Kota ena Hereva ese Gorere Taudia Ia Durudia
MR. JUSTICE Sydney Robins, Ontario, Canada ena Court of Appeal dekenai ia gaukara tauna, ia gwau: “Taravatu ia gwau ia maoro taunimanima ta ta iboudiai be idia sibona edia tauanina idia biagua.” To badina be dahaka hepapahuahu ia vara?
Lagani 1979 lalonai, motuka aksiden be Mr. bona Mrs. Malette, Quebec, Canada taudia dekenai ia vara; tau ia mase bona hahine be bero badana ia abia bona ia mase rea. Hospital dekenai idia abia lao haraga murinai idia davaria ia ese Medical Directive/Release Card ia dogoatao bona ia sainia vadaeni. Unai kadi ia gwau tomadiho ena taravatu dainai ia be rara do ia dadaraia. (Rara abia dae kara dainai, taunimanima be gorere idia abia diba danu.) Ia naria doketa tauna ia laloa ia gorere bada bona ia mase diba, unai dainai unai kadi ena hereva ia laloa lasi, to rara ia henia. Unai dainai, Mrs. Malette ese doketa bona hospital ia abia lao kota dekenai. Kota dekenai ia samanidia bona ia gwau idia ese iena tauanina idia hadikaia, idia haberoa bona iena tomadiho dainai idia ese ia idia kara dika henia. Kota ginigunana idia lao neganai, kota ia gwau U.S. dola 20,000 idia henia be maoro. Unai dainai, hospital bona doketa be Ontario ena kota badana, Court of Appeal, dekenai idia noinoi unai hereva idia haidaua totona.
Court of Appeal dekenai Mrs. Malette durua hereva ta idia gwauraia lou, idia gwau:
“Gorere tauna be sibona ena tauanina ia biagua dainai gau badana ta be ia be mai ena maoro sibona ena tauanina muramura henia dalana ia dadaraia diba. . . . Ena be mauri be gau helagana, to taunimanima momo idia gwau edia mauri lalonai kara haida edia anina be bada dainai, mauri dogoatao noho be anina lasi. Nega daudau lalonai, taunimanima be unai bamona kara hereadia idia lalodia bada, herevana unai kara idia karaia tuari lalonai edia tano idia ura henia bada dainai [eiava] adavana, natuna mero o natuna kekeni ena mauri idia ura naria dainai . . . Tomadiho ena taravatu dainai muramura henia dalana dadaraia karana be unai bamona kara ta.”
Kota badana ena hereva be inai bamona idia gwauraia noho: “Herevana doketa ena lalohadai be dahaka, gorere tauna sibona be mai ena maoro ia hereva tauanina hamauria dalana ta do ia abia dae o lasi. . . . Bema doketa ta be unai tauanina hamauria karana ia karaia, to gorere tauna ese unai kara ia dadaraia vadaeni, kota dekenai unai doketa idia samania diba, ia be maoro lasi unai bamona ia karaia dainai . . . Doketa ese gunanai gorere tauna ia henia haheganina [Iehova ena Witness taudia ese idia dogoatao Medical Directive/Release Card hegeregerena] ia negea be maoro lasi, dika ia vara negana lalonai gorere tauna ese ia henia haheganidia ia negea be maoro lasi hegeregerena.” Kota be ma ia gwau “ena be Iehova ena Witness hahine ese unai kara ia dadaraia momokani, to rara henia neganai, unai kara ese . . . ena maoro ia sibona ena tauanina biagua totona do ia hadikaia bona ia sibona ia abia hidi tomadiho karadia do ia matauraia lasi.”
Kota badana tauna ena hereva dekenai ia ese doketa ia samania badina unai doketa ia gwau heduru be haraga ia henia be namo dainai unai kadi be anina lasi. “Iehova ena Witness taudia edia kadi be anina lasi pepa ta sibona . . . lau abia dae lasi. . . . Iehova ena Witness edia kadi dekenai ia gwau bema Mrs. Malette ese doketa edia heduru ia abia haraga be gau badana, rara idia henia diba lasi. . . . Sibona ena hereva ia torea iena ura ia gwauraia totona, sibona ena uduna amo ia gwauraia diba lasi neganai.”
Iena hereva dokona lalonai, kota henia tauna ia hereva maoro, ia gwau Witness taudia be rara idia dadaraia neganai, “namona be sibodia edia hereva dainai gabeai idia vara gaudia do idia abia dae. Idia bona edia ruma bese taudia be gabeai idia hereva diba lasi unai kadi ese edia ura korikori ia gwauraia lasi.”