Karoa 13
Gau Hamatamatadia Negana
ISEDA helaro namona be inai nega dikana ena dokona amo do ita roho mauri. Ita ura inai tanobada ena kara kereredia, mataganigani bona dagedage do ita rakatania. To, do ita roho mauri urana ita ura bada badina be inai: “tanobada matamatana” do idia noholaia taudia iboudiai be dala do idia davaria, sibodia edia goevadae lasi karadia, gorere, hisihisi bona mase amo idia roho mauri totona. (Apokalupo 21:1-5) To unai ia vara totona, namona be kara dika do ia ore vaitani guna. Edena bamona do ia ore diba? Iesu ese “gau ibounai karaia matamata negana” ia herevalaia, unai nega lalonai kara dika do ia ore.
2 Iesu ese ena aposetolo taudia ia hamaorodia, ia gwau: “Lauegu murina dekenai umui raka taudia, be gau ibounai karaia matamata ena neganai, Taunimanima ena Natuna ena terona diaridiari dekenai do ia helai neganai, terona 12 dekenai do umui helai, Israela edia iduhu 12 dekenai dohore umui kota henia.” (Mataio 19:28) Dirava ese gau iboudiai do ia hamatamatadia lou neganai, taunimanima ese mauri goevadae do idia abia lou diba, matamana neganai idia abia hegeregerena.
3 Kara dika be Adam ena amo idia abia dainai, iena bese taudia iboudiai idia mase, bona idia momo idia gorere bada guna bena idia mase. (Roma 5:12) Mase amo roho mauri dalana be moni amo idia hoia diba lasi. Goevadae lasi tauna be ena kara amo, sibona ena mauri davana eiava ma ta ena mauri davana ia henia diba lasi. Dirava ena hahemaoro hegeregerena, taunimanima ese mauri hanaihanai do idia abia lou dalana tamona be, ta ese ena mauri goevadaena ia bouboulaia, Adam ese ia haboioa gauna danu ia hegeregere gauna unai. Adam ena bese taudia iboudiai be unai bamona mauri idia abia lasi.—Salamo 49:7-9; Kohelete 7:20.
4 Vadaeni, Iehova ese ena vara guna Natuna, Iesu tanobada dekenai ia siaia, taunimanima goevadaena ta hegeregerena iena mauri do ia henia, “taunimanima edia mauri davana korikori.” (1 Timoteo 2:5, 6, NW) Dirava ese ena hebogahisi bona lalokau ia hahedinaraia badabada unai! Unai dala amo do ita abia diba maurina be iseda kara ena davana lasi, to ia be Dirava ena harihari gauna. To inai bamona taudia sibodia ia henidia: inai heduru idia laloa bada, idia abidadama henia, bona edia abidadama be ena Natuna kamonai henia karana amo idia hamomokania taudia. (Roma 6:23; Ioane 3:16, 36) To edena negai hahenamo be unai boubou karana amo do idia abia?
HAHENAMO BE HARI IDIA ABIA
5 Iesu Keriso, (Dirava ena Hahelaga Tauna Badana), ese guba dekenai iena boubou gauna Dirava vairanai ia abia vareai neganai, maoromaoro unai ese haida edia mauri ia hanamoa matamaia. Guba dekenai Keriso ida king ai bona hahelaga taudia ai do idia lao taudia ese idia abia guna, Pentekoste ai, lagani 33 C.E. lalonai. (Kara 2:32, 33; Kolose 1:13, 14) Bena, lagani 1935 lalonai, taunimanima ma haida idia hedinarai matamaia, edia helaro be mauri hanaihanai do idia abia tanobada dekenai. Edia helaro danu ena badina be Keriso ena boubou karana. (1 Ioane 2:1, 2) Unai boubou karana amo haida do ia hanamodia guna bena gabeai ma haida do ia hanamodia, be idau negai Israel ena Kara Dika Boubouna Dinana ai idia karaia karadia ese idia hahedinaraia.
