Iboudiai Do Idia Goevadae

KARA, noho gabuna, bona medikal heduruna hegeregeredia, iseda tauanina dainai danu, ita gorere diba eiava lasi. Iseda tamana sinana edia amo ita abia maurina, bona iseda manoka hegeregeredia gabeai ita abia goreredia danu, be mai anina iseda tauanina dekenai.

Doketa ta ia gwau: “Oi vara neganai oi abia tauanina hegeregerena, do oi noho namo eiava lasi, do oi mauri daudau eiava lasi, bona do oi mauri eiava lasi.”

Bema iseda kwarana idia hisihisi o iseda varovaro idia auka, o iseda lalona idia hesiku momokani, o iseda turiana o kudouna idia manoka, herevana edia badina be dahaka, to unai dainai ita be dina iboudiai ita diba iseda tauanina bona iseda darana idia namo momokani lasi. Unai gorere idauidau edia badina be dahaka?

Edia Badina

Doketa ta aposetolo edia negai ia noho ese unai henanadai ia haerelaia. Dirava ena lauma amo Iesu Keriso sivaraina ia torea, ia gwau, dina ta raka diba lasi tauna ta be Iesu dekenai idia huaia lao, edia helaro be ia ese do ia hanamoa. Iesu ese unai tau ia hamaoroa, ia gwau: “Oiemu dika lau gwauatao vadaeni.” Bena Iesu ese ia hahedinaraia ia be mai ena siahu dika do ia gwauatao; unai tau ia hagania, ia gwau: “Oi toreisi, oiemu geda oi lokua, oiemu ruma dekenai oi lao.” Vadaeni, unai tau be unai bamona ia kara! Unai dainai, unai idia itaia taudia “ibounai idia hoa bada, bona mai gari danu Dirava dekenai idia hanamoa.”​—Luka 5:​17-26.

Iesu ese dahaka dika ia herevalaia unai? Unai henanadai ena haere ese ita ia hadibaia, dahaka dainai ita gorere, ita buruka ita lao, bona ita mase. “Buka Helaga ena hereva ibounai be Dirava ena Lauma ese ia havaraia,” unai dainai haere be Baibel lalonai ita tahua diba. (2 Timoteo 3:​16; 2 Petero 1:21) Ita ia hamaoroa, tau ginigunana, Adamu be Dirava ese ia havaraia neganai, ena mauri be goevadae. Dirava ia kamonai henia noho lalonai, gorere ta ena mamina ia abia lasi.

To Adamu be sibona ena ura dainai Dirava ena taravatu ia utua. Iena lohia siahuna unai bamona ia dadaraia neganai, ia kara dika unai. Unai dainai, ia be goevadae lasi tauna ai ia lao bona gorere ese ia idia hadikaia diba, bena gabeai ia mase. Adamu ena gorere bona ena mase edia badina be kara dika.

Gorere haida be tama sina edia amo idia hanai edia natudia dekenai. Unai hegeregerena, goevadae lasi maurina bona ia dainai idia vara goreredia be Adamu ena amo idia hanai, iena bese, tanobada taudia iboudiai, dekenai. Unai hegeregerena, gorere iboudiai be Adamu ena kara dikana dainai. (Genese 2:17; 3:​1-19; Roma 5:12) Roho mauri dalana ia noho, a?

Roho Mauri Dalana

Adamu ese Dirava ena taravatu ia utua neganai, ena kara dika dainai mauri goevadaena ia boio, bena gorere idia vara. Gorere haoredia bona mauri goevadaena havaraia lou dalana tamona be kara dika do idia hekoki. (Roma 5:​18, 19) Edena dala amo? Taunimanima goevadaena ma ta, tau goevadaena Adamu ida ia hegeregere tauna, be sibona ena mauri do ia bouboulaia, mauri ena davana. Badina be Dirava ena taravatu be “mauri ena davana be mauri.”​—Deuteronomi 19:21.

To, Adamu ena bese taudia, mai edia kara dika taudia, ta lasi be hegeregere unai davana do ia karaia. Unai dainai, Iehova ese ena Natuna, taunimanima goevadaena, Iesu Keriso, ia siaia mai ena lalokau ida, ia be sibona ena mauri “do ia atoa diho, taunimanima momo edia dika davana karaia totona,” bona “ia dekena amo mauri do ita abia totona.”​—Mataio 20:28; 1 Ioane 4:9; Salamo 49:7.

Iesu be tanobada ai ia noho neganai, ia hahedinaraia iena Tamana, Iehova, ese siahu ia henia dika do ia kokia; raka diba lasi tauna ia hamaoroa, ia gwau, “Oiemu dika lau gwauatao vadaeni,” bena unai tau ia namo lou vadaeni dainai ia raka lao. Iesu ese unai siahu Dirava ena amo ia gaukaralaia loulou; matakepulu taudia, taia kudima taudia, bona gorere idauidau taudia momo be kara haraga ia hanamodia.

Baibel ese Iesu ena hoa karadia inai bamona ia gwauraia: “Taunimanima momo ia dekenai idia lao. Aena idia dika taudia, matakepulu taudia, idia hereva diba lasi taudia, edia imana idia dika taudia, bona gorere idauidau taudia momo herea idia abia lao, Iesu ena aena badinai idia atoa. Vadaeni Iesu ese idia ia hanamoa. Unai dainai, taunimanima momo idia hoa, badina be idia itaia, hereva diba lasi taudia idia hereva, imana dika taudia idia goada, aena dika taudia idia raka, matakepulu taudia idia itaia diba.” (Mataio 15:​30, 31) Hoa gauna badana be inai: Iesu ese mase taudia ia hamauridia lou diba. Ia hatoredia isi lou negadia haida be Baibel ese ia sivarailaia.​—Luka 7:​11-16; 8:​49-56; Ioane 11:​14, 38-44.

