aena idibana be oiemu hegeregerena.+ 19 Israela taudia ese Iehova dekenai do idia henia harihari gaudia ibounai+ be oi bona emu natudia memero bona kekeni dekenai lau henia, inai be hanaihanai do umui abia gauna.+ Inai be noho daudau gwauhamata* Iehova vairanai, oi bona emu natudia totona.”

20 Iehova be Arona dekenai ma ia gwau: “Israela taudia huanai ahuna ta do oi abia lasi, bona edia huanai tano ena kahana ta do oi abia lasi.+ Badina lau be emu ahuna.+

21 “Levi taudia ese palai dubu ai idia karaia hesiai gaukara dainai, Israela taudia ese idia henia kahana 10 ena kahana ta be idia dekenai lau henia,+ edia ahuna bamona. 22 Hari Israela taudia be hebou dubu kahirakahira idia lao lasi, do idia kara dika bona mase garina. 23 Levi taudia ese hebou dubu ena hesiai gaukara do idia karaia, dubu helaga totona idia atoa taravatu be ta ese ia utua neganai, idia ese kerere davana do idia abia.+ Israela taudia huanai Levi taudia ese ahuna ta do idia abia lasi, emui uru ibounai lalonai unai be noho daudau taravatu.+ 24 Badina be Israela taudia ese Iehova dekenai do idia henia gaudia edia kahana 10 ena kahana ta be Levi taudia dekenai do lau henia, edia ahuna bamona. Unai dainai idia dekenai lau gwau, ‘Israela taudia edia huanai, namo lasi ahuna ta idia abia.’”+

25 Bena Iehova be Mose dekenai ia gwau: 26 “Namona be Levi taudia oi hamaoroa, ‘Israela taudia ese idia henia gaudia edia kahana 10 ena kahana ta be emui ahuna bamona do umui abia,+ unai be idia amo umui dekenai lau henia, bona unai gaudia amo kahana 10 ena kahana ta be Iehova dekenai umui henia be namo.+ 27 Bona unai be emui harihari gaudia, unai be hegeregere emui witi eiava wain eiava oela umui henia bamona.+ 28 Unai dala amo Israela taudia amo umui abia gaudia edia kahana 10 ena kahana ta be Iehova dekenai umui henia diba. Bona unai harihari gaudia be hahelaga tauna Arona dekenai umui henia, unai be Iehova totona. 29 Umui dekenai idia henia harihari gaudia namo hereadia amo, Iehova dekenai harihari gaudia idauidau ibounai do umui henia,+ oibe, helaga gaudia bamona do umui henia.’

30 “Bona namona be idia dekenai oi gwau, ‘Umui Levi taudia ese unai gau namo hereadia umui henia neganai, unai be hegeregere emui witi eiava wain eiava oela umui henia. 31 Umui bona emui ruma bese ese gabu idauidau ai unai umui ania diba, badina unai be hebou dubu ai umui karaia gaukara ena davana.+ 32 Umui ese kahana 10 ena kahana ta amo gau namo hereadia umui henia karana amo umui kara dika lasi. Bona Israela taudia ese idia henia helaga gaudia umui gaukaralaia kerere lasi, umui mase garina.’”+

19 Iehova be Mose bona Arona dekenai ma ia gwau: 2 “Iehova ese ia henia taravatu be inai, ‘Israela taudia umui hamaoroa umui totona, boromakau kakakaka, natuna lasi gauna do umui abia, ena kahana ta ia dika lasi+ bona ia latanai huaia auna ta idia atoa lasi. 3 Unai boromakau be hahelaga tauna Eleasara dekenai do umui henia, bona ia ese kamepa murimuri dekenai do ia hakaua lao, bona ia vairanai do idia hamasea. 4 Bena hahelaga tauna Eleasara ese boromakau ena rara sisina be ena ima kwakikwaki amo do ia abia bona hebou dubu ena vaira kahana dekenai nega 7 do ia negea.+ 5 Bena boromakau be iena vairanai do idia gabua. Iena kopina, ena vamu, ena rara, bona ena kukuri be do idia gabua.+ 6 Bona hahelaga tauna ese sida auna, husopo,+ bona dabua kakakaka do ia abia bona boromakau idia gabua lahina dekenai do ia negea vareai. 7 Bena hahelaga tauna ese ena dabua do ia huria bona ranu dekenai do ia digu, unai murinai kamepa lalonai do ia vareai, to hahelaga tauna be do ia goeva lasi ela bona dina ia diho.

8 “‘Boromakau ia gabua tauna ese ena dabua be ranu lalonai do ia huria bona ranu lalonai do ia digu, bona do ia goeva lasi ela bona dina ia diho.

9 “‘Ia goeva tauna ese boromakau ena lahi kahu do ia haboua+ bona kamepa murimuri ai do ia atoa, gabu goevana ta dekenai, unai amo Israela taudia ese unai lahi kahu be ranu lalonai do idia atoa bona hagoevaia gaukara do idia karaia.+ Ia be kara dika boubou. 10 Boromakau ena lahi kahu ia haboua tauna ese ena dabua do ia huria bona do ia goeva lasi ela bona dina ia diho.

“‘Unai be noho daudau taravatu Israela taudia bona edia huanai idia noho idau taudia dekenai.+ 11 Mase tauanina ia dogoatao tauna be dina 7 lalonai do ia goeva lasi.+ 12 Dina ihatoina ai unai tauna ese ranu amo sibona ia hagoevaia be namo, bona dina namba 7 ai do ia goeva. To bema dina ihatoina ai sibona ia hagoevaia lasi, vadaeni dina namba 7 ai do ia goeva lasi. 13 Mase tauanina ia dogoatao bona sibona ia hagoevaia lasi tauna ese Iehova ena palai dubu ia hamiroa,+ bona unai tauna be Israela taudia edia huana amo idia hamasea be namo.+ Ia latanai hagoevaia ranu+ idia negea lao mai lasi dainai, ia do goeva lasi. Unai tauna be miro.

14 “‘Tau ta be palai ruma lalonai ia mase neganai, taravatu be inai: Palai ruma ai idia vareai taudia bona palai ruma ai idia noho vadaeni taudia be dina 7 lalonai do idia goeva lasi. 15 Hodu ibounai mai edia koua gaudia lasi be miro.+ 16 Bema tau ta be kamepa murimuri ai ia loaloa bona tuari kaia amo idia hamasea tauna ta, eiava mase tauanina ta, eiava tau ta ena turia, eiava guria gabuna ia dogoatao, ia be dina 7 lalonai do ia goeva lasi.+ 17 Namona be kara dika totona idia gabua boubou ena kahu haida be unai goeva lasi tauna totona idia abia bona hodu lalonai do idia udaia bena ranu goevana do idia bubua. 18 Bena ia goeva tauna+ ese husopo do ia abia+ bona ranu lalonai do ia atoa bona ranu sisina be palai ruma, hodu ibounai, bona unuseni idia noho taudia dekenai do ia negea lao. Bona ta ena turia, eiava idia hamasea tauna, eiava mase tauanina, eiava guria gabuna ia dogoatao tauna dekenai unai bamona do idia karaia danu. 19 Dina ihatoina bona dina namba 7 ai, ia goeva tauna ese ia goeva lasi tauna dekenai unai ranu sisina do ia negea, bona dina namba 7 ai ia ese kara dika amo ia do ia hagoevaia.+ Bena ia ese ena dabua do ia huria bona ranu lalonai do ia digu, bona dina ia diho neganai do ia goeva.

20 “‘To ia goeva lasi bona sibona ia hagoevaia lasi tauna be Israela taudia huana amo do umui hamasea,+ badina ia ese Iehova ena dubu helaga ia hamiroa. Hagoevaia ranu be ia latanai idia negea lao mai lasi dainai, ia be ia miro.

21 “‘Inai be noho daudau taravatu idia totona: Hagoevaia ranu ia negea lao tauna+ ese ena dabua ia huria be namo, bona hahegoeva ranu ia dogoatao tauna be do ia goeva lasi ela bona dina ia diho. 22 Ia goeva lasi tauna ese ia dogoatao gaudia ibounai be miro, bona ta ese unai gaudia ia dogoatao neganai, do ia goeva lasi ela bona dina ia diho.’”+

20 Hua ginigunana ai, Israela taudia ibounai be Seni ena taunimanima lasi gabuna dekenai idia ginidae, bona Kadesi ai idia noho.+ Unuseniai Miriama+ ia mase bona idia guria.

2 Vadaeni Israela taudia totona ranu be lasi,+ bona idia be mai badu ida Mose bona Arona vairanai idia haboua. 3 Idia be Mose ida idia hepapahuahu noho,+ idia gwau: “Emai tadikaka be Iehova vairanai idia mase neganai, unai nega dekenai ai mase be namo! 4 Dahaka dainai Iehova ena taunimanima be inai tano kaukau dekenai oi mailaia? Ai bona emai animal be iniseniai do ai mase, a?+ 5 Bona dahaka dainai Aigupito amo ai oi hakaua raka-lasi bona inai gabu dikana dekenai ai oi mailaia?+ Inai gabu ai uhe bona fig bona vain bona pomogranet* be lasi, bona ranu be lasi ai inua totona.”+ 6 Bena Mose bona Arona be taunimanima edia vairana amo hebou dubu ena vareai gabuna dekenai idia lao bona edia kwarana be tano dekenai idia atoa diho, bona Iehova ena hairai be idia dekenai ia hedinarai.+

7 Bena Iehova be Mose dekenai ia gwau: 8 “Itotohi oi abia bona oi bona emu tadikaka Arona ese Israela taudia umui boiria, bona edia vairanai nadi badana umui hereva henia, unai amo ranu be nadi badana amo do ia raka-lasi, bena idia bona edia animal dekenai ranu oi henia idia inua totona.”+

9 Vadaeni Mose ese Iehova vairanai itotohi ia abia,+ Iena oda hegeregerena. 10 Bena Mose bona Arona ese taunimanima idia boiria bona nadi badana vairanai idia haboua, bona idia dekenai idia gwau: “Umui gwau-edeede taudia e, umui kamonai, ai ese umui totona inai nadi badana amo ranu do ai mailaia, a?”+ 11 Unai neganai Mose ese ena imana ia abia isi bona ena itotohi amo nega rua nadi badana ia botaia, bona ranu bada herea ia bubua raka-lasi, bona taunimanima bona edia animal ese idia inua matamaia.+

12 Gabeai Iehova be Mose bona Arona dekenai ia gwau: “Umui ese Israela taudia vairanai lau umui abidadama henia lasi bona lau umui hahelagaia lasi dainai, do lau henia tanona dekenai inai taudia do umui hakaua vareai lasi.”+ 13 Inai be Meriba* ranudia,+ unuseniai Israela taudia be Iehova ida idia hepapahuahu, unai amo edia vairanai iena ladana ia hahelagaia.

14 Vadaeni Mose ese Kadesi amo gwaukau taudia be Edoma ena king dekenai ia siaia,+ bona ia dekenai idia gwau: “Oiemu tadikaka Israela+ be inai bamona ia gwau, ‘Ai davaria metau idauidau ibounai be oi diba namonamo. 15 Emai sene taudia be Aigupito dekenai idia lao,+ bona lagani momo* Aigupito dekenai ai noho,+ bona Aigupito taudia ese ai bona emai sene taudia idia kara auka henia.+ 16 Vadaeni Iehova dekenai ai noinoi,+ bona ia be ai ia kamonai henia bona aneru ta ia siaia+ bona Aigupito amo ai ia hakaua raka-lasi, bona hari ai be Kadesi dekenai ai noho, inai siti be emu tano ena boda dekenai ia noho. 17 Mani emu tano amo ai raka hanaia. Ai ese emu uma eiava vain uma amo do ai raka hanaia lasi, bona ai ese emu ranu guri amo ranu do ai inua lasi. Ai be King Ena Dala dekenai do ai raka bona idiba kahana eiava lauri kahana do ai lao lasi ela bona emu tano do ai hanaia.’”+

18 To Edoma ena king be ia dekenai ia gwau: “Emai tano amo do oi raka hanaia lasi. Bema oi raka hanaia, lau be tuari kaia ida do lau raka-lasi oi lau tuari henia totona.” 19 Unai neganai Israela taudia be ia dekenai idia gwau: “Ai be dala badana amo do ai daekau, bona bema ai bona emai animal ese emu ranu ai inua, ai ese davana do ai henia.+ Ai ura emu tano ai raka hanaia sibona.”+ 20 To ia gwau: “Do oi raka hanaia lasi.”+ Bena Edoma ena king be taunimanima momo bona tuari orea goadana ida ia raka-lasi, Israela taudia ia tuari henia totona. 21 Edoma ena king ia ura lasi Israela be iena tano amo ia raka hanaia. Unai dainai Israela be ia amo ia raka siri.+

22 Israela taudia ibounai be Kadesi idia rakatania bona Horo Ororo dekenai idia lao.+ 23 Horo Ororo be Edoma tano ena boda ai, unuseniai Iehova be Mose bona Arona dekenai ia gwau: 24 “Arona be do ia mase bona ena sene taudia ida do idia guria.*+ Ia be Israela taudia dekenai do lau henia tanona ai do ia vareai lasi, badina Meriba ranudia totona umui ruaosi dekenai lau henia oda umui badinaia lasi.+ 25 Arona bona ena natuna Eleasara oi abia bona Horo Ororo dekenai idia oi hakaua lao. 26 Arona ena hahelaga dabuadia do oi kokia+ bona ena natuna Eleasara+ dekenai oi atoa, bona Arona be unuseniai do ia mase.”

