Matamata Taudia Edia Henanadai . . .

Bema Egu Tamana o Sinana Ia Kara Kerere be Edena Bamona?

“Egu tamana be lagani 10 bamona Keristani orea lalonai ia noho. To hari ia goada lasi lauma dalanai. Ia be Baibel ia stadilaia lasi, bona ia be nega ibounai hebou dekenai ia lao lasi. Ia be kongregesen dekenai idia noho tadikaka ia gwauraia dika. Ia be tanobada taudia edia lalohadai bese idauidau bona gau idauidau dekenai ia abia. Lau laloa ia be mai ena kara kerere momo herea.”—Lagani 19 kekeni matamatana.

TAMA SINA ibounai idia goevadae lasi. “Badina be ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:23) To bema tamana eiava sinana ese Keristani kara namodia idia karaia taunimanima vairanai, to sibodia idia noho neganai kara idaudia idia karaia, unai be idauna. Kekeni matamatana ta ia gwau: “Taunimanima vairadia egu tamana ia namo, to haida ese idia itaia lasi neganai ia be idau momokani, ia be hebogahisi lasi momokani! Ia be egu kara ibounai ia maumaulaia, bona ia ese famili taudia ibounai ia habadua. Hari lau be moale lau davaria diba lasi egu mauri lalonai. Egu mamina ia dekenai be ia lau inai henia.”

Reana hunia dalanai hisihisi idauidau idia davaria matamata taudia edia huanai badu dikadika mamina ia noho. Hahine ta ladana Mary, ese ena revareva lalonai ia torea, “dagedage, hereva dika, bona kara dikadia idauidau” ia mamia iena inuinu kekero karana ia hunia tamana amo. Mai badu ida ia gwau, “taunimanima haida be ai idia hedavari neganai, ai idia hamaoroa, tamana namona ai abia dainai ai totona idia moale bada.”

Baibel ese kara koikoi karadia ibounai ia gwauraia dika. (Iamesi 3:17) Ita ia hadibaia Dirava idia tomadiho henia taudia huanai, “kara maoromaoro koikoi taudia” haida do idia noho. (Salamo 26:4; Iuda 4 itaia.) Ena be unai siri oi diba, to bema emui tamana eiava sinana​—Dirava ia gwau oi lalokau henia bona matauraia taudia unai​—ese unai bamona koikoi karana idia karaia, do ia auka. Matamata taudia momo ese unai kara idia lalo-hekwarahilaia bada. Kekeni matamatana ta ia gwau: “Heduru lau ura lau abia, Baibel ia gwau ‘emu tamana oi matauraia,’ to egu tamana lau matauraia diba lasi.”

Idia Oi Matauraia Ena Anina Korikorina

Ena be matamata taudia haida idia laloa edia tama sina be hegeregere lasi, to momokani Baibel ia gwau tama sina matauraia karana amo ta ia ‘heau boio’ diba lasi. (Efeso 6:1, 2) To, ita gwau lasi tama sina matauraia ena anina be oi moale emu tama sina edia mauri dalana dekenai, eiava oi idia kara henia dalana oi moalelaia. Lasi, Baibel lalonai “matauraia” ena anina ta be siahu taudia edia dagi siahuna oi abia dae.

Hegeregere, aposetolo Petero ese Keristani taudia ia hagania “King do umui matauraia.” (1 Petero 2:17) Petero ia diba nega momo king taudia be kara namodia idia karaia lasi. Haheitalai ta be King Heroda Agripa Ginigunana, ia be moni negea kava tauna bona ena kara ia biagua lasi tauna ta. Roma gavamani ese idia abia hidi Palestine taudia edia King ai ia lao totona murinai, ia ese Keristani taudia ia dagedage henidia. “Iamesi, Ioane ena kakana be kaia dekenai Heroda ese ia alaia mase. Ia itaia, Iuda taudia idia moale inai kara dekenai, vadaeni, unai dainai ia ese Petero danu ma ia dogoatao.” (Kara 12:​1-3) Petero ese king taudia gwau-edeede henia karana ia hagoadaia lasi. To, ia gwau namona be king taudia ita matauraia bona ita kamonai henidia. Bona unai ia karaia be mai ena badina namona. Gavamani taudia kamonaia karana be Iehova ena ura. Bona Petero ena nega lalonai king haida edia lohia siahuna be bada herea. Solomona ia gwau: “King ese iena ura ibounai do ia karaia momokani. King ena hereva be mai siahu danu, bona tau ta ese king dekenai inai bamona do ia hereva lasi, ‘Dahaka oi karaia noho?’ ”​—Hadibaia Tauna 8:​3, 4.

