Karoa 15
Basileia Dainai Ia Hapararadia
ITA TA TA ibounai be Iehova ena Basileia Iesu Keriso ena imana dekenai ita lalohadailaia namonamo be namo. Inai Basileia dainai Iesu Keriso ese bese iboudiai ia hapararadia noho. Taunimanima ta ta edia kara hegeregeredia ia hapararadia orea rua dekenai. Inai orea tamona be tanobada dokona amo do ia roho mauri.—Mataio 24:40, 41.
2 “Idau bese edia nega” be lagani 1914 lalonai ia ore neganai, Iehova ese ena Natuna, iena Mesia unai, lohia siahuna ia henia, tanobada bona tanobada besedia iboudiai do ia biagudia. (Salamo 2:6, 8) Mesia ena gavamani amo Dirava ese iena palani tanobada totona do ia karaia guguru, unai palani be gunaguna ia lalohadailaia mai ena aonega bona mai ena lalokau danu. Unai dainai oiemu lalohadai Basileia dekenai ese ia hahedinaraia Iehova ena lohia siahuna be edena bamona oi laloa. Nega daudau lasi murinai unai Mesia Basileiana ese hari idia noho gavamanidia iboudiai “do ia hamakohidia maragimaragi bona do ia haoredia” bena tanobada ibounai ena gavamani tamona ai do ia lao. (Daniel 2:44; Apokalupo 19:11-21) Tanobada be Paradaiso ai do ia halaoa neganai, oi be edeseniai? Oi ia hakaua dainai, mauri goevadae do oi abia, a? Hari idia mauri noho taudia be unai hahenamo do idia abia dalana be Iesu ese ia gwauraia hedinarai.
KING BONA ENA “TADIKAKANA”
3 “Tanobada dokona” be iena aposetolo taudia dekenai ia gwauraia neganai, Iesu be parabole ta lalonai ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai iena vairana dekenai do ia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be ena idiba kahana dekenai do ia atoa, nanigosi be ena lauri kahana dekenai do ia atoa.”—Mataio 24:3; 25:31-33.
4 Unai peroveta herevana lalonai, Iesu be sibona “Taunimanima ena Natuna” ia gwauraia lou unai. (Mataio 24:27, 30, 37, 39, 44) Unai hereva idia kamonai neganai, idia ese Daniel be gunaguna ia abia peroveta matahanaina idia laloa diba. Daniel ese ia gwauraia, ia gwau: “Bena hanuaboi matahanaidia dekenai lau itaia noho, ta be guba oridia dekenai ia mai, ia be taunimanima ena natuna bamona [Iesu Keriso]; ia be Gauka [Iehova Dirava] dekenai ia mai, bena ia vairanai idia hakaua lao. Bena lohia siahuna ia henia, bona hairai bona basileia danu, bese idauidau bona basileia idauidau bona gado idauidau iboudiai ese iena hesiai gaukara do idia karaia totona. Iena lohia siahuna be noho hanaihanai siahuna, do ia ore lasi gauna, bona ena basileia danu ta ese do ia hadikaia ore lasi.” (Daniel 7:13, 14; Heberu 2:5-8) Unai lohia siahuna be Iesu ia henia vadaeni. Lagani 1914 amo ia be ena guba terona amo ia lohia. Oi ese iena lohia siahuna oi abia dae a? Oiemu mauri dalana amo oi hahedinaraia, Dirava ese tanobada ibounai Lohiana ai ia halaoa Tauna oi matauraia momokani, a?
5 Ena be ta ia gwau Dirava ena Basileia ia abidadama henia bona ia ese Iesu Keriso ia lalokau henia, to unai sibona be hegeregere lasi. Iesu ese mamoe bona nanigosi ia parabolelaia neganai, ia hahedinaraia ia be guba dekenai do ia noho dainai taunimanima ese do idia itaia diba lasi, unai dainai ia ese edia kara, iena “tadikakana” dekediai idia karaia karadia, do ia tahua, bena unai amo do ia davaria idia hereva momokani eiava lasi.—Mataio 25:40, 45.
