Herevahereva Namonamo

TAUNIMANIMA iboudiai idia aniani, mahuta, bona gaukara be mai anina bada. Kara ma ta danu idia karaia be mai anina bada. Unai be dahaka?

Tau ta ena hereva mani oi laloa, madi lagani ima ia sibona be dibura daiutuna ta lalonai idia koua. Ia gwau: “Unai neganai lau ura bada lau be ma taunimanima ta ida do ai hebamo bona do ai herevahereva. Egu lalona ia parara, lau be sibogu lau noho regerege lasi dainai lau abia lalohisihisina bema lau koua lasi, do lau kavakava.”

Oibe, iseda ura korikorina ta be taunimanima ida do ita herevahereva. Unai kara idia tahua taudia rua, Dennis R. Smith bona L. Keith Williamson, be idia gwau: “Namona be ita ese taunimanima haida do ita davaridia, idia ida do ita herevahereva diba, bona iseda moale badadia bona iseda gari badadia do ita hamaorolaidia diba mai eda hemarai lasi.”

Ita Herevahereva be Namo!

Dirava ese taunimanima ia henidia harihari gauna namo hereana ta be inai: Diba ia henidia do idia herevahereva diba totona. Tau ta ia gwau: “Dirava ese ita ia karaia, do ita hebamo heheni totona. Bema oi be hereva dalana lasi, eiava bema ta ese emu hereva dalana ia koua, unai be panisi bamona. Oi be ma ta ida umui herevahereva neganai, gau namona ta ia vara. Sibomu emu kara oi moalelaia, bona namo oi davaria, badina be iena lalohadai bona ena lalona ena mamina oi diba dainai.”

Elaine, sekit naria tauna ta ena adavana, be ia gwau: “Hereva ese lalona ena mamina idia hahedinaraia. Ita ta ia gwau diba lasi ena adavana ia diba ia ese ia laloa bada. Namona be unai ia herevalaia; taia ese hereva ia kamonaia be namo. Namona be ita hereva heheni.”

David, Keristani elda tauna ta ena natuna, ia gwau: “Nega haida egu ura lau hagugurua diba lasi dainai, lau daradara, bena unai dainai lau ura lasi do lau hereva. To lau davaria, bema ma ta ida ai kiki, unai ese egu lalo-hekwarahi ia hamaragia. Lau hereva noho lalonai, sibogu egu lalona ena mamina lau lalo-pararalaia, bona egu hekwakwanai haorea dalana lau davaria.”

Herevahereva Koua Gaudia

Momokani, herevahereva dainai taunimanima edia lalona idia hegeregere. To herevahereva daladia koua gaudia haida idia noho. Taunimanima haida ese idia hekwarahilaidia dainai, idia ura lasi idia herevahereva.

Gary ia gwau: “Egu mauri laganidia momo lalodiai, taunimanima ida lau herevahereva be auka, badina be egu lalona ia goada lasi. Hari danu lau gari, taunimanima ida do lau hereva neganai egu hereva ena mamina be kavakava bamona garina, eiava egu hereva dainai ta ese lau do ia gwauraia dika garina.”

Elaine ia gwau, ia hemarai dainai ia hereva be auka. Ia gwau: “Egu kekeni neganai, emai famili lalonai ai hereva heheni namonamo lasi. Egu tamana garina lau gari bada. Unai dainai, lau tubu daekau lalonai, lau laloa egu hereva be anina lasi.” Oibe, hemarai ese haida ia koudia dainai, herevahereva idia moalelaia diba lasi. Momokani, hemarai dainai haida idia hereva diba lasi!

John, Keristani elda tauna ta, ese ena hemarai ia hekwarahilaia dalana ia herevalaia, ia gwau: “Unai be hisihisi badana ta bamona.” Ma ia gwau: “Bema hemarai ese ta ia hadarerea, ia be sibona ia noho. Ena be daiutu ta lalonai be taunimanima 100, to idia ta ida do ia hereva lasi. Sibona ia hahisia bada unai!”

To, elda ta ladana Daniel ia gwau: “Lau be herevahereva momo tauna. Egu kerere lau do lalo-pararalaia lasi neganai, ta ena hereva lau utua bena herevahereva lau gunalaia. Egu adavana ena vaira auka lau itaia neganai, egu kerere lau lalo-pararalaia, bena egu lalona ai lau gwau, ‘Oo, lau kerere lou inai.’ Lau diba ia ese herevahereva orena do ia moalelaia diba lasi.”

