Mamoe Huina be Hoa Gauna

Noga! ena toretore tauna Australia ai ese ia torea

DAHAKA ese keru bona siahu danu ia koua diba? Dahaka ena bada ese koton varona ena bada ia hanaia, to iena amo idia karaia dabuana ia metau lasi? Keru gabudia ai idia noho taudia edia hetaru be dahaka amo idia karaia? Dahaka idia haroroa neganai ia lata ia lao, bena idia kahua nege neganai ia lou lao ena maka momokanina dekenai?

Unai henanadai iboudiai edia haere be inai: Mamoe huina! Oibe, unai amo idia karaia varodia amo taunimanima ese gau idauidau momo idia karaia diba.

Lagani Handred Momo ai Idia Gaukaralaia

Gunaguna, nao taudia be South America dekenai idia ginidae neganai, Peru taudia bona ma haida idia davaridia, edia dabua namodia be alpaca huina amo idia karaia, unai hui be mamoe ena huina bamona. Idaunegai danu, Baibel negana ai, taunimanima ese mamoe idia naridia, bona edia huina amo varo idia karaia, idia hakakakakaia, bena dabua idia karaia.​—⁠Hereva Lada-isidia 31:13.

Hanaia laganidia 200 bamona lalodiai, Spain ena merino mamoedia idia lalodia bada, badina be idia goada, hui namona momo idia hatubua, bona gabu dikadia ai idia noho diba. Australia ena gabu haida ai medu sisina mo ia diho bona unai gabu idia siahu herea, to merino mamoedia be hegeregere unai gabu ai idia noho. Lagani 1800 vairanai, nao taudia ese Australia idia noholaia matamaia neganai, idia ese aniani mo idia tahua lasi, to idau tanodia ai do idia hoihoilaia diba gauna ta idia tahua, moni do idia davaria totona.

Mamoe huina idia abia hidi. Mamoe be nega daudau lalonai idia sibodia idia loaloa diba, bona taunimanima ese edia huina momo idia abia haraga diba. Puse badadia lalodiai idia udaia be hekwarahi bada lasi, bona, bema nega daudau puse lalodiai ia noho, valavala ese do ia hadikaia lasi. Unai be mai anina bada, badina be England dekenai idia siaia neganai, ia be hua 6 lagatoi dekenai ia noho. Ena namo ma ta be, lahi ese ia araia haraga lasi.

Mamoe Dainai Idia Taga

Lagani 1797 ai merino mamoedia ginigunadia be Australia ai idia ginidae, bena lagani 150 lalodiai Australia ena moni ia hegeregere, badina badana ta be, mamoe huina idia hoihoilaia idau tanodia dekediai. To, lagani 1918 murinai, taunimanima ese idia karaia gaudia idauidau, hegeregere nailon, be mamoe huina ena gabu ai idia gaukaralaidia dainai, mamoe huina momo herea idia hoihoilaia lasi, guna bamona. Bena lagani 1985 murinai Australia ese mamoe huina momo herea ia hoihoilaia, bena ena taga ia bada ia lao. Unai neganai mamoe 166 milion be Australia ai idia noho, bona lagani ta ta iboudiai edia huina idia utua neganai, unai hui ena metau be 950,000 tonne mai kahana.

To lagani 1990 ia ginidae neganai, edia bisinesi ia dika vadaeni. Kampani momo ese mamoe huina momo idia hoia lasi, guna idia hoia bamona, unai dainai Australia ena mamoe naridia taudia 70,000 ese edia mamoe 20,000,000 bamona idia gaukaralaidia diba lasi.​—⁠London, England ena Sunday Correspondent.

Dahaka Dainai Ia be Hoa Gauna?

Taunimanima ese mamoe huina idia hoalaia, badina ia amo gau idauidau idia karaia diba. Mamoe huina ia tubu taunimanima edia huina ia tubu hegeregerena, bona mamoe oreadia haida edia hui kwadogidia bogaragidiai hui latadia idia tubu danu, to merino mamoedia be unai bamona lasi. Edia huina be namo herea, taunimanima momo ese idia tahua gauna. Ena be mamoe huina amo idia karaia varona ena bada ese koton varona ena bada ia hanaia, to ia manoka-manoka dainai, ia amo idia karaia dabuana ia metau lasi. Ma danu, kala idauidau ia dekenai idia atoa be haraga.

Mamoe huina amo idia karaia varona be nega ta emu imana amo oi hamotua toho, a? Ia auka, ani? Unai dainai, mamoe huina amo idia karaia dabuana be pakosi amo oi utua be namo. Mamoe huina varona be maoromaoro lasi dainai, bema oi haroroa do ia lata ia lao, bena oi kahua nege neganai do ia lou ena maka korikorina dekenai. Unai dainai mamoe huina amo idia karaia dabuadia idia kaukau neganai idia makuku lasi.

Ma danu, mamoe huina ta ta padadiai hodahoda ia noho dainai, mamoe huina amo idia karaia dabuana ia hahedokilaia tauna be siahu negana lalonai ia siahu lasi, bona keru negana lalonai ia keru lasi. Dabua idaudia haida bema idia paripari sisina, idia kaukau lou haraga neganai idia hahedokilaia taudia ese keru ena mamina idia abia, to mamoe huina amo idia karaia dabuana be unai bamona lasi.