6 Iena “tadikakana” be daidia? Dirava ese taunimanima bogaragidia amo ia abidia hidi taudia 144,000 unai, idia be Keriso ida guba Basileiana idia abia. (Apokalupo 14:1, 4) Dirava ena lauma amo idia “vara lou” dainai, idia be Dirava ena natuna, bona unai dainai Bible lalonai Iesu Keriso ena “tadikakana” idia gwauraidia. (Ioane 3:3; Heberu 2:10, 11) Taunimanima ese inai “tadikakana” dekediai idia karaia karadia be Iesu ese ia laloa, ia sibona dekenai idia karaia karadia hegeregeredia.
7 Hari inai nega lalonai Keriso ena “tadikakana” be Kerisendom ena dubu oreadia lalodiai idia noho, a? Lasi, badina be Iesu ese ena hahediba taudia momokanidia ia gwauraidia, ia gwau: “Idia be tanobada ena lasi, lau hegeregerena, lau be tanobada ena lasi.” (Ioane 17:16) To Kerisendom ena dubu oreadia mai edia orea taudia be unai bamona ita gwauraidia diba lasi, ani? Idia momo ese edia tano taudia edia lalohadai bona kara idia tohotohoa. Dubu oreadia be politik idia durua momo. Lagani 1945 lalonai United Nations oreana idia haginia gwauraia neganai, Protestant, Katolik bona Iuda taudia ese idia sisiba henidia. Vanegai, Roma ena pope ese United Nations oreana idia hanamoa, idia gwau unai orea sibona ese lalo-tamona bona maino ia havaraia diba. The World Council of Churches, ia lalonai be dubu oreadia 300, ese ena moni amo gavamani tuari henidia karadia ia durua. To, Iesu Keriso ese Roma gavana Pilato ia hamaoroa, ia gwau: “Lauegu Basileia be inai tanobada gauna lasi.”—Ioane 18:36.
8 Idia vara vadaeni gaudia ese idia hahedinaraia, orea tamona ese Basileia totona idia gini goada, tanobada ibounai dekenai idia harorolaia goadagoada, bona tanobada ena politikol karadia amo idia gini siri. Hari orea be Iehova ena Witness taudia. Idia bogaragidiai Keriso ena “tadikakana” oredia idia noho. Edia Lohiabada bona iena aposetolo taudia idia tohotohodia, hanua ta ta dekenai bona ruma ta ta dekenai idia lao, Dirava ena Basileia ena sivarai namona idia harorolaia. (Luka 8:1; Kara 8:12; 19:8; 20:20, 25) Lagani 1919 lalonai, Iehova ena Witness taudia edia hebouhebou ta dekenai, Cedar Point, Ohio dekenai, hebouhebou taudia idia hamaorodia edia gaukara korikori be Mesia ena basileia do idia harorolaia. Lagani 1922 lalonai, hebouhebou ma ta dekenai unai idia hamaorolaidia lou, idia gwau: “King bona ena basileia umui harorolaia, harorolaia, harorolaia.” Edia diba hegeregerena, tanobada ibounai dekenai unai bamona idia karaia noho ema bona hari. (Mataio 24:14) Edia gaukara dainai, Basileia ena sivarai oi kamonai vadaeni. Unai dainai dahaka oi karaia noho?
‘LAUEGU TADIKAKANA DEKENAI UMUI KARAIA’
9 Keriso ena “tadikakana,” lauma amo ia horodia taudia, ese hahetoho badadia idia davaria, Dirava ena Basileia idia harorolaia bona tanobada amo idia gini siri lalonai. (Ioane 15:19, 21) Idia haida be hitolo, ranu mase bona dabua lasi negadia idia hisihisilaia vadaeni. Momo ese edia hanua idia rakatania, idau gabudia dekenai idia haroro totona. Edia hesiai gaukara idia karaia noho lalonai, gorere idia davaria, bona dagedage taudia ese idia hadiburadia bona haida idia hamasedia. Keriso ena “tadikakana” be inai hisihisi idia ania negadiai, unai ese taunimanima bese iboudiai lalodiai ia tohodia. Dirava bona Keriso idia lalokau henidia dainai, inai guba Basileia ena hesiai taudia do idia durudia, eiava? (Mataio 25:35-40; 2 Korinto 5:20 itaia.) Hebogahisi dainai idia henidia heduruna lasi, to idia be Keriso ena orea taudia dainai idia henidia heduruna be ia ese ia laloa, ia sibona idia durulaia karadia hegeregeredia.—Mareko 9:41; Mataio 10:42.