Unai hegeregerena, emu tama sina​—herevana idia be mai edia kara kerere​—to idia be mai edia siahu emu mauri lalonai. Unai dainai, unai be aonega lasi, bema emu tama o sina oi dagedage henia eiava oi ura henia lasi. Unai bamona oi karaia neganai, emui mauri ia ha-aukaia sibona lasi to Dirava ena lalo-namo oi haboioa diba. (Aonega Herevadia 30:17; Hadibaia Tauna 10:4 itaia.) Bema mai emu ura ida oi gaukara goada idia oi matauraia totona, unai ese oi bona emu tama sina ihuanai maino sisina do ia havaraia.​—Kolose 3:20.

Badu Koua Dalana

To, edena bamona oi ese oi ia hahisia bona habadua tauna be oi matauraia diba? Unai be auka. To, bema nega ibounai ena kerere oi laloa, unai ese emu badu do ia hagoadaia sibona. Ena kara kerere oi laloa sibona lasi to reana ia karaia kara namo dainai ia do oi hanamoa diba, ani?

Aonega Herevadia 19:11 ia gwau: “Tau ta ena aonega ese haheauka ia henia noho, vadaeni ia badu haraga lasi.” Emu tama sina edia kara oi dibaia toho namonamo neganai, reana unai ese lalo-parara do ia henia oi dekenai. Ena kara be dika momokani, a? Eiava ia goada lasi, ena lalona ia manoka, bona heduru ia abia be namo? Gorere, lalo-metau, sibona noho, eiava ena moni gaukara ena hekwarahi dainai ena kara be unai bamona, a? Bema ena hekwarahi oi laloa, unai ese oi do ia durua emu tama sina oi hebogahisi henia, bona emu badu do ia hamaragia diba.

Herevana dahaka ia vara, to bema unai gaudia be ma ta danu oi kikilaia unai ese oi do ia durua. (Aonega Herevadia 12:25) Kekeni ta ia gwau: “Guna egu Tamana ia inuinu kekero. Lau be ia lau hamaoroa lasi edena bamona lau laloa, to egu lalona dekenai lau atoa.” To sibona unai oi lalohisihisilaia lasi. Tama sina edia maduna oi abia lasi, to Keristani kongregesen lalonai lo taihu bona tadikaka ese oi idia durua diba. (Mareko 10:30 itaia.) Aonega Herevadia 17:17 ia gwau: “Turadia be nega ibounai edia lalokau idia hahedinaraia. Nega dikana ia vara neganai emu tadikaka ia noho oi ia durua totona, ani?”​—Today’s English Version.

‘Ena Kara Lau Haidaua Diba’

Matamata haida idia lalohisihisi badina idia laloa tama sina edia kara kerere hunia be edia maduna. Mary be ia bona ena tadidia dekenai idia vara gaudia ia laloatao bona ia gwau: “Mai gari danu ai noho badina ai ura lasi ta ese emai tamana ena inuinu kekero karana ia dibaia.” Haida be edia tama sina edia kara kerere haidaua totona idia hekwarahi ela bona idia hesiku momokani.

Ena be emu tama o sina oi lalokau henia bada, to namona be oi diba ena kara dika be emui kerere dainai lasi. Ta be sibona ‘ena metau do ia huaia’ ena maduna Dirava vairanai. (Galatia 6:5; Iamesi 5:14 itaia) Emu tama sina edia kara biagua maduna be emu maduna lasi. Bema nega ibounai tama sina oi gwau henia bona edia kara dainai oi hereva momo, unai ese emu tama sina do ia hahisia sibona.

