Emu Hesiai Gaukara Habadaia Daladia

IESU ese ena hahediba taudia be Basileia harorolaia totona ia siaidia neganai, ia gwau: “Uma aniani gogoa gaukarana be bada, to gaukara taudia be momo lasi.” Gaukara bada ia do noho, unai dainai ma ia gwau: “Gogoa gaukara ena Biaguna umui noia, ia ese gaukara taudia do ia siaia iena aniani idia gogoa totona.” (Mat. 9:37, 38) Iesu ese ena hahediba taudia dekenai haroro gaukara karaia dalana ia hadibaia. Iena hereva lalonai karaharaga lalohadaina ia hahedinaraia, ia gwau: “Israela ena siti bona hanua ibounai lalonai emui haroro gaukara umui do haorea lasi neganai, taunimanima ena Natuna do ia ginidae.”​​—Mat. 10:23.

² Hari danu, haroro gaukara ai gaukara bada herea ia do noho. Dokona ia do mai lasi lalonai Basileia ena sivarai namona ita harorolaia be namo, badina nega be lasi! (Mar. 13:10) Uma ese tanobada ia laulaulaia dainai, iseda gaukara be Iesu bona ena hahediba taudia edia gaukara ida ia hegeregere, to iseda gaukara ena bada ese edia ia hereaia. Tanobada taudia bilioni momo ese iseda namba ia hereaia momokani, to ita diba Iehova ese ita do ia durua. Basileia ena sivarai namona be tanobada ibounai dekenai do idia harorolaia, bona Iehova ena nega korikori ai dokona do ia ginidae. Iseda hesiai gaukara hagugurua totona eda mauri lalonai Dirava ena Basileia do ita atoa guna, a? Unai ita karaia totona, edena tiokratik tahua gaudia ita atoa?

³ Iesu ese Iehova ena ura iena gwauhamata hesiai taudia dekenai be inai bamona ia herevalaia: “Iehova emu Dirava do oi lalokau henia mai emu kudouna ibounai, mai emu mauri ibounai, mai emu lalona ibounai, bona mai emu goada ibounai ida.” (Mar. 12:30) Dirava ia ura mai kudouna ibounai ida ia ita hesiai henia. Anina be Dirava ita badinaia karana bona iseda gwauhamata hahedinaraia totona, Iehova ena hesiai gaukara ita karaia goadagoada. (2 Tim. 2:15) Dala haida idia noho, ita ta ta eda noho dalana bona diba hegeregerena unai ita karaia totona. Mani unai dala haida ita laloa, bena ita abia hidi edena tiokratik tahua gaudia do ita karaia eda hesiai gaukara habadaia totona.

KONGRIGEISEN PABLISA

⁴ Hereva momokani idia abia dae taudia ibounai edia hahenamo be sivarai namona do idia harorolaia. Unai gaukara be Iesu ese ena hahediba taudia dekenai ia henia. (Mat. 24:14; 28:19, 20) Iesu Keriso ena hahediba tauna be sivarai namona ia dibaia neganai, ma haida dekenai ia herevalaia. Andrea, Filipo, Korenelio, bona ma haida be unai bamona idia karaia. (Ioa. 1:40, 41, 43-45; Kara 10:1, 2, 24; 16:14, 15, 25-34) Anina be ta ia do bapatiso lasi neganai ma haida dekenai sivarai namona ia harorolaia diba, a? Oibe! Kongrigeisen lalonai ta be bapatiso lasi pablisa ai ia lao neganai, ruma-ta-ruma-ta haroro gaukara ia karaia diba. Danu, ena diba bona noho dalana hegeregerena, hesiai gaukara ma haida ia karaia diba.

⁵ Pablisa ta ia bapatiso murinai, ia be nega bona goada do ia henia ma haida ia durua sivarai namona idia dibaia totona. Tatau bona hahine ese haroro gaukara idia karaia diba. Dirava ena Basileia gaukara ena kahana maragina ta ita durua be hahenamo badana. Ena hesiai gaukara ia habadaia diba bona maduna ma haida ia huaia tauna be do ia moale bada.