10 Iesu ia gwau unai bamona heduru idia henidia taudia be mamoe hegeregeredia. Iena “tadikakana” idia durudia lasi taudia be nanigosi ia gwauraidia. Reana “nanigosi” idia gwau Iesu idia itaia lasi. To iena hesiai taudia ia siaidia idia dekenai, bona idia be sibodia idia hahedinaraia goevagoeva. Reana “nanigosi” haida ese Keriso ena “tadikakana” idia dagedage henidia lasi, to ia idia lalokau henia lasi dainai iena hesiai taudia idia durudia lasi. (Mataio 25:41-45) Inai tanobada, Satana Diabolo ese ia gunalaia gauna, idia dogoatao noho. “Mamoe” danu ese Keriso idia itaia diba lasi, to “nanigosi” hegeregeredia idia karaia lasi. Idia gari lasi, to taunimanima vairadiai Keriso ena “tadikakana” idia durudia, Dirava ena Basileia idia harorolaia totona. “Mamoe” be sibodia edia kara ena anina idia diba, bona mai edia lalo-parara danu Dirava ena Basileia Iesu Keriso ena amo be idia abia hidi. Unai dainai King ese edia kara ia moalelaia.
11 To, bese iboudiai be inai dala amo edena bamona ia kota henidia diba? Iesu ia gwau, iena “tadikakana,” Tamana ese guba Basileiana do ia henidia taudia unai, be “orea maragi” sibona, ani? (Luka 12:32) Taunimanima momo be idia danu idia hedavari lasi. To Keriso ena “tadikakana” ese Iehova ena Witness taudia edia orea idia gunalaia, inai orea taudia be Basileia idia harorolaia, tanobada ibounai dekenai. Inai ibounai be Keriso ese ia gunalaia iena guba terona amo, bona ena aneru ese idia durua. Tano 200 bamona dekenai taunimanima hapararadia gaukarana idia karaia noho, gavamani ese inai haroro gaukara idia taravatulaia tanodia dekenai danu, bona taunimanima hutuma bada ese Dirava ena Basileia ena kaha dekenai idia gini.
12 Inai be edena bamona idia hahedinaraia? Horoa taudia ida idia gaukara hebou, Basileia idia harorolaia goadagoada, idia gwau ia lohia noho bona kahirakahira inai tanobada ena oromana do ia haorea. Inai dala amo taunimanima vairadiai idia hahedinaraia Iehova ena Mesia Basileiana idia badinaia, bona mai edia lalokau danu ma haida idia veridia, idia danu be unai bamona idia karaia totona. Inai lalo-maoro taudia ese roho mauri idia tahua sibona lasi, to Iehova bona ena dala idia ura henia dainai, inai bamona idia karaia. Iena Basileia mai ena King Keriso idia laloa bada dainai, idia ura ma haida be unai amo hahenamo do idia abia. Unai dainai Basileia idia harorolaia mai edia goada ibounai danu. Iesu ena hereva hegeregerena, Basileia idia tahua guna, bona edia tauanina durua gaudia idia laloa momo lasi. Inai dala amo hahenamo bada do idia abia.—Mataio 6:31-33.
BASILEIA DO OI ABIA A?
