Iseda Gabu Bona Tanobada Hegegemadai Basileia Gaukara Durua

IESU ese nega dokona ia perovetalaia neganai, ia gwau, Iehova ena Witnes taudia ese sivarai namona be “tanobada ena daudau momokani gabudia dekenai” do idia harorolaia. (Kara 1:8; Mat. 24:14) Unai idia karaia totona, mai edia ura ida edia nega bona goada idia henia hereva momokani be ma haida dekenai idia harorolaia totona. Idia abia dae Iehova ese ena hesiai taudia do ia naria dainai, edia mauri lalonai hanaihanai Dirava ena Basileia idia atoa guna. (Mat. 6:25-34; 1 Kor. 3:5-9) Idia havaraia anina namona ese ia hahedinaraia Iehova ese edia hekwarahi ia abia dae bona ia hanamodia.

TANOBADA HEGEGEMADAI BASILEIA GAUKARANA KARAIA

² Momo idia itaia iseda Baibel bona Baibel pablikeisen be davana lasi bona taunimanima dekenai ita henia neganai, idia henanadai: “Edena bamona unai umui karaia diba?” Momokani, Baibel bona Baibel pablikeisen printaia bona karaia be mai ena davana. Danu, printa gaukara idia karaia hesiai taudia, haroro gaukara idia naria taudia, bona ma dala haida ai sivarai namona idia harorolaia taudia edia noho gabudia bona Betele rumadia haginia bona hanamoa be mai ena davana. Danu, sekit naria taudia, misinari, spesel painia, bona ful-taim hesiai taudia ma haida ese edia hesiai gaukara idia karaia noho totona, tauanina dalanai heduru idia henia. Ia hedinarai goevagoeva, hari inai negai moni bada herea idia gaukaralaia iseda gabu ai eiava tanobada hegegemadai sivarai namona idia harorolaia totona. Unai moni be edeseni amo ia mai?

³ Iehova ena Witnes taudia ese idia karaia Baibel hadibaia gaukarana idia laloa bada taudia momo be mai moale ida tanobada hegegemadai gaukara durua totona kontribusen moni idia henia. To, iseda gaukara be Iehova ena Witnes taudia sibona ese idia durua, idia haida be brens ofesi dekenai kontribusen idia siaia. Idia be guna Dirava ena hesiai taudia ese Iehova tomadiho henia gabuna haginia totona mai edia ura bada ida edia moni bona kohu idia henia karana idia tohotohoa. (Eso. 35:20-29; 1 Siv. 29:9) Harihari gaudia haida be estates amo idia abia hegeregere, tano, ruma, kohu o moni, to ma haida be taunimanima ta ta amo, kongrigeisen bona sekit ta ta amo bona nega momo unai moni be bada lasi. Unai harihari gaudia idia haboua bona gaukaralaia hesiai gaukara idia karaia noho totona.

⁴ Iehova ena Witnes taudia dekenai edia moni bona kohu idia gaukaralaia haroro gaukara idia durua karana be hahenamo ta. Iesu bona ena hahediba taudia ese moni mauana ta idia abia bona unai moni amo edia dabu gaudia idia hoia. (Ioa. 13:29) Baibel ese ita ia hadibaia hahine haida ese Iesu bona ena hahediba taudia idia hesiai henia. (Mar. 15:40, 41; Luka 8:3) Aposetolo Paulo be mai moale ida sivarai namona harorolaia gaukarana idia laloa bada bona unai gaukara idia ura karaia taudia ese mai lalokau danu idia henia harihari gaudia ia abia dae. (Fili. 4:14-16; 1 Tes. 2:9) Iehova ena Witnes taudia ese idaunegai idia karaia hesiai gaukarana bona harihari karana idia badinaia. Unai amo, gabu ibounai dekenai kudou maoro taudia ese davana lasi “mauri ranuna” idia abia diba.​​—Apok. 22:17.

ISEDA GABU AI IDIA NOHO KONGRIGEISEN DURUA

⁵ Gabu ta ta ai idia noho kongrigeisen edia dabu gaudia danu be kontribusen moni amo idia hoia. Moni idia gogoa lasi, o ta idia hamaoroa lasi moni hida do ia henia bona ta idia noia lasi moni ia henia totona. Kontribusen mauadia be hebou gabudia ai idia atoa unai amo “ta ta ese edia kudouna ai idia laloa vadaeni gauna hegeregerena do idia henia” diba.​​—2 Kor. 9:7.

