Karoa 20
‘Maragina be Bese Badana ai Ia Lao’
NEGA daudau lalonai, Iehova tomadiho henia taudia edia momo ena namba be tanobada taudia oredia edia momo ena namba ese ia hanaia momokani. To hari idia momo daekau haraga dainai, kara maoromaoro ura henia taudia idia moale dikadika. Iehova ese unai ia perovetalaia, ia gwau: “Maragimaragina be 1,000 ai do ia lao, bona maragina be bese badana mai goadana ai do ia lao. Lau, Iehova, be ena nega korikori dekenai do lau haharagaia.” (Isaia 60:22) Unai siri hegeregerena, Iehova sibona ese inai ia havaraia. Edena bamona? Iena hesiai taudia ia hanamodia, bena edia noho be idau vaitani, tanobada besedia edia noho ia hereaia; unai dainai lalo-maoro taudia idia ura bada edia orea lalonai idia vareai.
2 Isaia 60:1, 2 ese inai ia perovetalaia; unai siri lalodiai Iehova ese ena “hahine” ia hereva henia, anina be ena aneru mai edia kamonai bona ena natudia tanobada dekenai, lauma amo ia horodia taudia. Ia gwau: “Hahine e, oi toreisi, diari oi halasia, badina be oiemu diari ia mai vadaeni bona Iehova ena hairai be oi latanai ia hedinarai. Itaia! Dibura ese tanobada do ia koua, bona dibura masemase ese tanobada besedia do ia koudia; to Iehova ese oi do ia hadiaria, bona ia sibona ena hairai be oi latanai do ia hedinarai.” Ia haidaudia gauna be, Mesia Basileiana Iesu Keriso ena imana dekenai be lagani 1914 lalonai ia vara. Unai negai “Iehova ena hairai” ese ena guba oreana ia hadiaria, Basileia ia havaraia oreana unai. Unai dainai idia moale bada. (Apokalupo 12:1, 2, 5, 10-12) Bona Basileia abia taudia oredia tanobada dekenai idia moale danu. Lagani 1919 amo ema, ‘diari idia halasia,’ Dirava ena Basileia ena sivarai namona be tanobada hegegemadai idia harorolaia noho lalonai.—1 Petro 2:9; Mataio 5:14-16.
3 To tanobada besedia edia kara be idau vaitani. Lagani 1914 lalonai, sibodia edia lohia siahuna dogoatao totona idia tuari neganai, dagedage bona gari negana lalonai idia vareai. Unai nega amo ema idia noho namo lasi dainai, taunimanima momo idia lalo-parara, ena be saiens taudia be edia diba idia habadaia lao, to vaira negana namona do idia davaria lasi. Momokani, ‘dibura masemase ese tanobada ia koua.’ Dahaka dainai hahemauri dalana idia davaria diba lasi? Badina be bese iboudiai ese Iehova ena lohia siahuna idia dadaraia. Lohia taudia haida sibodia ese “Dirava” ta idia hanamoa koikoi, to ena ladana idia gwauraia lasi. Idia ura idia sibodia ese tanobada do idia naria, to edia hekwakwanai be taunimanima ese idia kokidia diba lasi. (Ieremia 8:9; Salamo 146:3-6) Inai tanobada mai ena mataganigani bona kara dika, ena “nega dokona” ia ginidae vadaeni. Iena roho mauri dalana be lasi. Dirava ena Basileia idia abidadama henia momokani taudia sibodia be nega vairai idia naria mai edia lalo-goada danu. Lalo-maoro taudia be inai dekenai idia lalo-parara, bona Iehova ena Witness taudia ida Basileia idia herevalaia sibona lasi, to edia haroro herevana ena anina hegeregerena idia noho namonamo toho danu.
‘MARAGIMARAGINA BE 1,000 AI IA LAO’
4 Tanobada Ibounai Tuarina Ginigunana ia ore neganai, Basileia abia taudia gogodia gaukarana ia do ore lasi. Guba Ierusalemana ena “natuna” taudia ma haida idia gogodia be namo, Keriso danu do idia lohia taudia edia namba, 144,000 hahegeregerea totona. To Iehova ese inai gaukara hagugurua negana ia gwauraia, ia gwau: “Oi roharoha, oi itaia! Idia haboudia vadaeni, oi dekenai idia mai vadaeni. Emu natuna memerodia be gabu daudaudia amo idia mai, bona emu natudia kekenidia danu.” (Isaia 60:4) Lagani 1919 amo ema Basileia idia harorolaia dainai, taunimanima daha momo be Iehova idia gwauhamata henia, idia bapatiso bena lauma helaga amo ia horodia. To Basileia abia taudia edia orea be Iesu ese “orea maragi” ia gwauraia. (Luka 12:32) Isaia 60:22 ena hereva hamomokania totona, taunimanima ma haida be tomadiho momokani dekenai idia haboudia be namo. Momokani, unai bamona idia karaia vadaeni!
