Karoa 6
Gunaguna Ia Hamasedia Ore
GUNAGUNA, Dirava ese tanobada taudia ia hamasedia ore gwauraia neganai, ia hadibadia guna, abata badana be tanobada ibounai dekenai do ia havaraia. Noa ese ia kamonai henia dainai, ia mai ena adavana danu, bona edia natudia toiosi mai edia adavadia danu, be idia roho mauri. Noa ena kamonai karana ita laloa bada be namo, badina be unai taudia edia amo ita ibounai ita vara.—Genese 10:1, 32.
2 Iehova ese unai tanobada taudia ia hamasedia ore, badina be tanobada ia itaia, ia be dagedage amo ia honu. Hari inai negai bamona, “taunimanima . . . edia kara dika be bada herea gabu ibounai dekenai.”—Genese 6:3, 5, 13.
3 Dahaka dainai hekwakwanai momo be Noa ena nega lalonai idia vara? Genese 6:2 ia gwau: “Dirava ena natuna haida ese idia itaia, inai hahine be mai edia hairai. Vadaeni, idia ura henia kekeni idia abia, idia adavaia.” Dahaka dainai unai be kerere? Badina be unai “Dirava ena natuna” be taunimanima lasi; idia be aneru, lauma taudia unai. Idia ese hahine mai edia hairai idia itaia bona headava ena moale karadia danu idia itaia, bena idia be tauanina idia karaia sibodia edia, taunimanima edia hegeregeredia. (Iobu 1:6 itaia.) Unai bamona idia karaia bona idia headava neganai, Dirava idia gwau-edeede henia. Bible ia gwau “edia gabu korikori idia rakatania” bona “kara bodaga” be unai hahine danu idia karaia. (Iuda 6, 7; 1 Petro 3:19, 20) Edia natudia idia bada herea; taunimanima ese idia gwauraidia Nefili taudia o “haketoa taudia,” badina be idia be dagedage taudia.—Genese 6:4.
4 Ena be Noa be unai kara dika taudia edia huanai ia noho, to Iehova ese ia moale henia. Badina be dahaka? Badina be “Noa be kara namo tauna.” (Genese 6:8, 9) Ia be Eden dekenai idia vara gaudia edia sivarai ia diba. Vadaeni, Noa mai ena ruma bese danu bona animal idauidau bona manu idauidau danu hamauridia totona, Iehova ese Noa ia hamaoroa ark ta do ia karaia, ena toana be maua bada hereana ta ena hegeregerena. Dirava ia gwau: “Lau be abata bada herea tanobada dekenai do lau siaia, mauri gaudia ibounai do lau haorea. Gau ibounai tanobada dekenai do idia mase ore.” (Genese 6:13-17) Noa ia aonega dainai, Dirava ia kamonai henia bona ena oda hegeregerena ia karaia.
5 Abata Badana be lagani 2370 B.C.E. lalonai ia vara, Bible ena sivarai ese ia hahedinaraia hegeregerena. Matamana negana amo ema bona hari, hisihisi ta ese unai hisihisi ia hanaia lasi. “Abata ia bada daekau noho ela bona ororo badadia ibounai ia koua.” (Genese 7:19) “Dirava ese unai tanobada gunana ranu dekena amo ia hadikaia ore.” (2 Petro 3:6) To reana ta ia henanadai, ia gwau, ‘Bema ororo badadia iboudiai ia koua, hari unai ranu ibounai be edeseniai?’ Tanobada dekenai ia do noho.
6 Mani inai oi laloa: Bible ia gwau lasi, Noa ena nega lalonai ororo edia dorina be atai herea, Everest Ororona hegeregerena. Saiens taudia idia gwau, gunaguna ororo idia bada momokani lasi hari inai negai hegeregerena. Idia gwau, reana ororo haida be gabeai davara ena henuna amo idia daekau. Danu, idia laloa gadobada be gunaguna ia bada lasi hari inai negai hegeregerena, badina sinavai haida edia aru daladia be davara henunai idia davaria. Magasin ta, National Geographic, January 1945 ena, ia gwau: “Idia hedinarai tanodia iboudiai edia anina ena bada be gadobada ena anina ena bada ese nega 10 amo ia hanaia. Bema inai tano be gadobada ena kahana iboudiai dekenai idia negea, ranu ese tanobada ibounai do ia koua; ena dobu be maila ta mai kahana hegeregerena ai do ia lao.” Unai dainai, unai medu bada herea ia diho murinai, to ororo idia do daekau lasi bona gadobada ena badina tanodia idia do diho lasi bona ranu be atai tanodia amo ia do aru diho lasi bona aisi momo be North Pole bona South Pole dekenai ia do vara lasi neganai, ranu ena bada be hegeregere, “ororo badadia ibounai” do ia koua, Bible ena hereva hegeregerena.—Genese 7:17-20; 8:1-3; Salamo 104:8, 9 itaia.
