Karoa 14
“Guba Matamatana bona Tanobada Matamatana” Idia Matamaia Dalana
GUBA ita herevalaia neganai, taunimanima momo ese hisiu bona hua idia noho gabuna idia laloa. Bible ia gwau Dirava ena terona be “guba” dekenai bona unuseniai ia lohia noho. (Kara 7:49; Daniel 4:26; Mataio 4:17) Taunimanima edia gavamani danu be “guba” ia gwauraidia, badina be idia be edia bese taudia ataiai idia noho. (2 Petro 3:7) Unai hegeregerena, nega momo “tanobada” anina be tanobada kuboruna, to ena anina ma ta be taunimanima. (Salamo 96:1) Inai oi diba neganai, “guba matamatana bona tanobada matamatana” gwauhamatadia namodia edia anina dekenai do oi lalo-parara. Inai gwauhamata haida edia anina be idau negai idia vara Israel dekenai.
“LAU KARAIA GAUDIA UMUI MOALELAIA”
2 Israel besena ese gwauhamata metauna amo Iehova idia gwauhamata henia, do idia kamonai henia. To idia badinaia lasi. Unai dainai Iehova ia hamaorodia, do ia naridia lasi bona unai dainai Babulono taudia ese Ierusalem do idia hadikaia ore bona unai bese taudia do idia hakaudia lao Babulono dekenai. (Isaia 1:2-4; 39:5-7) To ia ese danu ia gwauhamata, do idia helalo-kerehai taudia do ia hakaudia mai lou.—Isaia 43:14, 15; 48:20.
3 Unai do ia vara momokani dainai, Iehova ese ia gwauraia, ia karaia noho karana ta bamona; ia gwau: “Lau ese guba matamatana bona tanobada matamatana lau karaia noho; gau gunadia do idia laloatao lasi . . . To umui lalo namo, umui moale hanaihanai, lau karaia gaudia umui moalelaia. Badina be Ierusalem lau karaia, moale gauna, bona ena taunimanima lau karadia, moale taudia.” (Isaia 65:17, 18) Inai anina be, unai helalo-kerehai Israel taudia do ia hamauridia.
4 Lagani 539 B.C.E. lalonai Mede bona Parasa taudia ese Babulono idia halusia neganai, Iuda taudia be gavamani matamatana ta henunai idia lao, “guba matamatana” unai. Unai “guba matamatana” lalonai, King Kurese be mai ena dagi badana. Ena be ia ese Iuda taudia edia tomadiho ia badinaia lasi, to ia gwau Iehova ese basileia siahuna ia henia bona ia hagania dubu ta be Ierusalem dekenai do ia haginia. (2 Sisiga 36:23; Isaia 44:28 itaia.) Lagani 537 B.C.E. lalonai, Ierusalem dekenai idia giroa lou neganai, Gavana Serubabele bona Hahelaga Tauna Badana Iesua danu be mai edia dagi badadia, unai “guba matamatana” bamona gavamanina lalonai, bona Iuda taudia oredia, Dirava ese ia hakaudia lou taudia unai, be “tanobada matamatana” ai idia lao.—Esera 5:1, 2.
5 Namona be unai taudia ese tomadiho goevana idia tahua guna, Iehova ena lohia siahuna idia matauraia momokani bona ena peroveta taudia idia kamonai henidia, badina unai amo do idia hahedinaraia idia helalo-kerehai momokani. Unai hegeregerena, Iuda dekenai idia ginidae neganai, “Israel Diravana ena boubou patana idia haginia” guna.—Esera 3:1-6.
6 To gabeai unai taudia ese kohu idia laloa bada, bona idia gari dainai dubu haginia gaukarana idia haorea lasi. Unai dainai Iehova ese ena peroveta taudia amo ia sisiba henidia, bena idia kamonai. (Hagai 1:2, 7, 8, 12; 2:4, 5) Ma gabeai, headava taravatuna idia badinaia lasi dainai ia sisiba henidia neganai, edia kara idia hamaoromaoroa. (Esera 10:10-12) Dirava ena hereva idia itaia bona idia kamonaia dainai, Dirava ese lauma dalanai ia hanamodia, bena edia matana bona taiana be Iehova ena ura hegeregerena idia iusilaia. (Isaia 6:9, 10 be Isa 35:5, 6 danu hahegeregerea.) Unai dainai Dirava ese ia hanamodia, Isaia 65:20-25 dekenai ia torea gwauhamatana hegeregerena.
