Tomadiho Gabudia

IEHOVA tomadiho henia taudia momokanidia be ia haganidia do idia hebou, unai amo hadibaia hereva idia abia bona idia hagoadaia heheni. (Heb. 10:23-25) Dirava ena abia hidi besena, Israela taudia, edia tomadiho gabuna ginigunana be “palai dubu.” (Eso. 39:32, 40) Gabeai, Davida ena natuna Solomona ese ruma ta, o dubu ia haginia Dirava hanamoa totona. (1 Kin. 9:3) Lagani 607 B.C.E. ai unai dubu be idia hadikaia murinai, Iuda taudia ese dubu maragidia ladana sinagoga ai Dirava idia tomadiho henia totona. Gabeai, dubu badana idia haginia lou, bona tomadiho momokani gabuna ai ia lao. Iesu ena hadibaia gaukara be sinagoga bona dubu helaga lalonai ia karaia. (Luka 4:16; Ioa. 18:20) Danu, Iesu be ororo ai hebou ia abia.​​—Mat. 5:1​—7:29.

² Iesu ia mase murinai, Keristani taudia be pablik gabudia bona edia ruma ai idia hebou Baibel idia herevalaia bona edia tadikaka ida edia hebamo karana idia moalelaia totona. (Kara 19:8, 9; Roma 16:3, 5; Kol. 4:15; File. 2) Nega haida, Keristani ginigunadia be taunimanima idia noho lasi gabudia ai idia hebou, dagedage taudia ese idia davaridia lasi totona. Oibe, idaunegai Dirava ena abidadama hesiai taudia be mai edia ura ida tomadiho gabudia ai idia hebou “Iehova ese [idia] do ia hadibaia” totona.​​—Isa. 54:13.

³ Hari danu, pablik gabudia bona ruma idia gaukaralaia Keristani heboudia idia karaia totona. Nega momo tadikaka edia ruma ai haroro heboudia idia karaia. Edia ruma be unai bamona hebou totona idia henia taudia idia laloa unai be hahenamo ta. Momo idia mamia unai kara ese edia abidadama ia hagoadaia.

KINGDOM HALL

⁴ Kingdom Hall be Iehova ena Witnes taudia edia hebou gabuna badana. Nega momo, gabu idia hoia bona Kingdom Hall matamatana idia haginia o gunana idia hanamoa. Kongrigeisen haida be Kingdom Hall tamona idia gaukaralaia unai amo moni bada idia nega kava lasi bona hebou gabudia idia gaukaralaia diba. Gabu haida ai, ruma ta idia rentaia diba. Kingdom Hall matamatadia idia haginia o gunadia dekenai hanamoa gaukara badana idia karaia ore murinai, idia hahelagaia be maoro. To bema Kingdom Hall ta dekenai hanamoa gaukara sisina idia karaia, do idia hahelagaia lasi.

⁵ Namo lasi Kingdom Hall mai edia herahera gaudia momo ita haginia taunimanima vairanai ita heagi totona. Ena be gabu ta ta ai Kingdom Hall edia toana be idauidau, to ibounai be tomadiho totona idia gaukaralaia. (Kara 17:24) Gabu ta ena noho dalana hegeregerena, namona be Kingdom Hall be gabu namona bona taunimanima ibounai idia lao diba Keristani heboudia idia karaia totona.

⁶ Iehova ena Witnes taudia edia kongrigeisen ibounai ese kontribusen idia atoa Kingdom Hall gaukaralaia, haheaua o hanamoa totona. Moni idia gogoa o noia lasi. Kontribusen maua ta idia atoa unai amo hebou totona idia mai taudia ese kontribusen idia udaia diba Kingdom Hall ena gaukara haida durua totona. Unai be mai kudouna ibounai ida bona sibona edia ura hegeregerena idia karaia.​​—2 Kor. 9:7.

⁷ Kongrigeisen taudia ibounai ese Kingdom Hall durua totona kontribusen moni idia henia bona hagoevaia eiava naria gaukara dekenai idia volantia be hahenamo badana. Unai gaukara ia vara totona elda o hesiai tauna ta ese sediual do ia karaia. Hanaihanai, hagoevaia gaukara be haroro grup ta ta ese idia karaia, bona grup naria tauna o ena durua tauna ese unai gaukara ia gunalaia. Namona be Kingdom Hall lalonai bona murimuri ai ena toana ese idia hahedinaraia unai be Iehova ena ruma bona ena orea.

