Karoa 9

“Hel”—Momokani la Noho A?

DUBU orea momo idia gwau kara dika taudia be hisihisi do idia ania ela bona hanaihanai, hel ena lahi lalonai. Roman Catholic dubu orea ia gwau hel do ia noho ela bona hanaihanai bona unuseniai idia noho taudia edia hisihisi do ia doko lasi. Protestant dubu orea danu ese unai hereva idia hadibaia. Hindu taudia, Buddhist taudia bona Moslem taudia idia gwau hel be hisihisi ania gabuna. Unai dainai, unai hereva idia abiadae taudia momo idia gwau idia ura lasi hel idia herevalaia badina idia laloa ia be gabu dika rohoroho.

² Henanadai ta be inai: Siahu Ibounai Diravana ese unai bamona gabu ia karaia a? Dirava ena lalohadai be dahaka, Israel taudia ese idia kahirakahira dekenai idia noho besedia edia kara idia tohotohoa bona edia natudia be lahi dekenai idia gabua neganai? Bible lalonai ia gwau: “Tofete dekenai, Hinom ena natudia edia koura dekenai, idia ese atai gabudia helagadia idia haginia, edia natudia memerodia bona kekenidia do idia gabua totona; lau be unai bamona oda lau gwauraia lasi, bona unai bamona lau laloa lasi.”—Ieremia 7:31.

³ Mani inai oi laloa: Bema taunimanima lahi lalonai gabua karana be Dirava ena lalohadai lasi, ia ese hel mai ena lahi ia karaia a, iena ura idia karaia lasi taudia hahisidia totona? Lasi, ani? Bible ia gwau, “Dirava be lalokau.” (1 Ioane 4:8) Lalokau Diravana ese taunimanima do ia hahisidia hanaihanai lasi, ani? Vadaeni, namona be iena Hereva, Bible, lalonai ita tahua, hisihisi gabuna “hel” be momokani ia noho eiava lasi.

SHEOL BONA HADE

⁴ Bible lalonai mase taudia edia gabu idia gwauraia neganai, Heberu gado ai “Sheol” idia torea, bona Greek gado ai “Hade” idia torea. Hegeregere, Salamo 16:10 dekenai “Sheol” idia torea, bona Kara 2:31 dekenai “Hade” idia torea. To unai siri ruaosi be Motu gado ai oi hahegeregerea neganai, ia hedinarai unai hereva ruaosi edia anina be tamona, mase taudia guria gabuna unai. Haida idia gwau mase taudia edia gabu, hel, be hisihisi ania hanaihanai gabuna. To guna Iesu Keriso be unai gabu dekenai ia noho. Anina be Dirava ese Keriso “hel” lalonai ia hahisia a? Lasi vaitani! Iesu ia mase neganai, mase gurina dekenai ia lao, unai sibona.

⁵ Nega ta Iakobo ia taitai badina be ia laloa ena lalokau natuna ia mase, ia gwau: “Lauegu natuna dekenai mase gabunai dohore lau lao, mai tai danu.” (Genese 37:35, HM) Iakobo ena lalohadai be iena natuna ia mase vadaeni bona ia ura ia danu do ia mase. Ia laloa lasi iena natuna be hisihisi gabuna dekenai ia lao hisihisi ia ania ela bona hanaihanai totona, bona ia laloa lasi ia danu be unai bamona gabu dekenai do ia lao bena ruaosi be unuseniai do idia hedavari. Lasi vaitani.

⁶ Oibe, kara namo taudia be mase gabuna (hel) dekenai idia lao. Iobu ese Dirava ia badinaia namonamo. Hisihisi bada ia ania neganai Dirava ia noia do ia durua, ia gwau: “Mase gabuna lalonai mani lau oi hunia, . . . lau dekenai nega oi gwauraia hidi bona lau oi laloatao!” (Iobu 14:13) Mani inai oi laloa: Bema mase gabuna dekenai lahi lalonai hisihisi idia ania, Iobu ia ura unai gabu dekenai ia lao bona unuseniai ia noho ela bona Dirava ese ia laloatao a? Lasi, ani? Iobu ia ura do ia mase, mase gurina dekenai do ia lao bona ena hisihisi do ia ore.

⁷ Bible ese ia hahedinaraia mase gabuna dekenai idia noho taudia idia mauri lasi, kara ta idia karaia lasi bona hisihisi idia ania lasi. Hegeregere, Kohelete 9:10 ia gwau: “Emu imana ia davaria gaukarana oi karaia mai emu goada ibounai danu, badina be oi lao henia gabuna, mase taudia edia gabu, lalonai gaukara ta, lalohadai ta, lalo-parara ta, bona aonega ta be lasi.” Unai ese ia hahedinaraia goevagoeva mase taudia edia gabu be hisihisi gabuna lasi, to ia be mase gurina, kara namo taudia bona kara dika taudia idia lao henia gabuna unai.—Salamo 139:8.