5 Isaia 55:5 ese inai bamona ia gwauraidia: “Itaia! Oi diba lasi besena do oi boiria, bona oi ia diba lasi besena taudia be oi dekenai do idia heau mai, Iehova, emu Dirava bona Israel ena Helaga Diravana, dainai; badina be ia ese oi ia hahairaia vadaeni.” Inai taudia be lauma Israel murimurina amo. Bese momo amo idia mai, to bese tamona ai idia lao mai edia lalo-tamona; iboudiai ese Dirava ena Basileia idia badinaia. Idia be “bese ta,” lauma Israel orena taudia be unai negai idia diba lasi besena. Unai negai Dirava ena hesiai taudia ese Bible ena siri haida edia anina idia lalo-pararalaia lasi dainai, unai taudia idia lalodia lasi. To unai taudia ese sivarai namona idia kamonai neganai idia ura henia, badina be idia diba inai lauma Israel taudia ese Dirava momokani idia tomadiho henia, bona badina be idia itaia, lauma dalanai idia be mai edia hairai, Dirava ese ia hanamodia dainai.
6 Ena be Satana ese Basileia sivaraina harorolaia gaukarana ia koua toho, bona taunimanima edia lalona ia veria toho, gau idaudia idia laloa totona, to hereva momokani ena diari be tanobada ena gabu daudaudia dekenai ia lao noho. Unai dainai Dirava be gunaguna ena “hahine” ia hamaoroa hegeregerena: “Unai negai do oi itaia, bena emu vairana do ia hairai, bona emu kudouna do ia haragaharaga moale dainai; badina be davara ena anina be oi dekenai do ia mai; bese idauidau edia kohu be oi dekenai do ia mai. . . . Bona Iehova hanamoa herevadia do idia gwauraia.” (Isaia 60:5, 6) Oibe, “hutuma bada herea,” ena be guna idia be Dirava dadaraia taudia edia “davara” lalonai bona tanobada besedia ia koudia ‘dibura masemasena’ ese edia mauri ia hadiburaia, to hari idia be lauma Israel danu idia hebou vadaeni. Dirava ena matana ai idia be bese iboudiai edia kohu namodia.
7 Iehova ena dubu be Ierusalem dekenai idia haginia lou neganai, ia ese ena peroveta tauna Hagai ia hasiahua, inai hereva ia halasia totona: “ ‘Bese iboudiai do lau haheudeheudedia, bena bese iboudiai edia kohu namodia do idia vareai mai; bena inai dubu be hairai amo do lau hahonua,’ tuari oreadia edia Iehova ia hereva.” (Hagai 2:7) Bese iboudiai do ia haheudeheudedia ela bona do ia hadikadia ore, to “bese iboudiai edia kohu namodia” be idia bogaragidia amo do idia gogodia guna, bona Iehova ena lauma dubuna badana lalonai do idia hakaudia vareai. Ia lalonai do idia noho namo, tanobada do ia ore neganai. Inai bamona tomadiho taudia be Iehova ese ia lalodia bada, edia kohu ia ura lasi. (Mika 6:6-8) Iehova idia henia diba gauna mai anina bada be, idia tomadiho henia mai edia lalona ibounai danu. Iena hesiai gaukara idia karaia goadagoada, ‘Iehova hanamoa herevadia idia gwauraia.’ Idia hedinarai dainai, Dirava ena hesiai taudia mai edia kamonai guba ai bona tanobada ai be idia moale bada herea!
8 Inai Iehova tomadiho henia taudia, edia helaro be Paradaiso tanobadana do idia noholaia taudia, do idia momo daekau ela bona idia be hida? Bible ese edia momo ena namba korikorina ia gwauraia lasi, badina be ura taudia iboudiai bese iboudiai amo be Iehova ena hahemauri idia abia diba. To Isaia 60:8 ese ia hahedinaraia do idia momo herea pune hegeregeredia, ia gwau “ori bamona idia heau.” Anina be taunimanima momo herea be nega kwadogina lalonai do idia mai, Iehova tomadiho henia totona. Ia ese ia perovetalaidia, ia gwau inai dala amo lauma Israel ena “maragimaragina be 1,000 ai do ia lao, bona maragina be bese badana mai goadana ai do ia lao,” ma ia gwau, “ena nega korikori dekenai do [ia] haharagaia.” (Isaia 60:22) Vadaeni, unai be momokani ia vara vadaeni, eiava?
