Karoa 2
Mauri Hanaihanai la Inai Henia Tauna Ta
ENA BE taunimanima iboudiai idia ura moale be tanobada dekenai idia davaria, to idia momo idia lalo-hisihisi. Badina be dahaka? Dahaka dainai, ena be taunimanima momo herea idia ura maino, to bese idauidau idia tuari heheni bona taunimanima idia badu heheni? Reana siahu dikana ta, ita itaia diba lasi gauna, ese tanobada besedia ia biagudia bona ia doridia, unai kara dikadia idia karaia totona, a?
2 Taunimanima momo be unai bamona idia henanadai, taunimanima edia dagedage karadia idia laloa neganai. Badina be tuari lalodiai edia tuari gaudia dikadia amo taunimanima idia alaia mase mai edia dagedage bada danu, momo be dibura kampa dekenai idia hahisidia bada, bona vanegai taunimanima momo herea be Cambodia dekenai idia alaia mase. Unai dika idauidau be idia vara kava a? Taunimanima be sibodia edia lalohadai dikadia bamona kara dika rohorohodia idia karaia diba, to reana siahu dikana ta, ita itaia diba lasi gauna, ese taunimanima ia hakaudia, ani?
3 Bible ese ia hahedinaraia goevagoeva lauma ta mai ena aonega ese taunimanima bona bese iboudiai ia biagudia. Keriso ese inai siahu laumana ia gwauraia “tanobada ena lohia.” (Ioane 12:31; 14:30; 16:11) Ia be daika?
4 Unai ita diba totona, namona be Iesu dekenai ia vara gauna ita laloa. Bible ia gwau, Iesu be bapatiso ia abia murinai ia lao taunimanima idia noho lasi gabuna dekenai, bona unuseniai lauma ta ladana Satana Diabolo ese ia dibagania. Bible ia gwau: “Vadaeni Satani ese ororo bada herea ta ena atai dekenai ia hakaua daekau, tanobada edia basileia ibounai mai edia hairaina danu ia itaia, ia gwau, ‘Bema oiemu kwarana oi atoa diho, bema lau dekenai oi tomadiho, vadaeni inai ibounai be oi dekenai do lau henia.’ ”—Mataio 4:8, 9, HM.
5 Diabolo ese Iesu Keriso ia henia gwauraia gaudia mani oi laloa. “Tanobada edia basileia ibounai” unai. Inai tanobada basileia be momokani Diabolo ena a? Oibe, badina be bema idia be iena lasi, Iesu dekenai ia henia diba lasi ani? Bema idia be Satana ena lasi Iesu ese do ia hakoikoia, to unai bamona ia hereva lasi. Momokani, Satana be tanobada besedia edia biaguna! Bible ia gwau: “Tanobada ibounai be dika tauna ena imana dekenai ia noho.” (1 Ioane 5:19) Bona Bible ese Satana ia gwauraia “inai tanobada ena dirava.”—2 Korinto 4:4.
6 Unai dainai ita diba badina be dahaka Iesu ia gwau: “Lauegu Basileia be inai tanobada gauna lasi.” (Ioane 18:36, HM) Danu, ita diba badina be dahaka ena be taunimanima momo idia ura maino dekenai idia noho to bese idauidau idia badu heheni bona idia hadikaia ore heheni toho. Oibe, “Satana . . . ese tanobada ibounai ia koia.” (Apokalupo 12:9) Ia ura ita danu ia koia. Ia ura lasi Dirava ena harihari gauna mauri hanaihanai ita abia. Unai dainai namona be Satana ena gaukara dalana ita diba bena ena siahu dikana do ita dadaraia diba, kara dika ita karaia totona ita ia veria garina.—Efeso 6:12.
DIABOLO BE DAIKA?
7 Satana Diabolo be lauma korikorina ta. Taunimanima momo idia laloa ia be dika ena siahu sibona, taunimanima iboudiai lalodiai ia noho siahuna, to ia be unai sibona lasi. Taunimanima ese Diabolo idia itaia diba lasi, Dirava idia itaia diba lasi hegeregerena, badina be idia ruaosi be lauma.—Ioane 4:24.