MASE GABUNA RAKATANIA DALANA

⁸ Mase taudia be mase gabuna (hel) idia rakatania diba a? Iona mani oi laloa. Iona ia maloa garina Dirava ese gwarume badana ta ia siaia, bena unai gwarume ese ia hadonoa. Bena Iona be gwarume ena bogana amo ia guriguri, ia gwau: “Mase gabuna lalona amo lau tai, heduru abia totona, bena oi ese lau egu gadona oi kamonai.”—Iona 2:2.

⁹ Iona ena hereva, “mase gabuna lalona amo,” anina be dahaka? Unai gwarume ena bogana be lahi hisihisilaia gabuna lasi. To Iona ena mase gurina ai ia lao diba. Iesu Keriso ia gwau: “Badina be Iona bamona, dina toi hanuaboi toi gwarume badana ena bogana lalonai ia noho, unai bamona Taunimanima ena Natuna danu dina toi hanuaboi toi tano lalonai do ia noho.”—Mataio 12:40, HM.

¹⁰ Iesu ia mase bena dina toi mase gurina lalonai ia noho. To Bible ia gwau: “Dirava be ia rakatania lasi mase taudia edia gabu dekenai . . . Inai Iesu Dirava ese ia hatorea isi vadaeni.” (Kara 2:31, 32, HM) Unai hegeregerena, Dirava ese Iona mase gabuna amo ia hatoreaisi, ena mase gurina bamona gabuna unai. Gwarume ia hereva henia bena Iona ia negea kone dekenai. Oibe, taunimanima ese mase gabuna idia rakatania diba! Momokani, gwauhamata ta Apokalupo 20:13 dekenai ese iseda lalona ia hamoalea, ia gwau: “Mase bona Mase Gabuna danu ese idia lalodiai idia noho taudia idia henidia dae.” Dubu orea edia hereva be idau vaitani!

GEHENA BONA LAHI GOHUNA

¹¹ To reana haida be unai hereva idia abiadae lasi, idia gwau: ‘Bible ese hel ena lahi bona lahi gohuna ia herevalaia. Anina be hisihisi gabuna ta ia noho, ani?’ Momokani, Bible ta Hiri Motu gado ai idia torea ese “hel ena lahi” ia gwauraia, ma ia gwau hel dekenai “lahi . . . ia bodo diba lasi.” (Mataio 18:9; Mareko 9:45, 46, HM) Unai siri lalodiai unai hereva “hel” be Greek hereva ta “Gehena” amo idia hanaia. Edena bamona—Hade ena anina be mase gurina sibona, to Gehena be lahi lalonai hisihisi ania gabuna, a?

¹² Ia hedinarai goevagoeva, Heberu hereva “Sheol” bona Greek hereva “Hade” edia anina be mase gurina. Vadaeni, Gehena ena anina be dahaka? Taravatu Gunana lalonai Gehena idia gwauraia “Hinom kourana.” Hinom kourana be Ierusalem kahirakahira dekenai, unuseniai Israel taudia ese edia natudia lahi lalonai idia bouboulaidia. Gabeai, pavapava namona King Iosia ese unai koura ia hadikaia, unai kara koua totona. (2 Hanua Pavapavadia 23:10) Bena momoru negea gabuna ai idia halaoa.

¹³ Unai dainai, Iesu be tanobada dekenai ia noho neganai Gehena be Ierusalem ena momoru negea gabuna. Salfa idia negea danu, unai amo lahi ia araia hanaihanai bona momoru ia haorea vaitani. Buka ta ia gwau: “Ia be hanua ena momoru negea gabuna, taravatu utua taudia edia mase tau-anidia, bona boroma edia mase tau-anidia, bona miro gaudia iboudiai, unuseniai idia negedia.” To mauri gaudia be unuseniai idia negedia lasi.

¹⁴ Nega ta Iesu ese tomadiho gunalaia taudia dikadia ia gwau henidia, ia gwau: “Gaigai e! Koria gaigai edia natudia! Gehena ena hahemaoro amo edena bamona do umui heau diba?” (Mataio 23:33) Ierusalem noho taudia be edia hanua ena momoru negea gabuna idia diba dainai, Iesu ena hereva ena anina dekenai idia lalo-parara. Idia diba Dirava ese unai gunalaia taudia lahi lalonai do ia hahisidia lasi, badina be Dirava ia hereva vadaeni Israel taudia be edia natudia unuseniai idia gabua be iena lalohadai lasi! Iesu ese Gehena ia parabolelaia anina be unai gabu dekenai idia lao taudia do idia mase ore ela bona hanaihanai, do idia toreisi lou lasi. Iesu ena hereva idia kamonai taudia idia lalo-parara Gehena dekenai idia lao taudia do idia ore ela bona hanaihanai, momoru bamona.