To, oi ese gau ta oi karaia diba. Emu tama sina be edia kara idia haidaua totona ‘nega ibounai oi guriguri’ diba. (1 Tesalonika 5:17) Bema hanaihanai emu lalokau oi hahedinaraia bona oi hereva henia namonamo reana unai ese ena kara kerere do ia haidaua. Reana unai sibona oi karaia diba lasi, to dala oi tahua oi haheauka noho totona.a

Bema oi bona emu tama sina be Keristani orea lalonai, bona emu tamana be inuinu karana ia karaia eiava badu dikadika karana ia karaia, oi be mai emu maoro kongregesen elda taudia ida oi herevahereva. (Iamesi 5:14) Inai kara ena anina be emu tamana oi dadaraia lasi to ia oi lalokau henia dainai oi ura heduru do ia abia ena kara do ia haidaua totona. Momokani, tama sina haida be mai badu danu edia kara idia gorea bona hunia dalanai edia natudia idia panisia. To ‘kara maoromaoro dainai hisihisi idia abia’ matamata taudia idia diba Iehova ese edia haheauka dainai idia ia lalo-namo henia bona ena nega korikori ai, kara momokani do ia hahedinaraia.​—1 Petero 3:14; 1 Timoteo 5:24, 25.

Sibona Emu Hahemauri Oi Tahua

Solomona ia gwau: “[Hisihisi ese] aonega tauna be kavakava tauna ia halaoa.” (Hadibaia Tauna 7:7) Madi, matamata taudia haida be badu ese ia biagua badina tama sina edia haheitalai dikadia dainai bona unai ese idia ia doria kara dika idia karaia totona. Haida be Dirava idia badu henia bona Keristani kara idia rakatania! (Aonega Herevadia 19:3) Baibel ese ita ia hagania: “Do oi naria namonamo, badu ese oiemu lalona do ia veria, bona Dirava dekenai do oi hereva dika. . . . Do oi naria namonamo, kara kerere daladia dekenai do oi lao garina.​—Iobu 36:​18, 21.

Emu tama sina edia gini Dirava vairana oi laloa momo lasi, to namona be ‘mai gari bona mai heudeheude danu emu hamauria do oi tahua noho.’ (Filipi 2:12) Idaunegai, lohia merona ta ladana Hesekaia ese unai bamona ia karaia. Ena tamana, Pavapava Ahasa, be sibona ia gwauraia ia be Iehova tomadiho henia tauna. (Isaia 7:​10-12) To ia be Dirava koikoidia ia tomadiho henidia, danu iena natudia memero be lahi lalonai ia gabua boubou gauna bamona! (2 King Taudia 16:​1-4) Mani oi laloa, mero matamatana Hesekaia be dahaka ia laloa unai hereva momokani dadaraia karana dekenai! Haida idia laloa unai mero ese Salamo 119:​28 ia torea, ia gwau: “Egu lalohisihisi ese egu goada ia haorea. Mani lau do oi hagoadaia, oiemu gwauhamata hegeregerena.”

Iehova be unai hegeregerena ia karaia! Ena be hereva momokani dadaraia karana ena huanai ia noho to Hesekaia be ena guriguri bona Dirava ena Hereva stadilaia karana amo lauma dalanai goada ia abia. (Salamo 119:97) Ena hebamo ia naria namonamo danu. (Salamo 119:63) Dahaka anina ia vara? Herevana ena tamana ese haheitalai namona ia hahedinaraia lasi, to Hesekaia be “[Iehova] ia badinaia namonamo.” (2 King Taudia 18:6) Unai bamona oi karaia diba danu! Sedira emu tama sina be koikoi karana idia karaia to namo lasi edia kara oi tohotohoa. Iehova oi badinaia noho, bona reana dina ta emu abidadama karana dainai emu tama sina ese edia kara do idia haidaua.

[Footnotes]

[Pictures on page 15]

Emu tama sina idia kara dika dainai, namo lasi unai bamona oi karaia danu