Unai bona herevahereva koua gaudia ma haida be edena bamona ita hanaia diba? Herevahereva namonamo dalana be dahaka?

‘Dahaka Do Lau Gwau Diba?’

‘Dahaka do lau herevalaia diba?’ ‘Lau be gau ta lau diba lasi.’ ‘Ta lasi ia ura egu hereva do ia kamonai.’ Ena be reana unai bamona oi laloa, to reana unai lalohadai be maoro lasi. Emu diba ena bada be oi ese oi laloa hegeregerena lasi, bona reana haida do idia ura oi diba gaudia herevadia do idia kamonai. Hegeregere, reana vanegai oi lao gabu ta. Reana haida idia ura unai gabu be edia noho gabuna ida do idia hahegeregerea.

Inai danu, duahiduahi amo emu diba gau idauidau dekenai oi habadaia diba, bona unai bamona oi karaia be namo. Namona be dina ta ta iboudiai gau ta oi duahia. Iehova ena Witness taudia edia buka bona edia magasin lalodiai be Baibel bona ma gau idauidau hahedibalaia herevadia. Bema diba momo oi abia, diba momo do oi hariharilaia diba. Haheitalai namona ta be dina ena siri, Iehova ena Witness taudia idia gaukaralaia bukana ladana Dina Iboudiai Buka Helaga Tahua lalonai. Dina ta ta iboudiai gau idauna ta oi ia henia, do oi laloa bona herevahereva lalonai do oi gwauraia.

Oi be ta ida umui herevahereva, anina be ia sibona mo lasi ia hereva eiava oi sibona mo lasi oi hereva, to umui ruaosi umui hereva be namo. Emu bamona ena herevahereva oi koua lasi. Bema ia be hemarai tauna, reana henanadai namodia amo oi hagoadaia be namo. Bema oi be taunimanima burukana ta ida oi herevahereva, reana oi ese kara gunadia eiava ia maragi negana amo tanobada eiava ruma bese edia mauri be edena bamona idia idau oi henanadailaia diba. Ena hereva do oi kamonai mai emu moale ida, bona diba do oi abia.

Oi Kamonai Namonamo

Herevahereva lalonai ita kamonai namonamo be mai anina bada. Unai amo ita ese edia maduna metaudia dainai heduru idia tahua taudia ita durudia diba. Tau ta ia laloa ia be ‘anina lasi momoruna bamona’; ena lalona ia hisihisi dainai, ia ese ena turana ta be telefon amo ia hereva henia, ena heduru abia totona. Ena be ena turana ia bisi momokani, to hora rua lalodiai ia kamonai henia mai ena hebogahisi ida! Hari unai tau ia gwau unai nega amo ena lalona ia goada lou. Dahaka dainai? Iena turana ia gwau: “Lau kamonai namonamo dainai mo. Aonega herevadia lau gwauraia lasi. Henanadai maorodia lau henia mo. Lau gwau, ‘Dahaka dainai unai bamona oi laloa?’ ‘Dahaka dainai unai oi lalo-hekwarahilaia?’ ‘Heduru gauna namona be dahaka?’ Egu henanadai ia haerelaidia neganai, sibona ena danu ia haerelaidia unai!”

Bema tama sina be edia natudia ida idia herevahereva, edia natudia ese idia lalodia bada. Mero ta ladana Scott ia gwau: “Namona be ta ena tamana bona sinana be ia dekenai idia lao bona idia nanadaia ia be dahaka ia laloa momo. Vanegai tamagu be unai bamona ia karaia, bona unai ese lau ia durua, badina be kara haida be lau sibogu ese lau hamaoromaorodia diba lasi.”

Tau ta ia gwau: “Emu natuna ese oi do idia hereva henia dalana be oi lailaia be namo.” Nega momo ia be ena natuna haniosi ta ta ida nega ia haorea, badina be ia laloa memero kekeni edia lalona do idia maoro totona, namona be edia tamadia bona sinadia ese idia kamonai henidia namonamo mai edia hebogahisi ida. Ia gwau, bema dala ia kehoa bona emu natuna ta ia ura do ia hereva, oi kamonai henia. Ma ia gwau: “Herevana oi taeadi momokani o oi hekwarahi bada, to edia hereva oi koua lasi! Oi kamonai.”