27 Bena Mose be Iehova ena oda hegeregerena ia kara, bona taunimanima ibounai edia matana ai Horo Ororo dekenai idia daekau. 28 Vadaeni Mose ese Arona ena hahelaga dabuadia ia kokia bona Arona ena natuna Eleasara dekenai ia atoa. Unai murinai Arona be unai ororo ataiai ia mase.+ Bona Mose bona Eleasara be ororo amo idia diho. 29 Israela taudia ibounai idia diba Arona ia mase vadaeni neganai, idia be dina 30 lalonai Arona totona idia taitai.+

21 Arada ena king be Kanana tauna+ bona Negebe dekenai ia noho. Vadaeni ia kamonai Israela taudia be Atarima ena dala amo idia mai neganai, Israela taudia ia tuari henia bona idia haida ia abia mauri. 2 Vadaeni Israela taudia be Iehova dekenai inai gwauhamata idia karaia: “Bema inai taudia be emai imana dekenai oi atoa, ai ese edia siti ibounai do ai hadikaia ore.” 3 Bena Iehova ese Israela taudia ia kamonai henia bona Kanana taudia be edia imana dekenai ia atoa, bona idia bona edia siti ibounai idia hadikaia ore. Unai dainai, unai gabu ena ladana idia hatoa, Horoma.*+

4 Horo Ororo+ idia rakatania bona Davara Kakakaka ena dala amo idia lao, Edoma tano ena kahana amo idia hanaia,+ vadaeni taunimanima be unai laolao dainai idia hesiku bada. 5 Bona taunimanima be Dirava bona Mose dekenai idia maumau noho,+ idia gwau: “Dahaka dainai Aigupito amo ai umui hakaua raka-lasi? Ai be tano kaukau dekenai ai mase totona, a? Aniani bona ranu be lasi,+ bona inai paraoa dikana ai ura henia lasi* momokani.”+ 6 Vadaeni Iehova ese taunimanima huanai poisini gaigai ia siaia, bona unai gaigai ese taunimanima idia koria noho dainai, Israela taudia momo idia mase.+

7 Bena taunimanima be Mose dekenai idia gwau: “Ai ese Iehova bona oi dekenai ai maumau dainai ai kara dika vadaeni.+ Ai totona Iehova oi guriguri henia, unai amo inai gaigai be ai amo do ia kokia.” Bona Mose be idia dainai ia guriguri.+ 8 Bena Iehova be Mose dekenai ia gwau: “Poisini gaigai ta oi koroa bona au ta dekenai oi atoa. Vadaeni gaigai ese ta ia koria neganai, unai tauna ese gaigai do ia itaia bona do ia mauri.” 9 Maoromaoro Mose ese kopa gaigai+ ta ia karaia bona au dekenai ia atoa.+ Vadaeni gaigai ese ta ia koria neganai, unai kopa gaigai ia itaia bona ia mauri diba.+

10 Unai murinai Israela taudia ese unai gabu idia rakatania bona Oboto dekenai idia kamepa.+ 11 Bena Oboto idia rakatania bona Ie-abarima dekenai idia kamepa,+ unai be tano kaukau ena ist kahanai, Moaba vairanai. 12 Unai gabu idia rakatania bona Seredi Kourana dekenai idia kamepa.+ 13 Bena unai gabu amo idia lao bona Aranona kahanai idia kamepa.+ Unuseniai ia noho tano kaukau be ia lao ela bona Amoro taudia edia boda ai, badina Aranona be Moaba tano ena boda ai, unai be Moaba bona Amoro taudia edia huanai. 14 Unai dainai Iehova ena Tuari bukana lalonai inai gabudia ia herevalaia: “Vahebe, unai be Supa dekenai, bona Aranona kouradia 15 bona ena sinavai maragidia, unai koura be idia lao ela bona Are siti bona Moaba ena boda dekenai.”

16 Gabeai unai gabu amo Bere dekenai idia lao. Bona Iehova be unai ranu gurina totona Mose dekenai ia gwau: “Taunimanima oi haboua, bona idia dekenai ranu do lau henia.”

17 Unai neganai Israela taudia be inai ane idia abia:

“Ranu guri e, do oi lohilohi! Ia dekenai ane abia!

Bena taunimanima lasi gabuna amo idia lao Matanaha dekenai. 19 Matanaha amo idia lao Nahaliele, bona Nahaliele amo idia lao Bamoto.+ 20 Bena Bamoto amo idia lao Moaba tano ai ia noho koura dekenai,+ bena Pisiga ataiai idia daekau lao,+ unuseni amo Iesimono* idia itaia diba.+

21 Vadaeni Israela taudia ese gwaukau taudia be Amoro taudia edia king, Sihona dekenai idia siaia, idia gwau:+ 22 “Namona be emu tano ai raka hanaia. Biru gabuna ta eiava vain umana ta dekenai do ai lao lasi. Bona ranu guri ta amo ranu do ai inua lasi. Ai be King Ena Dala dekenai do ai raka ela bona emu tano ai raka hanaia.”+ 23 To Sihona be Israela taudia dekenai maoro ia henia lasi ena tano idia raka hanaia totona. To, ia ese ena taunimanima ibounai ia haboua bona idia lao tano kaukau gabuna dekenai Israela taudia tuari henia totona. Vadaeni Iahasa dekenai idia ginidae bona Israela taudia idia tuari henia matamaia.+ 24 To Israela taudia ese tuari kaia amo ia idia halusia+ bona ena tano idia abia,+ unai be Aranona koura+ amo ela bona Iaboka koura,+ unai be Amono taudia kahirakahira, to idia ese Iasera+ siti idia abia lasi, badina unai siti be Amono taudia edia tano ena boda ai.+

25 Vadaeni Israela taudia ese unai siti ibounai idia abia, bona Amoro taudia edia siti ibounai dekenai idia noho matamaia,+ Hesebona ai bona ena badina taoni maragidia dekenai danu. 26 Hesebona be Sihona ena siti, ia be Amoro taudia edia king. Sihona be Moaba ena king ida ia tuari bona ena tano ibounai ia abia ela bona Aranona koura. 27 Unai dainai inai hahisia herevadia idia gwauraia, idia gwau:

“Hesebona dekenai umui mai.

Namona be Sihona ena siti ita haginia bona do ia gini goada.

28 Badina Hesebona amo lahi ia raka-lasi, oibe, Sihona siti amo lahi ia mai.

Unai lahi ese Moaba ena siti, Are ia araia, unai be Aranona koura ena ataiai gabudia* edia lohia taudia.

29 Moaba e, dika do oi davaria! Kemoso umui tomadiho henia taudia e, umui be do idia hadikaia ore!+

Ia dainai ena natudia memero be gabu idauidau dekenai idia loaloa bona ena natudia kekeni be Amoro taudia edia king, Sihona ese do ia abia mauri.

31 Vadaeni Israela taudia be Amoro taudia edia tano dekenai idia noho. 32 Bena Mose ese tatau haida ia siaia Iasera siti idia spai totona.+ Idia ese ena badina taoni maragidia idia halusia bona unuseni idia noho Amoro taudia idia lulua. 33 Unai murinai Basana Dala amo idia daekau lao. Bona Basana ena king, Oga+ be ena taunimanima ibounai ida ia raka-lasi, Ederei dekenai idia ia tuari henia totona.+ 34 Iehova be Mose dekenai ia gwau: “Namo lasi ia oi gari henia,+ badina lau ese ia bona ena taunimanima ibounai bona ena tano be oiemu imana dekenai do lau atoa,+ bona Amoro taudia edia king Sihona, Hesebona ai ia noho tauna, oi halusia hegeregerena, ia danu do oi halusia.”+ 35 Vadaeni ia, ena natudia, bona ena taunimanima ibounai idia tuari henia ela bona ibounai idia hamasea,+ bona ena tano idia abia.+

22 Bena Israela taudia idia lao bona Moaba ena tano kaukau palakana dekenai idia kamepa, unai be Ioridane kahanai, bona Ieriko be ma kahanai ia noho.+ 2 Siporo ena natuna, Balaki,+ be Israela taudia ese Amoro taudia idia halusia sivarai ia kamonai, 3 unai dainai ia bona Moaba taudia be Israela taudia dekenai idia gari dikadika, badina idia be momo herea. Moaba taudia be Israela taudia dainai idia lalohekwarahi bada.+ 4 Unai dainai Moaba taudia be Midiana ena tau badadia dekenai idia gwau:+ “Inai taunimanima ese iseda gabu ibounai do idia hadikaia, boromakau ese rei ia ania ore bamona.”

Unai nega ai Siporo ena natuna, Balaki, be Moaba ena king. 5 Ia ese gwaukau taudia be Beoro ena natuna Balama dekenai ia siaia lao. Balama be ena hanua Petoro+ dekenai ia noho, unai be Sinavai* badinai. Balaki ese Balama ia boiria, ia gwau: “Bese ta be Aigupito amo ia raka-lasi. Idia ese tano ibounai idia koua,+ bona idia be egu vairanai idia kamepa noho. 6 Vadaeni mani oi mai bona lau totona inai taunimanima dekenai hadikaia hereva oi gwauraia,+ badina idia edia goada ese egu goada ia hereaia. Reana lau ese idia lau halusia diba bona egu tano amo idia do lau lulua, badina lau diba oi ese oi hanamoa tauna be namo ia davaria bona oi gwauraia dika tauna be dika ia davaria.”

7 Vadaeni Moaba bona Midiana ena tau badadia be meamea ena davana totona moni idia abia bona Balama dekenai idia lao,+ bona ia dekenai Balaki ena hereva idia gwauraia. 8 Bena Balama be idia dekenai ia gwau: “Hari hanuaboi iniseni umui mahuta, bona Iehova ese lau dekenai do ia gwauraia herevana be umui dekenai do lau gwauraia.” Unai dainai Moaba ena lohia taudia be Balama ida idia noho.

9 Bena Dirava be Balama dekenai ia mai bona ia gwau:+ “Oi ida idia noho tatau be daidia?” 10 Balama be Dirava momokanina dekenai ia gwau: “Siporo ena natuna Balaki, Moaba ena king ese lau dekenai hereva ia siaia, ia gwau, 11 ‘Aigupito amo idia raka-lasi taudia ese tano ibounai idia koua noho. Oi mai bona lau totona idia dekenai hadikaia hereva oi gwauraia.+ Reana lau ese idia lau tuari henia bona idia lau lulua diba.’” 12 To Dirava be Balama dekenai ia gwau: “Unai taudia ida oi lao lasi. Inai taunimanima dekenai hadikaia hereva oi gwauraia lasi, badina idia lau hanamoa vadaeni.”+

13 Balama be daba ai ia toreisi bona Balaki ena lohia taudia dekenai ia gwau: “Emui tano dekenai umui giroa lou, badina Iehova ia ura lasi lau be umui ida lau lao.” 14 Unai dainai Moaba ena lohia taudia be unai gabu idia rakatania bona Balaki dekenai idia giroa lou bona idia gwau: “Balama ia ura lasi ai ida ia mai.”

15 To Balaki ese lohia taudia ia siaia lou, edia namba ese guna ena namba ia hanaia bona edia dagi ese guna idia lao taudia edia dagi ia hereaia. 16 Balama dekenai idia mai bona idia gwau: “Siporo ena natuna Balaki ia gwau, ‘Mani lau dekenai oi mai, namo lasi gau ta ese oi ia koua. 17 Badina lau ese oi dekenai davana namona do lau henia bona oi hereva gauna do lau karaia sibona. Unai dainai mani oi mai, bona lau totona inai taunimanima dekenai hadikaia hereva oi gwauraia.’” 18 To Balama ese Balaki ena hesiai taudia ia haere henia: “Bema Balaki ese lau dekenai iena ruma, siliva bona golo amo ia honu rumana ia henia, Iehova egu Dirava ena oda herevana do lau utua lasi, herevana unai be gau maragina eiava badana.+ 19 To mani hari hanuaboi danu iniseni umui noho, unai amo do lau diba Iehova ese lau dekenai dahaka hereva ma haida do ia gwauraia.”+

20 Bena hanuaboi ai Dirava be Balama dekenai ia mai bona ia gwau: “Bema inai tatau be oi boiria totona idia mai, vadaeni idia danu oi lao. To oi dekenai lau gwauraia hereva sibona do oi gwauraia.”+ 21 Unai dainai daba ai Balama ia toreisi bona ena doniki* ia abia hegaegae bona Moaba ena lohia taudia ida ia lao.+

22 To Balama ia lao dainai Dirava ia badu momokani, bona Iehova ena aneru be dala dekenai ia gini, Balama ia koua totona. Balama be ena doniki amo ia lao noho, bona ena hesiai taudia rua be ia ida. 23 Bona doniki ia itaia Iehova ena aneru be mai ena tuari kaia ida dala dekenai ia gini neganai, ia ura dala amo ia raka siri bona uda lalonai ia vareai. To Balama ese doniki ia kwadia matamaia, dala dekenai ia raka totona. 24 Vadaeni Iehova ena aneru be vain uma rua edia huanai ia noho dala maragina ai ia gini, dala kahana kahana dekenai be nadi magudia idia noho. 25 Doniki be Iehova ena aneru ia itaia neganai, ia be magu ena badinai momokani ia lao bona Balama ena aena be magu dekenai ia bampa, bona Balama ese doniki ia kwadia lou.

26 Iehova ena aneru be vaira kahana dekenai ma ia lao bona dala ia maragi gabuna ai ia gini, unai dainai idiba o lauri kahana dekenai idia lao diba lasi. 27 Doniki be Iehova ena aneru ia itaia neganai, ia hekure diho, vadaeni Balama ia badu dikadika bona ena itotohi amo doniki ia kwadia noho. 28 Dokonai, Iehova ese doniki ena uduna ia kehoa+ bona Balama dekenai ia gwau: “Oi dekenai dahaka lau karaia dainai nega toi lau oi kwadia?”+ 29 Balama be doniki dekenai ia gwau: “Badina oi ese lau be kavakava tauna bamona oi halaoa. Bema egu imana dekenai tuari kaia ta ia noho, oi do lau alaia mase!” 30 Bena doniki be Balama dekenai ia gwau: “Lau be emu doniki, emu mauri dinadia ibounai lalonai lau latanai oi guia ema bona hari, ani? Lau be nega ta oi dekenai inai bamona lau karaia, a?” Balama ia haere: “Lasi!” 31 Bena Iehova ese Balama ena matana ia kehoa+ bona ia itaia Iehova ena aneru be mai ena tuari kaia ida dala dekenai ia gini. Vadaeni maoromaoro ia tui diho bona ena kwarana be tano dekenai ia atoa.

