Inai Heheni Karana Do Ia ore

Taunimanima milioni momo be inai atikol ese ia herevalaia hakaua herevadia idia badinaia bona idia gaukara goada ma haida inai henia karana idia hadokoa totona. To, inai heheni karana be ita sibona iseda goada amo ita haorea diba lasi. So anina be inai kara do ia ore diba lasi, a?

Gavamani Namona Ta

Taunimanima edia gavamani be idia hegeregere lasi inai heheni karana idia hadokoa totona. Anina be gavamani ibounai idia hegeregere lasi, a?

Gavamani ta ese inai heheni karana ia haorea totona, inai do ia karaia

1. 1. Taunimanima do ia durua edia lalohadai bona hemami idia haidaua ma haida idia inai henia lasi totona.

2. 2. Inai heheni karana dainai idia lalohisihisi taudia edia hisihisi do ia haorea.

3. 3. Ena hakaua taudia be ma haida do idia inai henia lasi bona maka tamona dekenai taunimanima ibounai do idia kara henia.

4. 4. Bese ibounai do ia hatamonaia.

Baibel ese ia hahedinaraia Dirava be unai bamona gavamani ta ia haginia. Ia gwauraia, “Dirava ena Basileia.”​—Luka 4:43.

Mani unai gavamani ese do ia karaia gaudia ita herevalaia.

1. Dala Maorona Do Ia Hadibaia

“Tanobada taudia ese kota maoromaoro ena anina do idia diba.”​—ISAIA 26:9.

“Taunimanima ibounai ese kara maoromaoro sibona idia karaia dainai, idia ese, mai maino bona mauri namona do idia noho hanaihanai.”​—ISAIA 32:17.

Unai ena anina be dahaka? Dirava ena Basileia ese taunimanima dekenai kara maoromaoro do ia hadibaia. Taunimanima ese maoro bona kerere​—hahemaoro goeva bona kara gageva​—edia idau idia diba neganai, edia lalohadai bona kara do idia haidaua. Bona do idia laloparara taunimanima ibounai idia lalokau henia be namo.

2. Inai Heheni Karana Do Ia Haorea

Dirava ese “mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.”​—APOKALUPO 21:4.

Unai ena anina be dahaka? Kara gageva amo idia vara hisihisi ibounai be Dirava ena Basileia ese do ia haorea. Ma haida ese idia inai henia taudia be do idia lalohisihisi lasi.

3. Lohia Namona

“Iena kota biaguna kara, be do ia maoromaoro momokani, taunimanima edia toana dekenai lasi, bona ia kamonai hereva sibona lasi. To ogogami taudia be mai maoromaoro danu, do ia kota henidia. Bona manoka taudia idia hisihisi henia taudia, be ese do ia panisidia.”​—ISAIA 11:3, 4.

Unai ena anina be dahaka? Iesu Keriso, Dirava ena guba Basileia ena King, ese taunimanima ibounai be mai maoromaoro ida do ia lohiaia. Iesu be bese ibounai ia laloa bada, bona ena kara maoromaoro taravatudia be tanobada ibounai dekenai taunimanima ese do idia badinaia.

4. Lalotamona

Dirava ena Basileia ese taunimanima do ia hadibaia unai amo edia “lalona be tamona,” edia “lalokau be tamona,” “tauanina tamona,” bona “lalohadai tamona [do idia] dogoatao.”​—FILIPI 2:2.

Unai ena anina be dahaka? Dirava ena Basileia henunai taunimanima ibounai be lalotamona ai do idia noho. Idia lalotamona badina mai momokani ida ta ta do idia lalokau heheni.