Kamonai Momokani Dainai Idia Haere

Taunimanima momo be heduru idia abia be namo, do idia hereva diba totona. Uhau ta ia gwau: ‘Lau ura ta ida do lau herevahereva, to daika dekenai lau lao diba? Lau hereva be auka. Ta ese lau do ia laloa be namo!’ Bema ta ese ena bamona ena hereva ia kamonaia mai ena ura momokani ida, unai ese abidadama bona noho namo edia mamina ia havaraia, bena ena bamona ese sibona ena lalona ena mamina ia hamaorolaia be auka lasi.

Tau ta ia gwau: “Lagani haida idia lao vadaeni, egu famili ena hekwakwanai lau hekwarahilaia neganai, lau be egu turana ta ida lau herevahereva toho. Iena hereva tamona be inai, ‘Oi haheauka bona oi kara auka, bena gau iboudiai do idia namo.’ Ai herevahereva lasi, bona heduru lau abia lasi. Momokani, unai dainai lau hemarai lou. To, gabeai Iehova ena Witness taudia edia naria tauna ta ida lau herevahereva negana be idau vaitani. Ena matana, ena vairana ena toana, bona ena hebogahisi toana dainai, lau diba ia be mai ena hebogahisi. Lau hereva henia be haraga, badina be ia kamonai mai ena ura momokanina ida. Ia gwau: ‘Emu hekwakwanai lalonai oi do ai durua mai emai goada ibounai ida.’ Unai bamona taudia lau moalelaia!”

Ita ma haida ese mai eda lalokau ida haida do ita veridia diba, idia danu do idia herevahereva namonamo totona, a? Bema ta be ia hemarai dainai ia gini siri bona ia hereva lasi, iseda herevahereva lalonai ita veria vareai toho, a? Ai herevalaia vadaeni tauna, John be ia gwau: “Iena hemarai mamina lau abia bona lau hebogahisi dainai, egu lalona danu ia hisihisi!” Ma ia gwau: “Gau badana be ia dekenai ita raka kahirakahira lao bona ita hereva henia. Reana namona be iseda lalona ai ita gurigurilaia danu.”

Dan ese ena turana ta ia herevalaia, ia gwau: “Haida idia herevahereva hebou negadiai, Roy be ia gini muri, badina be ia laloa ia be hegeregere lasi idia ida do ia herevahereva. Unai dainai lau nanadaia, lau gwau, ‘Roy e, vanegai inai o unai be edena bamona oi gwauraia?’ Bena ia hereva matamaia. Bena ma haida ese ena kara idia itaia diba, guna idia diba lasi karana unai.” Dan be ma ia gwau: “Ena be ta be oi ida do umui herevahereva totona oi veria be auka, to oi hesiku lasi. Namona be oi laloa iena lalona be namo bona ia ura do ia hereva. Ma do oi veria toho loulou be namo.”

Ena be oi be hemarai tauna, to bema haida edia namo oi tahua mai emu lalokau bona emu momokani ida, namo do oi davaria. John ese ia davaria unai ese ia durua, ena ura, sibona do ia noho urana, halusia totona. Ia gwau: “Lalokau be sibona ena gau ia tahua lasi.” (1 Korinto 13:5) “Lalokau dalana be, haida ida oi herevahereva bona oi henanadailaidia. Sibomu emu manoka ese oi ia hadarerea be namo lasi. Guriguri amo oi hadarerea diba.” Ma ia gwau: “Unai bamona oi kara neganai, davana bada oi abia. Haida be emu kara dainai idia hereva bona edia lalona idia namo neganai, unai oi itaia dainai, emu lalona danu ia namo. Namona be unai ese oi ia hagoadaia, unai bamona do oi kara loulou totona.”

Herevahereva Ena Badina

Pennsylvania State University ena profesa ta, Doketa Bernard Guerney, ese taunimanima edia kara namo hereana ta ia herevalaia, ia gwau: ‘Taunimanima ta ese ma ta ena lalona ena mamina bona ena lalohadai ia lalo-pararalaia momokani diba​—herevana idia ruaosi ese unai idia lalo-tamonalaia eiava lasi.’ Herevahereva lalonai unai be mai anina bada eiava? “Unai be ena badina korikori! Ma gau iboudiai be unai latanai idia haginia.”