32 Bena Iehova ena aneru be ia dekenai ia gwau: “Dahaka dainai nega toi emu doniki oi kwadia? Lau mai oi lau koua totona, badina egu ura oi badinaia lasi.+ 33 Doniki ese lau ia itaia bona ia ura nega toi lau amo ia siri.+ Dahaka do ia vara bema lau amo ia siri lasi? Lau ese oi lau hamasea vadaeni, to doniki do ia mauri.” 34 Balama be Iehova ena aneru dekenai ia gwau: “Lau kara dika vadaeni, badina lau diba lasi oi be dala dekenai oi gini lau oi hedavari henia totona. Bona bema emu matana ai inai be dika, do lau giroa lou.” 35 To Iehova ena aneru be Balama dekenai ia gwau: “Unai tatau ida oi lao, to oi dekenai lau gwauraia hereva sibona oi gwauraia.” Unai dainai Balama be Balaki ena lohia taudia ida ia lao.

36 Balaki ia kamonai Balama ia mai neganai, maoromaoro Moaba ena siti ta dekenai ia lao, Balama ia hedavari henia totona. Moaba be Aranona ena sinavai badinai ia noho, Moaba ena boda ai. 37 Balaki be Balama dekenai ia gwau: “Oi totona hereva lau siaia, ani? Dahaka dainai lau dekenai oi mai lasi? Oi laloa oi do lau hanamoa lasi, a?”+ 38 Balama be Balaki dekenai ia haere, ia gwau: “Hari oi dekenai lau mai vadaeni. To lau dekenai maoro do oi henia lau hereva totona, a? Dirava ese lau dekenai ia gwauraia hereva sibona lau gwauraia diba.”+

39 Vadaeni Balama be Balaki ida ia lao bona Kiriata-husoto dekenai idia ginidae. 40 Bona Balaki ese boromakau bona mamoe ia bouboulaidia bona haida be Balama bona ia ida idia noho lohia taudia dekenai ia siaia. 41 Daba ai Balaki ese Balama be Bamoto-bala dekenai ia hakaua daekau, bona unuseni amo taunimanima ibounai ia itaia diba.+

23 Bena Balama be Balaki dekenai ia gwau: “Inai gabu dekenai boubou pata 7 oi haginia,+ bona lau totona boromakau 7 bona mamoe tatau 7 oi hegaegaelaia.” 2 Maoromaoro Balaki be Balama ena hereva hegeregerena ia kara. Bona Balaki bona Balama be boubou pata ta ta dekenai boromakau ta bona mamoe tau ta idia bouboulaia.+ 3 Vadaeni Balama be Balaki dekenai ia gwau: “Emu gabua boubou badinai oi noho, bona do lau lao. Reana Iehova be lau dekenai do ia hedinarai. Bona lau dekenai do ia gwauraia herevana be oi do lau hamaoroa.” Bena Balama be ororo ta dekenai ia daekau lao, unuseniai tubutubu gaudia be lasi.

4 Bena Dirava be Balama dekenai ia hedinarai,+ bona Balama be Dirava dekenai ia gwau: “Lau ese boubou pata 7 be laini dekenai lau haginia, bona boromakau ta bona mamoe tau ta be unai pata ta ta edia latanai lau bouboulaia.” 5 Iehova ese Balama ena uduna ai inai hereva ia atoa:+ “Balaki dekenai oi giroa lou, bona oi ese inai hereva do oi gwauraia.” 6 Vadaeni ia giroa lou bona ia itaia Balaki bona Moaba ena lohia taudia ibounai be iena gabua boubou badinai idia gini. 7 Bena inai hereva ia gwauraia:+

‘Oi mai bona lau totona Iakobo oi gwauraia dika.

Oibe, oi mai bona Israela oi hereva auka henia.’+

 8 Dirava ese ia gwauraia dika lasi taudia be edena bamona do lau gwauraia dika?

Bona Iehova ese ia hereva auka henia lasi taudia be edena bamona do lau hereva auka henia?+

11 Bena Balaki be Balama dekenai ia gwau: “Lau dekenai dahaka oi karaia? Oi lau mailaia egu inai taudia dekenai hadikaia hereva oi gwauraia totona, to idia oi hanamoa bada.”+ 12 Balama ia haere: “Iehova ese egu uduna dekenai ia atoa hereva sibona do lau gwauraia, ani?”+

13 Balaki be ia dekenai ia gwau: “Mani lau ida oi mai gabu ma ta dekenai, unuseni amo idia oi itaia diba. Oi ese edia kahana ta sibona do oi itaia, to idia ibounai lasi. Unuseni amo lau totona idia dekenai hadikaia hereva oi gwauraia.”+ 14 Vadaeni Balaki ese ia be Sopimi ena uda lasi gabuna ta dekenai ia hakaua lao, unai be Pisiga ena ororo ai,+ bona boubou pata 7 ia haginia bona unai pata ta ta dekenai boromakau ta bona mamoe tau ta ia bouboulaia.+ 15 Bena Balama be Balaki dekenai ia gwau: “Emu gabua boubou badinai oi noho, do lau lao bona Dirava do lau hereva henia.” 16 Bona Iehova be Balama ia hereva henia bona ena uduna ai inai hereva ia atoa, ia gwau:+ “Balaki dekenai oi giroa lou, bona lau gwauraia hereva be ia oi hamaoroa.” 17 Bena Balama be Balaki dekenai ia mai bona ia itaia Balaki be iena gabua boubou badinai ia naria noho, bona Moaba ena lohia taudia be ia ida. Bona Balaki ese ia nanadaia: “Iehova be dahaka ia gwau?” 18 Bena ia ese inai hereva ia gwauraia:+

“Balaki e, oi toreisi, bona kamonai.

Siporo ena natuna e, lau oi kamonai henia.

Gau ta ia gwauraia neganai, do ia badinaia, ani?

Ia hereva neganai, ena hereva do ia hagugurua, ani?+

22 Dirava ese Aigupito amo idia ia hakaua raka-lasi.+

Idia dekenai, ia be dagedage boromakau ena doana bamona.+

Unai nega ai Iakobo bona Israela totona inai hereva do idia gwauraia:

‘Dirava ese ia karaia kara badadia oi itaia!’

25 Bena Balaki be Balama dekenai ia gwau: “Bema edia latanai hadikaia hereva oi gwauraia lasi, vadaeni idia oi hanamoa lasi be namo.” 26 Balama ese Balaki ia haere henia: “Oi lau hamaoroa vadaeni, ‘Iehova ese ia herevalaia gaudia ibounai do lau karaia,’ ani?”+

27 Balaki be Balama dekenai ia gwau: “Mani oi mai bona gabu ma ta dekenai oi lau hakaua lao. Reana Dirava momokani ena matanai do ia maoro, unuseni amo oi ese lau totona idia dekenai hadikaia hereva oi gwauraia.”+ 28 Vadaeni Balaki ese Balama ia hakaua lao Peoro ena ataiai, unuseni amo Iesimono* idia itaia diba.+ 29 Bena Balama be Balaki dekenai ia gwau: “Inai gabu ai boubou pata 7 oi haginia, bona lau totona boromakau 7 bona mamoe tatau 7 oi hegaegaelaia.”+ 30 Vadaeni Balaki be Balama ena hereva hegeregerena ia kara, bona unai pata ta ta edia latanai boromakau ta bona mamoe tau ta ia bouboulaia.

24 Balama ia itaia Iehova be Israela hanamoa karana dekenai ia moale neganai, ia be gabu ta dekenai ia lao lou lasi puripuri herevadia ia tahua totona,+ to taunimanima lasi gabuna ia vaira henia. 2 Balama ia itaia Israela be ena iduhu ta ta dekenai ia kamepa neganai,+ Dirava ena lauma be ia latanai ia diho.+ 3 Bena inai hereva ia gwauraia:+

10 Bena Balaki be Balama dekenai ia badu dikadika. Balaki be mai hemataurai lasi ida ena imana ruaosi ia pataia hebou bona Balama dekenai ia gwau: “Oi lau boiria egu inai taudia dekenai hadikaia hereva oi gwauraia totona,+ to nega toi idia oi hanamoa. 11 Vadaeni harihari emu gabu dekenai oi giroa lou. Lau ura oi lau hanamoa bada,+ to Iehova ese oi ia koua unai hahenamo oi abia totona.”

12 Balama be Balaki dekenai ia gwau: “Oi siaia gwaukau taudia dekenai lau gwau, 13 ‘Ena be Balaki ese lau dekenai iena ruma, siliva bona golo amo ia honu rumana ia henia, to lau be Iehova ena oda, ena be ia be namo eiava dika, unai hegeregerena do lau kara, to sibona egu ura* do lau karaia lasi. Iehova ese lau dekenai ia gwauraia herevadia sibona do lau gwauraia.’+ 14 Bona hari lau be egu taunimanima dekenai do lau lao. Oi mai bona oi dekenai inai taunimanima ese vaira nega ai* emu taunimanima dekenai do idia karaia gauna do lau gwauraia.” 15 Vadaeni inai hereva ia gwauraia:+

20 Ia ese Amaleka ia itaia neganai, ia hereva noho ia gwau:

21 Ia ese Kene taudia ia itaia neganai,+ ia hereva noho ia gwau:

“Emu noho gabuna be goada, ia be nadi badana latanai.

22 To tau ta ese Kene* do ia gabua ore.

Edena negai Asuria ese oi do ia abia mauri?”

23 Bona ia hereva noho, ia gwau:

“Dirava ese unai ia karaia neganai, daika do ia roho mauri?

To idia* danu do idia ore momokani.”

25 Bena Balama+ ia toreisi bona ena gabu dekenai ia giroa lou. Bona Balaki danu be sibona ena dala dekenai ia lao.

25 Israela taudia be Sitima dekenai idia kamepa noho lalonai,+ idia be Moaba hahinedia ida matabodaga karadia idia karaia.+ 2 Unai hahine ese Israela taudia idia boiria edia dirava edia boubou karadia idia karaia totona,+ bona boubou gaudia idia ania bona edia dirava idauidau dekenai idia tui diho.+ 3 Vadaeni Israela taudia be Peoro ena Bala diravadia idia tomadiho henia,+ bona Iehova be idia dekenai ia badu momokani. 4 Iehova be Mose dekenai ia gwau: “Inai taunimanima edia gunalaia taudia ibounai oi dogoatao, oi hamasedia, bona dina ena diari ai Iehova vairanai oi tauadae, vadaeni Israela taudia amo Iehova ena badu siahuna do ia koua.” 5 Bena Mose be Israela ena hahemaoro taudia dekenai ia gwau:+ “Namona be umui ta ta ese emui siahu henunai idia noho tatau, Peoro ena Bala diravadia idia tomadiho henia tatau unai, do umui alaia mase.”+

6 To unai nega ai, Mose bona Israela taudia ibounai be hebou dubu ena vareai gabuna ai idia taitai noho lalonai, Israela tauna ta be ena tadikaka kahirakahira dekenai Midiana hahine ta ia hakaua mai.+ 7 Hahelaga tauna Arona ena tubuna mero Pineha,+ Eleasara ena natuna unai, ese unai ia itaia neganai, karaharaga Israela taudia huana amo ia toreisi bona io ta ia abia. 8 Bena unai Israela tauna murinai ia lao bona ena palai ruma lalonai ia vareai bona unai Israela tauna bona hahine ia gwadaia, hahine be ena bogana dekenai ia gwadaia. Unai neganai Israela taudia dekenai gorere ia ore.+ 9 Unai gorere amo idia mase taudia ibounai be 24,000.+

10 Bena Iehova be Mose dekenai ia gwau: 11 “Hahelaga tauna Arona ena tubuna mero Pineha,+ Eleasara ena natuna unai, ese Israela taudia amo egu badu ia koua, badina ia ura lasi idia ese dirava ma ta idia tomadiho henia, to lau sibona.+ Unai dainai, Israela taudia lau hamasea ore lasi, ena be lau ura idia be lau sibona idia tomadiho henia.+ 12 Unai dainai ia oi hamaoroa, ‘Lau be ia ida maino gwaubou lau karaia. 13 Unai gwaubou dainai ia bona ena bese taudia be nega daudau lalonai hahelaga gaukara do idia karaia,+ badina ia ura lasi dirava ma ta ese iena Dirava ena gabu ia abia+ bona Israela taudia totona kara dika karaia boubou ia henia.’”

