Karoa 21
Lou Mai Taudia Idia Abidia Dae
TAUNIMANIMA momo be Bible ena hereva momokani idia dibaia vadaeni dainai, idia diba Iehova be Dirava momokani, bona ena palani idia diba danu. Ena be idia be Iehova ena Witness taudia lasi, to reana idia be Witness taudia ida Bible idia stadilaia vadaeni. Eiava reana edia tamadia bona sinadia be Witness taudia. Idia momo be hebou haida dekenai idia vareai vadaeni, Kingdom Hall dekenai. Reana Basileia sivaraina idia harorolaia vadaeni. To Dirava ena ura karadia iboudiai idia karaia lasi. Badina be dahaka?
2 Idia ese tanobada ena moale gaudia idia ura henia, idia laloa unai gaudia amo moale bada do idia davaria, bena Iehova ena orea idia rakatania, unai gaudia idia tahua totona. To gabeai, idia haida idia lalo-parara, idia tahua moalena idia davaria lasi, bona bema unai dala idia badinaia noho idia be tanobada danu do idia ore hebou. Idia laloaboio lasi, guna idia be Iehova ena “ruma” lalonai idia noho mai edia lauma gaudia namodia momo; unai dainai idia ura idia giroa mai. To, Iehova ese do ia abidia dae, eiava?
LEBULEBU MERONA IA LOU MAI
3 Unai henanadai ena haere be Iesu ena parabole ta ese ia hahedinaraia. Tau ta mai ena natuna memerodia rua ia parabolelaidia. Murinai ia vara tauna ese ena tamana ia noia, ena kohu do ia haria, iena ahuna do ia henia. Bena ia abia murinai ia laolao, tano daudauna dekenai ia lao, unuseniai iena kohu ia lebulebulaia ela bona ia haorea. Unai tano dekenai hitolo bada ia vara neganai, hari tauhau ia ogogami momokani dainai boroma naridia gaukarana ia karaia. Ena be ia ura boroma edia aniani do ia ania, to gwaumaoro idia henia lasi. Ia lalohisihisi bada dainai ia lalo-parara, ia gwau iena tamana ena hesiai taudia edia noho ese iena noho ia hanaia dainai, namona be ia dekenai do ia giroa lou. Ena lalohadai be, ena tamana do ia noia, iena hesiai tauna ai do ia halaoa. (Luka 15:11-19) To unai kara dikadia iboudiai ia karaia murinai, ena tamana ese do ia abia dae lou a? Iehova, inai parabole lalonai tama ese ia laulaulaia, ese unai bamona tauna do ia abia dae lou, a?
4 Iesu ese Iehova ena lalona ia gwauraia hedinarai goevagoeva, ia gwau: “Daudau dekenai ena tamana ese ia itaia, vadaeni ia bogahisihisi henia, ia heau lao, ena aiona dekenai ia rosia, ia kisi henia. To ena natuna ese ia hamaoroa, ia gwau, ‘Egu tamana e, lau be guba biaguna ena vairana dekenai bona oiemu vairana dekenai kerere lau karaia vadaeni, lau be hegeregere lasi oiemu natuna do oi gwauraia.’ To ena tamana ese ena hesiai taudia dekenai ia hamaoroa, ia gwau, ‘Dabua namo herea ta umui mailaia, iena tauanina dekenai umui atoa. Ena imana kwakikwaki gauna bona tamaka danu umui mailaia. Boromakau ena natuna, ubua gauna, umui mailaia, do umui alaia. Do ita aniani, do ita moale hebou. Badina be inai egu natuna ia mase, to ia mauri lou vadaeni, ia boio, to lau davaria vadaeni.’ Vadaeni idia be idia moale hebou.”—Luka 15:20-24.
PARABOLE ENA ANINA BE DAHAKA HARI?
5 Inai parabole lalonai, ia vara guna tauna ese “Dirava ena vara guna natuna taudia” ia laulaulaidia, “edia ladana be guba dekenai idia torea vadaeni.” (Heberu 12:23) Murinai ia vara tauna ese orea idauna ia laulaulaia, unai orea taudia be guba helarona abia taudia edia “orea maragi” lalonai lasi. Lohiabada ena “mamoe idaudia” haida be murinai ia vara tauna hegeregerena. “Mamoe idaudia” haboudia gaukarana be lagani 1935 lalonai ia do hedinarai goevagoeva lasi neganai, taunimanima haida idia diba Iehova be Dirava momokani tamona. Ma idia diba haida ese mauri tanobada dekenai do idia abia, iena Basileia henunai, bona idia gwau lasi idia be “Dirava ena vara guna natuna taudia” edia orea lalonai. Gau tamona, Iehova ena hesiai gaukarana idia karaia lasi, to tanobada gaudia idia tahua goadagoada. Dirava ese ia henidia ‘kohuna’ idia abia, edia nega bona mauri unai, bena sibodia edia ura karadia dekenai idia gaukaralaia. To lagani 1935 lalonai, Iehova ena hesiai taudia be idia diba goevagoeva “hutuma bada herea” be daidia, neganai, murinai ia vara tauna bamona taudia momo be sibodia idia henia mai edia lalona ibounai danu, edia Tamana ena ruma lalonai iena hesiai gaukara do idia karaia totona. Unai be moale negana, Iesu ia parabolelaia negana hegeregerena.
