Duahia Taudia Edia Amo

Gaukara Havaraia  Tanikiu bada herea hereva ladana “Moni Bada Lasi Gabudia ai, Gaukara Havaraia” (July-September, 1995) dainai. Hari lau do sikuli noho bona lau palani noho painia (ful-taim hesiai tauna) ta ai do lau lao, sikuli lau haorea murinai. Hekwakwanai badana be gaukara tahua karana dekenai. Ia mai bona hari lau ura bada davaria gaukarana be helai momo gaukarana, ia lalonai do lau hekwarahi lasi gaukarana, to egu Keristani tadikaka moni bada lasi tanodia dekenai be dahaka gaukara idauidau idia davaria neganai idia karaia sibona sivaraina lau duahia neganai, sibona egu ura dekenai lau hemarai. Hari, herevana dahaka moni gaukarana do lau davaria, bema ia dainai egu painia gaukara do lau karaia diba, unai gaukara do lau karaia.

Y. T., Japan

Mase  Lauegu tamana be Kingdom Hall ai hereva ta ia henia murinai ia mase. Unai murinai, lau be lalohisihisi bona badu lau hekwarahilaia. Inai bamona lau laloa: Ai lalokau bada henia tauna, mai ena ura bada Iehova ena ura ia karaia tauna, be ia mase haraga be maoro lasi. Inai hereva “Matamata Taudia Idia Henanadai . . . Dahaka Dainai Tamagu be Ia Mase?” (April-June, 1995) lau duahia murinai, lau laloa Iehova be egu lalohisihisi ia laloa bona ia hanamoa.

S. A., Nigeria

Tamagu be kensa gorerena dainai ia mase, bona iena mase lau haheaukalaia be auka herea. Inai be hoa gauna, lau lalohisihisilaia gauna be inai magasin ese ia herevalaia namonamo. To egu lalona ia hahisia gauna be, hari egu mauri lalonai lau davaria gaudia be tamagu ese ia reaia noho. Lau laloa momo gauna be vanegai sibona lau hamatamaia, ful-taim hesiai gaukarana unai. Lau ura bada egu painia gaukarana ia itaia. Iena henari namona bona ena aonega lau reaia dainai nega haida inai be mai ena hekwarahi, to haida edia henari karana be heduru bada lau dekenai.

C. T., United States

Herevahereva  Inai hereva, “Herevahereva Namonamo” (October-December, 1995) gauna dainai umui lau tanikiu bada henia. Nega daudau lalonai egu hemarai karana lau hekwarahilaia. To hari lau lalo-parara lau sibona lasi to ma haida danu be inai hekwakwanai idia davaria. Emui sisiba do lau badinaia.

A. L., United States

Edukeisini  Nigeria ena iunivesiti ta amo sikuli lau haorea neganai, maka namo hereana be 2 pesen amo lau reaia. Unai neganai lau lalohisihisi. Inai hereva, “Lalohadai Maorona Edukeisini Dekenai” (April-June, 1995) umui halasia neganai, umui hahedinaraia namo lasi ita sikuli, eksam ai ladana bada do ita abia totona. Unai dainai lau itaia gau iboudiai be mai edia gabu korikoridia. Lauegu profesa taudia be lau idia hagoadaia ma kosi haida do lau karaia, to lau duahia gaudia amo lau abia dibana dainai unai gaudia lau lalohadailaia namonamo.

G. J., Nigeria

Egu mauri lagani be 14 bona haida ese lau idia doria edukeisini badana do lau abia totona. Umui torea heduru herevadia dainai, lau ura karaia gauna lau lalohadailaia vadaeni. Lau ura painia [ful-taim hesiai tauna] ta ai lau lao, bona bema diba ma haida lau abia be namo moni gaukara ta do lau abia totona, lau ura vokesenel sikuli ta dekenai do lau lao bona foto abia dalana do lau dibaia.

H. O., United States

Edukeisini ma haida tahua karana lau laloa lasi. To lau ura egu nega be ita ia Havaraia Tauna ena sivarai be taunimanima dekenai do lau hadibaia. Taunimanima idia hoa, gau idauidau lau diba momo dainai. Idia nanadaia, idia gwau “Oi be koledi dekenai oi lao, a?” Idia lau hamaoroa lau dibaia gaudia be Baibel bona Watch Tower Society ese idia halasia magasin bona bukadia amo lau abia.

M. L., United States

Emui hereva lalonai edukeisini ma haida tahua karana ena namo bona ena dika umui gwauraia. Lau ura sikuli dekenai lau giroa lou, to lau ura lasi lauma gaudia lau negea. Egu Keristani hebouhebou ena sediual be egu sikuli ena seketere dekenai lau herevalaia, bena egu kalasi edia nega ia haidaua hebouhebou ibounai lau lao henia diba totona.

M. F. S., Brazil