14 Unai Midiana hahine ida idia hamasea hebou Israela tauna ena ladana be Simiri. Ia be Salu ena natuna, Salu be Simeona iduhu ena gunalaia tauna ta. 15 Bona idia hamasea Midiana hahine ena ladana be Kosobi, ia be Suru ena natuna kekeni.+ Midiana ai, Suru be iduhu gunalaia tauna.+

16 Gabeai Iehova be Mose dekenai ia gwau: 17 “Midiana taudia umui tuari henia bona idia umui alaia mase,+ 18 badina idia be mai koikoi ida emui lalona idia veria Peoro ena Bala dirava umui tomadiho henia+ bona Midiana ena gunalaia tauna ena natuna kekeni, Kosobi ida umui kara dika totona. Peoro diravana dainai ia vara gorere dinana ai unai hahine idia hamasea.”+

26 Gorere ia ore murinai,+ Iehova ese Mose bona hahelaga tauna Arona ena natuna Eleasara dekenai ia gwau: 2 “Edia mauri lagani be 20 bona unai lagani idia hanaia Israela taudia ibounai do umui duahia, edia iduhu ta ta hegeregerena. Israela ai tuari lalonai idia vareai diba taudia ibounai do umui duahia.”+ 3 Bena Mose bona hahelaga tauna Eleasara+ be Moaba ena taunimanima lasi gabuna ai idia ida idia herevahereva,+ unai be Ioridane badinai, Ieriko kahirakahira ai.+ Idia gwau: 4 “Edia mauri lagani be 20 bona unai lagani idia hanaia Israela taudia ibounai do umui duahia, Iehova ese Mose ia oda henia hegeregerena.”+

Vadaeni Aigupito amo idia raka-lasi Israela taudia be inai: 5 Israela ena vara guna natuna be Rubena.+ Iena natuna+ Hanoka amo be Hanoka besena ia mai, Palu amo be Palu besena, 6 Hesarona amo be Hesarona besena, bona Karami amo be Karami besena. 7 Inai be Rubena iduhu amo idia mai besedia, bona idia rejistaia taudia ibounai be 43,730.+

8 Palu ena natuna be Eliaba. 9 Bona Eliaba ena natudia be Nemuele, Datana, bona Abirama. Datana bona Abirama be Israela taudia edia abia hidi taudia.+ Idia bona Kora ena orea taudia be Mose bona Arona ida idia hepapahuahu neganai,+ unai be Iehova ida idia hepapahuahu bamona.+

10 Bena tano ia kehoa bona idia ibounai ia hadonoa. To lahi ese tatau 250 ia araia neganai,+ Kora bona ena bamodia danu be unai lahi lalonai idia mase ore. Bona idia be haheitalai dikana ai idia lao.+ 11 To, Kora ena natudia memero idia mase lasi.+

12 Simeona ena natudia+ edia bese taudia be inai: Nemuele amo be Nemuele besena, Iamina amo be Iamina besena, Iakini amo be Iakini besena, 13 Sera amo be Sera besena, bona Sahulo amo be Sahulo besena. 14 Inai be Simeona iduhu amo idia mai besedia, bona idia rejistaia taudia ibounai be 22,200.+

15 Gado ena natudia+ edia bese taudia be inai: Sepona amo be Sepona besena, Hagi amo be Hagi besena, Suni amo be Suni besena, 16 Osini amo be Osini besena, Eri amo be Eri besena, 17 Arodi amo be Arodi besena, bona Areli amo be Areli besena. 18 Inai be Gado ena natudia amo idia mai besedia, bona idia rejistaia taudia ibounai be 40,500.+

19 Iuda ena natudia+ be Ere bona Onana.+ To, Ere bona Onana be Kanana tano ai idia mase.+ 20 Bona Iuda ena natudia ma haida edia bese taudia be inai: Selaha amo+ be Selaha besena, Perese amo+ be Perese besena, bona Sera amo+ be Sera besena. 21 Bona Perese ena natudia edia bese taudia be inai: Hesarona amo+ be Hesarona besena, bona Hamulu amo+ be Hamulu besena. 22 Inai be Iuda iduhu amo idia mai besedia, bona idia rejistaia taudia ibounai be 76,500.+

23 Isakara ena natudia+ edia bese taudia be inai: Tola amo+ be Tola besena, Puva amo be Punu besena, 24 Iasubu amo be Iasubu besena, bona Simarona amo be Simarona besena. 25 Inai be Isakara iduhu amo idia mai besedia, bona idia rejistaia taudia ibounai be 64,300.+

26 Sebuluno ena natudia+ edia bese taudia be inai: Sereda amo be Sereda besena, Elona amo be Elona besena, bona Ialela amo be Ialela besena. 27 Inai be Sebuluno iduhu amo idia mai besedia, bona idia rejistaia taudia ibounai be 60,500.+

28 Iosepa ena natudia+ be Manase bona Eparaima, bona edia bese taudia be inai:+ 29 Manase ena natuna+ Makiri amo+ be Makiri besena ia mai. Bona Makiri be Gileada ena tamana.+ Bona Gileada amo be Gileada besena. 30 Gileada ena natudia be inai: Iesere amo be Iesere besena, Heleke amo be Heleke besena, 31 Asariele amo be Asariele besena, Sekema amo be Sekema besena, 32 Semida amo be Semida besena, bona Hepere amo be Hepere besena. 33 Hepere ena natuna Selopehada be natudia memero lasi, to natudia kekeni sibona,+ bona Selopehada ena natudia kekeni edia ladadia be,+ Mahala, Noa, Hogila, Milika, bona Tirisa. 34 Inai be Manase iduhu amo idia mai besedia, bona idia rejistaia taudia ibounai be 52,700.+

35 Eparaima ena natudia+ edia bese taudia be inai: Sutela amo+ be Sutela besena, Bekere amo be Bekere besena, bona Tahana amo be Tahana besena. 36 Bona Sutela ena natuna be inai: Erana amo be Erana besena. 37 Inai be Eparaima ena natudia amo idia mai besedia, bona idia rejistaia taudia ibounai be 32,500.+ Inai be Iosepa ena natudia edia bese taudia.

38 Beniamina ena natudia+ edia bese taudia be inai: Bela amo+ be Bela besena, Asabela amo be Asabela besena, Ahirama amo be Ahirama besena, 39 Sepupama amo be Supama besena, bona Hupama amo be Hupama besena. 40 Bela ena natudia be Arada bona Namana.+ Bona Arada amo be Arada besena, bona Namana amo be Namana besena. 41 Inai be Beniamina ena natudia edia bese taudia, bona idia rejistaia taudia ibounai be 45,600.+

42 Dano ena natuna+ be inai: Suhama amo be Suhama besena. Unai be Dano ena bese taudia edia famili. 43 Inai be Suhama ena bese taudia ibounai, bona idia rejistaia taudia ibounai be 64,400.+

44 Asere ena natudia+ edia bese taudia be inai: Imina amo be Imina besena, Isivi amo be Isivi besena, bona Beria amo be Beria besena. 45 Bona Beria ena natudia edia bese taudia be inai: Hebere amo be Hebere besena, Malakiela amo be Malakiela besena. 46 Asere ena natuna kekeni ena ladana be Seraha. 47 Inai be Asere ena natudia edia bese taudia, bona idia rejistaia taudia ibounai be 53,400.+

48 Napatali ena natudia+ edia bese taudia be inai: Iasela amo be Iasela besena, Guni amo be Guni besena, 49 Iasere amo be Iasere besena, bona Silema amo be Silema besena. 50 Inai be Napatali ena bese taudia edia famili, bona idia rejistaia taudia ibounai be 45,400.+

51 Idia rejistaia Israela taudia ibounai be 601,730.+

52 Unai murinai Iehova be Mose dekenai ia gwau: 53 “Namona be iduhu ta ta ai idia noho taudia edia namba hegeregerena tano oi haria, unai be edia ahuna.+ 54 Bese badana totona, tano ena kahana badana oi henia be namo, bona bese maragina totona, tano ena kahana maragina oi henia.+ Orea ta ta lalonai idia rejista taudia edia namba hegeregerena edia ahuna oi henia. 55 To, namona be gadara ta* amo tano oi haria.+ Bona edia tamadia edia iduhu ta ta hegeregerena ai edia ahuna idia abia be namo. 56 Edia ahuna ta ta be unai gadara amo do idia dibaia bona unai hegeregerena orea badana bona orea maragina huanai tano idia haria.”

57 Levi iduhu amo idia rejistaia taudia edia famili ta ta be inai:+ Geresone amo be Geresone besena, Kohata amo+ be Kohata besena, bona Merari amo be Merari besena. 58 Bona Levi besena amo idia mai taudia ma haida be inai: Libini ena bese taudia,+ Heberona ena bese taudia,+ Mali ena bese taudia,+ Musi ena bese taudia,+ bona Kora ena bese taudia.+

Kohata be Amarama ena tamana.+ 59 Bona Amarama ena adavana ena ladana be Iokebeda,+ ia be Levi ena natuna kekeni bona Aigupito ai ia vara. Gabeai Amarama amo Iokebeda ese Arona, Mose, bona edia taihuna Miriama ia havaraia.+ 60 Bena Arona amo be Nadaba, Abihu, Eleasara, bona Itamara idia vara.+ 61 To Nadaba bona Abihu idia mase, badina taravatu ese ia gwauraia lasi lahina be Iehova vairanai idia henia.+

62 Idia rejistaia memero bona tatau ibounai, hua tamona bona idia hanaia taudia ibounai unai, be 23,000.+ Israela taudia huanai idia ese ahuna do idia abia lasi dainai,+ idia be Israela taudia ida idia rejistaia hebou lasi.+

63 Mose bona hahelaga tauna Eleasara ese Israela taudia edia ladadia idia rejistaia neganai, unai Israela taudia danu idia rejistaia. Unai be Moaba ena taunimanima lasi gabuna ai idia karaia, Ioridane badinai, ia be Ieriko kahirakahira ai. 64 To guna Mose bona hahelaga tauna Arona ese Sinai ena taunimanima lasi gabuna ai, Israela taudia idia duahia neganai, idia rejistaia tauna ta be inai taudia huanai ia noho lasi.+ 65 Badina idia totona Iehova ia gwau: “Idia be taunimanima lasi gabuna ai do idia mase ore.”+ Vadaeni idia ta ia mauri lasi, to Iepune ena natuna Kaleba bona Nunu ena natuna Iosua sibona idia mauri.+

27 Selopehada be Hepere ena natuna, Hepere be Gileada ena natuna, Gileada be Makiri ena natuna, bona Makiri be Manase ena natuna. Selopehada ena natudia kekeni be Mahala, Noa, Hogila, Milika, bona Tirisa,+ idia be Iosepa ena natuna Manase ena famili amo. Unai kekeni idia mai, 2 bona Mose, hahelaga tauna Eleasara, iduhu gunalaia taudia,+ bona hebou dubu ena vareai gabuna ai idia gini taudia ibounai vairanai idia gini, bona idia gwau: 3 “Aiemai tamana be taunimanima lasi gabuna ai ia mase, to ia be Iehova idia hepapahuahu henia oreana, Kora ena bamodia unai,+ edia huanai ia noho lasi, to sibona ena kara dika dainai ia mase bona ia be mai ena natudia memero lasi. 4 Dahaka dainai emai tamana ena ladana be ena iduhu taudia huanai do ia boio? Ia be mai ena natuna mero lasi dainai, a? Emai tamana ena tadikaka huana amo ai dekenai tano umui henia be namo.” 5 Vadaeni Mose ese edia hekwakwanai be Iehova dekenai ia gwauraia.+

6 Bena Iehova be Mose dekenai inai ia gwauraia: 7 “Selopehada ena natudia kekeni be idia maoro. Namona be edia tamana ena tadikakadia huana amo idia dekenai tano oi henia, edia ahuna bamona, bona edia tamana ena ahuna be idia ese do idia abia.+ 8 Bona Israela taudia oi hamaoroa, ‘Bema tau ta be mai ena natuna mero lasi bena ia mase, namona be ena ahuna be ena natuna kekeni dekenai umui henia hanai. 9 Bona bema ia be mai ena natuna kekeni lasi, umui ese unai tau ena ahuna be ena tadikakadia dekenai do umui henia. 10 Bona bema ia be mai ena tadikakadia lasi, umui ese ena ahuna be ena tamana ena tadikakadia dekenai do umui henia. 11 Bona bema ena tamana be mai ena tadikakadia lasi, umui ese ena ahuna be ena varavara korikori dekenai do umui henia, bona ia ese do ia abia. Israela taudia totona unai hahemaoro herevana be taravatu ai do ia lao, Iehova ese Mose ia oda henia hegeregerena.’”

12 Bena Iehova be Mose dekenai ia gwau: “Abarima ororo dekenai oi daekau lao,+ bona Israela taudia dekenai do lau henia tanona oi itaia.+ 13 Unai tano oi itaia murinai, do oi mase bona emu sene taudia edia guria gabuna ai oi do idia guria,*+ emu tadikaka Arona bamona,+ 14 badina Seni ena taunimanima lasi gabuna ai Israela taudia be lau ida idia hepapahuahu neganai, umui be egu oda umui badinaia lasi bona taunimanima vairanai lau umui hahelagaia lasi, ranu lau henia neganai.+ Unai be Kadesi+ ai ia noho Meriba ranudia ai,+ Seni ena taunimanima lasi gabuna dekenai.”+

15 Bena Mose be Iehova dekenai ia gwau: 16 “Namona be Iehova, taunimanima ibounai dekenai mauri ia henia Diravana, ese taunimanima huanai tau ta ia abia hidi. 17 Bona edia gaukara idauidau lalonai idia do ia gunalaia bona idia do ia hakaua raka-lasi bona hakaua vareai, unai amo Iehova ena taunimanima be mai edia naria tauna, idia be noho kava mamoe bamona lasi.” 18 Vadaeni Iehova be Mose dekenai ia gwau: “Nunu ena natuna Iosua oi abia, ia be laloa namonamo tauna dainai ia hegeregere gunalaia gaukara ia karaia totona, bona ia latanai emu imana oi atoa.+ 19 Bena hahelaga tauna Eleasara bona Israela taudia ibounai vairanai ia oi haginia, bona edia vairanai ia be gunalaia tauna ai oi halaoa.+ 20 Oi ese emu siahu* be ia dekenai oi henia,+ unai amo Israela taudia ibounai ese ia idia kamonai henia diba.+ 21 Ia be hahelaga tauna Eleasara vairanai do ia gini, bona Eleasara be ia dainai Urima*+ amo Iehova ena lalohadai do ia tahua. Bona unai oda hegeregerena do idia raka-lasi bona unai oda hegeregerena do idia vareai, ia bona Israela taudia ibounai.”

