Matamata Taudia Idia Henanadai . . .
Edena Bamona Tomadiho Rua Ruma Besena Lalonai Do Lau Noho?
“Ai tubu noho lalonai aiemai mauri be ia auka sisina. Aiemai tamana ese aiemai tomadiho ia ura henia lasi. Unai dainai nega ibounai ruma bese lalonai lalo-hekwarahi ia noho.”—Terry.
OI BE tomadiho rua ruma besena lalonai oi noho, a? Bema unai bamona oi noho reana oi diba mauri be ia auka. Oiemu tamana bona sinana be idia ruaosi edia tomadiho ia idau dainai reana ta ese ta ia koua toho lasi, to S. Sandmel ia torea bukana ladana When a Jew and Christian Marry lalonai ia gwau: “Ena be tama bona sina edia tomadiho ia idau dainai ta ese ta ia koua toho lasi, to reana do idia ura lasi edia natuna be unai tomadiho idauna dekenai idia hadibaia bona idia tubu.”
Mani oi laloa, dahaka do ia vara bema oiemu tamana eiava sinana, idia ta, be Iehova ena Witness tauna ta. Unai tamana eiava sinana be oi idia naria ena maduna ia laloa bada, ia ura ‘Lohiabada ena hadibaia hereva oi dekenai do ia hadibaia’ bona oi ia sisiba henia memero kekeni edia turana karaia dalana, lalo-goeva dalana, sikuli dekenai spot gadara oi vareai karana, emu nega oi gaukaralaia namonamo totona, bona emu mauri lalonai oi tahua gaudia do oi laloa namonamo totona. (Efeso 6:4) Oiemu Witness lasi tamana eiava sinana ese reana unai gaudia idia laloa bada lasi.
Sunday adorahi ta dekenai reana oiemu sinana ia ura do umui lao Keristen hebou ta dekenai. To oiemu tamana ia ura ia danu do oi noho ruma dekenai bona TV dekenai bolo gadara do umui raraia hebou. Doug ia gwau: “Nega haida lauegu tamana lau hebogahisi henia, Ia be loaloa hoihoi gaukarana ia karaia dainai wiki lalonai ai itaia lasi, Saturday bona Sunday dekenai ruma bese ibounai idia lao hebou neganai ia sibona be ruma dekenai ia noho. Nega ta ta lalonai hebou lau reaia ia danu lau noho totona.”
Iesu ia diba unai bamona kara do ia vara. Ia gwau: “Lau mai be heai do lau havaraia totona. Tau ta ese ena tamana do ia badu henia, bona kekeni ta ese ena sinana do ia badu henia, bona hahine matamata ese ena ravana hahine do ia badu henia. Bona ruma taudia ese ruma ena biaguna do idia badu henia.” (Mataio 10:35, 36) Iesu be ruma bese ia hapararaia lasi, to ia diba ruma bese lalonai haida ese tomadiho momokani do idia abia dae bona haida ese do idia abia dae lasi dainai hekwakwanai do ia vara. Henanadai badana ta be inai: Dahaka do oi karaia bema oiemu ruma bese lalonai unai hekwakwanai ia noho?
Hekwakwanai Momo Koua Dalana
Gau ginigunana be oi diba oiemu tamana o sinana oi hamoalea sibona lasi to gau badana be Dirava oi hamoalea! Iena ura be ita ese “lauma bona momokani dekena amo do [ita] tomadiho henia.” (Ioane 4:24) To tomadiho ia rua ruma besena lalonai unai oi karaia totona, inai hekwakwanai haida oi koudia be namo.
Dala maorona badinaia lasi karana—Mero ta ena tamana bona sinana edia headava ia dika bona unai mero ese ena Witness lasi tamana ia vadivadi henia karana ia gwauraia, ia gwau: “Ia ura lauegu lalona ia ania hereva momokani bona Dirava lau dadaraia totona.” Unai tamana ese ena natuna ia doria Keristen lasi holide ena moale karadia idauidau dekenai ia vareai totona. Unai mero ia gwau: “Lauegu hemami ia namo lasi.” To Iesu ese ita ia hadibaia, ia gwau: “Bema tau ta ena tamana o ena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi.” (Mataio 10:37) Unai dainai oi gini goada oi abidadama henia gaudia dekenai! Bema kara ta be Bible ena hereva hegeregerena lasi, namona be dala oi tahua emu tamana eiava sinana be mai manau danu oi hamaoroa ena ura o hereva do oi abia dae diba lasi badina oi ura dala maorona oi badinaia. Bema oiemu tamana eiava sinana ese oiemu ura momokani ia itaia, reana oiemu lalona do ia ania momo lasi.
