Karoa 16
Oi Sibomu be Dahaka Do Oi Karaia?
NAMONA be oi sibomu oi lalohadai, Iehova ena hesiai gaukara do oi karaia eiava lasi. Bema oiemu adavana ese Iehova ia badinaia, eiava emu tamana bona sinana ese, oi be hahenamo oi davaria diba. Edia heduru dainai reana oi ura Iehova na ‘lauma bona momokani dekena amo idia tomadiho henia’ taudia oi bamodia. (Ioane 4:23, 24) To nega ta do ia ginidae, oi sibomu emu lalona do oi hadaia be namo. Momokani Iehova oi lalokau henia bona oi ura ena hesiai tauna ta ai oi lao, a? Momokani oi ura kara maoromaoro negana lalonai do oi noho, a?
2 Bema oi be tama ta o sina ta, momokani oi ura emu natudia be mauri hanaihanai do idia abia, Dirava ena Basileia henunai. Do idia bada neganai do oi biagudia diba lasi, to idia be sibodia edia ura dalana do idia abia hidi. To bema tomadiho oi goadalaia o bema oi manokalaia, unai be mai anina bada idia dekenai. Bema oi ura lasi Iehova ena hesiai gaukara oi karaia, reana emu kara dainai emu natudia be mauri hanaihanai dalana do idia rakalaia lasi. O bema Dirava oi gwauhamata henia bena emu gwauhamata oi hamomokania lasi, reana unai dainai emu ruma taudia iboudiai be lauma dalanai do idia dika momokani, bona hisihisi badana lalonai do idia boio vaitani. To bema kamonai karana oi haheitalaia bona emu natudia oi durudia Bible idia stadilaia totona, bona bema Iehova oi lalokau henia bona ena orea oi matauraia, bona bema oi durudia unai bamona idia karaia totona, bona bema oi hadibadia Dirava ena ura karaia karana ese ia naridia, bona bema hesiai gaukara helagana moalelaia dalana oi hahedinaraia idia dekenai, vadaeni oi durudia bada unai, mauri dalana idia rakalaia matamaia totona. Inai dekenai do oi kwalimu dalana tamona be Iehova ena hahenamo oi abia. (2 Timoteo 1:5 itaia.) Oi gurigurilaia loulou. Namona be oi hekwarahi bada danu. Unai amo anina bada do oi davaria!
3 To reana oi lalo-hekwarahi, badina be emu ruma taudia ese Iehova idia lalokau henia lasi, oi lalokau henia hegeregerena. Oi idia koua toho a? Edena bamona oi durudia diba, idia danu be Iehova ena palani lalo-pararalaia karana idia moalelaia totona? Reana namona be oi noidia, idia be oi danu Kingdom Hall dekenai do idia lao, unuseniai idia vara gaudia idia itaia totona. Bema Iehova ena Witness taudia edia hereva o kara idia daradaralaia, reana unuseniai elda ta danu do idia herevahereva diba, edia daradara kokia totona. To bema oi idia koua noho be edena bamona? Namona be sibona dekenai oi henanadai, oi gwau: ‘Lau be momokani Iehova bona ena Natuna Iesu Keriso lau lalokau henidia, bona ita dainai idia karaia karadia lau laloa bada dainai, lauegu lalona ia hegeregere hekwarahi do lau haheaukalaia, a? Egu ruma taudia lau lalokau henidia bada dainai kara maoromaoro do lau haheitalaia, bena bema mai dalana, idia be unai dainai Dirava ena harihari gauna, mauri hanaihanai do idia abia, a?’—Mataio 10:36-38; 1 Korinto 7:12, 13, 16.
PEPE TA, BESE IDAUIDAU ESE IDIA TAHUA GAUNA
4 Iehova ese dala ia kehoa tanobada taudia iboudiai edia, iena Basileia do idia badinaia bona unai amo do idia hahedinaraia Ia idia lalokau henia. Unai gavamani amo Iehova ese sibona ena ladana do ia abia isi. Iseda lalohadai Basileia dekenai ese ia hahedinaraia iseda lalohadai Iehova dekenai be edena bamona.