PABLISA MOMO LASI GABUNA DEKENAI HARORO

⁶ Reana emu kongrigeisen ena teritori be nega momo umui karaia bona taunimanima ibounai umui haroro henia vadaeni. Bema unai bamona, reana emu hesiai gaukara habadaia totona, do oi ura pablisa momo lasi gabuna dekenai oi lao. (Kara 16:9) Bema oi be elda o hesiai tauna ta, kongrigeisen ma ta ese emu heduru do ia ura. Emu sekit naria tauna ese emu sekit lalonai ia noho kongrigeisen ta durua dalana do ia gwauraia hedinarai diba. Bema oi ura emu tano ena gabu ta dekenai hesiai gaukara oi karaia, brens ofesi ese heduru herevadia haida idia henia diba.

⁷ Oi ura idau tano dekenai hesiai gaukara oi karaia, a? Bema oibe, namona be unai oi lalohadailaia namonamo guna. Emu kongrigeisen ena elda taudia danu umui herevalaia hebou be namo. Gabu idauna ta lao karana ese oiemu mauri bona oi idia bamoa taudia edia mauri do ia haidaua momokani. (Luka 14:28) To bema oi ura nega sisina sibona do oi noho, emu tano ena hanua ma ta dekenai oi lao be namo.

⁸ Tano haida dekenai, maduna idia huaia tadikaka be lagani momo lalonai unai maduna idia do huaia lasi. Unai tano ai idia manau tadikaka ese kongrigeisen gunalaia gaukarana be tano ma ta amo ia mai elda tauna mai ena ekspiriens idia henia. Bema oi be elda ta bona oi ura unai bamona tano ta dekenai oi lao, namona be oi laloatao oi lao ena badina be unai tano ai idia noho tadikaka edia maduna abia totona oi lao lasi. To idia ida oi gaukara hebou totona. Idia oi durua idia gaukara goada kongrigeisen ena maduna ma haida idia huaia totona. (1 Tim. 3:1) Bema oi itaia gau haida be emu tano dekenai idia karaia hegeregerena idia karaia lasi, oi haheauka be namo. Emu elda gaukara ai oi davaria ekspiriens oi gaukaralaia idia oi durua totona. Bona bema nega ta emu tano dekenai do oi giroa lou, unai tano ai idia noho elda taudia be do idia hegeregere kongrigeisen idia naria totona.

⁹ Brens ofesi ese do oi durua diba kongrigeisen edia ladana be oi dekenai idia do henia lasi neganai, emu Kongrigeisen Hesiai Komiti ese oi totona brens ofesi dekenai revareva ta do idia siaia. Ena be oi be elda ta, hesiai tauna ta, painia ta, eiava pablisa ta, to unai revareva idia siaia be namo. Hesiai komiti ese gwaumaoro revarevana bona oiemu revareva be oi ura hesiai gaukara do oi karaia tanona ena brens ofesi dekenai do idia siaia lao.

IDAU GADO AI HARORO

¹⁰ Emu hesiai gaukara oi habadaia totona, reana do oi ura gado ma ta oi dibaia, sain gado danu. Bema emu tahua gauna be gado ma ta ai oi haroro totona, elda taudia bona sekit naria tauna oi hereva henia be namo. Oi dekenai heduru daladia bona hagoadaia herevadia idia henia diba. Brens ofesi ena hakaua henunai, sekit haida be gado ta dibaia sikuli idia karaia, unai amo idia hegeregere pablisa bona painia taudia dekenai treinini idia henia gado ma ta ai idia haroro totona.

PAINIA GAUKARA

¹¹ Namona be pablisa ibounai ese heduru, regula, bona spesel painia gaukara, eiava ful-taim hesiai gaukara ma haida totona do idia badinaia gaudia idia diba namonamo. Namona be painia tauna be haheitalai namona bapatiso Keristani tauna ta bona ia hegeregere sivarai namona harorolaia gaukarana dekenai painia hora ia hagugurua totona. Kongrigeisen Hesiai Komiti ese heduru bona regula painia ena aplikeisen dekenai gwaumaoro idia henia, to brens ofesi ese spesel painia taudia ia abia hidi.