7 To “guba matamatana bona tanobada matamatana” gwauhamatana ena anina be unai sibona, a? Lasi. Aposetolo Petro ia gwau, Keristen taudia iena nega lalonai ese unai gwauhamata ena anina ma ta idia naria noho. (2 Petro 3:13) Idia naria gaudia be iseda matana ai idia hedinarai. Kurese ia hanaia tauna, Iesu Keriso ia lohia matamaia dainai unai gaudia idia vara.
8 Ita diba vadaeni hegeregerena, lagani 1914 lalonai Iehova ese ena Natuna siahu ia henia, ena inai taudia edia huanai do ia lohia matamaia. Unai neganai “guba matamatana” ia vara. Unai ese idau negai Israel dekenai ia vara gauna ia hanaia momokani. (Salamo 110:2; Daniel 7:13, 14) Lagani 1914 lalonai ia vara gavamanina be guba amo ia lohia, bona Dirava ese siahu ia henia, tanobada ibounai do ia biagua. Gabeai inai gavamani ia bada ia lao, Keriso ena hahediba taudia, lauma amo ia horodia taudia, be mase amo idia toreisi bona guba dekenai idia daekau neganai. Unuseniai idia be edia Lohiabada danu king ai bona hahelaga taudia ai idia lao. Unai Basileia oreana taudia ma haida be tanobada dekenai idia mase negadiai, idia danu be “guba matamatana” taudia ai idia lao. (1 Tesalonika 4:14-17; Apokalupo 14:13) Hari idia momo herea be unai guba Basileiana lalonai idia gaukara noho. Idia be Iesu danu Ierusalem Matamatana ai idia lao; Iehova ese unai hanua inai bamona ia gwauraia: “Ierusalem lau karaia, moale gauna, bona ena taunimanima lau karadia, moale taudia.”—Isaia 65:18.
9 Guba dekenai sibona lasi to tanobada dekenai danu, Iehova ese “moale gauna” ia karaia. Basileia abia taudia oredia be tanobada dekenai idia do noho. Tanobada Ibounai Tuarina Ginigunana negana lalonai Kerisendom ena haroro taudia ese idia samanidia koikoi dainai, gavamani ese edia Hakaua Oreana taudia dibura dekenai ia koudia, nega daudau idia dibura totona. Unai dala amo Babulono Badana ena ura hegeregerena idia hadiburadia, to lagani 1919 lalonai Dirava ese ia ruhadia nege. Iehova ena lauma ese ia durudia dainai, edia orea idia haginia lou, tomadiho goevana bona Dirava ena Basileia gaukarana idia karaia totona.
10 To edia helaro be unai idau negai Iuda taudia, lagani 537 B.C.E. lalonai edia tano idia lou henia taudia, edia helaro hegeregerena lasi. Lauma Israel taudia edia helaro be, ‘guba dekenai idia totona ia noho hegaegae’ maurina do idia abia. (1 Petro 1:3-5) To Iehova ia haganidia, gaukara ta do idia karaia guna bena gabeai unai davana do idia abia. Ia perovetalaia, ia gwau: “Egu hereva be emu uduna ai do lau atoa, bona egu imana ena ikerukeru ai oi do lau hunia, guba atoa bona tanobada ena badina atoa bona Siona lau hamaoroa totona, lau gwau, ‘Oi be lauegu bese.’ ” (Isaia 51:16) Iena “hereva” be iena hesiai taudia edia uduna dekenai ia atoa, tanobada ibounai dekenai idia harorolaia totona. Mai edia goada danu idia haroro matamaia, idia gwau Dirava ese “guba matamatana” ia haginia auka dainai, taunimanima bona demoni ese do idia kokia diba lasi. Guba Siona ena hesiai taudia dekenai ia karaia karadia amo Iehova ia hamomokania idia be iena orea taudia. Tanobada be abidadama ai bona kara maoromaoro ai ia dabu, to lauma Israel idia noholaia “tanona,” edia gaukara gabuna unai, be lauma paradaisona ai ia lao; ia lalonai Dirava ena lauma gaudia idia laloa bada bona ena kara idia goadalaia! (Isaia 32:1-4; 35:1-7; 65:13, 14; Salamo 85:1, 8-13) To, “tanobada matamatana,” Isaia 65:17 dekenai ia perovetalaia, be edena bamona?