⁸ Bema kongrigeisen momo ese Kingdom Hall tamona idia gaukaralaia, unai kongrigeisen edia elda ese Kingdom Hall Naria Komiti ta do idia haginia, idia ese Kingdom Hall bona ena gabu idia naria totona. Unai kongrigeisen ta ta edia elda oreadia ese tadikaka ta do idia abia hidi Kingdom Hall naria komiti ena kodineita gaukara ia karaia totona. Kingdom Hall Naria Komiti be elda oreadia henunai do idia gaukara, idia ese Kingdom Hall hagoevaia gaukara do idia naria bona do idia sekea bema gau ibounai be idia namo bona hagoevaia bona toileti kohudia idia noho. Unai ia vara totona kongrigeisen iboudiai idia gaukara hebou be namo.

⁹ Bema Kongrigeisen haida be Kingdom Hall tamona idia gaukaralaia, lagani ta ta ai hebou negadia idia haidaua be namo. Elda taudia ese sediual idia karaia totona, namona be ma haida edia namo idia laloa bona lalokau dalanai idia karaia. (Fili. 2:2-4; 1 Pet. 3:8) Kongrigeisen tamona ese kongrigeisen ma haida totona disisen do ia karaia lasi. Bema sekit naria tauna ese kongrigeisen ta ia vadivadi henia, Kingdom Hall idia gaukaralaia kongrigeisen ma haida ese unai wiki ai edia hebou ena nega idia haidaua be namo.

¹⁰ Kongrigeisen Hesiai Komiti ena gwaumaoro amo Kingdom Hall idia gaukaralaia diba wedin bona fineral tok idia karaia totona. Unai elda taudia ese tadikaka edia noinoi gauna do idia laloa namonamo bona brens ofesi ese idia henia hakaua herevadia hegeregerena disisen do idia karaia.

¹¹ Unai gaudia totona Kingdom Hall do idia gaukaralaia ena gwaumaoro idia abia taudia ese edia kara do idia naria namonamo, badina unai be tomadiho momokani gabuna. Namo lasi Kingdom Hall ai ia vara karana ta ese kongrigeisen taudia ia hahekwakwanaia eiava Iehova bona kongrigeisen edia ladana namona ia hadikaia. (Fili. 2:14,15) Brens ofesi ena hakaua henunai, Kingdom Hall be tiokratik gaukara ma haida totona idia gaukaralaia diba, hegeregere Basileia Hesiai Gaukara Sikuli bona Painia Gaukara Sikuli.

¹² Namona be hanaihanai kongrigeisen taudia ese edia hebou gabudia idia matauraia. Namona be edia dabua, edia toana, bona edia kara amo idia hahedinaraia idia be Iehova idia tomadiho henia. (Had. 5:1; 1 Tim. 2:9, 10) Unai sisiba ita badinaia neganai, ita hahedinaraia iseda Keristani heboudia ita laloa bada.

¹³ Hebou idia heau namonamo be gau badana. Maragidia be edia tama sina danu idia helai be namo. Edia natudia idia do maragi tama sina be tadikaka taihu edia kamonai karana do idia hadikaia lasi gabuna ta ai idia helai be namo, unai amo edia natudia dekenai sisiba henia totona eiava gau ta ia vara neganai, kara haraga murimuri ai idia abia lao diba.

¹⁴ Idia hegeregere maduna idia huaia tadikaka be Kingdom Hall ai hebou negadiai atendan gaukara idia karaia. Namona be idia noho hegaegae, hereva namonamo bona laloa maoromaoro karana idia hahedinaraia. Edia maduna be nega ginigunana Kingdom Hall idia mai taudia do idia hanamoa, welkam henidia, idia leiti taudia totona helai gabuna do idia tahua, idia mai taudia edia namba do idia torea, bona do idia itaia bema Kingdom Hall be ia siahu eiava ia keru momokani. Danu, namona be tama sina ese edia natudia idia naria namonamo, namo lasi hebou ia heau lalonai eiava ia ore murinai idia heau loaloa eiava platfom ai idia gadara. Mai hebogahisi bona aonega ida atenden tauna ese ia gwau-edeede natuna ena tama sina do ia noia edia natuna idia abia raka-lasi totona, unai amo idia mai taudia edia kamonai karana do ia hadikaia lasi. Bema atendan ena gaukara ia karaia namonamo, ibounai ese hebou idia moalelaia diba. Namona be elda bona hesiai taudia ese atendan gaukara idia karaia.

