Edena Negai Hadibaia Hamatamaia bona Dahaka Gwauraia

TAMA sina momo be edia maduna idia huaia totona, idia laloa miniti 10 uda dekenai edia mauri lagani 13 natudia danu idia raka neganai, unai be nega namona mai hemarai danu mahuta hebou herevana be hehuni herevadia amo edia natuna idia hadibadia. To nega momo ia hedinarai natuna be ia bada dainai unai hereva ia diba vadaeni bona tama sina dekenai ma diba haida ia abia diba lasi. Mai edia lalokau tama bona sina momo idia gwau: “Hereva iboudiai lau ura hamaorodia neganai, lau davaria unai hereva iboudiai idia diba vadaeni.”

Dala namona ta ia noho unai mai anina bada herevadia idia hadibadia totona, a? Bema dala ta ia noho, tama bona sina be edena negai idia hadibaia hamatamaia be namo, bona dahaka do idia karaia bona dahaka do idia gwauraia?

Aonega dalana be beibi ia vara negana amo oi hegaegae unai anina bada herevadia oi hadibaia totona. Natudia be maragi neganai oi hadibadia hamatamaia, unai neganai mai hereva metaira danu oi hadibaia diba, iena bada bona aonega hegeregerenai oi hadibaia noho.

Tama sina ese edia natudia maragidia idia hadigua neganai, namona be edia tauanina kahana ta ta idia hadibaia, hegeregere do idia gwau: “Inai be oiemu kemena . . . oiemu bogana . . . oiemu tuina.” Dahaka dainai bogana bona tuina ena ihuanai idia noho tauanina kahadia oi gwauraia lasi? Unai be hemarai gaudia, a? Eiava unai be hehuni gabudia dainai do ita gwauraia lasi, a? Namo lasi ita ese dala dekenai idia gwauraia hemataurai lasi herevadia be unai hehuni tauanina kahadia dekenai ita gwauraia. Namona be oi gwau “usi” eiava “kio,” ani? Unai tauanina kahadia rua be Dirava ese ia karaia bona ia gwau, “namo herea.”​—⁠Genese 1:31; 1 Korinto 12:​21-24.

Reana gabeai, bema natudia ese beibi ena napi senisia karana idia itaia neganai, namona be hemataurai dalanai oi gwau diba, memero be mai edia usi bona kekeni be mai edia kio. Namona be idia oi hadibadia namonamo unai be edia tauanina hehuni kahana. Ruma bese lalonai sibona idia herevalaia diba, namo lasi natudia haida dekenai eiava ma taunimanima haida danu idia kikilaia hebou.

Unai dainai, gau momo oi gwauraia hedinarai namonamo guna, bena do umui hemarai lasi, ia maragi momokani neganai oi hadibaia hamatamaia bona ia tubu daekau noho lalonai ena diba unai hereva dekenai do oi habadaia diba.

Natuna Vara Dalana Hadibaia

Natudia edia mauri lagani be 3 ia lao 5 neganai,a reana natuna ia vara dalana do idia lalohadailaia bona do idia henanadai: “Beibi maragidia be edeseni amo idia mai?” Reana inai bamona do oi haere diba, do oi gwau: “Oi be sisina siahu gabu namona ta sinana ena bogana lalonai oi tubu.” Unai neganai unai haere be hegeregere ia dekenai. Gabeai unai natuna ma do ia henanadai, do ia gwau: “Beibi be edena bamona bogana amo do ia lasi?” Oi haere diba, oi gwau: “Dirava ese sinana ena tauanina kahana ta dekenai beibi havaraia gabuna ta ia karaia.” Natuna ena kamonai karana be nega kwadogi sibona, unai dainai namona be haere be ia kwadogi bona ia maoro sibona. Nega maorodia ai, hereva haida sisina sisina oi gwauraia, gabeai hereva haida ma oi gwauraia diba.

Bema tama sina idia naria namonamo neganai, idia ese dala idauidau do idia davaria diba edia natudia idia hadibaia totona. Bema varavara hahine ta be mai ena bogana neganai, reana sinana be ena natuna do ia hamaoroa diba, do ia gwau: “Oiemu lalana Susan be reana kahirakahira beibi ta do ia abia​—⁠pura haida vairanai oi do vara lasi neganai, lauegu bogana ena bada be oiemu lalana ena bamona.” Beibi maragina ia do vara lasi neganai, unai hua momo lalodiai be nega namona ena kakana o taihuna be mai moale bada danu oi hadibaia.