To namona be kahana kahana ita hahegeregerea be namo. Filipi 4:5 dekenai, ia gwau: “Emui manau bona manada kara taunimanima ibounai edia vairanai do umui hedinaraia.” Manau bona manada karana ita karaia ena anina be ta ena lalohadai ita dadaraia kava lasi. Bema oiemu Witness lasi tamana eiava sinana ia laloa oi ura henia lasi, dala oi tahua emu nega ia dekenai oi habadaia totona. Namona be inai oi laloatao, oi be mai emu maduna emu tamana bona sinana dekenai.—Efeso 6:1.
‘Tamana eiava sinana kahanai gini karana’—Nega haida reana oi laloa kerere, oi laloa oiemu sinana ena kahana dekenai oi gini be maoro badina oiemu kakana be oiemu tamana ena kahana dekenai ia gini. To unai be badina maorona lasi Iehova tomadiho henia totona, a? Bema oiemu sinana ena tomadiho karadia be koikoi bona ia be Bible ena hereva hegeregerena lasi, be edena bamona? Hereva Lada-isidia 23:23 ena sisiba ia gwau: “Hereva momokani oi hoia oiemu, bona haida dekenai oi hoihoilaia lasi.”
Tau ta murinai oi raka karana—Reana emu tamana bona sinana oi laloa maragi bona emu kakana merona eiava kakana kekenina ta oi laloa bada dainai, ia abia dae tomadiho dalana oi tohotohoa. Roberto ia gwau: “Lau be ruma bese badana amo lau mai dainai unai bamona lau mamia.” Lauma dalanai ia manoka, iena kakana be hereva momokani ia rakatania bona ruma amo ia siri neganai. Roberto ia gwau: “Lau ia hagoadaia momokani lasi.” Ena be emu kakana badana danu umui hetura namo herea, to ia totona emu hesiai gaukara Dirava dekenai oi rakatania be kavakava karana, ani?
‘Hapararaia bona kwalimu’—Doug ia gwau: “Lauegu mauri lagani be 19 neganai, lauegu tamana ese lau ia hagoadaia kekeni turana karana lau karaia totona. Lauegu sinana be bapatiso Keristen hahine dainai ia ura lasi momokani lau ese kekeni turana karana do lau karaia. Ena be lau diba lauegu sinana ena hereva be maoro, to tamagu ena hereva lau abia dae.” Tamana bona sinana idia abia dae mauri taravatuna idia idau neganai, oiemu ura hagugurua totona oiemu tamana eiava sinana edia lalona oi veria diba idia hepapahuahu totona. Nega momo reana oi ura sinana eiava tamana ena kahana dekenai oi gini badina oi ia koua momo lasi.
To unai bamona kara ese ruma bese ena hekwakwanai ia habadaia. Bema oi diba kara ta ia kerere, to emu tamana eiava sinana oi doria gwaumaoro oi abia unai kara do oi karaia totona, unai be aonega dalana lasi, bona Dirava vairanai oi kerere unai. “Bema kara namodia ia karaia diba tauna ese unai kara ia karaia lasi, unai tau be kara dika tauna.” (Iakobo 4:17) Namo lasi oiemu ura ia hagugurua tamana eiava sinana ena kahanai oi gini, to namona be “mauri dalana” oi ia hadibaia tamana eiava sinana ena hereva oi badinaia, ani?—Hereva Lada-isidia 6:23.
Oi Sibona ese Tomadiho Dalana Oi Abia Hidi
Nega haida memero eiava kekeni matamata haida idia daradara sinana eiava tamana ena hereva do idia badinaia. Daika ena hereva be ia maoro? Edena bamona do oi diba? Bible ese mero ta ena ladana Timoteo ena sivarai ia gwauraia, ia be tomadiho rua ena ruma besena lalonai ia tubu. Ia idia gwauraia inai bamona: “Ena sinana be Iuda hahine, kamonai hahine, to ena tamana be Helene tauna.” (Kara 16:1) Reana nega haida Timoteo be ia hekwarahi bada, ena tamana ena hereva eiava ena sinana ena hereva do ia kamonai totona. To, ena sinana ena tomadiho ia abidadama henia dainai aposetolo Paulo ia bamoa ena laolao dekenai. (Kara 16:2, 3) Ena anina be ia ese ena sinana ia lalokau henia bada bona tamana ia lalokau henia maragi, a? Lasi momokani.