6 Momokani, Iesu be ena parabole lalonai ia hahedinaraia hegeregerena, “orea maragi” taudia haida idia moale lasi, murinai ia vara tauna bamona taudia be idia lou mai neganai. To ena parabole lalonai Iesu ese dala ia kehoa idia edia, Iehova ida do idia moale hebou, kara dika taudia unai bamodia idia helalo-kerehai neganai.—Luka 15:7, 10, 25-32.
7 To unai be lagani 1935 bamona lalonai ia vara negana amo ema, ma haida idia lalo-parara idia danu edia kara haida be unai lebulebu tauna ena hegeregeredia. Iehova ena lauma ruma besena, iena orea, be idia diba goevagoeva, to edia mauri dalana dainai idia be hegeregere “tano daudau” dekenai idia noho bamona. Iehova ena hesiai taudia idia inai henidia lasi, to sibodia edia mauri dalana be Dirava ena Hereva hegeregerena lasi. Reana edia moni gaukara bona sibodia edia kara idia laloa bada, to edia maduna Dirava vairanai bona hari inai nega ena anina bada be idia laloa maragi. Idia haida be kongregesen taudia haida edia kerere dainai idia hekwakwanai, bena idia naria lasi ela bona Iehova ese unai kerere do ia hamaoromaoroa. To inai taudia iboudiai be edena bamona, abidadama ruma besena idia rakatania murinai?
8 Idia haida be gabeai idia lalo-parara lauma dalanai idia ogogami. Idia diba, ena be nega ta ta idia moale, to noho daudau moalena idia davaria diba lasi. Reana idia lalo-parara, edia mauri dalana amo idia be sibodia edia tauanina bona lalona idia hadikaia, bona lauma dalanai dika idia davaria danu. Idia laloa edia mauri be anina lasi, Dirava lasi bona helaro lasi taudia hegeregeredia. (Efeso 2:12) Idia diba, guna idia be Iehova ena “ruma” lalonai idia noho negana sibona ai idia moale. Idia ura idia lou mai. Idia be mai edia ogogami danu do idia noho, ena namo be dahaka? Bema idia naria noho, dika bada herea do idia davaria diba. Bema tanobada idia dogoatao noho, do ia ore neganai do idia mase.
9 To unai bamona taudia be idia giroa mai diba a? Iehova ese ia boiridia mai ena hebogahisi danu, bona ena orea ese ia durudia mai ena lalokau danu. (Sekaria 1:3, 4) Dahaka idia karaia be namo? Iesu ena parabole ese ia hahedinaraia bamona, namona be idia helalo-kerehai, idia giroa mai bona idia gwau idia ese Iehova idia kara dika henia vadaeni. Bema idia be kara dika rohorohodia idia karaia vadaeni, namona be elda taudia vairadiai idia hahedinaraia goevagoeva, unai mauri dalana idia rakatania vadaeni bona edia kara dika dainai idia sori momokani. Namona be idia ura bada Iehova ena hesiai gaukara do idia karaia iena orea lalonai. (Luka 15:18-21; Hereva Lada-isidia 28:13) Bema edia lalohadai korikori be unai, Iehova dekenai idia lou mai neganai, moale bada do idia davaria. (Isaia 55:7) Kingdom Hall dekenai do idia abidia dae lou neganai do idia moale bada, to unai ia hanaia moalena idia abia totona, namona be lauma dalanai idia be sibodia idia haginia lou namonamo.
BADINA AUKANA LATANAI HAGINIA
10 Iehova ena ruma bese dekenai idia giroa mai taudia be Iehova ena kara namodia idauidau idia diba bona ia idia tura henia be gau badana. Namona be idia diba, Iehova ena hahegani iboudiai ese iseda moale idia koua lasi, to ita idia naria, moale karadia mai edia hisihisi gabena ita karaia lasi totona. (Isaia 48:17; Galatia 6:7, 8) Ita ia matahakani henia neganai, unai be ita ia lalokau henia dainai. (Hereva Lada-isidia 3:11, 12) Bema sibona eda stadi ita karaia bena ita stadilaia gaudia bema ita laloa namonamo, bona bema ita guriguri mai iseda lalona ibounai danu bona hebou dekenai ita lao nega iboudiai, unai ese ita ia durua Iehova ita abidadama henia totona, bena iena sisiba do ita tahua, iseda kara iboudiai lalodiai.—Hereva Lada-isidia 3:5, 6.