KINGDOM HALL KONSTRAKSEN

¹⁵ Aposetolo edia negai, Keristani taudia haida be taga taudia bona ma haida be lasi, unai dainai Paulo be ia gwau: “Umui dekenai idia noho gau momo amo edia dabu gaudia do umui henia bona idia dekenai idia noho gau momo amo emui dabu gaudia do idia henia, vadaeni idia bona umui be do umui hegeregere.” (2 Kor. 8:14) Hari inai negai, unai ‘hegeregerena’ ia vara. Tanobada hegegemadai kongrigeisen ibounai ese idia henia kontribusen idia gaukaralaia Kingdom Hall idia haginia bona hanamoa lou totona. Iehova ena orea bona kongrigeisen taudia ese tanobada hegegemadai tadikakadia edia kontribusen amo namo idia abia karana idia laloa bada.

¹⁶ Gabu ta ta ena bada hegeregerena, brens ofesi ese Kingdom Hall ta ta dekenai kongrigeisen idia atoa. Danu brens ofesi ese edia brens teritori dekenai edena gabu ai bona edena nega ai Kingdom Hall matamata bona hanamoa gaukaradia do idia karaia idia gwauraia hedinarai. Disasta idia vara neganai, dala idia karaia idia dika Kingdom Hall idia hanamoa bona nega haida tadikaka edia ruma idia hanamoa danu.

¹⁷ Brens ofesi ese volantia taudia idia gaukaralaia tano idia hoia, Kingdom Hall idia disain, gavamani ena gwaumaoro pepadia idia abia, haginia bona hanamoa gaukara idia karaia totona. Tano momo ai Kingdom Hall momo haginia totona gaukara be bada dainai, volantia momo idia gaukaralaia. Idia hegeregere unai gaukara idia ura durua bapatiso pablisa taudia ese aplikeisen fom ta do idia hahonua bona edia Kongrigeisen Hesiai Komiti dekenai idia henia. Danu, bapatiso lasi pablisa taudia ese Kingdom Hall karaia bona hanamoa gaukara idia durua diba.

ASSEMBLY HALL

¹⁸ Nega momo Keristani ginigunadia be grup maragidia ai idia hebou. To nega haida “hutuma” idia hebou. (Kara 11:26) Unai hegeregerena hari inai negai sekit bona rijinol hebouheboudia ai, Iehova ena taunimanima be hutuma idia hebou. Nega momo unai heboudia totona ruma badadia idia rentaia, to bema unai bamona gabudia be lasi, idia ese tomadiho gabuna, ladana Assembly Hall idia gaukaralaia.

¹⁹ Nega haida, ruma ta idia hoia, idia hanamoa, bona Assembly Hall ai idia halaoa. To, nega momo, tano idia hoia bona ruma matamata ta idia haginia. Assembly Hall edia bada be idauidau, unai gabu ta ta edia bada hegeregerena. Unai bamona ruma ta haginia totona ena davana idia laloa namonamo bona do idia gaukaralaia moni idia dibaia murinai, brens ofesi ese disisen do idia karaia bema unai ruma do idia hoia o haginia diba.

²⁰ Brens ofesi ese tadikakadia ia abia hidia Assembly Hall gaukaralaia dalana bona hanamoa gaukarana idia naria totona. Danu, dala idia karaia sekit ta henunai idia noho kongrigeisen ibounai ese Assembly Hall do idia hagoevaia hegeregere, lagani ta ta ai nega rua do idia hagoevaia bona hanamoa gaukara haida idia karaia totona. Tadikakadia ese inai gaukara totona idia volantia be namo. Unai dainai, kongrigeisen hagoadaia unai gaukara be mai edia kudouna ibounai ida do idia karaia.​​—Sal. 110:3; Mal. 1:10.

²¹ Nega haida, Assembly Hall be tiokratik gaukara ma haida totona idia gaukaralaia diba, hegeregere, Baibel sikuli bona sekit taudia edia hebou totona. Kingdom Hall hegeregerena, Assembly Hall be tomadiho totona idia hahelagaia. Assembly Hall dekenai ita hebou neganai, namona be iseda kara, dabua, bona toana ese Iehova ena ladana ia hanamoa.

²² Inai nega dokona ena dina gabedia ai, kamonai taudia momo be kara haraga idia ura Dirava ena orea idia bamoa. Unai be Iehova ena hahenamo ia hahedinaraia. (Isa. 60:8, 10, 11, 22) Unai dainai, ita ura Iehova tomadiho henia gabudia namodia haginia bona hagoevaia karana ita durua. Unai bamona ita karaia neganai, ita hahedinaraia unai rumadia ita laloa bada bona dala ia kehoa ta ta ita hagoadaia heheni diba badina Iehova ena dina be ia kahirakahira noho.