22 Vadaeni Mose be Iehova ena oda hegeregerena ia kara. Ia ese Iosua ia abia bona hahelaga tauna Eleasara bona Israela taudia ibounai vairanai ia haginia, 23 bona ena imana be ia latanai ia atoa bona gunalaia tauna ai ia halaoa,+ Iehova ese Mose ia oda henia hegeregerena.+

28 Gabeai Iehova be Mose dekenai ia gwau: 2 “Israela taudia oi oda henia, oi gwau, ‘Namona be lau dekenai egu aniani boubou umui henia. Idia abia hidi negadiai, egu lahi bouboudia be lau dekenai do umui henia, bonana namo bouboudia bamona.’+

3 “Bona idia dekenai oi gwau, ‘Lahi boubou totona Iehova dekenai do umui mailaia gaudia be inai: Mamoe natudia memero rua, mauri lagani tamona gaudia, be gabua boubou totona hanaihanai dina ta ta ai do umui henia.+ 4 Mamoe natuna mero ta be daba ai do umui henia, bona ma ta be dina ena diho ai do umui henia.+ 5 Bona idia be paraoa namona ifa ta ena 10 pesen* ida do umui henia, hin ta* ena 25 pesen olive oela goevana ida idia mikisia gauna, ia be aniani boubou bamona do umui henia.+ 6 Inai gabua boubou be hanaihanai umui henia gauna,+ unai be Sinai Ororo dekenai ia matamaia, ia be bonana namo lahi boubou Iehova dekenai. 7 Bona ia ida hin ta ena 25 pesen wain do umui henia, mamoe natuna mero ta danu umui henia.+ Oi ese unai alkahol be gabu helagana dekenai do oi bubua, ia be wain boubou Iehova dekenai. 8 Bona dina ena diho ai, mamoe natuna mero ma ta do oi henia. Bona ia ida aniani boubou bona wain boubou do oi henia, daba ai oi henia gaudia hegeregerena. Unai be lahi boubou totona do oi henia, bonana namo gauna Iehova dekenai.+

9 “‘To Sabati dinana ai,+ namona be mamoe natudia memero namodia rua, mauri lagani tamona gaudia, do oi henia, bona oela ida idia mikisia paraoa namona ifa ta ena 20 pesen be aniani boubou totona do oi henia, ena wain boubou danu. 10 Unai be Sabati dinana ena gabua boubou, ia be hanaihanai gabua boubou bona wain boubou ida do umui henia.+

11 “‘Hua ta ta edia matamana ai, Iehova dekenai do umui mailaia gabua bouboudia be inai: Boromakau rua, mamoe tau tamona, bona mamoe natudia memero namodia 7, mauri lagani tamona gaudia.+ 12 Bona oela ida idia mikisi paraoa namona ifa ta ena 30 pesen+ be boromakau ta ta totona do umui henia, aniani boubou totona, bona oela ida idia mikisi paraoa namona ifa ta ena 20 pesen be mamoe tau totona do umui henia, unai be aniani boubou totona.+ 13 Bona mamoe natuna mero ta totona, oela ida idia mikisia paraoa namona ifa ta ena 10 pesen be aniani boubou totona do umui henia, ia be gabua boubou, bonana namo gauna,+ lahi boubou Iehova dekenai. 14 Bona edia wain bouboudia be inai: Boromakau tamona totona hin ta ena 50 pesen wain,+ mamoe tau ta totona hin ta ena 33 pesen wain,+ bona mamoe natuna mero totona hin ta ena 25 pesen wain.+ Lagani ta lalonai unai gabua boubou be hua ta ta ai umui henia. 15 Danu, hanaihanai umui henia gabua boubou bona ena wain boubou sibona lasi, to namona be nanigosi natuna ta be Iehova dekenai umui henia, kara dika boubou bamona.

16 “‘Hua ginigunana ena dina namba 14 be Iehova ena Pasova.+ 17 Bona unai hua ena dina namba 15 be aria dinana. Dina 7 lalonai isti lasi paraoa do umui ania.+ 18 Dina ginigunana ai hebou helagana do umui karaia, gaukara metauna ta do umui karaia lasi. 19 Bona gabua boubou totona Iehova dekenai do umui mailaia gaudia be inai: Boromakau rua, mamoe tau tamona, bona mamoe natudia 7, mauri lagani tamona gaudia. Namona be animal namodia umui henia.+ 20 Bona unai bouboudia danu oela ida idia mikisia paraoa namona do umui henia,+ boromakau ta totona be paraoa namona ifa ta ena 30 pesen bona mamoe tau ta totona be paraoa namona ifa ta ena 20 pesen. 21 Oi ese mamoe natudia memero 7 ta ta totona paraoa namona ifa ta ena 10 pesen ta ta do umui henia, 22 bona nanigosi ta be kara dika boubou totona do umui henia, emui kara dika davana karaia totona. 23 Umui ese unai gaudia sibona do umui henia lasi, to daba ena gabua boubou, hanaihanai umui henia gauna unai, do umui henia danu. 24 Umui ese dina ta ta ai unai gaudia be dala tamona ai do umui henia aniani boubou totona, dina 7 lalonai. Ia be lahi boubou, bonana namo gauna Iehova dekenai. Ia be hanaihanai umui henia gabua boubou mai ena wain boubou ida do umui henia. 25 Namona be dina namba 7 ai hebou helagana umui karaia,+ bona gaukara metauna ta umui karaia lasi.+

26 “‘Uma ena anina ginigunadia haboua dinana ai,+ Iehova dekenai anina matamata umui henia neganai,+ namona be emui aria edia wiki lalodiai hebou helagana do umui karaia.+ Namo lasi gaukara metauna ta umui karaia.+ 27 Umui ese boromakau rua, mamoe tau tamona, bona mamoe natudia memero 7, mauri lagani tamona gaudia, do umui mailaia, unai be bonana namo gabua bouboudia bamona Iehova dekenai.+ 28 Bona unai bouboudia danu oela ida idia mikisia paraoa namona ifa ta ena 30 pesen be boromakau ta ta totona do umui henia, bona ifa ta ena 20 pesen be mamoe tau tamona totona. 29 Umui ese mamoe natudia memero 7 ta ta totona be paraoa namona ifa ta ena 10 pesen ta ta do umui henia, 30 bona nanigosi natuna ta danu, emui kara dika davana karaia totona.+ 31 Umui ese unai sibona do umui henia lasi, to hanaihanai umui henia gabua bouboudia bona edia aniani bouboudia danu do umui henia. Namona be idia be animal namodia,+ bona idia be edia wain bouboudia ida do umui henia.

29 “‘Bona hua namba 7 ena dina ginigunana ai, namona be hebou helagana umui karaia. Namo lasi gaukara metauna ta umui karaia.+ Unai dina ai kibi umui hiriria be namo.+ 2 Umui ese gabua boubou bamona, bonana namo totona Iehova dekenai do umui henia gaudia be inai: Boromakau natuna ta, mamoe tau ta, bona mamoe natudia 7, mauri lagani tamona gaudia, idia ibounai be animal namodia. 3 Bona danu, oela ida idia mikisia paraoa namona be aniani boubou bamona do umui mailaia. Boromakau ta totona be paraoa namona ifa ta ena 30 pesen bona mamoe tau ta totona be paraoa namona ifa ta ena 20 pesen, 4 bona mamoe natudia memero 7 ta ta totona be paraoa namona ifa ta ena 10 pesen do umui henia, 5 bona nanigosi natuna mero ta be kara dika boubou bamona do umui henia, emui kara dika davana karaia totona. 6 Bona danu, hua ta ta ena gabua bouboudia+ bona hanaihanai umui henia gabua bouboudia be edia aniani bona wain bouboudia ida do umui mailaia,+ hanaihanai umui karaia dalana hegeregerena. Ia be bonana namo gauna, lahi boubou Iehova dekenai.

7 “‘Bona inai hua namba 7 ena dina namba 10 ai, umui ese hebou helagana do umui karaia,+ bona emui kara dika dainai umui lalohisihisi be namo.* Namo lasi gaukara ta umui karaia.+ 8 Umui ese gabua boubou bamona, bonana namo totona Iehova dekenai do umui henia gaudia be inai: Boromakau natuna ta, mamoe tau ta, bona mamoe natudia memero 7, mauri lagani tamona gaudia, idia ibounai be animal namodia.+ 9 Bona danu, oela ida idia mikisi paraoa namona be edia aniani boubou bamona do umui henia. Boromakau ta totona be paraoa namona ifa ta ena 30 pesen bona mamoe tau totona be paraoa namona ifa ta ena 20 pesen, 10 bona mamoe natudia memero 7 ta ta totona be paraoa namona ifa ta ena 10 pesen do umui henia, 11 bona kara dika boubou totona nanigosi natuna ta do umui mailaia. Bona kara dika davana karaia boubou+ bona hanaihanai umui henia gabua boubou, ena aniani boubou, bona ena wain boubou danu do umui henia.

12 “‘Bona hua namba 7 ena dina namba 15 ai, namona be hebou helagana do umui karaia. Namo lasi gaukara metauna umui karaia. Dina 7 lalonai Iehova dekenai aria ta do umui karaia.+ 13 Umui ese gabua boubou bamona,+ bonana namo totona Iehova dekenai do umui henia gaudia be inai: Boromakau natudia 13, mamoe tatau rua, bona mamoe natudia 14, mauri lagani tamona gaudia, idia ibounai be animal namodia.+ 14 Bona danu, oela ida idia mikisi paraoa namona be edia aniani boubou bamona do umui mailaia. Boromakau 13 ta ta totona be paraoa namona ifa ta ena 30 pesen bona mamoe tatau ta ta totona be paraoa namona ifa ta ena 20 pesen, 15 bona mamoe natudia memero 14 ta ta totona be paraoa namona ifa ta ena 10 pesen do umui henia, 16 bona kara dika boubou totona nanigosi natuna ta do umui mailaia bona hanaihanai umui henia gabua boubou, ena aniani boubou, bona ena wain boubou danu.+

17 “‘Bona dina iharuana ai, boromakau natudia 12, bona mamoe tatau rua, bona mamoe natudia memero 14, mauri lagani tamona gaudia, do umui mailaia, idia ibounai be animal namodia.+ 18 Bona boromakau, mamoe tatau, bona mamoe natudia memero edia namba hegeregerena, aniani boubou bona edia wain boubou do umui mailaia, hanaihanai umui karaia dalana hegeregerena, 19 bona kara dika boubou totona nanigosi natuna ta do umui mailaia. Bona hanaihanai umui henia gabua boubou, ena aniani boubou, bona ena wain boubou danu.+

20 “‘Bona dina ihatoina ai, boromakau 11, mamoe tatau rua, bona mamoe natudia memero 14, mauri lagani tamona gaudia, do umui mailaia, idia ibounai be animal namodia.+ 21 Bona boromakau, mamoe tatau, bona mamoe natudia memero edia namba hegeregerena, aniani boubou bona edia wain boubou do umui mailaia, hanaihanai umui karaia dalana hegeregerena, 22 bona kara dika boubou totona nanigosi ta do umui mailaia. Bona hanaihanai umui henia gabua boubou, ena aniani boubou, bona ena wain boubou danu.+

23 “‘Bona dina namba 4 ai, boromakau 10, mamoe tatau rua, bona mamoe natudia memero 14, mauri lagani tamona gaudia, do umui mailaia, idia ibounai be animal namodia.+ 24 Bona boromakau, mamoe tatau, bona mamoe natudia memero edia namba hegeregerena, aniani boubou bona edia wain boubou do umui mailaia, hanaihanai umui karaia dalana hegeregerena, 25 bona kara dika boubou totona nanigosi natuna ta do umui mailaia. Bona hanaihanai umui henia gabua boubou, ena aniani boubou, bona ena wain boubou danu.+

26 “‘Bona dina namba 5 ai, boromakau 9, mamoe tatau rua, bona mamoe natudia memero 14, mauri lagani tamona gaudia, do umui mailaia, idia ibounai be animal namodia.+ 27 Bona boromakau, mamoe tatau, bona mamoe natudia memero edia namba hegeregerena, aniani boubou bona edia wain boubou do umui mailaia, hanaihanai umui karaia dalana hegeregerena, 28 bona kara dika boubou totona nanigosi natuna ta do umui mailaia. Bona hanaihanai umui henia gabua boubou, ena aniani boubou, bona ena wain boubou danu.+

29 “‘Bona dina namba 6 ai, boromakau 8, mamoe tatau rua, bona mamoe natudia memero 14, mauri lagani tamona gaudia, do umui mailaia, idia ibounai be animal namodia.+ 30 Bona boromakau, mamoe tatau, bona mamoe natudia memero edia namba hegeregerena, aniani boubou bona edia wain boubou do umui mailaia, hanaihanai umui karaia dalana hegeregerena, 31 bona kara dika boubou totona nanigosi ta do umui mailaia. Bona hanaihanai umui henia gabua boubou, ena aniani boubou, bona ena wain boubou danu.+

32 “‘Bona dina namba 7 ai, boromakau 7, mamoe tatau rua, bona mamoe natudia memero 14, mauri lagani tamona gaudia, do umui mailaia, idia ibounai be animal namodia.+ 33 Bona boromakau, mamoe tatau, bona mamoe natudia memero edia namba hegeregerena, aniani boubou bona edia wain boubou do umui mailaia, hanaihanai umui karaia dalana hegeregerena, 34 bona kara dika boubou totona nanigosi ta do umui mailaia. Bona hanaihanai umui henia gabua boubou, ena aniani boubou, bona ena wain boubou danu.+

35 “‘Dina namba 8 ai, namona be hebou helagana umui karaia. Namo lasi gaukara metauna ta umui karaia.+ 36 Umui ese gabua boubou bamona, bonana namo totona Iehova dekenai do umui henia gaudia be inai: Boromakau ta, mamoe tau ta, bona mamoe natudia 7, mauri lagani tamona gaudia, idia ibounai be animal namodia.+ 37 Bona boromakau, mamoe tatau, bona mamoe natudia memero edia namba hegeregerena, aniani boubou bona edia wain boubou do umui mailaia, hanaihanai umui karaia dalana hegeregerena, 38 bona kara dika boubou totona nanigosi natuna ta do umui mailaia. Bona hanaihanai umui henia gabua boubou, ena aniani boubou, bona ena wain boubou danu.+

39 “‘Unai gaudia be emui aria negadia ai Iehova dekenai do umui henia.+ Bona danu emui gwauhamata bouboudia+ bona harihari bouboudia+ be gabua bouboudia,+ aniani bouboudia,+ wain bouboudia,+ bona maino karaia bouboudia bamona do umui henia.’”+ 40 Mose ese Israela taudia ibounai dekenai unai gaudia ibounai ia gwauraia, Iehova ese ia oda henia hegeregerena.