¹² Heduru painia taudia be edia noho dalana hegeregerena hua tamona, hua haida, eiava hua momo lalonai idia gaukara diba. Basileia harorolaia taudia momo be Memorial negana eiava sekit naria tauna ena vadivadi hua ai heduru painia idia karaia. Haida be holidei negadiai idia heduru painia. Idia do sikuli bapatiso pablisa be edia sikuli holidei negana ai heduru painia gaukara idia karaia diba. Pablisa haida be March bona April eiava sekit nari tauna ia vadivadi neganai hora 30 lalonai heduru painia gaukara idia karaia. Emu noho dalana hegeregerena, bema emu kara be ia goeva, unai hora oi hagugurua diba bona bema oi diba hua ta eiava haida lalonai heduru painia oi karaia diba, elda taudia be mai moale ida unai hesiai gaukara namona totona emu aplikeisen pepana do idia laloa.

¹³ Bema oi ura regula painia oi karaia, lagani ta ta ai haroro gaukara totona idia makaia hora oi abia be namo. Oi be regula painia ta dainai, hanaihanai emu kongrigeisen ida oi gaukara hebou be namo. Idia haroro goadagoada painia taudia be hahenamo ta kongrigeisen dekenai, idia ese haroro gaukara urana idia habadaia bona ma haida idia hagoadaia painia gaukara idia karaia totona. Regula painia totona aplikeisen oi do atoa lasi neganai, namona be oi be haheitalai namona pablisa ta bona hua 6 oi bapatiso vadaeni.

¹⁴ Spesel painia be regula painia taudia amo idia abia hidi bona idia be edia haroro gaukara idia karaia namonamo taudia. Brens ofesi ese idia siaia gabudia ai hesiai gaukara idia karaia diba. Nega momo pablisa lasi gabudia bona kongrigeisen matamatadia idia haginia diba gabudia dekenai idia siaia. Nega haida spesel painia taudia be edia teritori idia karaia hanaihanai lasi kongrigeisen dekenai idia siaia lao. Spesel painia taudia haida be elda taudia dainai, idia siaia kongrigeisen maragidia idia durua totona herevana inai teritori be maragi haroro gaukara karaia totona. Spesel painia taudia be tauanina dalanai heduru totona moni sisina idia abia. Idia haida be temporari spesel painia idia karaia.

MISINARI TAUDIA

¹⁵ Hakaua Oreana ena Hesiai Komiti ese misinari taudia idia abia hidi, bena do idia noho tanona ena Brens Komiti ese taunimanima momo idia noho gabudia dekenai idia siaia lao. Edia gaukara goada karana ese haroro gaukara bona kongrigeisen ia durua bada. Nega momo misinari taudia be Basileia Evanelia Sikuli dekenai treinini idia abia. Idia dekenai noho gabuna idia henia bona tauanina dalanai heduru totona moni sisina idia abia.

SEKIT GAUKARA

¹⁶ Hakaua Oreana ese ia abia hidi sekit gaukara do idia karaia taudia be sekit naria tauna durua gaukarana amo treinini bona ekspiriens idia abia guna. Unai bamona tadikaka ese hesiai gaukara bona edia Keristani tadikaka idia lalokau henia. Idia be gaukara goadagoada painia taudia, Baibel stadilaia namonamo taudia, hereva namonamo bona hadibaia taudia namodia. Idia ese lauma huahua idia hahedinaraia, gau ibounai idia karaia namonamo, laloa maoromaoro bona laloa kehoa idia hahedinaraia. Bema tadikaka be ia headava, namona be ena painia adavana be ena kara bona ma haida kara henia dalana dekenai ia be haheitalai namona. Ia be haroro goadagoada hahinena. Danu ena tau ena kwara dagina ia matauraia, ena tau totona do ia hereva lasi eiava ena tau ena herevahereva karana do ia koua lasi. Sekit naria taudia bona edia adavadia edia sediual be bisi momokani dainai, namona be unai hesiai gaukara idia ura karaia taudia edia tauanina ia goada bona gorere be lasi. Painia taudia be sekit gaukara totona aplikeisen do idia atoa lasi. To, sekit naria tauna dekenai edia ura sekit gaukara totona idia hahedinaraia diba, bena ia ese heduru herevadia do ia henia.