5 Iehova ena peroveta tauna Isaia ia gwau: “Unai dina ai Iese ena ramuna do ia gini, taunimanima momo edia pepe; bese idauidau ese ia do idia tahua, bona ena noho gabuna do ia hereadae.” (Isaia 11:10) Unai “Iese ena ramuna” be Lohiabada Iesu Keriso. King siahuna ia gaukaralaia matamaia neganai, mauri henia “ramuna” ta bamona ia ese Mesia pavapavadia edia iduhu ia hagoadaia lou, Iese ena natuna King David ena iduhu taudia unai. (Apokalupo 5:5; 22:16) Lagani 1914 amo ema “taunimanima momo edia pepe” bamona ia gini, bona gavamani maorona idia ura henia taudia be ia dekenai idia hebou. Iehova sibona ese Pepe ai ia halaoa, Mesia Pavapavana korikorina unai.—Isaia 11:12.
6 To taunimanima tanobada dekenai be guba Pavapavana dekenai edena bamona idia hebou diba? Namona be Bible amo idia hadibadia, bena edia lalona matana amo idia itaia diba. Lauma helaga ese ia hakaudia hegeregerena, lauma Israel taudia oredia be inai gaukara idia karaia goadagoada; Dirava ena Basileia, ia gini vadaeni gauna, be tanobada ibounai dekenai idia harorolaia. Taunimanima haida bese iboudiai amo idia kamonai mai edia ura danu. Dirava ena taravatu idia totona idia henanadailaia, unai taravatu bema idia badinaia, mauri hanaihanai be tanobada ena Paradaiso dekenai do idia abia. Bible ena haere idia abia dae dainai, idia badinaia bona Iehova ena Basileia ena kaha dekenai idia gini. Oi be unai bamona oi karaia vadaeni a?
‘DO IDIA KAMONAI TO KARANA DO IDIA KARAIA LASI’
7 Iehova ena Witness taudia idia gaukara goadagoada dainai, taunimanima ese idia kikilaidia loulou. To inai taunimanima edia lalohadai be dahaka, Iehova ena Witness taudia idia harorolaia herevana dekenai? Idia momo edia lalohadai be idau negai taudia haida edia bamona, Esekiel danu Babulono dekenai idia dibura taudia unai. Iehova ese ia herevalaidia, ia gwau: “To, taunimanima ena natuna e, oiemu bese taudia ese . . . oi idia hereva heboulaia . . . idia gwau, ‘Ita lao, Iehova ena amo ia mai herevana be dahaka do ita kamonai.’ Oi dekenai do idia mai, egu orea taudia idia hebou bamona, bena oi vairanai do idia helai, egu orea taudia bamona; bena oiemu hereva do idia kamonai, to karana do idia karaia lasi; badina be edia uduna amo hegahusi herevadia idia gwauraia, bona edia lalona dekenai edia moni be dala kererena amo habadaia daladia idia laloa noho. Itaia! Idia dekenai oi be lalokau anedia ia abia tauna bamona, ena gadona be namo herea, bona gitara ia hataia goevagoeva; badina be emu hereva do idia kamonai, to karana do idia karaia lasi. Bona inai ibounai do ia vara neganai—bona momokani do ia vara—bena idia be do idia diba peroveta tauna ta be idia bogaragidiai ia noho.”—Esekiel 33:30-33.
8 Taunimanima momo ese Iehova ena Witness taudia idia matauraidia bona edia buka idia ura henidia. Idia haida be Bible stadi idia abia dae. Haida be mai edia turadia danu idia mai Witness taudia edia hebou badadia dekenai. Hegeregere, Iesu ena mase laloa totona idia hebou taudia edia momo ena namba ese Iehova ena Witness taudia edia momo ena namba nega rua o nega 5 amo ia hanaia. To Bible ena hereva idia kamonai murinai, dahaka idia karaia? Taunimanima milion toi mai kahana ese inai hereva idia abia dae momokani, bona edia mauri lalonai idia badinaia noho. To ma haida idia karaia hegeregere idia laloa ia be miusik namona sibona bamona. Hagoadaia herevadia idia gwauraia readia, to idia gini siri; Dirava idia gwauhamata henia lasi, bona ena hesiai gaukara helagana idia karaia lasi.
