Timoteo Ia Ura Taunimanima Ia Durua

Timoteo be ia matamata neganai, ia ura bada ma haida do ia durua. Gabu momo dekenai ia loaloa ma haida ia durua totona. Unai dainai, ia ese ena mauri ia moalelaia bada. Oi ura iena mauri sivaraina do oi dibaia, a?​—

Timoteo be siti ta ladana Lusitera dekenai ia tubu. Ia maragi neganai, iena tubuna Loi bona sinana, Eunike, ese ia dekenai Iehova ena dala idia hadibaia. Timoteo ia bada neganai, ia ura ma haida dekenai Iehova ena dala ia hadibaia.

Timoteo be do matamata neganai, Paulo ese ia noia ia do ia bamoa gabu ma haida dekenai idia haroro totona. Timoteo ia haere: ‘Oibe!’ Ia be ia noho hegaegae do ia lao ma haida ia durua totona.

Timoteo be Paulo ida Makedonia ena siti ladana, Tesalonika dekenai idia lao. Unuseniai idia lao totona, idia be gabu daudau idia raka ela bona bouti abia gabuna dekenai idia ginidae. Unuseniai, idia ese taunimanima momo dekenai Iehova ena dala idia hadibaia. To, taunimanima haida be idia badu, bona idia ura Timoteo bona Paulo idia dagedage henia. Unai dainai, Paulo bona Timoteo ese Tesalonika idia rakatania bona gabu ma haida dekenai idia lao haroro.

Hua haida murinai, Paulo ese Timoteo ia noia Tesalonika dekenai do ia giroa lou bona tadikaka do ia sekea. Oibe, Timoteo be unai dagedage hanuana dekenai ia giroa lou totona, ia lalogoada be mai anina bada! To, Timoteo be unai hanua dekenai ia lao badina unuseniai idia noho tadikaka ia laloa bada. Paulo dekenai ia giroa neganai, sivarai namona ia mailaia. Tesalonika tadikaka be idia goada noho!

Timoteo be lagani momo Paulo ia bamoa. Nega ta Paulo ia gwau Timoteo be tau maorona ia ese do ia siaia kongrigeisen idauidau ia hagoadaia totona. Timoteo ese Iehova bona taunimanima ia lalokau henidia.

Taunimanima oi lalokau henidia bona oi ura idia dekenai Iehova ena dala oi hadibaia, a?​— Bema oibe, oi ese emu mauri do oi moalelaia bada, Timoteo bamona!