Matamata Taudia Haida Idia Ura Lasi Idia Mauri

INDIA dekenai matamata taudia momo be sibona edia mauri idia hadokoa. Unai kara idia stadilaia taudia idia gwau, miniti rua rua iboudiai lalonai ta ese sibona ena mauri ia hadokoa, bona miniti 10 10 iboudiai lalonai ta ia mase.

Magasin ta ladana, India Today, ese ripoti ta ia torea ia gwau, lagani 1990 lalonai India dekenai taunimanima 60,000 be sibodia edia mauri idia hadokoa. Sibodia edia mauri idia hadokoa taudia haida edia lagani be 10 sibona.

Unai magasin, India Today, ia gwau lagani 1990 lalonai, “matamata taudia 2,500 bona ma haida idia headava gwauraia hetura karana ia dika dainai sibodia edia mauri idia hadokoa.” Taunimanima edia lalohadai bona kara idia stadilaia taudia idia gwau, matamata taudia be sibodia edia mauri idia hadokoa karana ia bada ia lao ena badina ta be, idia do maragi momokani lalonai idia doridia idia kwalimu totona bona sikuli gaukara dekenai idia uini totona.

Unai magasin ma ia gwau “taunimanima edia lalohadai idia stadilaia taudia idia gwau, ruma bese idia parara karana ese lalohisihisi ia havaraia, bona natudia maragidia be sibodia idia noho dainai edia lalona dekenai sibodia edia mauri hadokoa lalohadai idia abia.”

Baibel ese Keristen tama bona sina ia hagoadadia edia natudia dekenai Dirava ena taravatu idia hadibaia do idia badinaia totona. (Deuteronomi 6:​4-9) Baibel ia gwau, tama bona sina ese edia natudia do idia habadudia lasi, to ia gwau, “Lohiabada ena hadibaia hereva idia dekenai do umui hadibaia.”​—⁠Efeso 6:⁠4.

Ma danu, Keristen matamata taudia ese hari inai negai edia hekwakwanai idia hanaia diba Baibel ena sisiba Filipi 4:​6, 7, ena hereva idia badinaia neganai, ia gwau: “Gau ta totona do umui laloa hekwarahi lasi. To emu dabu gaudia do umui abia totona Dirava do umui noia. Bona umui noia negadia ibounai, mai taniku danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia bona emui kudouna idia mamia gaudia ibounai do ia naria namonamo.”