30 Bena Mose be Israela ena iduhu kwaradia+ dekenai ia gwau: “Iehova ena oda herevana be inai: 2 Bema tau ta be Iehova dekenai ia gwauhamata+ eiava gwauhamata metauna+ ia karaia kara ta ia karaia lasi totona, namona be ena hereva ia hagugurua.+ Ia gwauhamatalaia gaudia ibounai ia karaia be namo.+

3 “Bona bema hahine matamata ta be ena tamana ena ruma ai ia noho lalonai Iehova dekenai ia gwauhamata kara ta ia karaia totona, eiava kara ta do ia karaia lasi gwauhamatana ia karaia, 4 bona ena tamana ese ena gwauhamata eiava kara ta do ia karaia lasi gwauhamatana ia kamonai bona ia koua lasi, vadaeni unai hahine matamata ese ena gwauhamata ibounai ia hagugurua be namo, kara ta do ia karaia lasi gwauhamatana danu. 5 To bema ena tamana ese ena gwauhamata eiava kara ta do ia karaia lasi gwauhamatana ia kamonai bona ia koua, vadaeni unai gwauhamata do ia hagugurua lasi. Iehova ese unai hahine matamata do ia gwauatao, badina ena tamana ese ia koua.+

6 “To, bema unai hahine matamata ia gwauhamata eiava ia laloa namonamo lasi bona ia gwauhamata, bona unai henunai ia do noho lalonai ia headava 7 bona ena adavana ese unai ia kamonai bona unai dina ai ia koua lasi, vadaeni unai hahine ena gwauhamata eiava kara ta do ia karaia lasi gwauhamatana do ia hagugurua be namo. 8 To bema ena tau ese unai gwauhamata ia kamonai dinana ai ia koua, vadaeni tau ese unai gwauhamata eiava laloa namonamo lasi gwauhamatana ia koua diba,+ bona Iehova ese hahine do ia gwauatao.

9 “To bema vabu ta eiava ia divos hahine ese gwauhamata ta ia karaia, unai gwauhamata ibounai ia hagugurua be namo.

10 “To, bema hahine be ena adavana ena ruma ai ia noho lalonai ia gwauhamata eiava kara ta do ia karaia lasi gwauhamatana ia karaia, 11 bona ena adavana be unai gwauhamata ia kamonai bona ia dadaraia eiava koua lasi, vadaeni hahine ena gwauhamata ibounai eiava kara ta do ia karaia lasi gwauhamatana ia hagugurua be namo. 12 To bema ena tau be unai gwauhamata ia kamonai dinana ai, hahine ena gwauhamata eiava kara ta do ia karaia lasi gwauhamata ia koudia momokani, vadaeni ia hagugurudia lasi be namo.+ Iena tau ese ia koua dainai, Iehova ese hahine do ia gwauatao. 13 Bema hahine ia gwauhamata eiava gwauhamata metauna ia karaia kara ta do ia karaia lasi, namona be tau ese disisen do ia karaia bema hahine ese unai do ia hagugurua eiava lasi. 14 To bema dina ta ta ai ena tau be hereva ta ia gwauraia lasi, ia ese ena hahine ena gwauhamata ibounai eiava kara ta do ia karaia lasi gwauhamatadia ia hamomokania danu. Badina ia ese unai gwauhamatadia ia kamonai dinana ai ia koudia lasi. 15 To bema tau ese unai gwauhamata ia kamonai bona nega sisina ia hanaia murinai ia koudia, ia ese hahine ena kerere davana do ia abia.+

16 “Inai taravatu be Iehova ese Mose dekenai ia henia, ia be tau bona ena adavana bona tamana bona ena ruma ai ia noho natuna kekeni totona.”

31 Bena Iehova be Mose ia hamaoroa: 2 “Israela taudia totona Midiana taudia edia dika davana oi haloua.+ Gabeai do oi mase bona emu sene taudia idia guria gabuna ai oi do idia guria.”*+

3 Vadaeni Mose be taunimanima ia hereva henia, ia gwau: “Emui huana amo tatau umui hegaegaelaia Midiana taudia idia tuari henia totona, bona Iehova ena badu be idia latanai do idia mailaia. 4 Namona be Israela ena iduhu ibounai amo, taunimanima 1,000 be iduhu ta ta amo tuari totona umui siaia lao.” 5 Vadaeni Israela taudia tausen momo amo,+ taunimanima 1,000 be iduhu ta ta amo idia abia hidi, bena idia ibounai 12,000 be tuari totona idia abia hegaegae.

6 Bena Mose ese iduhu ta ta amo taunimanima 1,000 be tuari dekenai ia siaia lao, hahelaga tauna Eleasara ena natuna Pineha danu ia lao,+ ia ese kohu helagadia bona tuari kibidia ia naria.+ 7 Iehova ese Mose ia oda henia hegeregerena, idia ese Midiana taudia idia tuari henia bona tatau ibounai idia alaia mase. 8 Idia ese Midiana ena king taudia 5 idia alaia mase danu, idia be Evi, Rekema, Suru, Huru, bona Reba. Danu, Beoro ena natuna Balama+ be tuari kaia amo idia alaia mase. 9 To Israela taudia ese Midiana hahine bona natudia idia abia mauri. Idia ese edia ubua animal, edia animal ma haida, bona kohu ibounai danu idia dadia. 10 Bona idia noholaia siti ibounai bona edia kamepa* ibounai be lahi dekenai idia gabua. 11 Bona idia ese tuari ai gau ibounai idia abia, taunimanima bona animal idia abia lao. 12 Bena idia abia mauri taudia bona tuari amo idia abia gaudia be Mose bona hahelaga tauna Eleasara bona Israela taudia edia kamepa dekenai idia mailaia, Moaba ena taunimanima lasi gabuna ai,+ ia be Ioridane kahirakahira, Ieriko dekenai.

13 Bena Mose bona hahelaga tauna Eleasara bona Israela ena iduhu gunalaia taudia ibounai be kamepa murimuri dekenai idia lao, idia hedavari henidia totona. 14 To Mose be tuari amo idia giroa mai tuari oreana ena abia hidi tatau, tuari tatau 1,000 ta ta edia biagudia bona 100 ta ta edia biagudia dekenai ia badu. 15 Mose be idia dekenai ia gwau: “Hahine ibounai umui abia mauri, a? 16 Idia be Balama ena hereva dainai Israela taudia edia lalona idia veria Peoro ena Bala dirava idia tomadiho henia totona,+ bena Israela taudia be Iehova idia badinaia lasi,+ unai dainai Iehova ena taunimanima dekenai gorere ia vara.+ 17 Vadaeni natudia edia huana amo memero ibounai bona tau ida idia mahuta hebou hahine ibounai umui alaia mase be namo. 18 To tau ida idia do mahuta hebou lasi kekeni matamata ibounai do umui hamasea lasi.+ 19 Bona namona be dina 7 lalonai kamepa murimuri ai umui noho. Taunimanima idia alaia mase taudia ibounai bona tuari ai idia mase taudia idia dogoatao taudia ibounai+ be dina ihatoina bona dina namba 7 ai, umui sibona do umui hagoevaia,+ umui bona umui abia mauri taudia. 20 Bona namona be dabua bona animal kopina ibounai, bona nanigosi ena huina amo idia karaia gaudia bona au amo idia karaia gaudia ibounai do umui hagoevaia.”

21 Bena hahelaga tauna Eleasara be tuari amo idia giroa mai tatau dekenai ia gwau: “Iehova ese Mose dekenai ia gwauraia taravatu be inai, 22 ‘Umui ese golo, siliva, kopa, auri, tini, bona ledi, 23 lahi ese ia hagoevaia diba gaudia be lahi lalonai do umui gabua bona do idia goeva. Namona be ranu amo unai gaudia umui hagoevaia, unai amo Dirava ese do ia abia dae.+ To lahi ese ia araia diba gaudia ibounai be ranu lalonai do umui atoa. 24 Bona namona be dina namba 7 ai emui dabua umui huria bona do umui goeva, bena kamepa lalonai umui vareai diba.’”+

25 Bena Iehova be Mose dekenai inai ia gwauraia: 26 “Namona be idia dadia gaudia edia lista oi karaia, idia abia mauri taudia bona animal oi duahia, hahelaga tauna Eleasara bona Israela ena bese kwarana taudia ida inai oi karaia. 27 Idia dadia gaudia be kahana rua dekenai oi hapararaia, kahana ta be tuari dekenai idia lao taudia totona bona kahana ma ta be Israela taudia ibounai totona.+ 28 Oi ese tuari dekenai idia lao taudia amo, orea 500 500 amo tamona oi abia, bona taunimanima, boromakau, doniki, bona mamoe amo orea 500 500 amo tamona oi abia bona Iehova dekenai oi henia, unai be iena. 29 Namona be edia kahana amo unai oi abia bona hahelaga tauna Eleasara dekenai oi henia, unai be harihari gaudia Iehova dekenai.+ 30 Israela taudia dekenai oi henia kahana amo oi ese taunimanima, boromakau, doniki, mamoe, bona ubua animal idauidau ibounai edia orea 50 50 amo tamona oi abia bona Levi taudia dekenai oi henia,+ idia be Iehova ena Palai Dubu ena gaukara idauidau idia naria taudia.”+

31 Vadaeni Mose bona hahelaga tauna Eleasara be Iehova ese Mose ia oda henia hegeregerena idia kara. 32 Tuari amo idia abia gaudia, tuari taudia ese idia hadikaia lasi gaudia ibounai be inai: Mamoe be 675,000, 33 boromakau be 72,000, 34 bona doniki be 61,000. 35 Tau ida idia mahuta hebou lasi hahine ibounai be 32,000.+ 36 Bona tuari totona idia lao taudia ese idia abia kahana be inai: Mamoe ibounai 337,500. 37 Mamoe ibounai 675 be Iehova dekenai idia henia, unai be iena. 38 Bona boromakau be 36,000, bona animal 72 be Iehova dekenai idia henia, unai be iena. 39 Bona doniki be 30,500, bona doniki 61 be Iehova dekenai idia henia, unai be iena. 40 Bona taunimanima be 16,000, bona idia 32 be Iehova dekenai idia henia, unai be iena. 41 Bena Mose ese Iehova totona idia henia harihari gaudia be hahelaga tauna Eleasara dekenai ia henia,+ Iehova ese Mose ia oda henia hegeregerena.

42 Mose be tuari taudia ese idia mailaia gaudia ia haria bona Israela taudia dekenai ia henia kahana be inai: 43 Mamoe be 337,500, 44 boromakau be 36,000, 45 doniki be 30,500, 46 bona taunimanima be 16,000. 47 Bena Mose ese Israela taudia dekenai ia henia kahana amo, taunimanima bona animal 50 50 amo tamona tamona ia abia bona Levi taudia dekenai ia henia,+ Iehova ena Palai Dubu ena gaukara idauidau idia naria taudia unai,+ Iehova ese Mose ia oda henia hegeregerena.

48 Bena tuari taudia 1,000 ta ta totona idia abia hidi tatau be Mose dekenai idia lao. Idia be tuari tatau 1,000 ta ta edia biagudia bona 100 ta ta edia biagudia.+ 49 Bona Mose dekenai idia gwau: “Ai, emu hesiai taudia be ai hakaua tuari tatau ibounai ai duahia vadaeni bona ai davaria ta ia boio lasi.+ 50 Unai dainai namona be harihari gaudia bamona ai mailaia gaudia be Iehova dekenai ai henia, golo gaudia, aena herahera seini, ima gaudia, rini,* taia gaudia, bona herahera gaudia ma haida, unai amo Iehova vairanai emai kara dika davana ai karaia diba.”

51 Vadaeni Mose bona hahelaga tauna Eleasara ese idia amo golo idia abia dae, herahera gaudia ibounai unai. 52 Tuari taudia 1,000 ta ta edia biagudia bona 100 ta ta edia biagudia ese golo ena metau be 16,750 sikel* idia henia, unai be edia kontribusen Iehova dekenai. 53 Tuari tatau ta ta be tuari amo sibodia totona gau haida idia abia vadaeni. 54 Mose bona hahelaga tauna Eleasara ese tuari taudia 1,000 ta ta edia biagudia bona 100 ta ta edia biagudia amo unai golo idia abia dae bona hebou dubu lalonai idia abia vareai Iehova vairanai, unai amo Israela taudia be ia do idia laloatao.

32 Vadaeni Rubena ena bese taudia+ bona Gado ena bese taudia+ edia animal be momo herea, bona idia itaia Iasera tano+ bona Gileada tano be namo herea edia animal totona. 2 Unai dainai Gado ena bese taudia bona Rubena ena bese taudia be Mose, hahelaga tauna Eleasara, bona Israela iduhu gunalaia taudia dekenai idia lao bona idia gwau: 3 “Inai tanodia, Ataroto, Dibona, Iasera, Bete-nimera, Hesebona,+ Eleale, Sebama, Nebo,+ bona Beoni,+ 4 Iehova ese Israela taudia edia vairanai ia halusidia tano unai,+ idia be tano namona animal totona, bona emu hesiai taudia edia animal be momo herea.”+ 5 Ma idia gwau: “Bema ai oi lalonamo henia, namona be inai tano be emu hesiai taudia dekenai oi henia, bona do ai abia. To, namo lasi Ioridane ena kahana ma ta dekenai ai oi siaia lao.”