Doketa Guerney ia gwau herevahereva be hebamo heheni karadia iboudiai durua bada gauna. Gau momo dekenai ita lalo-tamona lasi. Unai ese iseda hetura do ia hadikaia lasi totona, namona be iseda lalona idia hegeregere unai gau do ita herevalaia. Momo be unai kara amo idia siri, badina be idia diba lasi edena bamona do idia herevalaia bena edia bamona ese do ia heailaia lasi bona do ia badu lasi. Doketa Guerney ia gwau: ‘Taunimanima momo idia diba lasi idia ese ma ta ena lalohadai idia laloa namonamo bona idia matauraia be idau, bona unai lalohadai idia abia dae be ma idau. Unai dainai, gau ta idia lalo-tamonalaia lasi neganai, idia laloa bada heheni lasi bona idia hemataurai heheni lasi. To, ena bamona ena lalona ena mamina ia abia tauna be ia diba ena lalohadai ia abia dae be idau bona ia laloa bada be ma idau.’

Bema ta ena lalona ena mamina oi mamia toho, ia hegeregerena mamina oi abia bona oi laloa. Unai neganai do oi davaria, ena be gau haida umui lalo-tamonalaia lasi, to ta ta ena lalohadai lalo-pararalaia bona hemataurai heheni karadia be idia tubu.

Janet mani oi laloa, ia be hahine ta mai ena natuna hani. Guna ia lalohisihisi bona ia laloa ia be anina lasi. Hari ia diba, ta ese ma ta ia durua totona ena lalona ena mamina ia abia be namo. Ia gwau: “Lau laloatao, ena be guna lau laloa egu kara iboudiai be anina lasi, to egu adavana be lau ida ia herevahereva, lau durua daladia idauidau iboudiai ia gwauraia. Lau tai neganai danu, ia kamonai henigu mai ena lalokau ida, bena egu lalona ia hagoadaia. To bema egu lalohadai ia kirikirilaia eiava ia gwau ‘Oo, unai be lalohadai kavakavana,’ o unai bamona herevana ta ia gwauraia, egu hereva lau hadokoa bena lau be sibogu lau raka oho. To unai bamona ia vara lasi; unai hanuaboi ai, ai ruaosi ese mai anina herevadia ai herevalaia heheni daudau.”

Doketa Guerney be ma ia gwau: ‘Ta ena lalona ena mamina oi mamia toho neganai, oi hahedinaraia ena namo oi tahua. Unai ese hereva heheni karana ia havaraia, taunimanima momo ese idia ura henia bona idia karaia be namo karana unai.’

Oi Karaia Diba!

Herevahereva namonamo tauna ta ai oi lao diba. Unai kara manadalaia daladia haida ai herevalaia vadaeni, to ma momo idia noho. Haida be inai: Taunimanima oi gaiho namo henidia, fani gaudia oi kirikirilaia, bona oi naria namonamo, ta ena lalona do oi hahisia garina. To laulau namo hereana ia torea namonamo diba tauna be unai kara ia karaia toho loulou vadaeni hegeregerena, namona be unai kara namodia do ita goadalaia toho loulou.

Unai hegeregerena, Daniel be herevahereva namonamo tauna ai ia lao. Edena bamona? Ena ura, ma ta ena hereva do ia utua bena herevahereva do ia gunalaia urana, biagua dalana ia dibaia. Ia gwau: “Egu ura, herevahereva gunalaia urana, lau koua be mai hekwarahina. Anina be egu malana lau biagua. Lau ura ma hereva maragidia be ta ena hereva latanai do lau atoa neganai, unai ura lau koua! Bema lau laloa hereva ta ese herevahereva ena aru dalana do ia haidaua eiava ia dainai ta do ia hereva diba lasi, unai hereva lau gwauraia lasi!”

Dahaka ese Elaine ia durua? Baibel ia diba maoromaoro murinai, ena lalona ia parara ia be mai ena gau namona, do ia herevalaia diba gauna unai. Ia gwau: “Lau davaria bema sibogu lau laloa momo lasi bona lauma gaudia be ma haida ida lau herevalaia, unai herevahereva lau moalelaia. Heduru lau abia dalana ma ta be, Baibel gwauraia magasinidia, ai abia loulou gaudia, be lau duahia. Unai lau goadalaia neganai, lau be mai egu gau matamatadia do lau gwauraia diba, bona lau herevahereva be haraga.”

Unai kara namodia be emu herevahereva lalonai oi goadalaia toho. Bena oi ese ma haida edia lalona do oi hamatamataia bona do oi hamoaledia, bona do oi moale, badina be taunimanima hanamodia momokani karana ta ai oi kwalimu dainai.