“Gau Ibounai Do Umui Karaia Dirava Umui Hanamoa Totona”

ITA be Dirava ena hesiai taudia dainai, iseda maduna be eda hereva bona kara amo Iehova ena hairai do ita hahedinaraia. Aposetolo Paulo ese unai do ita karaia totona hakaua hereva ta ia henia, ia gwau: “Herevana umui aniani, umui inuinu eiava gau ma ta umui karaia, namona be gau ibounai do umui karaia Dirava umui hanamoa totona.” (1 Kor. 10:31) Anina be Iehova ena kara maoromaoro taravatudia, ena kara goevadia idia hahedinaraia taravatudia, ita badinaia be namo. (Kol. 3:10) Dirava ita tohotohoa totona ita helaga be namo.​​—Efe. 5:1, 2.

² Keristani taudia dekenai unai ia hahedinaraia totona, aposetolo Petero ia gwau: “Umui be kamonai natudia dainai, guna Dirava umui diba lasi neganai umui badinaia ura idauidau do umui hadokoa, to umui ia boiria Helaga Tauna hegeregerena, emui kara ibounai lalonai do umui helaga, badina Toretore Helagadia ia gwau: ‘Do umui helaga, badina lau be lau helaga.’” (1 Pet. 1:14-16) Idaunegai Israela taudia bamona, Keristani kongrigeisen taudia ibounai idia helaga be namo. Unai ena anina be idia goeva noho, kara dika bona tanobada ena lalohadai ese do idia hamiroa lasi. Unai amo hesiai gaukara helagana idia karaia diba.​​—Eso. 20:5.

³ Do ita goeva noho totona Baibel ai Dirava ena taravatu bona hakaua herevadia ita badinaia be namo. (2 Tim. 3:16) Baibel ita stadilaia neganai, Iehova bona ena dala ita dibaia, unai amo ia kahirakahira ita lao. Eda stadi karana amo ita diba momokani, Dirava ena Basileia ita tahua guna bona eda mauri lalonai Dirava ena ura ita karaia be gau badana. (Mat. 6:33; Roma. 12:2) Anina be mauri matamata ita atoa.​​—Efe. 4:22-24.

LAUMA DALA BONA EDA KARA AI ITA GOEVA

⁴ Hanaihanai Iehova ena kara maoromaoro taravatudia badinaia karana be mai ena hekwarahi. Iseda inai tauna, Satani Diabolo, ia ura hereva momokani amo ita ia hakaua siri. Nega haida tanobada ena laloa veria gaudia bona iseda kara dika dainai ita hekwarahi. Iseda gwauhamata ita hamomokania totona do ita tuari be namo. Baibel ese ita ia hadibaia dagedage o hahetoho ita davaria neganai, ita hoa lasi be namo. Kara maoromaoro totona do ita hisihisi. (2 Tim. 3:12) Hahetoho ita davaria neganai do ita moale, badina ita diba unai ese idia hahedinaraia Dirava ena ura ita karaia noho.​​—1 Pet. 3:14-16; 4:12, 14-16

⁵ Ena be Iesu be goevadae, to ia davaria hisihisi amo Dirava badinaia karana ia dibaia. Iesu be Satani ena hahetoho o tanobada ena ura tahua karana dekenai nega ta ia moru lasi. (Mat. 4:1-11; Ioa 6:15) Eiava nega ta ia laloa lasi Dirava badinaia karana do ia dadaraia. Ena be ena abidadama karana dainai tanobada ese ia inai henia, to Iehova ena kara maoromaoro taravatudia ia badinaia. Ena mase negana ia kahirakahira neganai, ena hahediba taudia ia hamaoroa tanobada ese idia danu do ia inai henia. Unai nega amo, Iesu ena murinai idia raka taudia ese dagedage idia davaria, to idia boga-auka badina idia diba Dirava ena Natuna ese tanobada ia halusia.​​—Ioa. 15:19; 16:33; 17:16.