6 Bena Mose be Gado ena bese taudia bona Rubena ena bese taudia dekenai ia gwau: “Emui tadikakadia be tuari dekenai do idia lao, to umui be iniseniai do umui noho, a? 7 Dahaka dainai Israela taudia edia lalona umui hamanokaia, Iehova ese do ia henia tanona dekenai idia hanaia lao lasi totona? 8 Guna emui tamadia be Kadesi-baranea amo lau siaia tano idia itaia totona neganai, unai bamona idia karaia.+ 9 Esakolo Koura dekenai idia daekau lao+ bona tano idia itaia neganai, Israela taudia edia lalona idia hamanokaia, Iehova ese ia henia tanona dekenai idia vareai lasi totona.+ 10 Unai dina ai Iehova ia badu momokani dainai ia gwauhamata, ia gwau:+ 11 ‘Aigupito amo idia raka-lasi mauri lagani 20 bona unai lagani idia hanaia tatau ibounai be Aberahamo, Isako, bona Iakobo dekenai lau gwauhamatalaia tanona do idia itaia lasi,+ badina idia ese mai kudouna ibounai ida lau idia badinaia lasi. 12 To Kenisi tauna Iepune ena natuna Kaleba+ bona Nunu ena natuna Iosua+ sibona ese unai tano idia itaia, badina idia ese mai kudouna ibounai ida Iehova idia badinaia.’+ 13 Bena Iehova ena badu mai siahuna be Israela taudia latanai ia diho bona idia ia siaia taunimanima lasi gabuna ai lagani 40 idia loaloa,+ ela bona Iehova vairanai unai kara dika uruna ibounai idia mase ore.+ 14 Vadaeni umui kara dika taudia be emui tamadia edia kara hegeregerena umui kara, bona Iehova ena badu Israela taudia dekenai umui habadaia. 15 Bema ia umui badinaia lasi, ia ese Israela taudia be taunimanima lasi gabuna ai do ia rakatania lou, bona umui ese inai taunimanima ibounai dekenai dika do umui mailaia.”

16 Gabeai Mose dekenai idia lao bona idia gwau: “Namona be iniseniai emai animal totona nadi magudia ai karaia, bona emai natudia totona siti ai haginidia. 17 To ai be tuari totona do ai hegaegae+ bona Israela taudia edia vairanai do ai lao ela bona edia tano dekenai idia ai hakaua vareai, to emai natudia be siti mai magu aukadia lalonai do idia noho, unai amo unai tano taudia ese idia do idia hadikaia lasi. 18 Ai be emai ruma dekenai do ai giroa lasi ela bona Israela taudia ta ta be ena tano ia abia, ena ahuna bamona.+ 19 To ai be idia ida Ioridane ena kahana ma ta bona ena tano ma haida do ai abia lasi, badina ai be Ioridane ena ist kahanai emai ahuna ai abia vadaeni.”+

20 Mose be idia dekenai ia gwau: “Bema umui ibounai be inai umui karaia: Umui ese tuari totona Iehova vairanai emui tuari kohudia umui abia,+ 21 bona Iehova vairanai Ioridane ena kahana ma ta dekenai umui hanaia lao. Bena ia ese ena vairana amo ena inai taudia ia lulua,+ 22 bona Iehova dainai tano umui abia,+ unai murinai umui giroa lou diba+ bona Iehova bona Israela taudia edia vairanai do umui kerere lasi. Bena Iehova vairanai inai tano be umui ese do umui abia.+ 23 To bema inai umui karaia lasi, umui be Iehova dekenai do umui kara dika. Vadaeni inai umui diba be namo, emui kara dika dainai panisi do umui abia. 24 Unai dainai emui natudia totona siti umui haginidia bona emui mamoe totona magu umui karaia diba,+ to umui gwauhamatalaia gauna umui karaia be namo.”

25 Gado ena bese taudia bona Rubena ena bese taudia be Mose dekenai inai idia gwauraia: “Ai, emu hesiai taudia be emai lohia ena hereva hegeregerena do ai karaia. 26 Emai natudia, emai adavadia, emai animal, bona emai ubua animal ibounai be Gileada ena siti idauidau dekenai do idia noho,+ 27 to ai, emu hesiai taudia be Ioridane ena kahana ma ta dekenai do ai hanaia lao bona ai ibounai Iehova vairanai tuari lalonai do ai vareai,+ emai lohia ia hereva hegeregerena.”

28 Vadaeni idia dainai Mose ese hahelaga tauna Eleasara, Nunu ena natuna Iosua, bona Israela ena iduhu ta ta ena bese kwarana taudia dekenai inai oda ia henia. 29 Mose be idia dekenai ia gwau: “Bema Gado ena bese taudia bona Rubena ena bese taudia be umui ida Ioridane idia hanaia, bona idia ibounai be Iehova vairanai tuari lalonai idia vareai bona emui vairanai ia noho tano taudia idia halusia, vadaeni Gileada tanona be idia do umui henia, idia noholaia totona.+ 30 To bema edia tuari kohudia idia abia lasi bona umui ida Ioridane ena kahana ma ta dekenai idia hanaia lasi, vadaeni Kanana tanona ai idia be umui huanai do idia noho.”

31 Unai neganai Gado ena bese taudia bona Rubena ena bese taudia idia gwau: “Iehova ese ai, emu hesiai taudia dekenai ia herevalaia gaudia do ai karaia. 32 Ai be emai tuari kohudia do ai abia bona Iehova ena vairanai Kanana tanona dekenai do ai hanaia lao,+ to do ai abia tanona be Ioridane ena kahana ma ta dekenai.” 33 Bena Mose ese Gado ena bese taudia, Rubena ena bese taudia,+ bona Iosepa ena natuna Manase ena iduhu kahana dekenai,+ Amoro ena king Sihona ena basileia+ bona Basana ena king Oga ena basileia ia henia,+ bona unai tano ai idia noho siti bona ena badina siti idauidau danu.

34 Bona Gado ena bese taudia ese inai siti idia haginia lou: Dibona,+ Ataroto,+ Aroere,+ 35 Ataroto-sapana, Iasera,+ Iogobeha,+ 36 Bete-nimera,+ bona Bete-harama.+ Idia be siti mai magu aukadia, bona mamoe totona nadi magudia idia karaia. 37 Bona Rubena ena bese taudia ese inai siti idia haginia: Hesebona,+ Eleale,+ Kiriataimi,+ 38 Nebo+ bona Bala-meono+ (edia ladadia idia haidaua), bona Sibima. Bona idia haginidia lou siti dekenai ladana matamata idia hatoa matamaia.

39 Manase ena natuna Makiri+ ena bese taudia ese Gileada idia tuari henia bona idia abia, bona unai tano ai idia noho Amoro taudia idia lulua. 40 Bena Mose ese Gileada tano be Manase ena natuna Makiri dekenai ia henia, bona unuseniai ia noho matamaia.+ 41 Bona Manase ena bese tauna Iairi ese idia ia tuari henia bona Gileada ena hanua maragidia ia abia, bona edia ladana ia hatoa, Havoto-iairi.*+ 42 Bona Noba ese Kenati bona ena badina hanuadia ia tuari henia bona ia abia, bona ena ladana ia hatoa Noba, ia sibona ena ladana hegeregerena.

33 Israela taudia be Mose bona Arona edia hakaua henunai+ Aigupito idia rakatania neganai,+ edia orea ta ta* hegeregerena ai inai dala amo idia lao.+ 2 Iehova ena oda hegeregerena gabu idia rakatania bona edia laolao ena sivarai be Mose ese ia torea, bona edia laolao ena sivarai be inai bamona:+ 3 Hua ginigunana ena dina namba 15 ai,+ idia ese Ramese idia rakatania.+ Pasova ena murina dinana ai,+ Israela taudia be mai gari lasi ida Aigupito taudia ibounai edia vairana amo idia raka-lasi. 4 Unai nega ai, Aigupito taudia ese edia vara guna natudia ibounai, Iehova ese edia huana amo ia hamasea natudia unai, idia guria noho,+ unai amo Iehova ese edia dirava idauidau ia hahemaoro henia bona ia panisia.+

5 Vadaeni Israela taudia be Ramese idia rakatania bona Sukoto dekenai idia kamepa.+ 6 Bena Sukoto idia rakatania bona Etahama dekenai idia kamepa,+ unai be taunimanima lasi gabuna ena isena ai. 7 Bena Etahama idia rakatania bona idia giroa bena Pihahiroto dekenai idia lao, unai gabu amo Bala-sepona idia itaia diba,+ bona Migidola vairanai idia kamepa.+ 8 Unai murinai Pihahiroto idia rakatania bona davara huana amo idia hanaia lao+ taunimanima lasi gabuna dekenai,+ bona Etahama ena taunimanima lasi gabuna ai dina toi lalonai idia laolao+ bona Mara dekenai idia kamepa.+

9 Bena Mara idia rakatania bona Elima dekenai idia ginidae. Elima ai ranu guri 12 bona pama au 70 idia noho, vadaeni unuseniai idia kamepa.+ 10 Bena Elima idia rakatania bona Davara Kakakaka badinai idia kamepa. 11 Unai murinai Davara Kakakaka idia rakatania bona Sini ena taunimanima lasi gabuna ai idia kamepa.+ 12 Bena Sini ena taunimanima lasi gabuna idia rakatania bona Dopika dekenai idia kamepa. 13 Gabeai Dopika idia rakatania bona Alusu dekenai idia kamepa. 14 Bena Alusu idia rakatania bona Repidima dekenai idia kamepa,+ unuseniai ranu be lasi taunimanima ese idia inua totona. 15 Unai murinai Repidima idia rakatania bona Sinai ena taunimanima lasi gabuna ai idia kamepa.+

16 Idia ese Sinai ena taunimanima lasi gabuna idia rakatania bona Kibiroto-hatava dekenai idia kamepa.+ 17 Bena Kibiroto-hatava idia rakatania bona Haseroto dekenai idia kamepa.+ 18 Unai murinai Haseroto idia rakatania bona Ritima dekenai idia kamepa. 19 Bena Ritima idia rakatania bona Rimono-perese dekenai idia kamepa. 20 Bena Rimono-perese idia rakatania bona Libina dekenai idia kamepa. 21 Libina idia rakatania bona Risa dekenai idia kamepa. 22 Bena Risa idia rakatania bona Kehelata dekenai idia kamepa. 23 Bena Kehelata idia rakatania bona Sepere Ororo dekenai idia kamepa.

24 Unai murinai Sepere Ororo idia rakatania bona Harada dekenai idia kamepa. 25 Bena Harada idia rakatania bona Makeloto dekenai idia kamepa. 26 Gabeai Makeloto idia rakatania+ bona Tahata dekenai idia kamepa. 27 Unai murinai Tahata idia rakatania bona Tera dekenai idia kamepa. 28 Bena Tera idia rakatania bona Mitika dekenai idia kamepa. 29 Gabeai Mitika idia rakatania bona Hasamono dekenai idia kamepa. 30 Bena Hasamono idia rakatania bona Mosera dekenai idia kamepa. 31 Bena Mosera idia rakatania bona Bene-iakana dekenai idia kamepa.+ 32 Bona Bene-iakana idia rakatania bona Horo-hagidigada dekenai idia kamepa. 33 Bena Horo-hagidigada idia rakatania bona Iotobata dekenai idia kamepa.+ 34 Gabeai Iotobata idia rakatania bona Aberona dekenai idia kamepa. 35 Bena Aberona idia rakatania bona Esiono-gebere dekenai idia kamepa.+ 36 Unai murinai Esiono-gebere idia rakatania bona Seni ena taunimanima lasi gabuna ai idia kamepa,+ unai be Kadesi ai.

37 Gabeai Kadesi idia rakatania bona Horo Ororo dekenai idia kamepa,+ unai be Edoma tano ena hetoana ai. 38 Bona Iehova ena oda hegeregerena, hahelaga tauna Arona be Horo Ororo dekenai ia daekau lao bona unuseniai ia mase, lagani namba 40 ena hua namba 5 ena dina ginigunana ai, Israela taudia ese Aigupito idia rakatania murinai.+ 39 Arona be Horo Ororo ai ia mase neganai, ena mauri lagani be 123.

40 Vadaeni Arada ena king,+ Kanana ena tano Negebe ai ia noho Kanana tauna unai, ese Israela taudia edia mai ena sivarai ia kamonai.

41 Gabeai Horo Ororo idia rakatania+ bona Salamonaha dekenai idia kamepa. 42 Unai murinai Salamonaha idia rakatania bona Punona dekenai idia kamepa. 43 Bena Punona idia rakatania bona Oboto dekenai idia kamepa.+ 44 Bena Oboto idia rakatania bona Ie-abarima dekenai idia kamepa, unai be Moaba ena boda ai.+ 45 Gabeai Lemi* idia rakatania bona Dibona-gado dekenai idia kamepa.+ 46 Unai murinai Dibona-gado idia rakatania bona Alamona-dibilataimi dekenai idia kamepa. 47 Bena Alamona-dibilataimi idia rakatania bona Abarima ena ororo gabudia dekenai idia kamepa,+ unai be Nebo vairanai.+ 48 Dokonai, Abarima ena ororo gabudia idia rakatania bona Moaba ena taunimanima lasi gabuna ai idia kamepa, unai be Ioridane badinai, Ieriko ai.+ 49 Idia be Ioridane badinai idia kamepa noho, unai be Bete-iesimoto amo ela bona Abele-sitima dekenai,+ Moaba ena taunimanima lasi gabuna ai.