7 Unai abata bada hereana amo idia roho mauri taudia ese idia hoalaia bada dainai, gabeai idia laloaboio diba lasi. Edia natudia dekenai idia kikilaia. Bible ia gwau bese iboudiai be unai roho mauri taudia amo idia vara, unai dainai unai abata bada hereana be tanobada ena kahana ibounai dekenai idia sivarailaia be maoro. Gau momo ese idia hahedinaraia bese idauidau edia sene taudia ese idia herevalaia.
8 Abata Badana amo idia roho mauri taudia edia bese be gabu daudaudia dekenai idia lao, bena lagani momo idia ore murinai unai sivarai idia mogea, bese ta ta ena tomadiho ena tomadiho hegeregeredia. Tanobada ibounai lalonai sene taudia ese abata badana ta idia sivarailaia, idia gwau, unai abata ese tanobada taudia ia hamasedia ore neganai taunimanima ta ta sibodia idia roho mauri hebou. Inai sivarai be Mesopotamia bona Asia ena kahana ma haida dekenai idia kikilaia, bona Australia bona Pacific motumotudia dekenai, bona America ena Indian taudia bogaragidiai danu. Idau negai Greece taudia bona Roma taudia ese idia herevalaia, bona Scandinavia taudia bona Africa ena bese momo danu. Inai sivarai momo idia gwau, animal idauidau be taunimanima danu bouti ta lalonai idia roho mauri. Bible ena sivarai hegeregerena, haida idia gwau manu idia siaidia, ranu ia diho momokani eiava lasi idia diba totona. (Genese 7:7-10; 8:6-12 itaia.) Idau negai ia vara gauna ma ta be unai bamona idia sivarailaia lasi tanobada ibounai lalonai.
9 Bese momo edia kastom, ema bona hari idia karaia noho karadia, be unai Abata Badana dainai idia karaia. Bible ia gwau Abata Badana be “hua iharuana ena dina 17” ai ia matamaia. Unai “hua iharuana” be October ena dokona bona November ena matamana hegeregeredia, iseda kalenda dekenai. (Genese 7:11) Tanobada besedia momo ese dina ta unai negai idia hahelagaia, “Mase Taudia edia Dina” o “Sene Taudia edia Aria” idia gwauraia. Badina be dahaka unai nega idia abia hidi? Badina be inai kastom amo idia ese Abata Badana dekenai idia mase ore taudia idia lalodia lou.
10 To Noa ena negai idia vara gaudia edia sivarai momokanina be Bible lalonai idia torea. Nega daudau murinai, Dirava be peroveta tauna Isaia ena amo “Noa ena ranu” ia herevalaia. (Isaia 54:9) Dirava ena vara guna Natuna ese Noa ena negai idia vara gaudia ia itaia. Gabeai, tanobada dekenai ia noho neganai, hari Natuna, Iesu Keriso, ese Abata Badana ena sivarai ia hamomokania, ma ia hahedinaraia dahaka dainai taunimanima momo herea be unai negai idia mase.
“IDIA LALOA LASI”
11 Iesu ia gwau lasi Noa ena negai idia noho taudia iboudiai be dagedage taudia. To ia gwau: “Abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa lagatoi dekenai ia guia dinana. . . . idia laloa lasi dahaka do ia vara . . . ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna [Iesu Keriso] do ia mai neganai danu unai bamona do ia vara.”—Mataio 24:37-39.
12 Idia be edia sikeili hegeregeredia idia aniani bona idia inuinu bona dala maorona ai idia headava be kerere lasi. To Noa ese ia hadibadia dika bada herea ia vara gwauraia neganai, sibodia edia ura karadia idia tahua noho. Unai amo idia hahedinaraia, Noa ena hereva idia abia dae lasi bona ia ena amo ia hadibadia Diravana, Iehova, idia abidadama henia lasi danu. Bema unai hereva idia abia dae, roho mauri dalana do idia nanadailaia namonamo bena unai dala do idia tahua haraga. Reana unai negai taunimanima haida idia gwau dagedage karadia idia koua be namo, to abata badana sivaraina idia abia dae diba lasi. Unai dainai, Iesu ena hereva hegeregerena, “idia laloa lasi dahaka do ia vara [Dirava ena hereva Noa ena amo hegeregerena], ia mai bona . . . abata ranu ese ibounai ia abia lao.” Unai sivarai idia torea ita idia hadibaia totona.