“TANOBADA MATAMATANA” IA HEGAEGAELAIA
11 Lagani 1935 lalonai Iehova ese lauma Israel taudia ia hadibadia, nega ia ginidae vadaeni taunimanima hutuma bada do idia gogodia, mauri hanaihanai tanobada dekenai do idia abia totona. Idia be momo herea, edia momo ese Basileia abia taudia edia “orea maragi” ena momo ia hanaia momokani. (Apokalupo 7:9, 10) Idia danu be lauma paradaisona lalonai idia hakaudia vareai. Israel lasi taudia ese idia laulaulaidia, lagani 537 B.C.E. lalonai bona murinai Iuda taudia ida Babulono idia rakatania taudia unai. (Esera 2:58, 64, 65; 8:17, 20) Inai Iehova ena witness taudia iboudiai, edia helaro be tanobada dekenai, be “tanobada matamatana” taudia ai do idia lao diba.
12 Unai taudia be hisihisi badana amo do idia roho mauri neganai, unai “tanobada matamatana” ena badina ai do idia lao, ena taunimanima ginigunadia unai. Ena badina ia auka be gau badana. Unai dainai hari inai negai Iehova ese ena dala ia hadibadia namonamo. Ia durudia, iena lohia siahuna abia isi karana idia laloa bada totona. Ia hadibadia, gau badana be ‘Iehova idia abidadama henia mai edia kudouna ibounai danu, bona sibodia edia aonega dekenai idia tabekau lasi.’ (Hereva Lada-isidia 3:5, 6) “Basileia ena Sivarai Namona” be hari idia harorolaia goadagoada diba, unai amo idia hahedinaraia Dirava ena Basileia idia badinaia momokani. (Mataio 24:14) Ena be idia be bese idauidau, gado idauidau bona kopi idauidau taudia, to tanobada hegegemadai idia be tadikaka bamona idia gaukara hebou mai edia lalokau danu. (Ioane 13:35; Kara 10:34, 35) Inai hadibaia gaukarana ena heduru oi tahua goadagoada noho a? Idia tahua goadagoada taudia ese hahenamo momo do idia davaria, vaira negana lalonai.
“TANOBADA MATAMATANA” IA VARA
13 Iehova ia gwauhamata “tanobada matamatana” do ia havaraia; unai gwauhamata ena anina do ia havaraia guguru neganai, unai ese lagani 537 B.C.E. lalonai ia vara gauna do ia hanaia momokani. “Tanobada matamatana” taudia be Babulono Badana amo ia ruhadia nege guna, bena unai tomadiho koikoi basileiana tanobada ibounai dekenai do ia haorea ela bona hanaihanai. (Apokalupo 18:21) Isaia ena peroveta herevana be gunaguna ia momokani neganai, Israel kahirakahira dekenai idia noho besedia ese Iehova idia gwauraia dika bona ena hesiai taudia idia dagedage henidia, to “tanobada matamatana” taudia be unai dika do idia davaria lasi. Taunimanima dikadia iboudiai mai edia gavamani iboudiai danu be Iehova ese tanobada amo do ia haoredia guna, badina be iena lohia siahuna idia abia dae lasi dainai. (Daniel 2:44; Hereva Lada-isidia 2:21, 22) Dirava ena kara maoromaoro Nega Matamatana do ia matamaia neganai, Iehova idia hanamoa bona ena dala idia moalelaia taudia sibodia ese tanobada do idia noholaia.—Salamo 37:4, 9.