50 Moaba ena taunimanima lasi gabuna, unai be Ioridane badinai, Ieriko ai, Iehova be Mose dekenai ia gwau: 51 “Israela taudia dekenai oi gwau, ‘Umui be Ioridane ena kahana ma ta dekenai do umui hanaia lao bona Kanana tano lalonai do umui vareai.+ 52 Namona be unai tano ai idia noho taudia ibounai be emui vairana amo umui lulua bona edia nadi bona edia auri kaivakuku ibounai umui hadikaia,+ bona namona be edia ataiai gabu* helagadia umui hadikaia ore.+ 53 Bona unai tano do umui abia bona do umui noholaia, badina lau ese umui dekenai unai tano do lau henia, ia be umui emui.+ 54 Namona be gadara ta* amo tano umui haria+ emui famili ta ta huanai. Namona be orea badana dekenai tano ena kahana badana oi henia bona orea maragina dekenai tano ena kahana maragina oi henia.+ Unai gadara amo idia ibounai do idia diba edena tano do idia abia. Emui tamadia edia iduhu ta ta hegeregerena, umui ese tano do umui abia, emui ahuna bamona.+

55 “‘To bema tano ai idia noho taudia be emui vairana amo umui lulua lasi,+ idia noho taudia be hegeregere emui matana idia gwadaia gaudia bamona bona idia be ginigini bamona emui gabana dekenai, bona do umui noholaia tanona dekenai umui do idia dagedage henia.+ 56 Bona idia dekenai lau ura karaia gauna be umui dekenai do lau karaia.’”+

34 Bona Iehova be Mose dekenai ma ia gwau: 2 “Israela taudia dekenai inai hadibaia hereva oi gwauraia: ‘Kanana tano dekenai umui vareai neganai,+ unai tano be emui ahuna bamona do umui abia, ena hetoa gabudia hegeregerena.+

3 “‘Emui saut kahana ena tano hetoana be Seni ena taunimanima lasi gabuna ia matamaia bona Edoma badinai ia lao, bona ist kahana ena tano hetoana be Damena Davara* amo ia lao be namo.+ 4 Unuseni amo emu tano hetoana be do ia idau bona Akarabima+ ororo dalana ena saut kahana dekenai do ia lao ela bona Seni, bona Kadesi-baranea+ ena saut kahana dekenai do ia doko. Bena unuseni amo do ia lao ela bona Hasara-adara+ dekenai, bena unuseni amo ia lao Asamona dekenai. 5 Asamona amo Aigupito Koura dekenai do ia lao bona Davara* dekenai do ia doko.+

6 “‘Emui west kahana ena tano hetoana be Davara Badana* bona ena kone. Unai be emui west kahana ena tano hetoana ai do ia lao.+

7 “‘Inai be emui not kahana ena tano hetoana: Ia be Davara Badana amo do umui makaia ela bona Horo Ororo dekenai. 8 Bena Horo Ororo amo do umui makaia ela bona Lebo-hamata*+ dekenai bona Sedada dekenai do ia doko.+ 9 Bona unuseni amo do ia lao Siporona dekenai, bona Hasara-enana dekenai do ia doko.+ Unai be emui not kahana ena tano hetoana.

10 “‘Bena ist kahana totona emui tano hetoana be Hasara-enana amo ela bona Sepama dekenai. 11 Bona Sepama amo do ia lao Ribila, Aina ena ist kahana dekenai, bena unai amo do ia diho bona ia hanaia lao Kinerete Gohuna* ena ist kahana dekenai.+ 12 Unai tano hetoana be do ia lao Ioridane dekenai, bona Damena Davara dekenai do ia doko.+ Inai tano hetoadia lalonai idia noho tano be umui emui.’”+

13 Vadaeni Mose ese Israela taudia dekenai inai hadibaia hereva ia gwauraia: “Inai tano be gadara ta* amo do umui haria bona umui abia,+ Iehova ese iduhu 9 bona Manase ena iduhu kahana ta ia hamaoroa hegeregerena. 14 Badina Rubena iduhu taudia bona Gado iduhu taudia, bona Manase ena iduhu kahana ese edia ahuna idia abia vadaeni.+ 15 Unai iduhu rua bona iduhu kahana ta edia ahuna be Ioridane ena ist kahana, unai be Ieriko ena dina daekau kahana.”+

16 Iehova be Mose dekenai ma ia gwau: 17 “Do umui noholaia tano do idia haria taudia edia ladana be inai: Hahelaga tauna Eleasara+ bona Nunu ena natuna Iosua.+ 18 Bona iduhu ta ta amo gunalaia tauna ta do umui abia hidi, tano haria gaukara idia durua totona.+ 19 Unai tatau edia ladadia be inai: Iuda iduhu+ amo be Kaleba,+ ia be Iepune ena natuna. 20 Simeona iduhu+ amo be Semuela, ia be Amihuda ena natuna. 21 Beniamina iduhu+ amo be Elidada, ia be Kisilona ena natuna. 22 Dano iduhu+ amo be gunalaia tauna Buki, ia be Iogili ena natuna. 23 Iosepa ena natudia,+ Manase iduhu+ amo be gunalaia tauna Haniela, ia be Epodi ena natuna. 24 Eparaima iduhu+ amo be gunalaia tauna Kemuela, ia be Sipitana ena natuna. 25 Sebuluno iduhu+ amo be gunalaia tauna Elisapana, ia be Paranaka ena natuna. 26 Isakara iduhu+ amo be gunalaia tauna Palitiela, ia be Asan ena natuna. 27 Asere iduhu+ amo be gunalaia tauna Ahihuda, ia be Selomi ena natuna. 28 Napatali iduhu+ amo be gunalaia tauna Pedahele, ia be Amihuda ena natuna.” 29 Iehova ese unai tatau ia oda henia, idia ese Kanana tano do idia haria Israela taudia totona.+

35 Moaba ena taunimanima lasi gabuna, unai be Ioridane badinai, Ieriko ai, Iehova be Mose dekenai ia gwau:+ 2 “Israela taudia oi hamaoroa idia abia tanodia amo Levi taudia dekenai siti idia henia idia noholaidia totona,+ bona Levi taudia dekenai siti ena murimurina ena rei gabudia do idia henia.+ 3 Idia be unai siti ai do idia noho, bona rei gabudia be edia ubua animal, animal naria rumadia, bona edia animal ma haida totona. 4 Levi taudia dekenai do umui henia rei gabudia edia pada be 1,000 kiubit* unai be siti ena magu ibounai do ia hagegea. 5 Siti ena murimuri kahadia do umui hahetohoa, ist kahana be 2,000 kiubit, saut kahana be 2,000 kiubit, west kahana be 2,000 kiubit, bona not kahana be 2,000 kiubit, bona siti be huanai ia noho. Unai be edia siti ena rei gabudia.

6 “Levi taudia dekenai heau mauri siti 6 do umui henia,+ ala-ala tauna ia heau lao totona,+ bona siti ma 42 do umui henia danu. 7 Levi taudia dekenai siti ibounai 48 mai edia rei gabudia do umui henia.+ 8 Idia dekenai do umui henia siti be Israela taudia edia amo do umui abia.+ Orea badana amo siti momo do umui abia bona orea maragina amo siti haida sibona do umui abia.+ Orea ta ta ese ena siti haida be Levi taudia dekenai do ia henia, ia abia tano hegeregerena.”

9 Iehova be Mose dekenai ma ia gwau: 10 “Israela taudia oi hamaoroa, oi gwau, ‘Umui be Ioridane ena kahana ma ta dekenai do umui hanaia lao bona Kanana tano do umui abia.+ 11 Namona be umui heau lao diba siti umui abidia hidi, unai be heau mauri siti ai umui halaodia. Bona bema tau ta be ia laloa lasi bona ta ia alaia, ia be unuseniai ia heau lao diba.+ 12 Unai siti ese rara davana haloua tauna amo umui do idia gimaia.+ Vadaeni ia ala-ala tauna be unuseniai do ia mauri noho ela bona idia kota henia guna.+ 13 Umui abia hidi siti 6 be unai totona do umui gaukaralaia. 14 Inai kahana, Ioridane ai be siti toi+ bona Kanana tano ai be siti toi,+ idia be heau mauri siti. 15 Unai siti 6 be heau mauri siti, Israela taudia, idau tano taudia, bona umui huanai idia noho taudia totona.+ Bema tau ta be ia laloa lasi bona ta ia alaia, ia be unuseniai ia heau lao diba.+

16 “‘To bema ia ese ta be auri gauna ta amo ia botaia bona ia mase, ia be ala-ala tauna. Unai ala-ala tauna idia hamasea be maoro.+ 17 Bona bema ia ese ta be nadi amo ia botaia bona ia mase, ia be ala-ala tauna. Unai ala-ala tauna idia hamasea be maoro. 18 Bona bema ia ese ta be au amo idia karaia gauna ta amo ia botaia bona ia mase, ia be ala-ala tauna. Unai ala-ala tauna idia hamasea be maoro.

19 “‘Rara davana haloua tauna ese ala-ala tauna do ia hamasea. Ia ese ala-ala tauna ia davaria neganai, do ia hamasea. 20 Bema tau ta ese ma ta ia inai henia dainai ia pusia bona unai tauna ia mase eiava ia lalodika henia dainai ia dekenai gau ta ia negea,+ 21 eiava ia inai henia dainai ia paisia bona unai tauna ia mase, ia idia hamasea be maoro. Ia be ala-ala tauna. Rara davana haloua tauna ese ia davaria neganai, do ia hamasea.

22 “‘To bema ta be ma ta ia inai henia lasi to ia pusia kava eiava ia lalodika henia lasi to ia dekenai gau ta ia negea kava,+ 23 eiava unai tauna ia itaia lasi bona ia latanai nadi ta ia hamorua bona unai tauna ia mase, to ia be ena inai tauna lasi eiava mai ena ura ida ia haberoa lasi, 24 namona be hahemaoro taudia ese ia bona rara davana haloua tauna do idia kota henia, unai taravatudia hegeregerena.+ 25 Bona namona be hahemaoro taudia ese rara davana haloua tauna ena imana amo ala-ala tauna idia hamauria, bona heau mauri siti dekenai ia idia siaia giroa, bona unuseniai do ia noho ela bona hahelaga tauna badana, dehoro helagana amo idia horoa tauna unai, ia mase.+

26 “‘To bema ala-ala tauna ese ena heau mauri siti ena hetoana ia rakatania 27 bona rara davana haloua tauna ese ia be ena heau mauri siti ena hetoana murimurinai ia davaria bona ia hamasea, ia be kerere lasi. 28 Badina ala-ala tauna be ena heau mauri siti dekenai ia noho be namo ela bona hahelaga tauna badana ia mase. Bona hahelaga tauna badana ia mase murinai, ia be ena tano dekenai ia giroa lou diba.+ 29 Emui uru ibounai lalonai, hahemaoro karadia umui karaia neganai, unai taravatu do umui badinadia, emui noho gabudia ibounai dekenai.

30 “‘Bema haida ese idia hamomokania ia be ala-ala tauna,+ ala-ala tauna idia hamasea be maoro,+ to bema hamomokania tauna be tamona sibona, ala-ala tauna do idia hamasea lasi. 31 Bema ala-ala tauna ese ena mauri totona mauri davana ia henia, namo lasi unai umui abia, badina ena davana be mase, oibe, ia umui hamasea be maoro.+ 32 Bona bema tau ta be heau mauri siti amo ia heau siri, namo lasi ia amo mauri davana umui abia, badina unai ese dala do ia kehoa ena siti dekenai ia noho lou totona, hahelaga tauna badana ia do mauri noho lalonai.

33 “‘Namo lasi umui noholaia tano umui hamiroa, badina rara ese tano ia hamiroa,+ bona tano dekenai idia bubua rara totona kara dika davana karaia boubou be lasi, to rara ia bubua tauna sibona ese ena rara amo davana ia karaia be namo.+ 34 Umui noholaia tano umui hamiroa lasi, badina lau be umui huanai lau noho. Oibe, lau Iehova be umui Israela taudia huanai lau noho.’”+

36 Gileada be Makiri+ ena natuna bona Manase ena tubuna mero. Ia be Iosepa ena natudia memero edia bese amo. Gileada bese ena iduhu gunalaia taudia be Mose bona Israela taudia edia iduhu gunalaia taudia dekenai idia lao bona edia vairanai idia hereva. 2 Idia gwau: “Iehova ese oi, emai lohia, ia oda henia gadara ta* amo Israela taudia dekenai tano oi henia totona.+ Bona Iehova ese emai lohia ia oda henia emai tadikaka Selopehada ena ahuna be iena natudia kekeni dekenai ia henia totona.+ 3 Bema unai kekenidia be Israela iduhu ma ta amo tatau idia adavaia, edia ahuna be emai tamana ena ahuna amo do idia kokia bona ia adavaia tauna ena iduhu ese do ia abia, vadaeni edia ahuna be emai ahuna amo do idia kokia. 4 Vadaeni Israela taudia edia Iubili lagani ai,+ hahine ena ahuna be ia adavaia tauna ena iduhu ese do ia abia, unai amo emai tamadia edia iduhu ena ahuna amo edia ahuna idia kokia diba.”

5 Bena Iehova ena oda dainai, Mose ese Israela taudia ia hamaoroa, ia gwau: “Iosepa ena natudia edia iduhu taudia edia hereva be maoro. 6 Iehova ese Selopehada ena natudia kekeni totona inai oda herevana ia gwauraia: ‘Idia ura henia tauna idia adavaia diba. To, edia tamana ena iduhu ena famili tauna sibona idia adavaia be namo. 7 Israela taudia edia ahuna be iduhu ta amo do ia hanaia lasi iduhu ma ta dekenai, badina Israela taudia ese edia sene taudia edia iduhu ena ahuna idia dogoatao be namo. 8 Bona Israela edia iduhu ta ta huanai, bema natuna kekeni ta be mai ena ahuna, vadaeni namona be ena tamana ena iduhu sibona lalonai ia headava,+ unai amo Israela taudia ese edia sene taudia edia ahuna idia dogoatao noho. 9 Israela taudia edia ahuna be iduhu ta amo do ia hanaia lasi iduhu ma ta dekenai, badina Israela taudia ese sibona edia ahuna idia dogoatao be namo.’”

10 Iehova ese Mose ia oda henia hegeregerena, Selopehada ena natudia kekeni be unai bamona idia karaia.+ 11 Vadaeni Selopehada ena natudia kekeni, Mahala, Tirisa, Hogila, Milika, bona Noa+ ese edia tamana ena tadikakadia edia natudia memero idia adavaia. 12 Idia be Iosepa ena natuna Manase ena famili lalonai idia headava, unai amo edia ahuna be edia tamana ena iduhu amo idia kokia lasi.

13 Iehova ese Moaba ena taunimanima lasi gabuna ai, Mose amo Israela taudia dekenai unai oda hereva bona hahemaoro herevadia ia henia, unai be Ioridane badinai, Ieriko ai.+