13 Iesu ena parabole hegeregerena “mamoe” ai idia lao taudia be momokani hahenamo bada do idia abia. Ena guba terona amo ia hereva henidia, ia gwau: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.” (Mataio 25:34) Adam bona Eva ese edia natudia, Dirava ese Genese 3:15, 16 hegeregerena do ia hamauridia diba taudia, idia havaradia negana amo, Iehova ese davana namona ia laloa noho, inai “mamoe” ia henidia gwauraia. (Luka 11:50, 51 itaia.) Paradaiso do ia vara lou neganai, mauri goevadaena, Adam ese ia haboioa gauna, do idia abia diba. ‘Basileia idia abia’ anina be guba dekenai do idia lao lasi, badina be parabole ia hahedinaraia “mamoe” be King ena “tadikakana” hegeregeredia lasi, guba Basileiana idia abia taudia unai. Unai dainai “mamoe” be unai guba gavamanina henunai do idia noho, tanobada dekenai. Greek gado ai idia ese “king ta ese ia lohiadia taudia” danu na basileia idia gwauraidia. Mataio 25:34 lalonai ena anina be unai.
14 “Nanigosi” be “davana ia dika hanaihanai gabuna” dekenai do idia lao neganai, do idia ore vaitani, lahi ese ia do ia haoredia hegeregerena. (Mataio 25:41, 46; Apokalupo 21:8 itaia.) Unai neganai Mesia Pavapavana ese “mamoe” do ia naridia, bena hisihisi badana amo do idia roho mauri bona “tanobada matamatana” do idia noholaia. Unuseniai Satana bona ena tanobada dikana edia siahu dikana be lasi. Unai hahenamo do idia abia, badina be Basileia be hari idia lalohadailaia maoromaoro dainai.
15 Bema ta ia laloa inai parabole ena anina do ia vara diba lasi ela bona Keriso ena Lagani 1,000 Lohia Negana ia matamaia murinai, iena lalohadai be kerere. Inai parabole be “tanobada dokona” negana ena toana ena kahana ta. (Mataio 24:3) Iesu ia gwauraia gaudia idia vara, lohia siahuna ia abia murinai, bona ena “tadikakana” be hisihisi idauidau tanobada ai idia do ania noho lalonai. Negana be hari, bona ia ore gwauraia. Unai dainai gau badana be Basileia ita abidadama henia momokani bona ma haida ita durudia danu, idia laloa bada totona.
[Study Questions]
1. Basileia dainai taunimanima ia hapararadia; dahaka dainai unai ita laloa namonamo be namo?
2. (a) Mesia ena Basileia ena anina be dahaka, Iehova ena lohia siahuna dekenai? (b) Basileia be dahaka ai do ia lao, bona unai dainai dahaka ita laloa namonamo be namo?
3. Mataio 25:31-33 dekenai Iesu be dahaka ia gwauraia?
4. (a) Inai parabole be Daniel 7:13, 14 danu edena bamona ia hegeregere? (b) Ita be sibona dekenai edena bamona ita henanadai be namo?
5. Keriso ese taunimanima edia hereva edena bamona ia tahua, idia momokani eiava lasi?
6. Keriso ena “tadikakana” be daidia?
7. Dahaka dainai Keriso ena “tadikakana” be Kerisendom ena orea taudia lasi?
8. (a) Edena dala amo Keriso ena “tadikakana” oi dibadia? (b) Basileia harorolaia gaukarana be mai anina bada idia dekenai, eiava?
9. (a) Mataio 25:35-40 ai ia gwauraia gaudia edia anina Basileia gaukara dekenai be dahaka? (b) Unai ese taunimanima gabu iboudiai dekenai edena bamona ia tohodia?
10. (a) Dahaka dainai “nanigosi” edia hereva be anina lasi? (b) To “mamoe” be dahaka idia karaia?
11. (a) Keriso ena “tadikakana” danu idia hedavari lasi taudia be inai dala amo edena bamona ia kota henidia diba? (b) Dahaka dainai inai gaukara ia kwalimu?
12. (a) “Mamoe” ese edia lalohadai edena bamona idia hahedinaraia? (b) Dahaka dainai unai bamona idia karaia?
13. (a) Edena nega amo Iehova ese inai mamoe bamona taudia edia davana namona ia laloa noho? (b) ‘Basileia idia abia’ anina be dahaka?
14. Edena bamona “nanigosi” edia kota davana be idau, “mamoe” ese idia abia gauna hegeregerena lasi?
15. (a) Dahaka dainai ita diba inai parabole ena anina be hari ia vara noho? (b) Unai dainai, dahaka gaukara be mai anina bada?