6 Israel ena kalaga helagana dekenai, bena gabeai dubu helagana dekenai, hahelaga tauna badana ta, Levi iduhuna tauna bona Aaron ena ruma tauna unai, be ia gaukara. Ia henunai, Aaron ena ruma taudia oredia be hahelaga taudia, bona Levi iduhuna taudia oredia be edia heduru taudia. Kara dikadia kokia totona, hahelaga tauna badana ese animal rua ia bouboulaia, bena edia rara be Helaga Herea Gabuna lalonai ia abia vareai, Iehova ena oda hegeregerena. Boromakau ta ia bouboulaia guna, “ia sibona dainai bona ena ruma taudia dainai,” anina be Levi iduhuna ibounai dainai. (Levitiko 16:11, 14) Bena nanigosi ta ia bouboulaia, “taunimanima edia” kara dika boubouna, anina be iduhu oredia 12 edia. (Levitiko 16:15) Danu, Israel ibounai edia kara dika be nanigosi ta ena kwarana latanai ia gwauraia hedinarai, bena unai nanigosi be tano gagaena dekenai idia hakaua oho. (Levitiko 16:21, 22) Vadaeni, inai ibounai ena anina be dahaka?
7 Aposetolo Paulo ia gwau Iesu ena boubou karana tamona ese unai kara ia hagugurua. “Keriso ese taunimanima idia karaia Gabu Helagana dekenai ia raka vareai lasi. Unai be guba gauna ena laulau sibona. Lasi, to Keriso ese maoromaoro guba dekenai ia raka vareai . . . ita durua totona . . . Ia sibona ena mauri boubou gauna Dirava dekenai ia henia, kara dika kokia totona.” (Heberu 9:24-26) Idau negai hahelaga tauna badana ese animal rua edia rara ia bouboulaia karadia bona ia mauri nanigosina dekenai idia karaia karadia ese Iesu ena boubou karana ena anina idauidau idia haheitalaia.
8 Boromakau ena rara, Aaron ena ruma taudia dainai idia bouboulaia, be Helaga Herea Gabuna lalonai ia abia vareai guna; unai hegeregerena, Iesu ena boubou karana ena hahenamo be ia ida guba dekenai hahelaga taudia ai do idia lao taudia ese idia abia guna. Unai be lagani 33 C.E. amo ia vara. Aaron be mai ena kara dikadia, idia dainai boubou gauna ia henia, to Iesu be idau. To ia ida hahelaga taudia ai do idia lao taudia be mai edia kara dika, Levi iduhuna ese ia laulaulaidia taudia unai. (1 Petro 2:4, 5) Boubou gauna iharuana, “taunimanima edia” kara dika dainai idia bouboulaia nanigosina, ena rara ia abia vareai, ese ia hahedinaraia, guba oreana taudia murinai ma taunimanima haida danu be hahenamo Iesu ena boubou karana amo do idia abia, tanobada dekenai mauri do idia abia taudia unai. Kara Dika Boubouna Dinana ai “Israela edia iduhu 12” ese idia laulaulaidia, badina idia be hahelaga taudia lasi. (Mataio 19:28; Salamo 37:29) Iesu ese inai taudia iboudiai dainai ia mase sibona lasi, to idia dainai boubou gauna ta bamona ia mase taudia edia kara dika ia abia oho danu. Unai ia hahedinaraia gauna be inai: Ta ese Israel edia kara dika be ia mauri nanigosina ta latanai ia gwauraia hedinarai murinai, tano gagaena dekenai idia hakaua oho, bena ia boio vaitani.—Salamo 103:12; Isaia 53:4-6.