8 To reana haida idia gwau, ‘Bema Dirava be lalokau, dahaka dainai Diabolo ia havaraia?’ (1 Ioane 4:8) To Dirava ese Diabolo ia havaraia lasi. To reana ta do ia henanadai, do ia gwau, ‘Bema Dirava ese ia havaraia lasi, daika ese? Diabolo be edeseni amo ia mai?’
9 Bible ia gwau Dirava ese lauma momo, ia bamona gaudia, ia havaradia, aneru unai. Bible ese ia gwauraidia “Dirava ena natudia.” (Iobu 38:7; Salamo 104:4; Heberu 1:7, 13, 14) Ia havaradia neganai idia iboudiai idia goevadae. Ta be diabolo ta o satana ta lasi. Inai hereva “diabolo” anina be ladana hadikaia tauna, bona inai hereva “satana” anina be tuari henia tauna.
10 To, ena be unai lauma be Dirava ena natudia, to idia ta be sibona na Diabolo ai ia halaoa, Dirava ena ladana ia hadikaia neganai. Sibona na Satana ai ia halaoa danu, badina be Dirava ia tuari henia. Dirava ese ia havaraia neganai ia be unai bamona lasi, to gabeai unai bamona tauna ai ia lao. Iena kara be henao tauna ta ena kara hegeregerena; henao tauna ia vara neganai ia be henao tauna ta lasi. Reana iena tamana sinana bona tadikakana be kara maoromaoro taudia, to ia be moni amo ia hoia diba gaudia ia ura dikadika dainai henao tauna ta ai ia lao. Unai aneru ena kerere be unai bamona.
11 Dirava ese taunimanima ginigunadia ruaosi Adam bona Eva ia havaraia neganai, unai aneru ia noho. (Iobu 38:4, 7) Unai dainai, Dirava ese ia hamaorodia natudia do idia havaraia neganai, ia kamonai. (Genese 1:27, 28) Ia diba gabeai tanobada be kara maoromaoro taudia amo do ia honu bona iboudiai be Dirava do idia tomadiho henia. Dirava ena ura unai. To hari aneru be sibona ena hairai bona diba ia laloa momo dainai ia ura taunimanima ese ia do idia tomadiho henia, edia Dirava bamona. (Esekiel 28:13-15; Mataio 4:10) Unai ura dikana ia negea lasi to ia laloa noho ela bona kara ta ia karaia, hemataurai bona dagi badana ia abia totona. Dahaka ia karaia?—Iakobo 1:14, 15.
12 Unai gwau-edeede aneruna ese gaigai ta ena uduna amo Eva ia hereva henia. Reana Eva ia laloa gaigai sibona ese ia hereva henia, to unai gwau-edeede aneruna, Bible ese ia gwauraia “idau negai gaigaina” gauna, ese ia hereva henia. (Apokalupo 12:9) Ia gwau Dirava ese Eva ia koia bona ia koua noho, diba namona do ia abia garina. (Genese 3:1-5) Unai aneru be unai bamona ia koikoi neganai, Diabolo ai ia lao bona Dirava tuari henia tauna Satana ai ia lao danu. Vadaeni, ena be haida idia laloa Diabolo be mai ena doana rua bona ena imana dekenai foka badana ia dogoatao bona hisihisi gabuna ia naria tano henunai, to unai lalohadai be kerere. Ia be aneru dikana ta mai ena siahu bada.
TANOBADA ENA DIKA IA HAVARAIA
13 Diabolo ese Eva ia koia neganai, ena koikoi ese ena anina ia havaraia. Ena hereva ia abiadae bona Dirava ia gwau-edeede henia. Bena ena adavana ia veria dainai ia danu ese Dirava ena taravatu ia utua. (Genese 3:6) Satana ia gwau, ena be taunimanima ese Dirava ena siahu bona ena heduru idia dadaraia to idia noho namo diba. Ma ia gwau Adam bona Eva edia bese ibounai do ia veria oho diba bena Dirava do idia rakatania.