14 Ena revareva iharuana lalonai aposetolo Petro ese unai nega namo hereana ia torelaia. (2 Petro 3:13) Aposetolo Ioane ese danu ia gwauraia, Iesu Keriso ese ia hahedinarai henia hegeregerena, ia gwau: “Guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni.” (Apokalupo 21:1) Hisihisi badana ia ore bona Satana mai ena demoni danu idia koudia vadaeni neganai, nega matamatana do ia matamaia. Satana mai ena demoni danu edia siahu dikana bona edia orea ibounai idia ore vadaeni. Bena “guba matamatana” ese Iehova ena palani mai lalokauna taunimanima totona do ia hagugurua, bona gwau-edeede gavamanidia ese do idia koua diba lasi. Unai “guba matamatana” henunai “tanobada matamatana” do ia noho, anina be, taunimanima “hutuma bada herea,” Dirava ese dala ia kehoa idia edia, mauri hanaihanai be tanobada ena Paradaiso lalonai do idia abia diba totona. Dirava ese ia gwauraia negana do ia ginidae neganai, mase taudia do idia toreisi lou bena idia danu be “tanobada matamatana” taudia ai do idia lao diba.—Apokalupo 20:12, 13.
15 Aposetolo Ioane ese gado ta ia kamonai, guba amo ia mai, unai nega namona ia gwauraia, ia gwau: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:3, 4) Mauri do idia moalelaia dikadika!
16 Eden ena toana namona bona Iesu ena hoa karadia danu ese unai “tanobada matamatana” ena mauri idia haheitalaia namo herea. Danu, kamonai taudia ese hahenamo bada do idia davaria, Isaia 11:6-9 bona Isa 35:1-7 bona Isa 65:20-25 edia peroveta herevadia be tauanina dalanai do idia momokani neganai. Do idia moale momokani, badina be lauma dalanai bona tauanina dalanai do idia goada, Paradaiso korikorina lalonai! Unai helaro namo hereana ita abia dainai, namona be unai ibounai ia havaraia Diravana, Iehova ita hanamoa bada!
[Study Questions]
1. (a) Bible ese dahaka na “guba” ia gwauraia? (b) Ia ese dahaka na “tanobada” ia gwauraia?
2. Dahaka dainai Iehova ese Israel ia hamauridia lasi, to dahaka ia gwauhamatalaia?
3. Isaia 65:17 ena gwauhamata ena anina be dahaka?
4. (a) Daidia ese idia ruhadia nege? (b) Unai negai “guba matamatana” bona “tanobada matamatana” be dahaka?
5, 6. (a) Edena bamona idia hamomokania idia helalo-kerehai momokani? (b) Iehova ia sisiba henidia neganai, dahaka idia karaia?
7. Edena bamona ita diba Isaia ena peroveta herevana ena anina be ma nega ta do ia vara lou?
8. (a) Edena negai Iehova ese inai “guba matamatana” ia havaraia, bona inai be peroveta herevana ena anina ia vara negana ginigunana hegeregerena, eiava? (b) “Guba matamatana” be edena bamona ia bada ia lao?
9. Lagani 1919 lalonai, Iehova ese dahaka “moale gauna” tanobada dekenai ia havaraia?
10. (a) Edena bamona inai lauma Israel taudia edia helaro be idau, unai idau negai Iuda taudia edia helaro hegeregerena lasi? (b) Iehova ese dahaka gaukara ia henidia? (c) Edena dala amo ia hanamodia bada, tanobada dekenai idia do noho lalonai, bona Bible ese unai edena bamona ia gwauraia?
11. (a) Edena lagani amo Iehova ese “tanobada matamatana” taudia ia hahegaegaedia noho? (b) Edena taudia ese idia laulaulaidia?
12. Taunimanima be edena bamona ia hahegaegaedia, “tanobada matamatana” ena badina namona ai idia lao totona?
13. “Tanobada matamatana,” gabeai do ia mai gauna, ese Iehova ena gwauhamata lagani 537 B.C.E. lalonai hamomokania gauna edena bamona do ia hanaia momokani?
14. (a) Petro Iharuana 3:13 bona Apokalupo 21:1 be edena negai do idia momokani? (b) “Guba matamatana” do ia lohia negana do ia idau, ena badina be dahaka? (c) Daidia be “tanobada matamatana” taudia ai do idia lao?
15. Dahaka dainai Apokalupo 21:3, 4 ena anina be bada?
16. Dahaka gwauhamata namodia be inai siri ese idia gwauraia: (a) Isaia 11:6-9? (b) Isaia 35:1-7? (c) Isaia 65:20-25? (d) Daika ese inai gwauhamata namodia do ia hamomokania?