Duahia Taudia Edia Amo

1914  Emui hereva ladana “1914 Idia Hapoua Ipidi ese Iseda Tanobada Idia Haheudeheudea Noho” lau duahia. (July-September, 1995) Lau ura lau gwau unai bamona sivarai ta be guna lau duahia lasi. Taunimanima idia hepapahuahulaia momo gauna ena anina ia hahedinaraia goevagoeva bona ia auka lasi. Egu tano ai idia noho sikuli ese tanobada tuaridia edia sivarai idia herevalaia namonamo lasi, to ta ese unai sivarai ia lalo-pararalaia neganai, unai ese ia durua bada, tanobada lalonai idia vara gaudia ia lalo-pararalaia totona.

W. S., Venezuela

Heduru Daladia  Iehova ena Witness taudia Rwanda ai dainai lau lalo-hekwarahi bada. Hereva ta ladana “Dagedage Idia Davaria Taudia Idia Naridia Rwanda Ena Hisihisi Dainai” (July-September, 1995) lau duahia vadaeni dainai, hari lau diba idia be dahaka metau lalonai idia noho. Unai magasin lalonai ia gwau unuseniai Witness taudia momo idia mase. Egu lalona ena mamina ia hanamoa sisina gauna be egu helaro, Paradaiso lalonai idia do lau hedavari henidia helarona unai. Unai nega lau naria noho lalonai, Rwanda ai idia noho tadikakadia dainai do lau guriguri.

J. D., Japan

Rata amo Ubua  Hua toi murinai aiemai natuna iharuana do lau abia. Unai dainai egu April-June, 1995, Noga! magasin lau abia neganai, lau kehoa kahana ladana “Rata amo Ubua Dalana” dekenai. Lau moalelaia bada. Unai hereva ese mataurai bona hanamoa mauri Havaraia Diravana dekenai ia henia. Sinana ena tauanina ia hegeregere momokani ena beibi do ia ubua. Unai lau laloa neganai, haida edia kara ena badina lau lalo-pararalaia lasi; idia gwau mauri havaraia Diravana be mai ena aonega bona mai lalokau lasi.

L. K., United States

Lau diba tanikiu revarevadia momo do umui davaria unai hereva dainai. Egu kara lau laloa lou neganai, lau diba aiemai natudia toi be rata amo lau ubudia dainai unai be hahenamo badana bona dala namona lau abia hidi unai. Lau diba unai hereva ese sina bona sina ai do idia lao hahinedia do ia durua bada.

C. S., United States

Emui magasin ena hereva ladana “Rata amo Ubua Dalana” (April-June, 1995) ese guna umui torea herevadia unai kahana dekenai ia hanaia. Nega momo, tama ese unai maduna idia rakatania sina edia imana dekenai, do idia kwalimulaia diba, eiava lasi. To emui hereva ese tama bona ruma bese taudia ia hamaorodia dahaka heduru be sina do idia henia diba, ena natuna be rata amo ia ubua karana dekenai do ia kwalimu totona.

D. D., United States

Lau ese ekspiriens namona lau davaria egu natuna rua rata amo lau ubua neganai. Matamatana ai hekwakwanai haida idia vara, hegeregere egu rata idia hisihisi, to egu taihuna bona doketa edia heduru hereva dainai, unai hekwakwanai lau hanaia. Lau ura edia natudia rata amo idia ubua sinadia ibounai lau hagoadaia, unai bamona do idia karaia totona, badina be unai kara ese sina bona natu ia hatamonaia, ia be ekspiriens namo hereana, ta ese ia laloaboio diba lasi gauna.

U. B., Germany