¹⁵ Vadaeni, “lahi gohuna,” Apokalupo ese ia gwauraia gauna, be dahaka? Ena anina be Gehena ena anina hegeregerena. Anina be hisihisi ania gabuna lasi, to anina be mase hanaihanai. Apokalupo 20:14 ia gwau: “Bona Mase bona Mase Gabuna be lahi gohuna lalonai idia negedia. Unai be mase iharuana, lahi gohuna.” Oibe, lahi gohuna anina be “mase iharuana,” unai mase amo do idia toreisi lou lasi. Ita diba unai “gohu” ese gau ta ia laulaulaia, badina be unai siri ia gwau mase bona mase gabuna be ia lalonai idia negedia. Lahi korikori ese unai gau ruaosi ia araia diba lasi, to Dirava ese ia haoredia diba, bona unai bamona do ia karaia.

¹⁶ To reana ta ia gwau ‘To Bible ia gwau Diabolo do idia hahisia ela bona hanaihanai, lahi gohuna lalonai.’ (Apokalupo 20:10) Anina be dahaka? Idau negai, dibura ruma naria taudia idia gwauraidia “hahisia taudia.” Iesu ese tau ta ia parabolelaia, ia gwau: “Ena biaguna ia badu dikadika, bena do idia hahisia taudia dekenai ia henia, ela bona ena abitorehai davana do ia haorea.” (Mataio 18:34) “Lahi gohuna” lalonai idia negedia taudia be “mase iharuana” lalonai idia vareai bona idia toreisi lou diba lasi. Unai be hegeregere mase ena dibura rumana lalonai idia koudia bena dibura ruma naria taudia ese idia naridia ela bona hanaihanai. To do idia hahisidia lasi, badina be idia ore vaitani bona gau ta idia diba lasi.

KOHU MOMO TAUNA BONA LASARO

¹⁷ Ena parabole ma ta lalonai Iesu ia gwau: “Noinoi tauna ia mase, vadaeni aneru ese ia abia, Aberahamo ena kemena dekenai ia abia lao. Kohu momo tauna danu ia mase, vadaeni idia guria. Mase gabuna dekenai ia hisihisi noho neganai, ena matana ia negea daekau, daudau dekenai Aberahamo ia itaia, Lasaro danu be ena kemena dekenai.” (Luka 16:19-31, HM) Anina be dahaka? Ita diba vadaeni mase gabuna (hel) be hisihisi gabuna lasi, to ia be taunimanima edia mase gurina; unai dainai ita diba Iesu ena hereva be parabole ta. Mase gabuna (hel) bona guba edia padana be daudau dainai, lalodiai idia noho taudia idia hereva heheni diba lasi, ani? Danu, bema kohu momo tauna be lahi gohuna korikorina dekenai ia noho, Abraham ese Lasaro edena bamona ia siaia diba, ranu sisina amo ena malana ia hakerua totona? Dala be lasi ani? Vadaeni, Iesu ena parabole ena anina be dahaka?

¹⁸ Kohu momo tauna ese tomadiho gunalaia taudia ia laulaulaidia, idia hekokoroku dainai Iesu idia dadaraia bona idia hamasea taudia unai. Lasaro ese ladana maragi taudia ia laulaulaidia, Dirava ena Natuna idia abiadae taudia unai. Kohu momo tauna bona Lasaro edia mase ese edia mauri ia haidaua gauna ia laulaulaia. Unai gau ia vara, Iesu ese Lasaro bamona taudia ia hadibaia neganai, badina be unai neganai Abraham Badanat Iehova Dirava, ese idia ia abiadae. Unai neganai tomadiho koikoi gunalaia taudia idia “mase” bamona, badina be Dirava ese ia dadaraidia. Hisihisi bada idia ania, Keriso badinaia taudia ese edia kara dikadia idia hahedinaraia neganai. (Kara 7:51-57) Vadaeni, inai parabole ese ia hahedinaraia lasi mase taudia haida ese hisihisi idia ania lahi gabuna korikorina ta dekenai.

DIABOLO AMO HAHEDIBA HEREVADIA

¹⁹ Diabolo ese Eva ia hamaoroa, ia gwau: “Dohore umui mase lasi.” (Genese 3:4, HM; Apokalupo 12:9) To ia mase vadaeni,. ena kahana ta ia mauri noho lasi. Mase murinai lauma ia mauri noho herevana be hereva koikoi ta, Diabolo ese ia halasia. Ena hereva koikoi ma ta be kara dika taudia be hel o pegatori lalonai hisihisi idia ania. Unai hereva be koikoi, badina be Bible ese ia hahedinaraia mase taudia be gau ta idia diba lasi, bona unai bamona hereva ta be Bible lalonai ia hedinarai lasi.