⁶ Tanobada amo ita gini siri totona, iseda Biaguna bamona, Iehova ena kara maoromaoro taravatudia ita badinaia be namo. Tanobada ai idia vara karadia bona ena politikol karadia ita dadaraia totona, namona be tanobada ena kara mirodia ita dadaraia. Namona be Iamesi 1:21 ena sisiba ita badinaia, ia gwau: “Kara mirodia ibounai bona kara dikadia ibounai do umui atoa siri, bona mai manau ida Dirava ese emui lalona ai ia hadoa herevana umui abia dae, unai ese umui ia hamauria diba.” Iseda stadi bona hebou karana amo iseda kudouna bona ‘lalona ai ia hadoa hereva’ momokani do ita mamia, bona tanobada ena laloani karadia do ita ura henia lasi. Hahediba tauna Iamesi ia gwau: “Tanobada tura henia karana amo Dirava umui inai henia. Unai umui diba lasi, a? Unai dainai, bema ta ia ura tanobada ena turana ai ia lao, ia be sibona Dirava ena inai tauna ai ia halaoa.” (Iam. 4:4) Unai dainai, Baibel ese ita ia sisiba henia Iehova ena kara maoromaoro taravatudia ita badinaia bona tanobada amo ita gini siri.

⁷ Dirava ena Hereva ese ita ia sisiba henia hemarai karadia bona kara mirodia ita karaia lasi totona. Ia gwau: “Namona be matabodaga karadia, kara miro idauidau bona mataganigani karadia be umui huanai umui herevalaia lasi, helaga taudia edia kara hegeregerena.” (Efe. 5:3-5) Unai dainai kara mirodia, hemarai, o matabodaga karadia ita lalohadailaia lasi, bona eda herevahereva lalonai ita gwauraia lasi. Unai amo ita hahedinaraia ita ura Iehova ena goeva bona kara maoromaoro taravatudia ita badinaia.

TAUANINA DALANAI ITA GOEVA

⁸ Lauma dalanai bona iseda kara dekenai ita goeva sibona lasi, to Keristani taudia idia diba tauanina dalana ai idia goeva danu be gau badana. Idaunegai Israela ai, helaga Diravana ia ura kamepa ia goeva be namo. Unai negai edia mauri lalonai Iehova ena goeva taravatudia idia badinaia. Iseda mauri dalana ia goeva danu be namo, unai amo Iehova ese ‘gau mirona ta ita huanai do ia itaia’ lasi.​​—Deu. 23:14.

⁹ Baibel ai helaga karana bona tauanina ai goeva karana idia gwauraia hebou. Hegeregere, Paulo ia gwau: “Lauegu lalokau taudia e, . . . namona be tauanina bona lalona hamiroa gaudia ibounai amo ita goeva, bona Dirava ita gari henia noho lalonai namona be ita helaga noho.” (2 Kor. 7:1) Unai dainai, Keristani taudia be hanaihanai idia digu bona edia dabua idia huria be namo unai amo edia tauanina do ia goeva. Ena be tano ta ta edia mauri dalana be idau, to ita ese sopu bona ranu amo eda tauanina ita hagoevaia diba bona iseda natudia ita hagoevaia diba.

¹⁰ Iseda haroro gaukara dainai, momo ese ita idia dibaia. Iseda ruma lalona bona murimurina ia goeva bona gau ibounai ita atoa namonamo karana be eda dekena taudia haroro henia dalana ta. Unai be ruma bese ibounai ese idia karaia diba gauna. Tadikaka ese edia ruma ena lalona bona murimurina idia laloa bada be namo, badina ruma murimurina ia goeva kara ese ma haida edia lalona ia veria diba. Unai bona bema lauma dalanai edia ruma bese idia naria, idia hahedinaraia edia ruma bese idia naria namonamo diba. (1 Tim. 3:4, 12) Taihu danu be mai ena maduna ruma lalonai idia noho gaudia ia naria totona. (Tito 2:4, 5) Edia tama sina ese idia hadibaia namonamo natudia be edia tauanina bona edia daiutu idia naria bona hagoevaia. Ruma bese idia gaukara hebou goeva karana idia badinaia neganai, do idia hegeregere Dirava ena Basileia henunai tanobada matamata ai idia noho.

¹¹ Hari Iehova ena witnes taudia momo be motuka idia gaukaralaia hebou idia lao totona. Bona gabu haida ai, haroro totona motuka idia gaukaralaia. Motuka ia goeva bona ia heau namonamo be namo. Namona be iseda ruma bona motuka ese idia hahedinaraia ita be Iehova ena goeva bona helaga taudia. Iseda haroro baege bona Baibel idia goeva danu be namo.