14 Momokani, unai neganai Dirava ese Satana ia hamasea haraga diba. To unai amo Satana ena hereva ia hakoikoia diba lasi, bona unai kara idia itaia anerudia ese iena hereva do idia laloatao diba. Unai dainai Dirava ese nega ia henia Satana dekenai, ena hereva do ia hamomokania toho totona. Vadaeni, dahaka ia vara?
15 Nega daudau lalonai idia vara vadaeni gaudia ese idia hamomokania, bema Dirava ese taunimanima ia durudia lasi, idia be sibodia idia naria namonamo diba lasi. Taunimanima be sibodia edia gavamani henudiai hisihisi bada idia ania vadaeni. Bible ese ia hahedinaraia Diabolo ese unai gavamani ia biagudia hehuni. Danu, Satana ese ena hereva ia hamomokania diba lasi, taunimanima haida be Dirava ena tomadiho amo ia veridia oho diba lasi. Nega ibounai haida ese Dirava idia badinaia noho. Idia ta be Iobu; ena be Satana ese ia koua toho, to lobu ese Dirava ia badinaia noho.—Iobu 1:6-12.
16 Unai dala amo Dirava ese Diabolo ena hereva ia hakoikoia. Ia hamasea be maoro, badina be ia ese Dirava gwau-edeede henia karana ia hamatamaia. Hari inai nega lalonai Dirava ese Satana ena siahu ia haorea gwauraia dainai tuari badana be guba dekenai ia vara; tanobada taudia ese unai tuari idia itaia lasi bona ena regena idia kamonai lasi. Bible ia gwau:
17 “Bena guba dekenai tuari ia vara: Mikael [Iesu Keriso] mai ena aneru danu ese huala idia tuari henia. Huala mai ena aneru danu idia tuari, to idia lusi, bena edia gabu idia davaria lou lasi guba dekenai. Bena hari huala badana, idau negai gaigaina ma ladana ta Satana, tanobada ibounai ia koia gauna, be idia negea diho tanobada dekenai, bona ena aneru danu ia danu idia negea diho. ‘Guba e, bona guba lalonai umui noho taudia e, unai gau dainai umui moale! Tanobada bona davara, madi! Badina be Satana be umui dekenai ia diho vadaeni, ia badu dikadika, badina be ia diba ena nega be kwadogi.’ ”—Apokalupo 12:7-9, 12.
18 Unai tuari guba lalonai be edena negai ia vara? Lagani 1914 lalonai ia vara, Tuari Badana Ginigunana be tanobada dekenai ia vara laganina unai. Apokalupo ena hereva hegeregerena, unai neganai Satana be guba amo idia negea, bona unai nega amo iena nega kwadogina lalonai ita noho. Anina be ita be Satana ena tanobada ena “dina gabedia” lalodiai ita noho hari. Idia vara gaudia, hegeregere taravatu utua karadia, gari, tuari, hitolo negadia bona gorere dikadia, ese unai idia hamomokania.—Mataio 24:3-12; Luka 21:26; 2 Timoteo 3:1-5.
19 Satana ia diba ena nega kwadogina ia ore gwauraia, unai dainai taunimanima ia koudia toho, Dirava ena ura do idia karaia lasi totona. Ia ura ia mase neganai taunimanima momo be ia danu do idia mase hebou. Bible ia gwau ia be laion ta bamona, do ia ania ore taudia ia tahua. (1 Petro 5:8, 9) Bema ita ura lasi ita ia abia, namona be iena tuari dalana bona ena koikoi dalana ita diba hari.—2 Korinto 2:11.
TAUNIMANIMA IA KOIDIA DALANA
20 Nega momo Satana be hehuni dalanai taunimanima ia koidia, iena ura idia karaia totona. Unai koikoi karana ia diba momo. Nega daudau herea lalonai ia kara hehuni mai ena aonega danu, unai dainai hari inai negai taunimanima momo idia laloa ia noho lasi. Idia laloa kara dikadia idia vara kava bona do idia vara ela bona hanaihanai. Satana be henao taudia edia orea gunalaia taudia bamona, taunimanima vairadiai idia hedinarai kara maoromaoro taudia hegeregeredia, to kara dikadia idia karaia hehuni. Bible ia gwau: “Satana be sibona diari aneruna ai ia halaoa.” (2 Korinto 11:14) Unai dainai taunimanima idia laloa iena koikoi karadia be kerere lasi, nega haida idia laloa unai kara be taunimanima hanamoa karadia.