9 Iehova ena lalokau karana Keriso amo ia karaia be idia abidadama henia taudia iboudiai edia kara dika ia ese ia gwauatao; herevana idia be guna dahaka idia karaia, to Dirava ena matana ai idia goeva. Dirava ena hesiai gaukara helagana idia karaia diba mai edia lalo-goeva danu. (1 Korinto 6:9-11; Heberu 9:13, 14) To hari inai negai kara dika be do mai ena siahu edia mauri lalonai. (1 Ioane 1:8-10; Roma 7:21-25) Keriso ida do idia lohia taudia be mauri goevadaena do idia abia lasi ela bona edia mauri tanobada ai ia ore bena idia toreisi lou, doko diba lasi maurina guba dekenai idia abia totona. Taunimanima oredia be Keriso ese kara dika amo do ia ruhadia vaitani, gau hamatamatadia negana lalonai.
“GAU HAMATAMATADIA NEGANAI”
10 Iesu ena hereva hegeregerena, gau iboudiai do idia karaia matamata, “Taunimanima ena Natuna [Iesu Keriso] be ena terona diaridiari dekenai do ia helai neganai.” (Mataio 19:28) To lagani 1914 C.E. lalonai iena terona latanai ia helai neganai, unai ibounai be maoromaoro ia vara lasi. Guba ia hagoevaia guna, Satana mai ena demoni danu ia negedia diho. Bena ena horoa taudia ia hatoredia isi, guba dekenai hairai idia abia totona. (Apokalupo 12:5, 7-12; 1 Tesalonika 4:15-17) Keriso ese ena kamonai aposetolo na edia “terona 12” ia henidia, bena 144,000 oredia be mase amo idia toreisi lou negadiai, terona latadiai ia hahelaidia, guba dekenai.—Apokalupo 3:21.
11 Guba oreana taudia abidia hidi karana ia ore gwauraia neganai, “mamoe idaudia” haboudia karana ia matamaia, bona lagani 1935 amo inai kara ia bada ia lao. Inai taudia danu be Keriso ena boubou karana amo hahenamo idia abia matamaia, ‘edia dabua idia huria Mamoe ena Natuna ena rarana lalonai, vadaeni edia dabua be kurokuro momokani.’ Ia durudia, ‘mauri matamata be dabua bamona idia atoa totona, inai mauri be . . . kara maoromaoro momokani bona kamonai dekenai ia hedinarai.’ (Apokalupo 7:9, 10, 14; Efeso 4:20-24, NW) Dirava ese Keriso ena amo ia karaia karadia dainai, mauri hanaihanai be Paradaiso dekenai do idia abia diba.—Apokalupo 7:17; 22:17.
12 Nega sisina murinai inai tanobada dikana do ia ore, bena Kota Badana Dinana do ia matamaia. Diadi Badana, Iesu Keriso ese dala do ia kehoa taunimanima iboudiai edia, bona do ia durudia bada, Iehova ena dala maorodia idia dibaia bona idia badinaia totona. Keriso ena horoa taudia, ia idia badinaia ela bona mase, be ia danu unai gaukara do idia karaia hebou, ‘Israela iduhu 12 dekenai do idia kota henia.’ (Luka 22:28-30; Apokalupo 20:4, 6) Israel bese taudia korikoridia mo sibodia lasi, to ma taunimanima momo danu do idia kota henidia, Kara Dika Boubouna Dinana ai “Israela iduhu 12 [hahelaga taudia lasi]” ese idia laulaulaidia taudia unai. Anina be Iesu ese ia hamauridia taudia iboudiai. (1 Korinto 6:2) Hisihisi badana amo do idia roho mauri taudia be inai dala amo do idia hanamodia lou guna. To taunimanima ma milion momo be unai hahenamo do idia abia danu, badina be “mauri noho taudia, bona idia mase vadaeni taudia danu” do idia kota henidia. (2 Timoteo 4:1; Kara 24:15) Iesu ena boubou karana dainai mase taudia do idia giroa mai neganai, taunimanima do idia moale dikadika, edia lalokau taudia danu do idia hedavari lou neganai!