11 Idia raka boio taudia be reana guna idia diba dahaka be maoro bona dahaka be kerere. To namona be hari idia ese kara dika badu henia karana idia goadalaia. (Salamo 97:10) Unai idia karaia diba totona, namona be diba sibona lasi to lalo-parara danu idia tahua. Anina be Dirava do idia laloa momo. Ita ia hadibaia daladia idauidau ita lalo-pararalaia be namo, bona namona be ita diba iena sisiba ita badinaia negana sibona ai ita ia lalo-namo henia. (Hereva Lada-isidia 4:7; 9:10) Namona be ita lalo-parara gau badana be Iehova ena hahegani be nega ibounai ita badinaia, iseda kara iboudiai lalodiai. (Tito 2:11, 12; 1 Tesalonika 4:7) Danu, harihari ita moalelaia karana ena moale sibona lasi, to ena anina gabena danu ita laloa namonamo be namo. (Hereva Lada-isidia 20:21; 23:17, 18; Heberu 11:24-26 itaia.) Namona be mai iseda lalokau danu ita naria namonamo, iseda hereva o kara amo haida ita hahekwakwanaidia garina.—Roma 15:1, 2.
12 Keristen taudia mai goadadia ai ita lao totona, namona be ita lalo-parara lauma tuarina ta ita tuarilaia noho. Iseda inai tauna badana be Satana, mai ena demoni danu. Dala idauidau amo ita ia veria toho, Basileia gaukarana ita rakatania totona. Ena palani be, ita do ia dibagania, Iehova ena taravatu ita negea bona tanobada taudia ita tohotohodia totona. Taunimanima edia kara korikori be idia ura do idia moale, do idia noho namo bona haida ese do idia lalokau henidia, to Satana ese unai ura ia habadaia o ia hagagevaia ela bona dala kereredia amo edia ura gaudia idia tahua. Inai lauma tuarina lalonai do ita kwalimu dalana tamona be inai: Dirava ese ita ia henia lauma tuari dabuadia iboudiai be do ita gaukaralaia badabada.—Efeso 6:11-18.
13 Iesu ia gwau, bema ia dekenai ita mai bona iena “huaia auna” bema ita huaia, laga-ani do ita davaria. (Mataio 11:29, 30) Ta be “huaia auna” ta ia huaia, anina be hesiai gaukara ia karaia. To bema Iehova ena Natuna hegeregerena iena hesiai gaukara ita karaia, do ita laga-ani momokani, badina be unai gaukara dainai do ita ura kwalimu. Guna ita be kara dika ena hesiai taudia; unai negai, ena be ita diba kara haida be dika bona reana ita ura lasi ita karaia, to ita karaia. (Ioane 8:32, 34-36) Bema iseda Keristen maurina be badina aukana, Iesu Keriso latanai ita haginia, iena dagi badana do ita matauraia bona ia do ita kamonai henia. Ia be ena Tamana ena ura karaia karana ia moalelaia bada. Ita danu be unai bamona do ita karaia. (Ioane 4:34; Salamo 40:8) Dirava ena taravatu do ita badinaia dainai iseda lalona do idia goeva. Sibona eda ura do ita tahua lasi, to henia karana ena moale do ita moalelaia. (Kara 20:35) Iseda mauri ena anina do ia bada. Bona gau badana be inai: Do ita moale, badina be ita diba Iehova ese ita ia lalo-namo henia dainai.—Hereva Lada-isidia 10:22.
[Study Questions]
1. Inai karoa lalonai edena bamona taudia ita gwauraidia?
2. (a) Dahaka dainai Iehova ena orea idia rakatania? (b) Dahaka dainai idia ura idia vareai lou?
3. (a) Unai bamona kara be Iesu ese edena bamona ia parabolelaia? (b) Tamana ese daika ia laulaulaia?
4. Tamana ese ena natuna edena bamona ia abia dae lou?
5. (a) Ia vara guna tauna ese daidia ia laulaulaidia? (b) Ia raka boio tauna ese edena taudia ia laulaulaidia?
6. Unai parabole ena anina ia vara neganai, taunimanima haida ese ia vara guna natuna ena kara edena bamona idia tohotohoa? to orena taudia iboudiai be unai bamona a?
7, 8. (a) Dahaka dainai unai nega murinai ma haida ese Iehova ena ruma bese idia rakatania? (b) Dahaka dainai idia haida idia laloa idia be ia raka boio merona hegeregerena? (c) Dahaka dainai idia lou mai be namo?
9. (a) Dahaka dainai Iehova ia ura unai bamona taudia do idia giroa mai? (Esekiel 18:23) (b) Dahaka idia karaia be namo?
10. (a) Helalo-kerehai taudia ese Iehova ena oda edena bamona idia laloa be namo? (b) Edena bamona idia be Iehova idia tura henia momokani diba?
11. Dahaka dainai namona be guna idia raka boio taudia be (a) kara dika idia inai henia? (b) lalo-parara idia tahua? (c) nega ibounai taravatu idia badinaia? (d) idia karaia gwauraia karadia edia anina idia laloa namonamo? (e) ma haida edia namo idia tahua mai edia lalokau danu?
12. (a) Bema Satana ena palani ita diba, unai ese ita edena bamona ia naria? (b) Do ita kwalimu dalana tamona be dahaka?
13. (a) Laga-ani be edena bamona ita davaria diba? (b) Bema Iesu hegeregerena ita be Iehova ena hesiai gaukara ita karaia, dahaka dainai moale korikori do ita davaria?