21 Satana ese Eva ia koia totona, ena turana ta bamona ia hedinarai. Bena ia koia, dala kererena amo sibona ena namo ia tahua totona. (Genese 3:4-6) Hari inai nega danu be unai bamona. Hegeregere, Satana be ena hesiai taudia amo taunimanima ia veridia, sibodia edia gavamani idia laloa bada bona Dirava ena hesiai gaukara idia laloa maragi totona. Unai dainai sibodia edia bese idia heagilaia bona idia tuari. Satana ese danu taunimanima ia koidia, dala idauidau ai maino bona noho namo idia tahua totona. Dala ta be United Nations. To unai dala amo tanobada idia hamainoa a? Lasi vaitani! Ena be Dirava ese dala ia hegaegaelaia vadaeni, Iesu Keriso, “Maino Lohiana,” be iena basileia amo maino do ia havaraia, to Satana ese taunimanima unai bamona ia koidia dainai Dirava ena dala idia laloa lasi.—Isaia 9:6; Mataio 6:9, 10.
22 Mauri hanaihanai ita abia totona, namona be Dirava bona iena Natuna King Iesu Keriso ita diba maoromaoro. (Ioane 17:3) Satana ia ura lasi unai diba oi abia, bona do ia hekwarahi bada oi ia koua totona. Haida edia lalona do ia ania oi idia inai henia totona bona reana oi do idia kirikirilaia. Bible ia gwau: “Keriso Iesu danu Dirava idia ura badinaia taudia iboudiai be do idia dagedage henidia.”—2 Timoteo 3:12.
23 Reana emu turadia o emu varavara ese oi do idia hamaoroa, do idia gwau idia ura lasi Bible ena hereva oi tahua. Iesu Keriso ia gwau: “Bona ruma taudia ese ruma ena biaguna do idia badu henia. Bema tau ta ena tamana o ena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi. O bema tau ta ena natuna mero o ena natuna kekeni ia ura henia bada, to lau be ia ura henia maragi, ia be lau dekenai do ia hegeregere lasi.” (Mataio 10:36, 37, HM) Reana emu varavara ese oi do idia koua toho, badina be Bible ena hereva namodia idia diba lasi. To bema oi idia koua toho neganai Bible stadilaia karana oi hadokoa, Dirava be dahaka do ia laloa oi dekenai? Danu, bema oi manoka, emu turadia bona emu varavara be edena bamona do oi durudia diba, Bible ena hereva idia laloa bada totona? Bema Dirava ena Hereva lalonai oi davaria gaudia oi badinaia noho, reana gabeai idia danu be hereva momokani do idia abiadae, emu kara dainai.
24 Eiava reana Satana ese oi do ia dibagania, kara bodaga ta, Dirava habadua karana ta, oi karaia totona. (1 Korinto 6:9-11) Eiava reana emu lalona do ia ania bena do oi laloa oi bisi momokani dainai emu nega be hegeregere lasi Bible do oi stadilaia. To inai bamona diba ita abia be gau badana, ma gau iboudiai ia hanaia momokani, ani? Namona be gau ta ese oi ia koua lasi inai diba oi abia lasi totona, badina be inai diba ese oi do ia hakaua ela bona mauri hanaihanai be paradaiso lalonai do oi abia, tanobada dekenai!
25 Bible ia gwau: “Diabolo umui koua, bena umui dekenamo do ia heau oho.” (Iakobo 4:7) Anina be oi do ia rakatania vaitani bena oi do ia hahekwarahia lou lasi a? Lasi, oi do ia veria toho loulou, iena ura oi karaia totona. To, bema hanaihanai oi koua, oi do ia veria diba lasi Dirava oi dadaraia totona. Unai dainai, Bible dekenai diba oi tahua goadagoada, bona oi diba gaudia oi badinaia. Unai bamona oi karaia be namo, Satana be ena koikoi dalana ma ta, tomadiho koikoi, amo oi ia koia garina.