¹² Namona be Baibel ena hakaua herevadia hegeregerena iseda dabua ita atoa bona toana ia goeva. Lada bada tauna ta ita hedavari henia neganai ita ura lasi eda dabua toana be ia dika. Bema unai ita laloa bada, Iehova hesiai henia totona platfom ai o haroro gaukara ai goeva karana ita laloa be namo! Iseda toana bona dabua karaia dalana dainai ma haida ese Iehova tomadiho henia karana idia gwauraia dika diba. Lebulebu taudia edia dabua toana o ma haida edia hemami laloa lasi dalanai dabua hahedokilaia karana be namo lasi. (Mika 6:8; 1 Kor. 10:31-33; 1 Tim. 2:9, 10) Unai dainai, haroro gaukara, kongrigeisen heboudia, sekit hebouhebou, o rijinol hebouhebou totona ita hegaegae neganai, namona be Baibel ena hereva goeva karana bona eda toana ia namo karana ai ita laloa bada. Ita ura Iehova ita matauraia bona hanamoa hanaihanai.

¹³ Iehova ena witnes taudia edia hedikwota o brens ofesi ta ita vadivadi henia neganai unai bamona ita karaia danu be namo. Laloatao, inai ladana Betele anina be “Dirava ena Ruma.” Unai dainai ita vadivadi neganai, namona be iseda dabua bona kara be Kingdom Hall ai hebou totona ita lao neganai ita karaia bamona.

¹⁴ Ita loaloa o laga-ani negadiai danu, iseda dabua bona toana ita laloa bada be namo. Ita sibona ita nanadaia, ‘Lauegu toana dainai nega bona gabu idauidau ai haroro totona lau hemarai, a?’

LAGA-ANI BONA MOALE KARADIA NAMODIA

¹⁵ Iseda tauanina ia namo bona ita gorere lasi totona laga-ani bona gadara be mai anina bada. Nega ta Iesu ese ena hahediba taudia ia boiria taunimanima lasi gabuna ta ai idia “laga-ani sisina” totona. (Mar. 6:31) Nega ta ta ai ita laga-ani bona gadara o moale karadia ita karaia ese eda lalona ia durua diba. Eda hemami ia hanamoa diba unai amo eda gaukara do ita karaia namonamo.

¹⁶ Hari inai negai laga-ani karadia be momo dainai, Keristani taudia ese idia abia hidi namonamo bona Dirava amo ia mai aonegana idia gaukaralaia be namo. Momokani laga-ani karadia ita karaia be namo, to iseda mauri lalonai gau badana ai ia lao lasi be namo. Baibel ese ita ia hadibaia “dina gabedia ai” taunimanima be “moale karadia do idia ura henia bada, bona Dirava do idia lalokau henia lasi.” (2 Tim. 3:1, 4) Hari idia karaia laga-ani bona moale karadia momo be Dirava ena kara maoromaoro taravatudia idia ura badinaia taudia dekenai be maoro lasi.

¹⁷ Keristani taudia ginigunadia ese unai nega ai idia karaia tauanina ena ura hahedinaraia moale karadia idia dadaraia. Roma edia kariota gadara helulu gabudia ai, idia mai taudia ese haida hamasea karana idia moalelaia. Taunimanima hamoalea totona dagedage, rara bubua karadia, bona matabodaga karadia be gadara ai idia karaia, to Keristani ginigunadia be unai gaudia amo idia gini siri. Hari inai negai, tanobada ena moale karadia momo be unai bamona bona miro gaudia idia ura henia taudia idia hamoalea. Iseda raka dalana ita “naria namonamo” be namo, moale karadia dikadia amo ita raka siri. (Efe. 5:15, 16; Sal. 11:5) Danu, ena be moale karana ta be dika lasi, to Keristani tauna ena hemami ia hadikaia neganai, unai be namo lasi.​​—1 Pet. 4:1-4.

¹⁸ Keristani taudia ese laga-ani bona moale karadia namodia idia moalelaia diba. Momo be Baibel ena sisiba bona iseda pablikeisen ai idia noho hereva namodia idia badinaia dainai namo idia davaria.

