Mahuta Hebou Karana be Daika ese Idia Hadibalaia?

BEIBI matamata ta ia vara neganai moale bada ia havaraia! Tama bona sina ese idia moalelaia, idia gadara henia, bona beibi ese dahaka ia karaia gaudia ibounai be edia turadia dekenai idia kikilaia. To nega sisina murinai idia lalo-parara unai beibi ese maduna badana idia dekenai ia atoa. Unai beibi maragina do ia tubu neganai, idia ese do idia hadibaia inai matabodaga ia bada ia lao tanobadana dekenai ia sibona do ia naria namonamo totona.

Tama sina be edena bamona edia lalokau natu maragina do idia durua ruma bese namona bona moalena dekenai do ia tubu daekau totona, bona edena bamona idia durua tau badana ai ia lao neganai reana sibona ena natudia do ia hadibaia Dirava do idia gari henia totona? Tama bona sina haida be reana idia laloa unai be gaukara aukana momokani, unai dainai ai laloa ai torea durua herevadia haida do idia ura henia.

Oiemu natudia oi hadibadia dalana be reana oiemu tamana bona sinana ese oi idia hadibaia dalana bamona. To tama bona sina momo be mahuta hebou karana dekenai haida ese idia hadibadia momo lasi; bona reana gau haida idia diba lasi. Ena be oi idia hadibaia namonamo, to tanobada be hari ia idau momokani, bona natudia dekenai namo gaudia hadibaia be ia idau. Ma danu, inai magasin idia duahia taudia momo be kara ena taravatu hereadia bona mauri namona dalana hereana idia abia dae. Unai dainai, namona be sibona oi henanadai henia, oi gwau: ‘Lauegu natudia lau hadibaia dalana be hari lau abia dae herevadia dekenai bona edia namo totona ia hegeregere, a?’

Tama sina haida idia laloa edia natudia be sibodia idia ura dalana dekenai mahuta hebou herevana idia dibaia. To unai ese gari henanadai haida ia havaraia, hegeregere: Dahaka do idia diba? Edena negai? Daika edia amo, bona edena bamona gabudia dekenai eiava dahaka karadia amo idia hadibadia?

Sikuli ese Idia Hadibaia Herevadia

Tama bona sina momo idia gwau: “Vadaeni, unai be sikuli gabuna dekenai do idia diba.” Sikuli momo be mahuta hebou karana idia hahedibalaia, to momo lasi ese kara goeva idia hahedibalaia. United States ena Edukeisini Seketere gunana William J. Bennett ia gwau, lagani 1987 lalonai sikuli dekenai “idia ura lasi kara namo bona kara dika edia idau idia hahedinaraia.”

Kekeni namodia rua edia tamana, ladana Tom, ese edia sikuli gunalaia hahinena ia nanadaia, ia gwau: “Dahaka dainai oi gwauraia hedinarai lasi idia headava lasi taudia idia mahuta hebou be kerere?” Unai hahine ia gwau, ia ura unai bamona ia hereva, to namo lasi sikuli taudia ese natudia edia headava lasi sinadia bona edia sinana ida idia noho hebou tataudia idia hahemaraidia. Unai dainai, sikuli ese sikuli natudia idia hamaoroa edia ura hegeregerenai idia abia hidi diba, to idia hadibadia lasi edena dala idia abia hidi be maoro.

‘Buka Ta Do Lau Hoia’

Tama bona sina haida be reana idia gwau: “Mahuta hebou ia herevalaia bukana ta do lau hoia.” Reana buka namona ta dekena amo heduru do idia abia diba, to namona be unai buka ena hereva oi tahua namonamo guna, ena hereva oi abia dae diba o lasi. Mahuta hebou idia herevalaia bukadia haida sibona be kara goeva idia herevalaia eiava maoro bona kerere dalana idia herevalaia. Buka haida ese matabodaga karadia idauidau idia gwauraia namo. Bona buka haida sibona idia gwau headava taudia sibona be mahuta hebou karana idia karaia be maoro.

Unai dainai, natu dekenai kara namodia hahedibalaia ena maduna be guna Dirava ese ia henidia taudia dekenai ia giroa​—⁠edia lalokau tamana bona sinana dekenai. Bible ese tama taudia ia hamaorodia, ia gwau: “Bona oiemu natuna danu [Dirava ena taravatu] oi hadibalaidia mai emu goada ida; ruma ai oi helai negadiai, bona dala ai oi raka negadiai, bona oi hekure negadiai, bona oi toreisi negadiai, oi herevalaidia.”​—⁠Deuteronomi 6:⁠7.

Momokani, tama bona sina be hahediba taudia namodia edia natudia dekenai. Buka ta lasi eiava sikuli ta lasi ese edia lalohadai maorona bona ruma bese ena haheitalai namona edia namo ia hanaia diba. William Bennett, ia gwau: “Stadi edia ripoti ese idia hahedinaraia bema tama bona sina ese mahuta hebou karana edia natudia dekenai idia hadibaia neganai, nega momo natudia be mahuta hebou karana do idia karaia lasi. . . . Ma haida lasi to tama bona sina ese unai maduna idia huaia neganai edia natudia edia kara idia haidaua diba.”

To, tama bona sina haida idia gari badina idia laloa natudia be diba idia abia neganai do idia ura unai kara idia karaia. Dahaka do oi hahedibalaia bona edena bamona oi hahedibalaia be gau badana. Gau momokanina ta be inai, matamata taudia be mahuta hebou karana dekenai diba do idia abia. Dala maorona dekenai idia diba totona namona be mauri ena kara namodia idia karaia lalokau tamana bona sinana ese idia hadibadia, ani? Namo lasi dala dekenai ia raka kava tauna ta dekenai ia lao, eiava sikuli gabuna dekenai, eiava ena lalona be miro karadia amo ia honu tauna ta dekenai ia lao unai hereva ia diba totona, ani?

To henanadai ta be inai: Unai bamona gaudia be edena bamona Dirava badinaia dalanai bona hemataurai dalanai umui hahedibalaia diba? Matamata taudia ese haida edia hereva idia kamonai, idia gwau, “taunimanima iboudiai be edia ura bamona mahuta hebou karana idia karaia,” to edena bamona idia dekenai do oi hamomokania diba taunimanima namodia bona moale korikori taudia ese unai bamona idia karaia lasi? Edena bamona do oi durudia diba bona do idia lalo-parara namona be Bible ena taravatu idia badinaia bona “heudahanai karadia do idia rakatania momokani,” badina unai neganai idia ese moale korikori edia mauri lalonai do idia davaria, bona unai dala sibona amo Dirava idia hamoalea diba? Murinai sivaraidia ese unai henanadai badadia edia haere namona do idia haerelaia.​—⁠1 Tesalonika 4:⁠3.

[Blurb on page 3]

“Tama sina ese edia natudia idia hadibaia taravatudia be do idia badinaia.”—⁠U.S.News & World Report