⁶ Kongrigeisen ese idia atoa kontribusen be Kingdom Hall haheaua bona naria totona idia gaukaralaia guna. Elda oreana ese moni haida be Iehova ena Witnes taudia edia brens ofesi dekenai idia siaia diba tanobada hegegemadai ena gaukara durua totona. Unai ia vara totona kongrigeisen be gwaubou ta do idia karaia. Unai dala amo, kongrigeisen momo be hanaihanai kontribusen idia henia tanobada hegegemadai gaukarana durua totona. Kingdom Hall haheaua bona naria totona moni do ita gaukaralaia dainai namona be kontribusen ita atoa, unai amo kontribusen totona hadibaia hereva do idia gwauraia loulou lasi.

KONTRIBUSEN GAUKARALAIA DALANA

⁷ Hebou ta ta murinai, tadikaka rua ese kontribusen mauadia amo moni do idia kokia bona rekodia. (2 Kin. 12:9, 10; 2 Kor. 8:20) Elda oreana ese dala do idia karaia unai moni idia naria ela bona brens ofesi dekenai do idia siaia o kongrigeisen ena dabu gaudia do idia hoia. Akaun ia naria tadikaka be hua ta ta ai akaun ripoti ta ia karaia kongrigeisen hadibaia totona, bona elda orea ena kodineita ese dala do ia karaia hua toi murinai kongrigeisen ena akaun idia sekea totona.

SEKIT DURUA MONI

⁸ Sekit hebouhebou bona hebouhebou ma haida idia karaia totona idia ese unai sekit lalonai idia noho Witnes taudia edia kontribusen amo idia karaia. Kontribusen mauadia be Assembly Hall dekenai idia atoa, unai amo taunimanima be edia ura hegeregerena kontribusen do idia henia. Danu, nega haida kongrigeisen idauidau ese edia kontribusen moni amo heduru idia henia diba.

⁹ Namona be tanobada ibounai gaukarana ena kontribusen moni idia gaukaralaia namonamo hebouhebou ena kohu ibounai idia hoia totona. To bema sekit akaun dekenai moni be hegeregere lasi hari idia karaia hebouhebou eiava gabeai do ia vara hebouhebou ma ta totona o gabu ena davana karaia totona, sekit naria tauna ese kongrigeisen ta ta ia noia diba kontribusen do idia henia. Elda orea ta ta ese unai do idia herevalaia bona do idia abia hidi edia kongrigeisen ta ta ese sekit akaun totona moni hida do idia henia. Bena gwaubou do idia karaia unai davana henia totona.

¹⁰ Bema sekit durua moni dekenai gau haida ia vara dainai inai sekit dekenai idia noho elda taudia idia ura herevalaia, unai dina tamona ai ia vara hebouhebou dekenai, hebou ta idia karaia diba. Namona be idia ese disisen do idia karaia gwaubou moni hida be hebouhebou lalonai do idia gaukaralaia. Unai gwaubou be sekit hebouhebou durua moni idia halasia negadia ta ta ai, do idia torea bona davana do idia siaia bona hamomokania.

¹¹ Hebouhebou ta ta murinai dala do idia karaia sekit akaun dekenai odit idia karaia totona.

OGOGAMI TAUDIA DURUA

¹² Iesu bona ena hahediba taudia ese moni mauana idia naria ena badina ma ta be ogogami taudia durua totona. (Mar. 14:3-5; Ioa. 13:29) Unai Keristani maduna be ita karaia noho badina Iesu ia gwau: “Ogogami taudia be hanaihanai umui danu do idia noho.” (Mar. 14:7) Hari inai negai Iehova ena Witnes taudia ese edena dala ai unai maduna idia huaia?