TIOKRATIK SIKULIDIA

¹⁷ Basileia Evanelia Sikuli: Basileia evenelia gaukara do idia karaia taudia momo idia noho be namo, unai amo ita haroro momo lasi teritori do idia karaia bona kongrigeisen do idia durua. Unai dainai, singul tadikaka taihu bona headava taudia ese Basileia Evanelia Sikuli totona aplikeisen idia siaia diba. Sikuli murinai, idia gradueit taudia be edia tano dekenai idia siaia lao, pablisa lasi gabudia dekenai regula painia idia karaia totona. To, hesiai gaukara ma haida idia karaia diba taudia ese edia tano o tano ma ta dekenai hesiai gaukara ma haida idia karaia diba. Haida sibona be temporari eiava fultaim spesel painia gaukarana do idia karaia. Unai sikuli idia ura lao painia taudia be unai sikuli ena hebou dekenai idia lao diba, unai be Rijinol hebouhebou ena nega ai idia karaia, unai amo do idia karaia gaudia idia dibaia diba.

¹⁸ Gilead Sikuli: Unai sikuli totona idia abia hidi singul tadikaka taihu o headava taudia be English gado idia diba bona idia be spesel ful-taim hesiai gaukara idia karaia taudia. Idia ese haroro gaukara bona Betele haheaua dalana idia durua diba. Idia hahedinaraia idia ura edia tadikaka totona idia gaukara bona ma haida idia durua Dirava ena Hereva bona tiokratik dalana idia dibaia bona badinaia totona. Brens Komiti ese idia hegeregere taudia idia noia edia aplikeisen idia atoa totona. Sikuli idia haorea taudia be idia siaia tano ma ta eiava edia tano ai haroro gaukara eiava brens ofesi gaukara idia durua totona.

BETELE GAUKARA

¹⁹ Betele gaukara be hahenamo badana ta. Inai ladana Betele anina be “Dirava ena Ruma,” bona unai be maoro badina unuseniai tiokratik gaukara idia karaia. Betele ai idia gaukara tadikaka bona taihu ese Baibel pablikeisen idauidau idia printaia, hahanaia bona hariharilaia. Hakaua Oreana dekenai edia gaukara be mai anina bada, idia ese tanobada hegegemadai idia noho kongrigeisen idia naria bona hakaua dalana idia henia. Betele ai idia gaukara gado hahanaia taudia momo be edia brens teritori ai edia gado idia herevalaia gabudia ai idia noho bona idia gaukara. Unai amo dina ta ta ai idia hahanaia gado idia kamonaia diba. Danu do idia diba bema idia hahanaia pablikeisen be taunimanima ese idia lalopararalaia eiava lasi.

²⁰ Betele ena gaukara momo be nega bona goada bada do oi gaukaralaia. Unai dainai Betele dekenai idia boiria taudia be gwauhamata bapatiso matamata taudia, gorere lasi bona tauanina be ia goada. Bema emu gabu dekenai Betele taudia ma haida idia tahua bona oi ura unuseni ai oi gaukara, namona be emu kongrigeisen ai idia noho elda taudia oi itaia diba ma haida abia totona.

KONSTRAKSEN GAUKARA

²¹ Tiokratik rumadia haginia gaukarana be gaukara helagana ta, Solomona ena dubu haginia gaukarana hegeregerena. (1 Kin. 8:13-18) Tadikaka bona taihu momo be mai ura bada ida unai gaukara totona edia nega, moni bona kohu idia gaukaralaia.

²² Oi hegeregere oi heduru totona, a? Bema oi bapatiso vadaeni bona oi ura unai gaukara oi karaia, konstraksen gaukara idia naria tadikakdia be mai moale ida emu heduru do idia abia dae bona bema unai gaukara oi diba lasi, mai moale ida oi do idia hadibaia. Namona be elda taudia oi hadibaia oi ura unai gaukara oi durua. Bapatiso pablisa haida be idia hegeregere tano ma haida ai konstraksen gaukara dekenai idia volantia, tiokratik rumadia idia haginia totona.