9 Lagani 1919 lalonai taunimanima 8,000 sibodia be Basileia idia harorolaia. Lagani 1935 lalonai idia be 60,000 sibodia, tanobada ibounai lalonai. Lagani 1941 lalonai Basileia harorolaia taudia edia momo ese 100,000 ia hanaia. Lagani 1953 lalonai idia be 500,000. Ma lagani 10 murinai idia be milion ta. Lagani 1985 ena dokonai idia be milion toi mai kahana. Dina ta ta iboudiai hora milion ta mai kahana Dirava ena Basileia ena sivarai namona idia harorolaia. Iehova ena Witness taudia be “bese ta,” idia ta ta iboudiai be edia kara amo idia hahedinaraia Iehova ena Mesia ena Basileia idia badinaia. Hoa gauna be inai: Inai “bese” ia bada ia lao noho, bona ena taunimanima edia momo ese tanobada besedia 60 ta ta edia momo ia hanaia. To inai “bese” idauna ese tanobada ena politik ia durua lasi, to Dirava momokani ena hesiai gaukara sibona ia karaia.
10 Inai peroveta herevana ena anina be ma do ia bada ia lao a? Idia vara vadaeni gaudia ese Bible ena hereva idia hagugurua vadaeni. Bona ita hoalaia gaudia haida be inai: Inai gaukara idia karaia taudia be mai edia lalona ibounai danu idia karaia noho lalonai, hekwakwanai gabudia badadia idia hanaia, bona Dirava ese ia hahedinaraia ia hakaudia bona ia hakwalimudia. Danu, inai gaukara ena anina ese taunimanima edia mauri ia haidaua bona ia hanamoa. To Iehova idia badinaia matamaia taudia idia do momo daekau noho. Vanegai laganidia lalodiai, hua ta ta iboudiai 10,000 bamona be bapatiso idia abia. Inai taudia iboudiai, bema edia bapatiso gwauhamatana idia badinaia noho, edia helaro be do idia roho mauri bena “tanobada matamatana” do idia noholaia.
11 Inai taunimanima milion toi mai kahana, ta ta ena lalohadai ena lalohadai hegeregeredia Dirava ena hesiai gaukara idia karaia lasi, to idia be mai edia kamonai danu Iehova ena orea taudia ai idia lao. Ita diba vadaeni hegeregerena, Basileia abia taudia ese edia orea taudia oredia “idia haboudia” guna. Hari, ma taunimanima momo bese iboudiai amo be ‘idia dekenai idia mai noho.’ (Isaia 60:4, 5) Idia be idia danu ‘orea tamona’ lalonai idia lalo-tamona, ‘naria tauna tamona’ henunai. (Ioane 10:16) Aposetolo Petro ese Keristen taudia momokanidia ia gwauraidia “ekalesia varavara tanobada kahana ibounai dekenai.” Bona Paulo ese ia sisiba henidia, idia ta ta be sibona sibona do idia noho lasi, to do idia hebou loulou, bona inai kara do idia habadaia, badina be Dirava ena badu dinana be kahirakahira do ia ginidae dainai. (1 Petro 5:9; Heberu 10:23-25) Inai dala amo idia ese goada bona diba idia davaria, bena inai orea ena gaukara korikori idia karaia diba; inai gaukara ena anina be, Iehova ena ladana idia hanamoa.—1 Petro 2:9; Isaia 12:4, 5.