¹³ Nega haida, kongrigeisen lalonai abidadama taudia haida be idia buruka, gorere eiava hekwakwanai haida dainai reana tauanina dalanai heduru do idia ura. Ruma bese taudia, varavara, bona ma haida be unai idia diba neganai do idia ura heduru idia henia. Unai be aposetolo Ioane ena hereva hegeregerena, ia gwau: “Bema tau ta be mai ena tanobada kohudia, bona ia itaia ena tadikaka be ia dabu, to ia ura lasi hebogahisi ia hahediaraia, Dirava ena lalokau be ia lalonai ia noho diba a? Natudia e, namo lasi iseda lalokau be hereva eiava uduna sibona amo, to mai momokani ida iseda kara amo ita hahedinaraia.” (1 Ioa. 3:17, 18; 2 Tes. 3:6-12) Tauanina dalanai idia dabu abidadama taudia durua karana be tomadiho momokani ena kahana ta.​​—Iam. 1:27; 2:14-17.

¹⁴ Timoteo dekenai revareva ginigunana ia siaia neganai, aposetolo Paulo ese heduru idia abia be namo taudia dekenai tauanina gaudia haria karana ia herevalaia. Iena sisiba be 1 Timoteo 5:3-21 dekenai oi duahia diba. Keristani taudia edia maduna be edia ruma bese edia dabu gaudia do idia henia. Buruka o gorere taudia be edia natudia, tubudia, o varavara amo heduru idia abia be namo. Nega haida tauanina dalanai heduru abia totona gavamani o taunimanima durua oreadia ese program haida idia karaia, unai dainai ia dabu tauna ena varavara o ma haida ese unai gabudia amo heduru idia noia diba. Nega haida badina haida dainai lagani momo lalonai mai abidadama ida hesiai gaukara idia karaia tadikaka bona taihu haida be kongrigeisen ese edia dabu gaudia do idia henia. Bema unai bamona taudia edia ruma bese o varavara be lasi bona gavamani taudia ese idia durua diba lasi, elda oreana be gwaumaoro idia henia diba heduru haida idia henia totona. Abidadama Keristani taudia ese dabu taudia durua karana idia laloa bada.

¹⁵ Tadikaka bona taihu momo be dagedage, tuari, tano mareremarere, abata, hitolo, o inai negai idia vara gau dikadia dainai idia dabu. (Mat. 24:7-9) Unai gaudia idia vara gabudia ai, kongrigeisen ibounai be idia dabu dainai, Hakaua Oreana ese ma gabu haida amo tadikaka idia gaukaralaia diba edia dabu gaudia idia henia totona. Unai be Asia Minor ai idia noho Keristani taudia ese hitolo negana ta ai Iuda tadikaka idia durua hegeregerena. (1 Kor. 16:1-4; 2 Kor. 9:1-5) Edia haheitalai ita tohotohoa neganai, ita hahedinaraia iseda tadikaka ita lalokau henidia, bona ita be Iesu Keriso ena hahediba taudia korikoridia.​​—Ioa. 13:35.

BAIBEL PABLIKEISEN HARIHARILAIA DALANA

¹⁶ Basileia ena sivarai harorolaia gaukarana ai Baibel bona Baibel pablikeisen ita gaukaralaia momo. Elda oreana ese hesiai tauna ta idia abia hidi kongrigeisen ena litrisa ia naria totona. Unai gaukara idia naria tadikaka ese edia maduna idia laloa bada be namo. Idia ese rekodi idia karaia namonamo unai amo kongrigeisen ena litrisa idia ore lasi.

¹⁷ Ita be Keristani taudia dainai, ita diba iseda nega, laloa dalana bona goada, diba, kohu, bona iseda mauri be Dirava ena harihari gaudia bona iena hesiai gaukara ai do ita gaukaralaia. (Luka 17:10; 1 Kor. 4:7) Ita dekenai idia noho gaudia ita gaukaralaia namonamo neganai, ita hahedinaraia Iehova ita lalokau henia bada. Ita ura bada iseda kohu namodia amo Iehova ita hanamoa, badina mai kudouna ibounai ida ia ita hesiai henia totona ita henia gaudia ibounai ia moalelaia. (Aon. 3:9; Mar. 14:3-9; Luka 21:1-4; Kol. 3:23, 24) Iesu ia gwau: “Umui abia davana lasi, umui henia davana lasi.” (Mat. 10:8) Iehova ena hesiai gaukara ai ita sibona bona eda kohu ita henia neganai, ita ese moale bada do ita abia.​​—Kara 20:35.