9 Idia daradara noho bona idia naria noho anina be dahaka? Dika davana henia dinana ai Iehova ese do ia lalo-namo henidia lasi bona do ia hamauridia lasi. Oi roho mauri totona, namona be hari oi hahedinaraia goevagoeva Iehova oi badinaia bona oi be iena orea tauna ta.—Sekaria 2:11; Mataio 7:21.
IDIA LALOHADAI MAOROMAORO
10 Iesu Keriso ena hahediba taudia hegeregeredia Iehova idia tomadiho henia taudia iboudiai, ta ta ena lalona ena lalona idia hadaia guna bena unai bamona idia karaia. Guba Basileiana abia taudia be unai bamona. Dala be hari ia kehoa ma haida edia, edia raka dalana do idia abia hidi, bena unai dainai hisihisi badana amo do idia roho mauri bona mauri goevadaena tanobada dekenai do idia abia. Hobab ena kara idia tohotohoa be namo.
11 Hobab be Mose ena nakimi. Ia be Israel tauna lasi to ia be Kene besena tauna, Midian tanona ia noholaia. Israel ese Taravatu Mose ena amo idia abia bona Iehova ena Kalaga Helagana idia karaia murinai, Gwauhamata Tanona idia raka henia. Ori latana ese ia gunalaidia; ia be toa ta, ia hahedinaraia Iehova ese ia bamodia noho, bona edia raka dalana bona edia kampa gabudia ia hahedinaraia danu. To unai tano ia diba bona kampa taudia edia mauri durua gaudia ia davaria haraga diba tauna ta ese do ia bamodia be namo. Mose ese Hobab ia noia do ia bamodia, to Hobab ia ura lasi, badina be ia laloa namona be ena varavara dekediai ia noho, ena tano korikori dekenai. To Mose ese ia noia lou, do ia bamodia bona Israel ena ‘matana ai’ do ia lao, bena Iehova ese ena bese taudia totona ia abia hegaegae gaudia namodia amo iena ahuna do ia henia. Vadaeni Hobab be unai bamona ia karaia mai ena aonega danu.—Numera 10:29-32; Hahemaoro Taudia 1:16.
12 Hari idia noho taudia haida be Hobab ese ia laulaulaidia. Ena be idia be lauma Israel taudia lasi, to idia bamodia, Dirava ena Nega Matamatana idia lao henia noho lalonai. Edia varavara murimuri taudia bona politik idia rakatania. Mose ia hereaia tauna, Iesu Keriso ese ia hakaudia noho lalonai, Keriso ena “tadikakana” oredia danu idia gaukara hebou mai edia moale danu. Gabu matamatadia idia tahua, sivarai namona be unuseniai idia harorolaia totona. Idia momo be pioneer taudia o misinari taudia ai idia lao, idau gabudia dekenai Dirava ena Basileia ena sivarai namona idia harorolaia nega ibounai. Dala ia hekeho gaukara idia manadalaia taudia edia, bona idia boiridia noho, unai gaukara helagana idia karaia bena unai amo hahenamo momo idia abia totona. Oi be unai bamona oi karaia diba, a?
13 Hobab ese Israel taudia ia bamodia, bena lagani 180 idia ore murinai, ena tubuna ta ladana Hebere be ena adavana Iaele danu idia noho Megido kahirakahira dekenai. Hebere ese Kene taudia oredia ia rakatanidia vadaeni bona Kanana ena king, Iabin danu maino idia karaia, unai king ese Israel taudia ia hahisidia bada. Iehova ese Barak ia haginia Israel hamauria totona, bena Iabin ena tuari biaguna, Sisera, ese ena tuari taudia ia haboudia, bona kariota 900 danu. To Iehova be iena bese taudia dainai ia tuari, edia inai taudia ia hadaradaradia, bona abata ia halasia, kariota edia uili be kopukopu dekenai idia hepuni totona. Sisera be ena kariota amo ia diho, ena aena amo ia heau, Iaele, Hebere ena adavana, ena kalaga dekenai ia lao. Bena Iaele ese ia hamaoroa kalaga dekenai do ia vareai.—Hahemaoro Taudia 4:4-17; 5:20, 21.