¹⁹ Nega haida, ruma bese haida be ruma bese ma ta ese Keristani hebamo totona edia ruma dekenai idia boiria. Eiava tadikaka bona taihu be headava aria ta o unai bamona aria ma ta dekenai idia boiria. (Ioa. 2:2) Unai aria ena biaguna ena maduna be aria lalonai do idia vara gaudia ibounai ia naria. Ia hedinarai goevagoeva, hutuma idia hebou neganai ita naria namonamo be namo. Unai negadia ai idia karaia moale karadia dainai haida ese Keristani karadia idia hahedinaraia lasi, idia aniani bona inuinu momo bona kara dika badadia idia karaia danu. Unai idia diba dainai, laloa maoromaoro Keristani taudia ese edia aria ai momo idia boiria lasi bona ena nega idia hadaudaua lasi. Bema kekero muramura do idia inua, namona be do idia kekero lasi. (Fili. 4:5) Bema moale negadia be moale bona hagoadaia totona, aniani bona inuinu be gau badadia lasi.

²⁰ Heabidae karana be kara namona. (1 Pet. 4:9) Bema iseda ruma ai aniani, laga-ani, bona tomadiho totona Keristani taudia ma haida ita boiria, idia dabu taudia ita laloa be namo. (Luka 14:12-14) Bema unai bamona negana ta ai ita idia boiria, namona be Mareko 12:31 ena sisiba ita badinaia. Namona be haida edia heabidae karana ita laloa bada.

²¹ Keristani taudia ese Dirava ena harihari gaudia momo idia moalelaia bona edia ‘gaukara ena anina idia moalelaia, idia aniani bona inuinu’ diba. (Had. 3:12, 13) Bema ‘gau ibounai ita karaia Dirava ita hanamoa totona,’ aria ena biaguna bona ia boiria taudia ese unai nega idia laloa lou neganai, do idia moale badina edia hetura karana Dirava ida ia hadikaia lasi.

SIKULI GAUKARADIA

²² Iehova ena Witnes natudia be tanobada ena edukeisen amo namo idia davaria. Sikuli idia lao neganai, duahiduahi bona toretore karana idia dibaia. Sikuli ai idia dibaia gaudia haida ese matamata taudia ia durua diba, Dirava idia hesiai henia lalonai tahua gaudia namodia idia atoa totona. Idia sikuli noho lalonai, do idia gaukara goada idia ‘ia karaia Dirava do idia laloa’ bona iena ura idia atoa guna.​​—Had. 12:1.

²³ Bema oi be Keristani matamata ta bona oi do sikuli noho, namona be oi naria namonamo murimuri matamata taudia oi bamoa kava lasi totona. (2 Tim. 3:1, 2) Badina Iehova ese oi ia gimaia totona gau momo ia henia, bona gau momo oi karaia diba tanobada ena laloani karadia oi dadaraia totona. (Sal. 23:4; 91:1, 2) Unai dainai oi sibona oi gimaia totona, Iehova ese ia henia gimaia gaudia ibounai oi gaukaralaia be namo.​​—Sal. 23:5.

²⁴ Sikuli lalonai tanobada amo idia gini siri totona, Witnes matamata taudia momo be sikuli murinai idia karaia karadia lalonai idia vareai lasi. Reana unai kara be edia sikuli turadia bona tisa ese do idia lalopararalaia lasi. To, Dirava hamoalea karana be gau badana. Anina be Baibel amo oi hadibaia lalomamina oi gaukaralaia bona emu lalona oi hadaia tanobada ena gadara helulu o bese abia hisi karadia lalonai oi vareai lasi totona. (Gal. 5:19, 26) Bema emui Keristani tama sina edia sisiba Baibel amo umui kamonai bona kongrigeisen taudia danu umui hebamo, umui ese Iehova ena kara maoromaoro taravatudia do umui badinaia diba.

MONI GAUKARA BONA TURADIA

²⁵ Baibel ia gwau ruma bese kwaradia edia maduna be edia ruma bese do idia naria. (1 Tim. 5:8) Ena be idia diba idia be Dirava ena hesiai taudia dainai Basileia do idia atoa guna, to ruma bese naria be edia maduna. (Mat. 6:33; Roma 11:13) Dirava idia badinaia bona idia abia dae idia dekenai idia noho aniani bona dabua be ia hegeregere neganai, do idia lalohekwarahi lasi bona kohu ura henia karana ena tarapu lalonai do idia moru lasi.​​—1 Tim. 6:6-10.