Unai hoa karadia sivaraidia dainai, ita diba momokani Iesu ena siahu be hegeregere gorere iboudiai do ia hanamoa. Dirava ese ia henia siahuna be unai bamona do ia gaukaralaia lou, a? Unai amo ita ese namo do ita davaria diba, a?

Mauri Goevadaena be Momokani Do Ia Vara

Baibel ena peroveta herevadia ese idia hahedinaraia, Iesu be Dirava ena guba gavamanina ena King ai ia lao vadaeni bona hari ia be guba dekenai ia lohia noho. Dirava ese siahu ia henia, taunimanima edia gavamani iboudiai do ia kokia bena tanobada ibounai do ia lohiaia. (Salamo 110:​1, 2; Daniela 2:44) Iesu ese ena hahediba taudia ia hadibalaidia gurigurina ena anina do ia vara: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Dirava ena ura gauna ta be, unai guba Basileiana ese tanobada do ia lohiaia neganai, hoa dalanai taunimanima edia gorere iboudiai do ia hanamoa.

Unai neganai, lauma dalanai bona tauanina dalanai danu, ‘matakepulu taudia ese do idia itaia diba, bona taia kudima taudia be do idia kamonai diba. Edia aena idia dika taudia be do idia roho bona mavaru, bona hereva diba lasi taudia be mai moale bada do idia boiboi.’ “Idia noho taudia ta ese do ia gwau lasi, ‘Lau be gorere.’ ”​—Isaia 33:24; 35:​5, 6.

Dirava ena guba Basileiana henunai, taunimanima edia mauri do ia goevadae dainai, do idia mase lasi, hari inai negai ita mase bamona. Dirava ena gwauhamata be: “Do idia abidadama henia taudia ibounai be . . . mauri hanaihanai do idia abia.” “Dirava ena harihari gauna davana lasi be mauri hanaihanai, Iesu Keriso iseda Lohiabada . . . dainai.” (Ioane 3:16; Roma 6:23) Oibe, gunaguna salamo ta ia gwauhamata: “Kara maoromaoro taudia ese, Dirava ia henidia tano dekenai do idia noho ela bona hanaihanai.” (Salamo 37:29) Tanobada ai ia noho neganai ia kara hegeregerena, unai neganai Iesu ese mase taudia do ia hatorea isi lou, mauri goevadaena do idia abia diba totona. Baibel ia gwauhamata: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”​—Kara 24:15.

Basileia ena lohia siahuna henunai tanobada do ia namo lou dainai, hitolo bada, gorere havaraia gauna, be do ia vara lou lasi. Baibel ia gwau: “Huahua audia ese huahua do idia atoa, tano danu ese aniani gaudia do ia havaraia, bona taunimanima ta ta be sibona edia tano korikori dekenai do idia noho, mai maino danu.” (Esekiela 34:​27) “Tano ena anina [do] idia vara namonamo, badina be, Dirava, iseda Dirava ese ita [do] ia hanamoa.” (Salamo 67:6) ‘Koni momo herea be tano dekenai do ia vara.’ (Salamo 72:16) “Taunimanima idia noho lasi tanona, bona tano kaukauna be do idia moale, bona palauapalaua be unai tano dekenai do idia tubu namonamo.”​—Isaia 35:1.

Dirava ena tanobada matamatana ena namo be Baibel ena buka ginigabena ese ia perovetalaia, ia gwau: “[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.”​—Apokalupo 21:4.

Oi laloa unai hereva do oi abia dae be auka, a? Vadaeni, mani inai oi laloa. Adamu be kara dika tauna ai ia do lao lasi neganai, ena mauri be goevadae. Bema unai neganai ta ese ia hamaoroa, gabeai tanobada be hisihisi ania taudia, gorere taudia, bona idia buruka idia lao taudia amo do ia honudae, unai hereva ia abia dae diba lasi, ani? To, hari inai negai ia momokani.

To, Dirava ena Basileia henunai taunimanima edia mauri do ia goevadae. Iehova ia gwau unai gwauhamata be “maoromaoro bona momokani.” (Apokalupo 21:5) Dirava ese ia gwauhamatalaia gaudia be do idia vara, badina be “Dirava ia koikoi diba lasi.”​—Heberu 6:18.

Vadaeni, unai hahenamo do oi abia totona, hari inai negai edena bamona do oi kara be namo? Mauri goevadaena hanaihanai lao henia dalana be Iesu ese ia gwauraia; ena Tamana ia guriguri henia, ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​—Ioane 17:3.

Mani Iehova ena Witness taudia oi noia, emu ruma lalonai Baibel ena hereva be oi do idia hadibalaia, davana lasi. Oi do idia durua mai edia moale ida, Dirava ena gwauhamata namo hereadia do oi diba totona. Unai amo oi ese mauri goevadaena lao henia dalana do oi rakalaia matamaia!

[Picture on page 14]

Dirava ena tanobada matamatana ai, taunimanima iboudiai ese mauri goevadaena do idia moalelaia