Stadi 9

Oiemu Haere Hanamoa Dalana

¹ Namona be Keristani taudia iboudiai ese diba idia tahua, taunimanima edia henanadai do idia haerelaidia namonamo totona. (Kol. 4⁠:⁠6) Ita haere namonamo neganai ita moale.

² Kongregesen ena hebou lalodiai. Paragraf ena haere ginigunana ia gwauraia tauna ese haere korikorina sibona ia gwauraia be namo. Unai murinai tadikaka ma haida ese unai haere ena anina do idia habadaia, o paragraf lalonai ia noho Baibel sirina ena anina do idia gwauraia, o unai hereva ena anina iseda mauri dekenai o unai hereva ia hamomokania sivaraina do idia gwauraia.

³ Haere oi gwauraia neganai, namona be emu haere ia kwadogi. Paragraf ena hereva oi duahia lasi, to sibona emu hereva amo oi gwauraia. Unai dala amo unai hereva do oi laloatao, bona idia kamonai taudia ese paragraf ena hereva edia anina do idia lalo-pararalaia.

⁴ Ruma dekenai haere oi hegaegaelaidia guna be namo. Paragraf lalonai, haere ena hereva badadia sibodia oi makaia. Bema henanadai be rua, hegeregere “a” bona “b”, edia haere oi makaia neganai, idia badinai “a” bona “b” oi torea. Bema paragraf be mai edia henanadai lasi, hegeregere Iseda Basileia Gaukara pepana ena hereva haida bamona, edia hereva badadia sibodia oi makaia, bena hebou lalonai ta ese ia henanadailaia neganai haere namodia do oi henia diba.

⁵ Namona be ita ibounai be hebou lalonai do ita haere, badina unai dala amo ‘lalokau bona kara namodia do ita karaia, bona ita ta ta eda ekalesia varavara taudia edia lalona do ita hagoadaia.’​—⁠Heb. 10⁠:​23-25.

⁶ Ruma-ta-ruma-ta gaukarana lalonai. Bema ruma tauna ta ena henanadai oi haerelaia diba lasi, oi hamaoroa haere do oi tahua bena do oi lou mai. Bema ta ese oiemu hereva ia koua o ia heailaia gwauraia, iena lalohadai oi tahua be namo. Iena lalohadai do oi diba totona, reana namona be oi nanadaia dahaka dainai unai bamona ia hereva. Oi hamaoroa, unai hereva ia gwauraia hedinarai dainai oi moale, bena unai hereva oi haerelaia toho.

⁷ Kamonai tauna ta oi haroro henia neganai, bema ma tau ta ia mai bona hereva haida ia gwauraia oiemu hereva koua totona, oi hamaoroa ia ese iena hereva do ia hamomokania be namo. Iesu be unai bamona ia karaia. (Mat. 22⁠:​41-46) Ta ena henanadai ita haerelaia neganai, Baibel ena hereva ita gwauraia be namo, badina ia be Dirava ena Hereva.

⁸ Baibel stadi dekenai. Oi stadi henia tauna ena henanadai ta oi haerelaia murinai, oi nanadaia, emu haere ia abia dae eiava lasi. Bema ia do daradara noho, oi hadibalaia lou be namo. Bema iena henanadai be umui stadilaia noho herevana hegeregerena lasi, oi hamaoroa, gabeai stadi ma ta dekenai unai haere do ia davaria. Danu, Diba bukana o Baibel amo ia sibona ese haere do ia tahua dalana be oi hadibalaia be namo.

⁹ Gavamani taudia vairadiai. Dirava ena gaukara oi karaia dainai bema oi idia kota henia, oi gari lasi be namo. (1 Pet. 3:14, 15) Danu, Roma 13⁠:​1-7 ia gwau, namona be gavamani ena siahu taudia ita matauraidia. Unai dainai, mai emu badu ida oi haere henidia lasi be namo. (Roma 12⁠:​17, 21; 1 Pet. 2⁠:​21-23) Namona be idia vairadiai oi kara namonamo bona oi hereva namonamo.

¹⁰ Nega haida oi hereva momo lasi be namo, to aposetolo Paulo ia karaia hegeregerena, kota biaguna oi hamaoroa oi idia samania taudia ese edia hereva do idia hamomokania toho be namo. (Kara 24⁠:​10-13) Bema haida ese oi idia kirikirilaia, eiava oi amo Witness taudia haida hadikadia dalana idia tahua, oi hereva lasi be namo.​—⁠Had. 3⁠:⁠7.

¹¹ Baibel be Dirava ena Hereva, bona unai hereva ita abidadama henia dainai, taunimanima edia henanadai aukadia ita haerelaidia diba.