Reana gabeai natuna do ia henanadai lou, do ia gwau: “Beibi be edena bamona ia matamaia?” Auka lasi haerena be inai, do oi gwau: “Tamana ena gatoi bona sinana ena gatoi idia hakapua bena natuna ia tubu hamatamaia unai, hegeregere uhe ta oi hadoa neganai ia tubu bena flaoaflaoa ta o au ta ai do ia lao bamona.” Nega ma ta natuna ma do ia henanadai, do ia gwau: “Tamana ena gatoi be sinana lalonai edena bamona ia vareai?” Mai hemataurai danu oi gwau diba: “Mero ena tauanina toana oi diba. Ia be mai ena usina. Sinana ena tauanina dekenai gabu ta ia noho bona usina be unai gabu dekenai ia vareai diba bona gatoi ta ia atoa diba. Dirava ese ita be unai bamona ia karaia, unai dala amo beibi be gabu namona dekenai do idia tubu ela bona sibona edia mauri do idia noholaia. Unai murinai beibi namona matamatana ta ia vara!” Dirava ese hoa dalanai unai gau namodia ia karaia gaudia be hoa dalana amo emu natuna oi hadibaia diba.b

Namona be oi naria namonamo henanadai be hemarai dalana dekenai oi koua garina, hegeregere oi gwau lasi: “Oi bada sisina neganai oi do lau hamaoroa.” Unai ese natuna ena daradara do ia habadaia bona reana diba abia totona haida dekenai do ia lao. Natuna ena bada hegeregerenai henanadai ia henia neganai, ena bada hegeregerenai auka lasi haere bona hemataurai haerena oi henia ia dekenai. Bema oiemu natuna ena haere oi henia lasi bona oi hadibaia namonamo lasi neganai, gabeai oi dekenai do idia lao lasi unai bamona hereva ma haida idia tahua totona.

Edena Negai Hadibaia?

Tama sina momo idia laloa namona be edia natudia be sikuli dekenai idia do lao lasi neganai, idia ese unai gaudia ibounai idia lalo-pararalaia guna, bona sikuli gabuna dekenai idia ese ma sikuli natudia edia hereva koikoidia do idia kamonai lasi.

Tubuna tau buruka ta, ia gwau: “Lau be henanadai ta lau gwauraia lasi, to lauegu mauri lagani be 6 neganai, lauegu tamana ese beibi edia vara dalana lau dekenai ia hadibaia. Ia gwau tau bona hahine idia mahuta hebou neganai beibi idia karaia hamatamaia be auka lasi, hegeregere aniani oi ania bamona, to Dirava ia gwau unai kara be headava taudia sibona ese do idia karaia. Unai neganai tamana bona sinana ese unai beibi do idia lalokau henia bona do idia naria.” Unai tubuna tauna be ma ia gwau: “Nega korikori dekenai lauegu tamana ese unai hereva lau dekenai ia hadibaia, badina edia mauri lagani 6 memerodia haida be lau lalo-pararalaia lasi piksa dikadia haida idia torea bona idia kirikirilaia.”

Momokani, unai hereva ita gwauraia hedinarai neganai, namo lasi ia be hemarai gauna bamona ita kikilaia, to ia be hehuni gauna ta bamona ita kikilaia. Namona be oi gwauraia lou unai be ruma bese ena hehuni herevana, bona natudia haida dekenai bona taunimanima haida dekenai idia gwauraia hedinarai lasi. Bema oiemu natuna be haida dekenai ia gwauraia kava neganai, reana do oi gwau: “Ssss! Oi laloatao unai be iseda hehuni herevana. Iseda ruma bese lalonai sibona ita kikilaia.”

Hoa Gauna Lasi

Bema inai magasin ia duahia tauna ta ia hoa inai hereva ai gwauraia dainai, ai ura ai hahedinaraia tama sina matamatadia momo be hemataurai daladia namodia idia tahua edia natudia idia hadibaia totona. Hereva maorodia lalokau ruma besena dekenai idia gwauraia hedinarai namonamo be namo, to edia tama sina haida ese idia davaria dalana hegeregerena miro herevadia amo idia diba be dika, ani?

Bema natuna oi kamonai henidia namonamo bona auka lasi haeredia idia dekenai oi gwauraia mai hemataurai danu, lagani haida idia lao neganai do idia ura ma haere haida idia diba neganai idia be oi dekenai do idia mai henanadai haida do idia gwauraia totona.

[Footnotes]

[Picture on page 6]

Sinana ia rogorogo neganai be nega namona anina bada gaudia natuna ai ia hadibaia totona