Aposetolo Paulo ese Timoteo ia tore henia, ia gwau: “To oi ese oi abia dae bona oi abidadama henia hereva momokani do oi badinaia namonamo noho. Inai hereva momokani oi dekenai idia hadibaia taudia ibounai oi diba vadaeni, ani? Bona inai danu oi diba vadaeni, oi be mero maragi neganai Buka Helagadia dekenai oi manada vadaeni. Inai Buka Helagadia ese oi dekenai aonega idia henia diba ela bona hahemauri do oi davaria, Keriso Iesu oi abidadama henia dainai.” (2 Timoteo 3:14, 15) Inai sivarai amo ita diba Timoteo be Dirava ena Hereva ia stadilaia bona ia laloa bada dainai, sinana ena tomadiho ia abia dae! Ia idia “hadibaia,” dainai unai hereva ia abia dae.
Namo lasi tomadiho oi abia dae hemataurai eiava kudou ena hemami dainai, to namona be tamana bona sinana idia abia dae hahediba herevana be ‘revareva helagadia’ dekenai oi hahegeregeredia. Mauri abia dalana be oi sibona dekenai, oiemu Tamana eiava Sinana ese oi do ia hamauria diba lasi!—Filipi 2:12.
Witness Lasi Tamana Eiava Sinana Durua Dalana
Bema oiemu kudouna dekenai tomadiho momokani oi abia dae momokani neganai, oiemu Witness lasi tamana eiava sinana be edena bamona do oi kara henidia? Aposetolo Paulo ese Keristen taudia ia hagoadaia idia ese edia kara namo amo edia Witness lasi adavana do idia hagoadaia hereva momokani do idia abia dae totona. Ia gwau: “Oi ekalesia hahine, sedira bema ia danu oi noho, oiemu tau do oi durua diba ekalesia lalonai do ia vareai, ani? Bona oi ekalesia tauna, sedira bema ia danu oi noho, oiemu hahine do oi durua diba ekalesia lalonai do ia vareai, ani?” (1 Korinto 7:12-16) Unai hereva be Witness lasi tamana eiava sinana ena natudia dekenai be mai ena anina, ani?
Oiemu kara namodia bona hemataurai bada karadia oiemu Witness lasi tamana eiava sinana dekenai oi hahedinaraia neganai, unai ese ia durua Keristen taudia korikori edia kara do idia itaia totona. (Petero Ginigunana 3:1, 2 itaia danu.) Namona be inai danu oi laloatao, hereva momokani badinaia karana ese oiemu Witness lasi tamana eiava sinana kamonai henia karana ia koua lasi. Bema ia dekenai hebogahisi bona kamonai karana oi hahedinaraia bona ia danu oi gaukara hebou, do ia diba oi lalokau henia.
“Hereva lasi be mai ena nega bona ita herevahereva be mai ena nega.” (Kohelete 3:7) Bema dala ia kehoa, namona be oi abidadama henia gaudia be emu tamana bona sinana dekenai oi gwauraia hedinarai. Hereva Lada-isidia 3:27 ia hereva bamona, ia gwau: “Bema oi be mai dalana taunimanima haida oi hanamodia, namona be oi hanamodia.” To namona be oi hebogahisi bona oi laloa namonamo guna gabeai oi hereva o gau ta oi karaia totona. Namo lasi oi laloa Bible ena hereva oi diba momo dainai, emu tamana bona sinana oi hereva henia mai hekokoroku danu. Reana oiemu hekwarahi ena huahua anina do ia vara diba. Jay ia gwau: “Lauegu tamana be lagani momo lalodiai hereva momokani ia ura henia lasi momokani. Ai laloa ia be do ia kamonai lasi momokani, to gabeai emai kara namodia dainai ia ese hereva momokani ia abia dae.” Lagani haida idia lao vadaeni neganai, Jay ena tamana ia mase neganai, ia be Keristen elda tauna ta.
Bema oiemu hereva idia abia dae lasi, namona be David ena hereva Salamo 27:10 dekenai oi laloatao, ia gwau: “Bema lauegu tamana bona lauegu sinana ese lau idia rakatania, Iehova sibona ese lau ia abia dae diba.” Keristen kongregesen dekenai kamonai turadia namodia idia noho, bona idia ese oi idia ‘laloa bada,’ oiemu kakana eiava tadina ese oi idia laloa ena bada idia hanaia unai. (Hereva Lada-isidia 18:24) Idia edia heduru amo bona oiemu Witness tamana eiava sinana ena heduru amo oi be hereva momokani dekenai do oi gini goada diba.
[Picture on page 21]
Oiemu ura hagugurua totona emu tamana bona sinana oi doridia bena idia hepapahuahu be dika badina ruma bese lalonai lalo-hekwarahi ia habadaia