Duahia Taudia Edia Amo
Gau Idauidau Momo Lalohadailaia Nega momo egu lalona lau biagua lasi bena gau dikadia lau lalohadailaia. Unai dainai hereva ladana, “Baibel Ena Haere: Baibel ese Taunimanima Edia Lalohadai Ia Biagua Auka Toho, A?” (April-June, 1995, Noga!) lau duahia neganai lau hoa bada. Guna lau diba lasi, bema ta be mai ena ura ida dala kererena ia lalohadailaia, unai be kara dikana Iehova ena matana ai. Iehova lau tanikiu henia, badina ia ese unai sisiba namona lau ia henia, unai amo lauegu lalohadai gagevadia do lau hamaoromaoroa diba!
J. P., Philippines
Ura Henia Ena Hekwakwanai Umui lau tanikiu henia umui torea herevadia rua dainai. Edia ladana be “Matamata Taudia Idia Henanadai . . . Bema Keristani Lasi Tauna Lau Ura Henia be Edena Bamona?”(May 22, 1994, Awake!) bona “Ta Lau Ura Henia Urana be Edena Bamona Lau Koua Diba?” (June 8, 1994, Awake!) Lauegu gaukara gabuna ai ia gaukara kekenina ta ese lau ia ura henia matamaia, bena lau ese ia lau ura henia matamaia. Lau diba unai be kerere, unai dainai Iehova lau noia lau do ia durua. Unai hereva ruaosi lau itaia neganai lau duahia loulou. Hari lau lalo-parara, emai turana karana do lau hadokoa bena nega sisina do lau lalohisihisi be namo, to unai turana karana kererena dainai do idia vara hekwakwanaidia be egu mauri ibounai lalonai do lau hekwarahilaia be dika.
P. J., United States
Mamina lau abia, unai hereva be lau totona umui torea! Lau diba lasi, bema unai hereva umui torea lasi dahaka ia vara lau dekenai. Tanikiu bada herea, matamata taudia edia hekwakwanai umui diba dainai.
S. J., Nigeria
Lau ese egu klas merona ta lau ura henia bada. Iena toana be namo herea bona ena kara be manau. To unai hereva lau duahia murinai, egu lalona ai lau henanadai loulou ‘Lau tahua gaudia be ia danu ia tahua bona iena mauri dalana be lauegu mauri dalana bamona, a?’ Inai gaudia lau lalohadailaia neganai, egu lalona ia parara lau kara kava ema bona hari. Lau ura inai ura henia kava karana do lau hadokoa haraga!
S. T., Japan
Lau ese Keristani lasi tauna ta lau ura henia bena lau adavaia. Ia be Keristani heboudia dekenai ia lao, lau do ia hamoalea totona. Ai headava murinai iena kara ia haidaua. Ia ese danu lau ia koua toho Iehova ena hesiai do lau lao henia lasi totona. Gabeai lau ia botaia bona ia heudahanai. Hari emai headava ai hadokoa vadaeni. Matamata taudia iboudiai ese Keristani lasi tauna tura henia karana ena dika idia lalo-pararalaia be namo. Lau ura lasi ta be lauegu hekwakwanai bamona do ia davaria!
T. F., Puerto Rico
Lalo-hekwarahi Tanikiu bada herea, hereva ladana “Baibel ena Haere: Dahaka ese Oi Ia Durua Diba, Lalo-Metau Do Oi Hanaia Totona?” (September 8, 1994, Awake!) dainai. Keristani dalanai lau tubu daekau, to lau bada neganai hereva momokani lau rakatania. Lagani toi gunanai lau giroa lou, to egu adavana be Keristani lasi tauna. Lauegu kara kereredia lau laloa loulou, bona guna lau lalo-parara lasi, lauegu lalo-metau ena badina be unai. Tanikiu bada badina be lau umui durua, do lau diba guna idia vara gaudia laloa momo karana be namo lasi. To, do idia vara gaudia totona do lau hegaegae be namo.
R. L., United States
Umui gwau ‘lagani idauidau taudia idia lalo-metau.’ Lauegu mauri lagani be 21 bona lau lalo-metau bada. Hua 8 lalonai nega rua hospital dekenai lau noho, masolo gorerena bona lalo-metau amo ia vara kwara hisihisina dikana dainai. Unai nega ruaosi ai, doketa taudia ese lau idia hamaoroa, lauegu lagani be bada lasi dainai, lalo-metau lau abia diba lasi. Unai dainai emui hereva be lauegu lalona ena mamina ia hanamoa sisina.
V. P., United States
Hisihisi Idia Ania Natudia Umui emui hereva ladana “Natudia Dekenai Dahaka Helaro Ia Noho?” (January-March, 1995, Noga!), be momokani bona umui torea namo herea. Natu momo be edia mauri lalonai idia davaria gaudia dikadia, hamasea goreredia, bona edia noho gabudia dikadia edia sivarai lau duahia neganai lauegu lalona ia hisihisi. To helaro momokani natudia totona, Dirava ena Basileia ese taunimanima do ia lohiadia neganai do idia davaria gauna, lau duahilaia neganai lau moale bada.
D. G., Papua New Guinea