²⁰ Ita davaria vadaeni mase taudia edia gabu, hel, be edia mase guridia sibona. Unuseniai kara namo taudia bona kara dika taudia idia laga-ani ela bona do idia toreisi lou. Danu, Gehena be hisihisi gabuna lasi, to ena anina be Dirava ese haida do ia haoredia ela bona hanaihanai. Unai hegeregerena, “lahi gohuna” be lahi gabuna korikorina ta lasi, to “mase iharuana” ia laulaulaia, unai mase amo do idia toreisi lou lasi. Ia be hahisia gabuna lasi, badina be Dirava ese unai bamona gabu ia lalohadailaia lasi. Danu, bema ta be tanobada dekenai ia noho negana kwadogina lalonai ia karaia kara dikadia dainai ia hahisia ela bona hanaihanai, unai be maoro lasi. Inai hereva momokani ese gari bona hereva koikoi amo ita ia ruhaia.—Ioane 8:32.

[Study Questions]

1. Dubu orea momo edia hadibaia hereva hel dekenai be dahaka?

2. Dirava ena lalohadai be dahaka, natudia lahi lalonai gabua karana dekenai?

3. Bema ta ia laloa Dirava ese taunimanima lahi lalonai ia hahisidia, dahaka dainai iena lalohadai be maoro lasi bona Bible ena hereva hegeregerena lasi?

4. (a) Bible ese edena bamona ia hahedinaraia Sheol bona Hade edia anina be tamona? (b) Iesu be nega ta mase taudia edia gabu dekenai ia noho, unai dainai dahaka ita diba?

5, 6. Iakobo bona Iosef bona Iobu edia sivarai ese edena bamona idia hahedinaraia mase taudia edia gabu hel be hisihisi ania gabuna lasi?

7. (a) Mase gabuna dekenai idia noho taudia be edena bamona? (b) Unai dainai mase taudia idia noho gabuna (Sheol bona Hade) be dahaka?

8, 9. Badina be dahaka Iona be gwarume ena bogana lalonai ia noho neganai ia gwau ia be mase gabuna lalonai ia noho?

10. (a) Dahaka ese ia hahedinaraia mase taudia edia gabu dekenai idia noho taudia be Dirava ese unai gabu amo do ia kokidia? (b) Dahaka danu ese ia hahedinaraia “mase gabuna” anina be “mase gurina”?

11. Edena Greek hereva ma ta, Bible lalonai ia hedinarai, Motu gado ai idia hanaia neganai “hel” idia torea?

12. Gehena be dahaka, bona dahaka idia karaia unuseniai?

13. (a) Iesu ena nega lalonai Gehena be edena bamona gabu? (b) Dahaka be unuseniai idia negea lasi?

14. Dahaka ese ia hahedinaraia Gehena be Dirava ese do ia haoredia ela bona hanaihanai taudia edia mase ia laulaulaia?

15. “Lahi gohuna” be dahaka, bona dahaka ese unai ia hamomokania?

16. Inai hereva, Diabolo be “lahi gohuna” lalonai do idia hahisia ela bona hanaihanai, anina be dahaka?

17. Dahaka dainai ita diba kohu tauna bona Lasaro edia sivarai be parabole sibona?

18. Unai parabole lalonai, inai edia anina be dahaka: (a) kohu momo tauna? (b) Lasaro? (c) edia mase? (d) kohu momo tauna ena hisihisi?

19. (a) Diabolo ese edena hereva koikoi ia halasia? (b) Dahaka dainai ita diba pegatori herevana be koikoi?

20. (a) Inai karoa ese dahaka ia hadibaia ita dekenai? (b) Inai diba ese oi edena bamona ia durua?

[Box on page 83]

Heberu hereva “Sheol” bona Greek hereva “Hade” edia anina be tamona

Buka Helaga

Salamo 16:10

Aposetolo edia Kara 2:31

31 Una dainai e diba guna herevana e gwauraia, Keriso ena tore isi lou herevana, ia na mase taudia edia gabu ai basine noho, bona tau-anina basine pata.

[Picture on page 84, 85]

lona be gwarume ta ese ia hadonoa murinai dahaka dainai ia gwau: ‘Mase gabuna amo lau tai’?

[Picture on page 86]

Gehena be koura ta Ierusalem murimuri dekenai. Mase hanaihanai ia laulaulaia gauna idia gwauraia