²⁶ Namona be moni gaukara idia karaia gwauhamata Keristani taudia ese Baibel ena hakaua herevadia idia laloa bada. Mai momokani ida eda ruma bese ita naria anina be Dirava ena taravatu o gavamani ena taravatu idia utua gaukaradia ita karaia lasi. (Roma 13:1, 2; 1 Kor. 6:9, 10) Hebamo dikana ena dika ita laloatao be namo. Ita be Keriso ena tuari taudia dainai, Dirava ena taravatu idia utua, tanobada amo gini siri karana ia hadikaia, o iseda hetura karana Dirava ida idia hadikaia diba bisinesi karadia ita dadaraia be namo. (Isa. 2:4; 2 Tim. 2:4) Bona Dirava ese ia inai henia tomadihona “Babulonia Badana” ita bamona lasi.​—Apok. 18:2, 4; 2 Kor. 6:14-17.

²⁷ Dirava ena kara maoromaoro taravatudia badinaia karana ese ita do ia durua iseda Keristani hebamo karana ita gaukaralaia lasi bisinesi karadia o sibona eda ura gaudia herevalaia totona. Keristani heboudia, hebouhebou badadia o maragidia ai ita hebamo ena badina be Iehova tomadiho henia totona. Dirava ena pata amo aniani namodia ita abia bona “ta ta do ita hagoadaia” karana ita moalelaia totona. (Roma 1:11, 12; Heb. 10:24, 25) Unai bamona hebamo negadiai Dirava ia ura henia gaudia sibona ita herevalaia.

KERISTANI LALOTAMONA AI ITA NOHO

²⁸ Iehova ese ena taunimanima totona kara maoromaoro taravatudia ia atoa ena badina ma ta be, idia ese ‘lalotamona karana idia badinaia totona, bona maino ese idia do ia hatamonaia’ totona. (Efe. 4:1-3) Sibona eda namo ita tahua lasi, to ma haida edia namo ita tahua danu. Unai be Kongrigeisen lalonai idia hahedinaraia. Herevana iseda kopina, bese, noho dalana, bona edukeisen be idauidau o ita be taga o lasi, to ita ibounai be Dirava ena kara maoromaoro taravatudia henunai ita noho. Murimuri taudia ese danu unai kara be Iehova ena orea taudia sibona dekenai idia itaia.​​—1 Pet. 2:12.

²⁹ Aposetolo Paulo ese lalotamona ena badina ia herevalaia lou neganai, ia gwau: “Tauanina be tamona, lauma helaga be tamona, bona danu helaro be tamona, bona unai helaro abia totona umui ia boiria. Lohiabada be tamona, abidadama be tamona, bapatiso be tamona. Dirava be tamona bona ia be taunimanima ibounai edia Tamana. Ia be ibounai ataiai, ibounai huanai, bona ibounai lalonai ia gaukara.” (Efe. 4:4-6) Unai dainai Baibel ena hahediba hereva badadia, bona dobudia ita lalopararalaia karana dekenai ita lalotamona be namo badina Iehova ena lohia siahuna ita lalopararalaia. Momokani, Iehova ese ena taunimanima dekenai gado goevadaena ia henia, unai amo idia gaukara hebou totona.​​—Sef. 3:9.

³⁰ Keristani Kongrigeisen lalonai lalotamona bona maino ese Iehova idia tomadiho henia taudia ibounai dekenai namo bada ia havaraia. Ita ese Iehova ena gwauhamata ita mamia, ia gwau: “Mai lalotamona ida do lau atodia, mamoe be magu tamona lalonai bamona.” (Mika 2:12) Ita ura Iehova ena kara maoromaoro taravatudia ita badinaia karana amo unai maino bona lalotamona karana ita hahedinaraia noho.

³¹ Iehova ena Kongrigeisen goevana lalonai ia abia dae taudia be idia moale! Iehova ena ladana ita abia ese ita dadaraia gaudia ibounai edia namo ia hereaia. Iehova ita tura henia noho lalonai, do ita gaukara goada iena kara maoromaoro taravatudia ita badinaia noho bona ma haida dekenai do ita gwauraia hedinarai totona.​​—2 Kor. 3:18.