GAUKARA TA IA NOHO
12 Iehova ena orea lalonai idia vareai taudia iboudiai be idia diba haraga, orea taudia iboudiai be gaukara taudia. Iesu Keriso bamona, idia iboudiai ese Dirava ena Basileia idia harorolaia, unai Basileia amo Iehova ese ena ladana do ia hahelagaia. Iesu ia gwau: “Lau be Dirava ena Basileia ena Sivarai Namo . . . do lau harorolaia, lau ia siaia badina be unai.” (Luka 4:43) Ia ese ma haida ia hadibadia goadagoada, ia gwau namona be Dirava ena ura idia tahua guna, edia mauri lalonai. Ia ese ena hahediba taudia na ia karaia gaukarana karaia dalana ia hadibadia. Iseda nega ia perovetalaia, ia gwau: “Basileia ena Sivarai Namona be tanobada ibounai dekenai do idia harorolaia.” (Mataio 24:14) Hari inai negai inai gaukara ese ma gaukara iboudiai ia hanaia. Badina be dahaka? Badina be ia amo Iehova Dirava ena lohia siahuna maorona ita abia isi, unai lohia siahuna sibona amo, taunimanima iboudiai be namo do idia davaria diba. Inai gaukara ita goadalaia neganai, ita hahedinaraia ita ese Iehova ena hebogahisi bada karana ita laloa bada. Ita ese danu ma haida ita durudia, hisihisi badana amo do idia roho mauri dalana tamona idia davaria totona.—1 Timoteo 4:15, 16.
13 Iehova ena orea lalonai maino idia davaria dainai idia moale bada. Iehova ese Isaia ena amo ia peroveta hegeregerena: “Maino be emu naria taudia ai do lau halaoa bona kara maoromaoro be emu gaukara biagudia ai do lau halaoa.” (Isaia 60:17) Inai maino be gau korikorina, Dirava ena lauma helaga ena huahua ta. To, ena be ta be orea lalonai ia vareai, to inai maino ena mamina do ia abia badabada lasi ela bona ‘maino daladia do ia tahua, bona iena bamona edia abidadama do ia hagoadaia.’ (Roma 14:19) Namona be Dirava ena amo ia mai aonegana ia gaukaralaia, sibona ena lalona biagua totona, bona haida edia kerere idauidau haheaukalaia bona gwauatao totona, ia ura Dirava ese ia do ia kara henia hegeregerena. Oibe, namona be ‘maino ia karaia.’ (Iakobo 3:17, 18; Galatia 5:22, 23; Kolose 3:12-14) Unai bamona idia karaia taudia idia moale bada, badina be inai “bese badana mai goadana,” “moale Diravana,” Iehova ena hesiai gaukara ia goadalaia besena, lalonai idia vareai dainai. (1 Timoteo 1:11, NW) Inai “bese” taudia be Iehova ese do ia hamauridia, Satana ena tanobada taudia edia davana do ia henidia neganai.
[Study Questions]
1. (a) Iehova ia gwauhamata tomadiho momokani taudia be edena bamona do idia momo daekau? (b) Daika ese inai ia havaraia, bona edena dala amo?
2. (a) Isaia 60:1, 2 ai daika ia hereva henia? (b) “Iehova ena hairai” be edena bamona ia hedinarai ia dekenai? (c) Orena taudia ese “diari” edena bamona idia “halasia”?
3. (a) Dahaka dainai lagani 1914 amo ema ‘dibura ese tanobada ia koua’? (b) Unai dika hanamoa dalana tamona be dahaka?
4. Isaia 60:4 hagugurua totona, dahaka gogoa gaukarana idia karaia guna?
5. Isaia 55:5 ese edena bamona ia hahedinaraia orea be ma do ia bada ia lao?
6. Basileia sivaraina idia abia lao ela bona edeseniai, bona dahaka anina namona ia havaraia?
7. Ena peroveta herevana amo Iehova ese edena bamona ia hahedinaraia ia ese orea lalonai idia vareai taudia ia lalodia bada?
8. Bible ese edena bamona ia hahedinaraia, Basileia henunai idia noho gwauraia taudia do idia momo herea?
9. Lagani 1935 amo ema, edena bamona idia momo daekau?
10. (a) Orea ia bada ia lao dalana be dahaka dainai ita hoalaia? (b) Dahaka dainai ita diba orea be ma do ia bada ia lao?
11. (a) Bible ese edena bamona ia hahedinaraia inai taunimanima hutuma bada be orea ta taudia ai idia lao? (b) Inai orea ena gaukara badana be dahaka?
12. (a) Iesu be edena bamona ia hahedinaraia ita ibounai be haroro gaukara ita karaia be namo? (b) Unai gaukara be mai anina bada a, bona badina be dahaka?
13. (a) Isaia 60:17 ia gwau dahaka do ia vara Iehova ena orea lalonai? (b) Unai ena mamina ita abia badabada totona, dahaka ita karaia be namo? (c) Unai bamona idia karaia taudia edia helaro be dahaka?