La Raclette!—Ororo Gabuna amo ela bona Aniani Patana
Noga! ena toretore tauna Switzerland ai ese ia torea
HAIDA idia gwau, lagani 1875 bamona ai, paraka bada negana lalonai, tatau haida be vine umana ta lalonai idia gaukara noho, Switzerland ena hanua ta ladana Sierre kahirakahira dekenai. Dina tubua ai lahi idia helaia hegege, paraoa bona sisi idia ania bona uaina idia inua. Idia ta ia ura aniani siahuna do ia ania. Unai dainai ena sisi be lahi gidadia latadiai ia atoa, ela bona ena kopina ia veve. Bena ena kopina ia kakasia oho, ena paraoa latanai ia atoa—la raclette ia vara unai!
Ena be unai sivarai hamomokania gauna be lasi, to la raclette idia manadalaia vadaeni, bona Switzerland lalonai Valais ena ororo gabuna dekenai idia manadalaia momokani. French gado ai inai hereva racler ena anina be “kakasia,” bona sisi idia havevea bena idia dabaraia dalana idauna be inai bamona idia gwauraia be maoro. To raclette sisi idia karaia dalana be idau vaitani.
Boromakau Dekediai Idia Karaia
Valais dekenai, siahu negana ia ginidae neganai, sinou ia ore bona rei ia tubu badabada. Boromokau ese unai aniani idia moalelaia, bona idia ania noho lalonai, ororo dekenai idia daekau ela bona aisi gabuna kahirakahira dekenai. Guna, edia milika abia bona faktori dekenai abia lao dalana be lasi. Unai dainai, sisi be boromakau idia loaloa gabuna dekenai idia karaia. Edena bamona idia karaia?
Sosipani badana ta, uaea ta, lahi au, bona ma gau haida be hosi o doniki latadiai idia laohaidia unai gabu dekenai. Nadi be unuseniai idia abidia hidi lahi gabuna karaia totona. Milika ena digara idia kokia lasi, unai dainai unai sisi be mai digarana.
Hari inai negai, sisi karaia taudia Valais kahana dekenai ese edia sisi na ruma maragidia lalodiai idia karaia, unai ruma be ororo ena gabana gabudia idauidau ai idia haginidia vadaeni, henu kahana amo ela bona atai kahana. Ruma ta ta lalodiai edia gaukara gaudia idia atodia vadaeni, bona tano lalonai idia geia daiutuna ta lalonai sisi ena kopina idia damenaia idia ha-aukaia totona. Sisi ta ena toana be uili ena toana bamona, ena metau be kilogram 5 bamona. Idia naria ela bona hua toi o ima idia ore, bena idia laloa sisi ia hegeregere vadaeni.
La Raclette Dabaraia Dalana
Vaia, la raclette be poteto, pikel, oniani kurokurodia maragidia, pepa bona unai bamona gaudia ma haida, bona, momokani, uaina kurokuro Valais amo galasi ta ida idia dabaraia. Bema aniani rumana ta lalonai oi gwauraia hidi, ueita ese sisi uilina kahana ta do ia mailaia emu aniani patana dekenai, ena kopina ena kahana ta be gwaragwara ia karaia noho, lahi amo idia hasiahua vadaeni dainai. Bena ena kahana mai ena toana namona do ia kakasia oho bona emu poteto latanai do ia atoa!
Emu ruma ai elektrik raclette sitouna do oi iusilaia diba. Unai bamona sitoudia haida lalodiai sisi kahana maragidia mo oi havevedia diba, bona ma haida edia bada be hegeregere sisi uilina kahana ta do oi udaia. To bema oi ura lasi raclette sitouna ta do oi hoia, sisi be emu aveni lalonai do oi havevea diba.
Taunimanima momo ese edia vadivadi taudia hari aniani idia henidia, badina be momo ese idia moalelaia bona ia be hekwarahi lasi. Vadaeni, emu turadia be aniani totona do oi boiridia neganai, inai aniani idauna, Switzerland ena ororo amo ia mai gauna, la raclette, do oi henidia be namo!
[Pictures on page 26]
La raclette: sisi dabaraia dalana idauna ta
Sisi ia karaia
“La raclette” ida idia dabaraia gaudia
“La raclette” ia dabaraia