14 Vadaeni, Iaele ese Iehova ena bese taudia edia inai tauna edena bamona ia kara henia? Bilankesi amo Sisera ia koua, rata kapusi ta ia henia, bena ia naria ela bona ia mahuta. Bena “ikoko ta ia abia, bona hama ta ena imana ai ia abia, . . . ena kwarana ia kokoa . . . Unai dainai ia mase.” Unai hahine be unai ia karaia diba totona, namona be ia boga-auka, bona Iehova bona ena bese taudia ia ura henidia be namo. Danu, namona be ena lalona ia goada bona kara ta ia karaia mai ena goada danu be namo.—Hahemaoro Taudia 4:18-22; 5:24-27, 31.
15 Iaele be Israel hahinena lasi to Iehova ia tomadiho henia; unai dainai ia danu ese “mamoe idaudia” ia laulaulaidia, Keriso ena tadikaka idia kara namo henidia taudia unai. Herevana edia varavara be tanobada mai ena lohia taudia idia badinaia eiava lasi, “mamoe idaudia” idia moale lasi, lohia taudia ese Iehova ena orea taudia idia hahisidia neganai. Barak ia hanaia tauna, Lohiabada Iesu Keriso idia badinaia, bona ena hahediba taudia momokanidia danu. Iaele bamona taudia ese lohia taudia idia hadikadia lasi, to edia diba hegeregerena Iehova ena hesiai taudia hahisidia karadia idia koua toho. Idia gari lasi, taunimanima vairadiai idia gwau Iehova ena palani iena inai taudia iboudiai hamasedia ore totona be idia abia dae vaitani.
16 Oi naria lasi be namo. Bema oi be momokani Iehova bona ena Basileia oi abidadama henia, bona bema Bible ena taravatu oi badinaia noho, vadaeni, kara haraga unai be taunimanima vairadiai oi hahedinaraia be namo. Etiopia tauna ena lalohadai oi abia be namo. Dirava ena ura ia dekenai ia diba neganai, maoromaoro Filipo ia nanadaia, ia gwau: “Dahaka ese egu bapatiso ia koua?” Vadaeni, maoromaoro Filipo ese ia bapatisoa.—Kara karoa 8.
17 Inai bamona oi raka namonamo matamaia murinai, dina ta ta iboudiai dala oi tahua, Iehova tura henia karana oi goadalaia bona ena Hereva be emu mauri lalonai oi badinaia goevagoeva totona, bona Basileia harorolaia gaukarana oi karaia goadagoada danu, inai nega ena dokona lalonai.
[Study Questions]
1. Ita ta ta ibounai be dahaka ita lalohadailaia be namo?
2. (a) Dahaka dainai tama bona sina edia lalohadai be mai anina bada? (b) Tama sina be dahaka kara 5 idia karaia diba, edia natudia durudia bada totona?
3. (a) Bema emu ruma taudia ese oi idia koua toho, dahaka oi karaia diba? (b) To bema oi idia koua noho, be edena bamona?
4. Edena bamona ita hahedinaraia diba Iehova ita lalokau henia momokani?
5. (a) Isaia 11:10 ese dahaka ia perovetalaia iseda nega totona? (b) Unai ena anina be dahaka?
6. (a) Taunimanima be guba Pavapavana dekenai edena bamona idia hebou diba? (b) Taunimanima be “pepe” idia “tahua” dainai, dahaka idia diba vadaeni?
7. Esekiel 33:30-33 ese ia hahedinaraia hegeregerena, taunimanima momo be Bible ena hereva edena bamona idia laloa?
8. Haida ese unai lalohadai edena bamona idia hahedinaraia?
9. Aonega taudia be dahaka idia karaia?
10, 11. (a) Hobab be daika, bona Mose ese ia noia dahaka do ia karaia? (b) Hobab ese ia bamodia a?
12. (a) Hari inai negai daidia be Hobab hegeregerena, bona edena dala amo? (b) Hari inai negai, daidia idia noidia Mose ese Hobab ia noia hegeregerena, bona dahaka totona?
13. (a) Iaele be daika, bona ena adavana ena kara be dahaka, Iehova ena hesiai taudia dekenai? (b) Iaele be hahetoho ta edena bamona ia davaria?
14. Iaele ena lalohadai be dahaka, bona inai ese dahaka ia hahedinaraia?
15. Hari, haida be Iaele ena kara edena bamona idia tohotohoa?
16, 17. (a) Daika ena kara ita tohotohoa be namo? (b) Unai murinai dahaka ita karaia noho be namo?