[Study Questions]
1. Taunimanima momo be moale bona maino idia davaria lasi dainai, dahaka henanadai idia vara?
2. Dahaka dika idauidau idia vara dainai, momo idia laloa reana ita itaia diba lasi siahuna ese taunimanima ia biagua?
3. Bible ia gwau daika ese tanobada ia lohiaia?
4. Diabolo ese dahaka ia hahedinaraia Iesu dekenai, bona ia hamaoroa dahaka do ia henia?
5. (a) Dahaka ese ia hahedinaraia tanobada ena gavamani iboudiai be Satana ena? (b) Bible ia gwau daika be “inai tanobada ena dirava”?
6. (a) Bema ita diba Satana ese tanobada ia lohiaia, unai diba dainai dahaka dekenai ita lalo-parara? (b) Satana ia ura dahaka ita karaia? Unai dainai dahaka ita karaia be namo?
7. Dahaka dainai Diabolo ita itaia diba lasi?
8. Dahaka dainai taunimanima momo idia laloa Dirava ese Diabolo ia havaraia?
9. (a) Aneru be edena bamona taudia? (b) Inai hereva “diabolo” bona “satana” edia anina be dahaka?
10. (a) Daika ese Satana Diabolo ia karaia? (b) Kara namo tauna be sibona kara dika tauna ta ai edena bamona ia halaoa diba?
11. (a) Gwau-edeede aneruna ta ia diba Dirava ena ura be dahaka? (b) Hari aneru ena ura be dahaka, bona ena ura dainai dahaka ia karaia?
12. (a) Hari aneru ese Eva edena bamona ia hereva henia, bona dahaka ia hamaoroa? (b) Edena dala amo hari aneru be Satana Diabolo ai ia lao? (c) Taunimanima haida ese Diabolo ena toana edena bamona idia laloa kerere?
13. (a) Diabolo ese ia koia neganai Eva be dahaka ia karaia? (b) Diabolo be dahaka ia gwau?
14. Dahaka dainai Dirava ese Satana ia hamasea haraga lasi?
15, 16. (a) Unai nega amo ema bona hari, Satana be ena hereva ia hamomokania diba a? (b) Dirava be kahirakahira dahaka do ia karaia?
17. (a) Bible ese guba dekenai ia vara tuarina edena bamona ia gwauraia? (b) Unai tuari dainai guba taudia be edena bamona, bona tanobada taudia be edena bamona?
18. (a) Unai tuari guba dekenai be edena negai ia vara? (b) Satana idia “negea diho” negana amo, dahaka be tanobada dekenai ia vara?
19. (a) Hari inai nega lalonai Satana ia gaukara goadagoada, dahaka ia karaia totona? (b) Dahaka ita karaia be namo?
20. (a) Satana be edena dala amo ia kwalimu? (b) Dahaka dainai, ena be nega momo taunimanima idia laloa iena kara be kerere lasi, to unai dekenai ita hoa lasi?
21. Satana ese taunimanima ia koidia dalana ta be dahaka? 22. Satana ia ura lasi dahaka diba ita abia?
23. (a) Satana ese iseda turadia bona varavara edena bamona ia gaukaralaia diba, iseda lalona hamanokaia totona? (b) Dahaka dainai oi be hanaihanai oi gini auka be namo, oi idia koua toho neganai?
24. (a) Edena dala ma haida amo Diabolo ese taunimanima ia koudia toho, diba maoromaoro idia abia lasi totona? (b) Dirava ena Hereva oi stadilaia be gau badana eiava?
25. Bema Diabolo ita koua hanaihanai, dahaka do ia karaia diba lasi ita dekenai?
[Picture on page 16, 17]
Bema inai tanobada gavamani iboudiai be Satana ena lasi, Keriso dekenai ia henia diba a?
[Picture on page 19]
Inai henao tauna ia vara neganai ia be kara dika tauna lasi; unai hegeregerena, Diabolo ia vara neganai ia be “diabolo” ta lasi
[Picture on page 20, 21]
Guba dekenai tuari ia vara bena Satana bona demoni be tanobada dekenai idia negea diho. Mamina ita abia hari
[Picture on page 24]
Reana haida ese oi do idia koua toho, Bible oi stadilaia lasi totona