Tanobada Matamatana ta be Kahirakahira Momokani!
INAI tanobada oromana ia ore gwauraia! Unai hereva be momokani, a? Mani inai tanobada dekenai idia vara gaudia oi lalodia namonamo.
Niuklia tuari gaudia be momo herea dainai tanobada dekenai idia noho taudia iboudiai idia hamasedia ore diba. Tano momo lalodiai, hegeregere, Angola bona Mozambique dekenai, bese tamona taudia idia tuari heheni. South Africa ai, Sri Lanka ai bona tano ma haida dekenai, bese idauidau taudia idia tuari heheni. Taunimanima hagaridia karadia bona doe dainai taunimanima momo idia mase.
AIDS gorerena be edena bamona? South Africa ena niuspepa ta, Sunday Times, October 25, 1987 gauna, ese AIDS gorerena be “gorere dikana matamatana” ia gwauraia: bona ia gwau: “Harihari ia hedinarai Africa dekenai AIDS gorerena be dika herea. Tano haida lalodiai lagani 1994 ia do davaria lasi neganai taunimanima 10 10 amo 6 6 be AIDS gorerena dainai do idia mase.”
Unai dika idauidau dainai taunimanima momo idia gari. Nobel prais ia abia tauna ta, ladana Harold C. Urey be lagani haida gunanai ia gwau: “Gari do ita ania bamona, mai gari danu do ita mahuta, gari ai do ita mauri bona gari ai do ita mase.” Iesu Keriso, inai tanobada ena peroveta taudia iboudiai ia hereadia tauna, ia peroveta, ia gwau, inai tanobada ena dina gabedia ai, “taunimanima edia kudouna dekenai do idia gari momokani, edia laloa danu do idia doko, unai idia vara gaudia dainai.”—Luka 21:26.
To taunimanima momo idia gari lasi. To idia moale, badina idia diba inai tanobada ena oromana (tanobada korikorina lasi) be kahirakahira do ia ore, bona tanobada oromana matamatana be kahirakahira momokani. Edena bamona unai idia diba momokani? Badina be Bible ena peroveta herevadia momo idia vara momokani vadaeni.
Hegeregere, Iesu ena hahediba taudia ese idia nanadaia, ena noho ena toana bona inai tanobada ena dokona edia toana be dahaka. Iesu ia haere, ia gwau: “Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia.” Lagani 1914 dekenai Tanobada Ibounai Tuarina Ginigunana ia vara. Unai tuari lalonai idia mase taudia edia namba be bada herea, gunaguna idia vara tuaridia ta ta iboudiai lalodiai idia mase taudia edia namba ia hanaia. Tuari taudia 9 milion bamona idia mase, bona taunimanima ma milion momo danu idia mase! Tanobada Ibounai Tuarina Iharuanana lalonai taunimanima 55,000,000 idia mase! Iesu ese ia hahedinaraia, unai dika iboudiai idia vara neganai, doe, tano mareremarere, daihanai goreredia bona kara dika do idia vara danu.—Mataio 24:7-13; Luka 21:10, 11.
Aposetolo Paulo danu ese hari inai negai idia vara gaudia ia perovetalaidia. Ia gwau: “Nega dokonai metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau, idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinarai, to iena anina momokani do idia negea. Inai bamona taudia ibounai dekena amo do oi raka siri.” (2 Timoteo 3:1-5) Paulo ese hari inai negai idia vara gaudia ia perovetalaia maoromaoro diba, badina Dirava ese ena lauma helaga amo ia hasiahua unai hereva do ia torea totona.
Iesu ese nega dokona ia herevalaia murinai, ia gwau: “Inai gaudia do idia vara do umui itaia, vadaeni do umui diba Dirava ena Basileia ia kahirakahira vadaeni.” (Luka 21:31) Taunimanima milion momo ese Lohiabada ena guriguri idia gwauraia neganai, idia noinoi Dirava ena Basileia do ia mai. (Mataio 6:9, 10) To bema ta ese ia nanadaidia, “Inai Basileia ese dahaka do ia karaia?” idia haere diba lasi. To Bible idia stadilaia namonamo taudia milion momo be idau, idia diba Basileia ese inai tanobada gunana do ia haorea bona tanobada matamatana do ia haginia bona unai tanobada matamatana ese hahenamo momo herea be taunimanima do ia henidia. To unai be edena bamona bona edena negai do ia vara?