13 Nega daudau lalonai kara dika ese taunimanima ia hagoreredia bona ia hakavakavadia, to unai nega lalonai unai dika ibounai do ia ore. Tanobada dekenai ia noho neganai, Iesu ese marere diba lasi taudia, matakepulu taudia, taia kudima taudia, mu taudia bona gorere taudia idauidau ia hanamodia haraga. Unai siahu karadia ese idia hahedinaraia ia ese taunimanima edena bamona do ia durudia, iena Lagani 1,000 Lohia Negana lalonai. Iehova ena hebogahisi karadia unai bamodia idia itaia o edia namo idia abia bena iena lohia siahuna idia dadaraia taudia be ia ese do ia haoredia ela bona hanaihanai. To abidadama momokani bona kamonai idia hahedinaraia taudia be ena dala maorodia do ia hadibadia; unai amo edia lalohadai bona ura do idia namo idia lao ela bona idia goevadae momokani. Unai Iehova lalokau henia taudia be unai dala amo do ia hamatamatadia lou momokani. Unai be hegeregere edia mauri ia hamatamaia lou bona tamana matamatana ia henidia bamona, Tamana Hanaihanai, Iesu Keriso unai.—Isaia 26:9; 9:6.
14 Bena lagani 1,000 dokonai hahetoho ginigabena lalonai idia kwalimu murinai, Iehova ese Keriso ena amo iena natuna ai do ia halaodia bona Iena bese goevadaena lalonai do ia abidia dae. Helaro namona unai—hisihisi badana amo do idia roho mauri taudia totona sibona lasi, to mase amo do idia toreisi lou taudia totona danu; idia iboudiai be mauri do idia moalelaia, Paradaiso tanobadana dekenai!—Roma 8:20, 21.
[Study Questions]
1. (a) Idia roho mauri bena “tanobada matamatana” ai idia vareai taudia be dahaka hahenamo do idia davaria diba? (b) To unai idia abia totona, dahaka ia vara be namo?
2. Iesu ese dahaka nega ia gwauraia, Mataio 19:28 dekenai?
3. (a) Adam ena kara dika dainai dahaka ia vara? (b) Dahaka dainai Adam ena bese taudia iboudiai be iena kara dika ena anina dikana amo idia roho mauri diba lasi?
4. (a) Edena dala amo Iehova ese edia mauri davana ia karaia? (b) Unai hahemauri be edena bamona ita abia diba?
5. (a) Keriso ena boubou karana ese daidia ia hanamodia guna? (b) Edena orea idauna taudia ese unai hahenamo idia abia, bona edena lagani amo idia abia badabada?
6. Kara Dika Boubouna Dinana dekenai dahaka idia karaia?
7. (a) Unai ese dahaka boubou karana tamona ia laulaulaia? (b) Dahaka dainai animal toi idia gaukaralaidia?
8. (a) Unai dina dekenai idia karaia karadia ese idia hahedinaraia edena taudia ese hahenamo Keriso ena boubou karana amo do idia abia guna? (b) “Taunimanima edia” kara dika boubouna idia karaia ena anina be dahaka? (c) Nanigosi ta be tano gagaena dekenai idia hakaua oho ena anina be dahaka?
9. Keriso ena boubou karana idia abidadama henia taudia be dahaka hahenamo idia abia (a) Hari inai negai? (b) Gabeai?
10. (a) Edena negai gau iboudiai ia hamatamatadia matamaia? (b) Iesu ese haida na edia terona ia henidia vadaeni a?
11. Gau iboudiai hamatamatadia negana ena anina namona be “mamoe idaudia” ese edena bamona idia abia noho?
12. (a) “Israela iduhu 12” Iesu ese ia gwauraidia ese daidia idia laulaulaidia? (b) Roho mauri taudia sibodia lasi, to daidia danu be hahenamo do idia abia, gau hamatamatadia neganai?
13. Kota Badana Dinanai Dirava ese gau iboudiai edena bamona do ia hamatamatadia momokani?
14. Hahetoho ginigabena lalonai idia gini auka taudia be Iehova ese edena bamona do ia abidia dae?