13 Aposetolo Petro danu ese ita unai bamona ia hadibaia, ia gwau: “Nega dokonai [iseda negai], tauanina ena ura sibona idia karaia taudia be do idia hedinarai. Dirava badinaia kara do idia kirikirilaia. . . . do idia gwau, ‘Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.’ ” Unai taudia idia ura lasi Dirava ese do ia biagudia. Unai dainai idia ese Keriso ia lou mai vadaeni bona Dirava dadaraia taudia ia panisidia gwauraia sivaraina idia abia dae lasi. To Petro be ma ia gwau: “Kara ta idia ura laloaboio, kara be inai: Dirava ese guba bona tanobada, sibona ena oda hereva dekena amo ia karaia. Tanobada be ranu dekena amo ia karaia, bona ranu ese ia hegegea. To Dirava ese unai tanobada gunana ranu dekena amo ia hadikaia ore, abata badana dekena amo. To harihari idia noho guba bona tanobada be Dirava ese ena oda hereva dekena amo ia naridia noho. Oibe, idia noho hegaegae ela bona Kota Badana Dinanai. Unai neganai lahi badana ese tanobada bona guba do ia araia ore, bona Dirava idia negea taudia be do idia boio.”—2 Petro 3:3-7.
14 Unai kirikiri taudia idia laloa lasi gauna be inai: Dirava ese “ena oda hereva” iboudiai ia hagugurua. Edia lalohadai hakoikoia totona, aposetolo Petro ese matamana negana ia herevalaia. Unai neganai Dirava ia gwau: “Gau ta ese davara badana do ia haria, ranu be gabu rua do ia noho totona.” Bena “Dirava ese gau ta ia karaia, henunai ia noho ranu bona atai ai ia noho ranu ia hapararaia totona.” Dirava ese “ena oda hereva” ia hagugurua unai. (Genese 1:6, 7) Noa ena negai danu iena hereva ia hagugurua; ia gwau abata badana do ia halasia, bena unai ranu amo “unai tanobada gunana” ia hadikaia ore. Bona Dirava ese ena hereva do ia hagugurua lou neganai, ia ese hari inai nega lalonai ia idia dadaraia taudia do ia hamasedia ore.
15 Abata Badana ena negai idia vara gaudia be gabeai do idia vara gaudia edia laulau. Unai neganai Dirava ese tanobada ia hadikaia ore lasi, to ia idia badinaia lasi taudia ia hadikadia ore. Vadaeni, inai hereva, “lahi badana ese tanobada bona guba do ia araia ore,” ena anina be dahaka? (2 Petro 3:7; 2:5) Lahi korikori ese guba dekenai idia noho gaudia, dina bona hisiu, ia hadikaia diba lasi, badina be idia siahu masemase vadaeni, ani? Bona bema tanobada korikorina be lahi ese ia araia ore, Dirava ena palani Paradaiso ai ia halaoa totona do ia guguru diba lasi, ani? Unai dainai ita diba momokani, inai hereva, “harihari idia noho guba bona tanobada,” edia anina be idau. (Genese 11:1; 1 Hanua Pavapavadia 2:1, 2; 1 Sisiga 16:31 itaia.) “Guba” anina be gavamani, taunimanima ataiai idia haginidia, bona “tanobada” anina be Dirava idia dadaraia taudia. Iehova ena dina badana dekenai do ia hadikadia ore vaitani, lahi amo ia aradia ore bamona. Dirava ena hereva idia kirikirilaia noho taudia be edia mauri do idia haboioa haraga diba.
DIRAVA BADINAIA TAUDIA DO IA HAMAURIDIA
16 Abata Badana sivaraina ese ia hahedinaraia gauna ta be harihari ita laloa namonamo be namo. Aposetolo Petro ese Dirava be Noa ena negai ia karaia karana ia gwauraia murinai, ma ia gwau: “Bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba.” (2 Petro 2:9) Vadaeni, bema oi ura oi do ia hamauria, namona be Dirava oi badinaia.