²³ Konstraksen gaukara idauidau oi durua diba. Hegeregere bema bapatiso pablisa be konstraksen gaukara haida ia diba, ia ese Local Design/Construction volantia tauna ai ia lao diba bona ia kahirakahira idia noho projek haida lalonai heduru ia henia diba. Haida be gabu daudau ai nega sisina sibona projek haida idia durua diba bona brens ofesi ese idia ia abia hidi wiki rua ia lao hua toi lalonai konstraksen volantia gaukara idia durua totona. To idia abia hidi nega daudau konstraksen gaukara do idia durua taudia be idia gwauraia konstraksen hesiai taudia. Konstraksen gaukara durua totona, tano ma ta amo ia mai tauna be idia gwauraia expatriate konstraksen hesiai tauna. Konstraksen hesiai taudia bona konstraksen volantia taudia idia gaukara hebou Konstraksen Grup ta idia karaia bona idia ese projek ta ta idia hakaua bona Local Design/Construction volantia taudia bona kongrigeisen amo idia mai volantia taudia ida idia gaukara hebou. Konstraksen Grup be brens ta ena teritori henunai idia noho projek ta ta dekenai heduru idia henia totona.

EMU TAHUA GAUDIA BE DAHAKA?

²⁴ Bema emu mauri be Iehova dekenai oi gwauhamatalaia vadaeni, oi hahedinaraia oi ura Iehova do oi hesiai henia ela bona hanaihanai. To, Dirava oi hesiai henia totona emu tahua gaudia be dahaka? Bema Dirava hesiai henia totona tahua gaudia oi atoa, oi do ia durua emu goada, moni bona kohu do oi gaukaralaia namonamo totona. (1 Kor. 9:26) Unai tahua gaudia ese oi do idia durua Iehova ena orea lalonai oi tubu bona hesiai gaukara ma haida oi tahua lalonai mai anina bada gaudia do oi laloa noho diba.​—Fili. 1:10; 1 Tim. 4:15, 16.

²⁵ Dirava hesiai henia karana dekenai aposetolo Paulo be haheitalai namona. (1 Kor. 11:1) Paulo be Iehova ena hesiai gaukara ia karaia goadagoada. Ia laloparara Iehova ese ia dekenai hahenamo momo ia henia. Korinto tadikaka dekenai ia gwau: “Lau dekenai gaukara ena iduara badana ia kehoa vadaeni.” Ita dekenai unai be momokani, ani? Oibe, Basileia ena sivarai namona harorolaia totona, kongrigeisen lalonai Iehova hesiai henia daladia momo idia kehoa. To Paulo dekenai, unai “iduara badana” dekenai ia vareai totona, “inai taudia be momo.” (1 Kor. 16:9) Paulo ia ura sibona ia biagua. Mani ena hereva ita laloa, ia gwau: “Egu tauanina lau botaia bona igui hesiai tauna bamona lau hakaua.” (1 Kor. 9:24-27) Ita danu be unai lalohadai ita abia, a?

²⁶ Ita ta ta idia hagoadaia iseda mauri dalana hegeregerena eda tiokratik tahua gaudia ita hagugurua be namo. Momo be idia do maragi neganai tiokratik tahua gaudia idia atoa dainai hari idia ese ful-taim hesiai gaukara idia karaia. Idia do maragi neganai edia tama sina bona ma haida ese idia durua unai idia karaia totona. Unai dainai, Iehova ena hesiai gaukara lalonai mai moale ida gaukara namodia idia karaia bona idia lalohisihisilaia lasi. (Aon. 10:22) Ful-taim hesiai gaukara sibona lasi, to wiki ta ta ai ita haroro, Baibel stadi ita hamatamaia bona karaia noho o hebou gaudia ita hegaegaelaia totona tahua gaudia ita atoa danu. Gau badana be ita gini goada bona eda hesiai gaukara ita hagugurua namonamo. Bema unai ita karaia, Dirava do ita hanamoa bona eda tahua gauna badana​​—Iehova hesiai henia hanaihanai karana​​—do ita hagugurua.​​—Luka 13:24; 1 Tim. 4:7b, 8.