Mamoe huina haida idia hasiahua bona masini amo idia gigia, felt ai idia halaoa, bena unai amo kapet bona tenis bolo bona gau idauidau momo idia karadia. Danu, mamoe huina idia mogea bena idia hatua daladia be idauidau, unai dainai mamoe huina amo idia karaia dabuadia be idauidau​—⁠haida idia auka, haida idia manoka.

Idia Abia Dalana

Tano haida lalodiai mamoe huina momo idia utua dainai, ruma idia haginidia, idia lalodiai unai gaukara idia karaia totona. Lagani ta ta amo nega tamona idia utua, to siahu tanodia haida ai lagani ta ta amo nega rua idia utua.

Mamoe huina utua taudia edia imadia bona dorudia idia goada. Paua pakosidia idia gaukaralaidia, bona mamoe ta ena huina ibounai nega tamona idia utua oho toho. Diba momo tauna be dina tamona ai mamoe 200 edia huina ia utua oho diba. Mamoe huina ia utua matamaia ena bogana ai, bena ia utua lao, ena ohena ta, ena doruna, ena aiona, ena pagana, bona ena ohena unai kahana amo ia utua oho. Mamoe huina namona be ena pagana bona ena ohena amo.

Mamoe edia huina idia utua bena mamoe idia ruhadia neganai, idia heau lao, idia roho isi roho isi, edia huina metauna, hetaru metauna bamona, idia kokia oho vadaeni dainai. Edia kara bema oi itaia, do oi kiri.

Unai murinai, gaukara taudia ese mamoe huina idia haria. Ena namo idauidau bona ena dika idia tahua namonamo. Diba momo tauna tamona be pura tamona lalonai mamoe huina 4,500 kilogram ia tahua diba. Unai murinai mamoe huina idia hagoevaia bena idia hakaukaua, bena iena amo dehoro (lanolin) idia kokia. Ia mauri noho mamoena ena huina ia namo herea, mase gauna ena ia hereaia.

Naria Namonamo Bena Do Ia Noho Daudau

Kaubebe haida ese mamoe huina idia ura henia bada. Edia gatoi be ia dekenai idia atodia bena idia papa neganai, idia amo idia raka lasi gaigai-gaigaidia ese mamoe huina idia ania. Bema varahu eiava aniani sisina be mamoe huina ai, ena mamina idia ura henia bada. Unai dainai, mamoe huina amo idia karaia dabuadia bema idia miro sisina, maua o sutkeisi lalonai oi udadia lasi. Mamoe huina amo idia karaia dabuana, nega momo oi hahedokilaia lasi gauna, be hodahoda ia vareai diba lasi gauna lalonai oi udaia, to bema nega momo oi hahedokilaia, namona be oi brasia loulou bona oi taporaia loulou.

Hari inai negai, saiens taudia edia diba dainai, mamoe huina amo idia karaia dabuadia momo ai muramura idia atoa, bena kaubebe bona valavala ese idia hadikaia diba lasi, lahi ese ia araia haraga diba lasi, bona idia huria neganai ia maragi ia lao (hedikoidae) lasi. To, oi huria neganai oi naria namonamo. Dabua huria masini haida lalodiai oi huria diba, to haida be lasi. Bema emu imana amo oi huria, ranu maivalo o ranu keruma lalonai oi atoa bena oi gigia ela bona ia goeva. Spesel muramurana ta be sitoa amo oi hoia diba mamoe huina amo idia karaia dabuana huria totona, to bema unai be lasi, sopu pauda be ranu ida oi buloa guna bena oi huria. Detegen muramurana amo oi huria lasi, do ia hadikaia garina. Sopu ibounai kokia totona, ranu kava momo lalonai oi atoa, to namona be unai ranu ena siahu be huria ranuna ena siahu hegeregerena. Unai murinai, dabua mai ranuna be tauela ai oi lokua bena oi gigia, ranu kokia totona.

Mamoe huina amo idia karaia dabuadia edia namo ta be, oi huridia murinai oi aenidia lasi. To bema oi ura ta oi aenia, ia kaukau vadaeni neganai stim aeni amo oi aenia, eiava dabua taina oi hapariparia bena ia latanai oi atoa bena oi aenia. Unai oi karaia neganai aeni oi doria lasi, to dabua latanai oi atoa bena oi abia isi, atoa abia isi.

Mamoe Huina be Hoa Gauna

Mamoe huina be hoa gauna, ani? Iena amo taunimanima edia hetaru, dabua, tenis bolo, bona gau idauidau momo herea idia karadia. Unai Australia taudia gunadia ese mamoe idia abidia hidi be aonega karana. Ita tanikiu henidia, badina be taunimanima ese mamoe huina amo idia karaia gaudia idauidau momo ita gaukaralaidia diba.

[Pictures on page 24]

Huina idia do utua lasi neganai

Huina utua neganai

Huina idia utua murinai

Idia karalaia dabuana ia moalelaia