17 Unai anina be dahaka? Momokani Noa be Dirava badinaia tauna ta. “Ia be Dirava danu ia noho, turana hegeregere.” (Genese 6:9) Ia ese ia karaia karadia iboudiai be Iehova ena ura hegeregerena. Ark ia karaia bona animal ia haboudia be gaukara bada hereana. Noa ia naria kava lasi. Ia be mai ena abidadama. Noa “be inai bamona ia karaia, Dirava ena hereva ibounai hegeregere.” (Genese 6:22; Heberu 11:7) Ia ese Iehova ena dala maoromaorodia bona kara dika taudia do ia hamasedia ore sivaraina be taunimanima dekenai ia harorolaia be namo. Vadaeni, unai ia karaia totona, Noa ese “kara maoromaoro ia harorolaia.”—2 Petro 2:5.
18 Noa ena adavana, bona ena natuna toiosi mai edia adavadia, be dahaka idia karaia be namo? Bible ese Noa ia herevalaia momo badina be ia be unai bese ena kwarana, to ita diba unai taudia danu be Dirava badinaia taudia. Dahaka dainai? Badina be gabeai Iehova ese Noa ena natuna edia sivarai be iena peroveta tauna Esekiel dekenai ia gwauraia, unai amo ia hahedinaraia, bema Noa be unai neganai Israel dekenai ia noho, Dirava ese iena natuna do ia hamauridia lasi, edia tamana ena kara maoromaoro dainai. Idia bada vadaeni dainai, idia kamonai diba o idia gwau-edeede diba; unai dainai namona be idia sibodia idia hahedinaraia idia ura Iehova bona ena dala maoromaorodia idia badinaia.—Esekiel 14:19, 20.
19 Momokani, tanobada taudia hamasedia ore negana be kahirakahira do ia ginidae, unai dainai Bible ia gwau namona be unai dina ita laloa hanaihanai bona ita hamomokania ita danu be Dirava badinaia taudia. (2 Petro 3:11-13) Hari inai negai, tanobada hegegemadai Noa ena bese taudia bogaragidia amo haida ese unai sisiba namona idia badinaia; do idia roho mauri bena “tanobada matamatana” do idia noholaia.
[Study Questions]
1. (a) Gunaguna taunimanima idia mase ore gwauraia a? (b) Dahaka dainai Noa ena kamonai karana ita laloa bada be namo?
2. Dahaka dainai Dirava ese unai taudia ia hamasedia ore?
3. Dahaka dainai hekwakwanai momo be unai negai idia vara?
4. (a) Dahaka dainai Dirava ese Noa ia moale henia? (b) Mauri gaudia hamauridia totona, Iehova be dahaka ia karaia?
5. Abata Badana ena bada be edena bamona?
6. Abata Badana murinai, ranu ibounai be edeseni ia lao?
7, 8. Bible sibona lasi, to dahaka danu ese Abata Badana ia gwauraia?
9. Dahaka kara amo idia hahedinaraia Noa ena kalenda ena “hua iharuana” ai idia vara gaudia idia laloa loulou?
10. Dahaka dainai Bible ena sivarai ese unai sivarai idauidau ia hereaia bona ena anina be bada ita dekenai?
11. Dahaka dainai taunimanima momo be Abata dekenai idia mase?
12. Dahaka dainai “idia laloa lasi” neganai idia kerere bada?
13. (a) Dahaka dainai taunimanima momo ese Keriso ia lou mai vadaeni sivaraina idia abia dae lasi? (b) Petro ia gwau idia be dahaka idia ura laloaboio?
14. Matamana neganai bona Noa ena negai danu, Dirava ese “ena oda hereva” ia hagugurua; dahaka dainai unai ita laloa namonamo be namo?
15. (a) Dahaka dainai 2 Petro 3:7 ese tanobada korikorina araia ore karana ia gwauraia lasi? (b) Vadaeni, “guba” bona “tanobada,” ‘lahi badana ese do ia araia ore’ gaudia, be dahaka?
16. Petro Iharuana 2:9 hegeregerena, hahemauri dalana be dahaka?
17. Noa be edena bamona ia hahedinaraia Dirava ia badinaia?
18. Dahaka dainai ita diba Abata Badana amo idia roho mauri taudia iboudiai ese Dirava idia badinaia?
19. Dahaka ita karaia noho be namo, bona edena dala amo?