Sivarai Namona Idia Harorolaia Daladia

KERISTANI taudia ese hahegani idia abia ‘bese ibounai be diba tahua taudia ai do idia halaoa,’ to namo lasi taunimanima idia doria eiava edia tomadiho haidaua totona idia veria. Iesu ese ia abia gaukarana be ‘ogogami taudia dekenai sivarai namona do ia harorolaia,’ ‘kudouna idia makohia taudia do ia hanamoa lou,’ bona ‘taitai taudia ibounai do ia durua bona hagoadaia.’ (Mataio 28:19; Isaia 61:​1, 2; Luka 4:​18, 19) Iehova ena Witnes taudia ese Baibel ena sivarai namona harorolaia karana amo unai idia karaia toho. Idaunegai peroveta tauna Esekiela bamona, hari inai negai Iehova ena Witnes taudia idia gaukara goada, ‘kara dika rohoroho ibounai dainai idia taitai noho bona idia lalohisihisi noho taudia’ idia davaria totona.​—Esekiela 9:4.

Hari idia vara kara dikadia dainai idia lalohisihisi taudia idia davaria dalana badana be ruma-ta-ruma-ta gaukarana amo. Unai dala ai taunimanima idia davaria totona idia gaukara goada, Iesu be “hanua badadia bona hanua maragidia edia lalonai ia haroro loaloa, Dirava ena Basileia ena Sivarai Namona ia harorolaia” neganai ia karaia bamona. Iena hahediba taudia ginigunadia be unai idia karaia danu. (Luka 8:1; 9:​1-6; 10:​1-9) Hari, bema ia hegeregere, Iehova ena Witnes taudia be lagani iboudiai lalonai nega momo ruma ta ta dekenai idia vadivadi lou, idia ura miniti haida lalonai ruma tauna ida edia gabu dekenai eiava tano ma haida dekenai taunimanima idia laloa gauna ta eiava idia lalo-hekwarahilaia gauna ta idia herevalaia. Reana Baibel siri ta eiava rua idia herevalaia, bona bema ruma tauna ia ura, Witnes tauna ese dala do ia karaia nega namona ta ai do idia herevahereva lou totona. Baibel bona Baibel idia herevalaia bukadia idia hahedinaraia danu, bona bema ruma tauna ia ura, davana lasi Baibel stadi idia karaia diba. Tanobada hegegemadai taunimanima ta ta eiava ruma bese ida unai Baibel stadi namodia milioni momo idia karaia.

Ma haida dekenai “Basileia ena Sivarai Namona” idia harorolaia dalana ma ta be Kingdom Hall dekenai idia karaia heboudia amo. Witnes taudia ese pura iboudiai unuseniai hebou idia karaia. Hebou ta lalonai, taunimanima idia laloa bada gauna ta ia hahedinaraia herevana idia henia, ia murinai Baibel ena hereva ta eiava peroveta herevana ta be Gima Kohorona magasin amo idia stadilaia. Hebou ma ta be sikuli ta, Witnes taudia idia hadibaia sivarai namona idia harorolaia namonamo totona, bona ia murinai edia teritori ai idia karaia haroro gaukarana idia herevalaia. Danu, pura iboudiai nega tamona, Witnes taudia be grup maragidia ai ruma ta ta dekenai idia hebou, Baibel stadi idia karaia totona.

Taunimanima be unai hebou iboudiai lalonai idia vareai diba. Moni do idia gogoa lasi. Iboudiai ese unai hebou amo namo idia abia diba. Baibel ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” Sibona eda stadi ita karaia bona diba ita tahua be mai anina bada, to ma haida ida ita hebou ese eda laloa dalana ia habadaia: “Tau ta ese ma tau ta dekena amo, diba ia davaria noho, auri ta ese ma auri ta ia segea noho bamona.”​—Heberu 10:​24, 25; Aonega Herevadia 27:17.

Danu, Witnes taudia ese dina ta ta gaudia idia karaia lalonai taunimanima idia davaria bona dala ia kehoa neganai, sivarai namona idia herevalaia toho. Reana dekena tauna eiava basi o peleini ai idia helai hebou tauna dekenai hereva haida idia gwauraia, reana turana ta eiava varavara ta ida idia herevahereva sisina, eiava aniani negana ai gaukara turana ida idia herevahereva. Iesu be tanobada ai ia noho neganai, unai be ia haroro dalana badana​—kone dekenai ia raka, ororo ai ia helai, ta ena ruma dekenai ia aniani, headava aria dekenai ia noho, eiava Galilea Kourana dekenai bouti ia guia neganai ia haroro. Dubu idauidau bona Ierusalema ena dubu badana dekenai ia hadibaia. Herevana edeseniai ia noho, dala ia davaria Dirava ena Basileia ia herevalaia totona. Iehova ena Witnes taudia be iena aena gabudia dekenai idia raka toho.​—1 Petero 2:21.

EDIA HAHEITALAI AMO IDIA HARORO

Unai dala idauidau ai oi dekenai sivarai namona idia herevalaia be anina lasi bema haroro tauna ese ia hadibaia gaudia ia badinaia lasi. Tau ta ese gau ta ia herevalaia to ma gau ta ia karaia be koikoi karana, bona tomadiho koikoi karadia dainai taunimanima milioni momo ese Baibel idia dadaraia. To unai be Baibel ena kerere lasi. Taravatu hadibaia taudia bona Farisea taudia dekenai Heberu Revarevadia idia noho, to Iesu ia gwau idia be koikoi taudia. Ia gwau Mose ena Taravatu idia duahia, bena ena hahediba taudia dekenai ma ia gwau: “Do idia hereva henia gaudia be do umui badinaia, bona do umui karaia. To idia karaia bamona do umui karaia lasi. Badina be idia hereva, to idia karaia lasi.” (Mataio 23:3) Keristani tauna be ena mauri amo haheitalai namona ia hahedinaraia ena namo ese hora momo ia haroro ena namo ia hereaia. Unai be Keristani hahinedia, edia adavadia be abidadama lasi taudia, dekenai idia hahedinaraia: “Sedira edia lalona do idia giroa, bona Dirava do idia abidadama henia. Unai bamona do idia karaia, badina be emui kara goevagoeva . . . idia itaia.”​—1 Petero 3:​1, 2.

Unai dainai, sivarai namona ese taunimanima edia lalona ia veria totona Iehova ena Witnes taudia ese inai dala idia gaukaralaia: edia kara amo ma haida dekenai idia herevalaia Keristani kara idia haheitalaia. ‘Idia ura taunimanima ese idia dekenai do idia karaia gauna be idia ese taunimanima dekenai idia karaia’ toho. (Mataio 7:12) Witnes taudia, turadia, dekena taudia, eiava varavara sibona dekenai unai idia karaia toho lasi, to taunimanima iboudiai dekenai. Idia be goevadae lasi dainai, nega haida idia kwalimu lasi. To mai edia kudouna ibounai ida idia ura taunimanima iboudiai dekenai namo idia karaia, idia dekenai Basileia ena sivarai namona idia harorolaia karana amo sibona lasi, to dala ia kehoa neganai heduru idia henia karana amo danu.​—Iamesi 2:​14-17.

[Picture on page 19]

Hawaii

[Picture on page 19]

Venezuela

[Picture on page 19]

Yugoslavia

[Pictures on page 20]

Kingdom Hall namodia be Baibel herevalaia gabudia

[Pictures on page 21]

Witnes taudia ese edia ruma bese lalonai bona taunimanima ma haida idia bamoa neganai, idia herevalaia gaudia idia badinaia toho