Tanobada Matamatana—Paradaiso Ia Vara Lou!
HEADAVA matamata tauna ta mai adavana edia noho gabuna be namo herea—imea badana ta mai ena palaoapalaoa, au, manu bona animal momo herea. Unai gabu be paradaiso ta, edia lalokau Tamana ese ia henidia harihari gauna! Moale idia davaria ela bona hanaihanai, a? Lasi. Nega sisina murinai edia Paradaiso idia haboioa. Badina be dahaka?
Unai Paradaiso idia haboioa, badina edia Tamana ena kara namodia idia dekenai idia laloa lasi. Unai sibona lasi, to idia gwau-edeede. Edia kara maoromaoro ia tohoa totona, edia Tamana ese ia hamaorodia au ta ena huahua idia ania diba lasi, to idia gwau-edeede bona unai au ena huahua idia ania.—Genese 2:15-17; 3:6, 7.
Badina be dahaka unai kerere maragina tamona dainai, panisi bada herea idia abia? Reana haheitalai ta ese unai henanadai ena haere do ia hahedinaraia. Bisinesi tauna ta ese tau ta mai ena referens pepana ia hagaukaraia ena sitoa do ia naria totona. Ia ura ia diba momokani unai tau do ia kara koikoi eiava lasi, unai dainai, ki ia henia, to ia hamaoroa ia gwauraia seipina ta ena loka ia kehoa be taravatu. Bema ia kehoa, ena gaukara amo do ia hadokoa. Sitoa naria tauna be sibona ia noho neganai, ia ura dikadika ia diba unai seipi lalonai dahaka ia noho. Unai dainai seipi ena loka ia kehoa. Unai ia karaia lalonai, bisinesi tauna ia giroa mai bona ena kara ia itaia. Vadaeni, ena gaukara amo ia hadokoa.
Paradaiso Ia Boio
Unai sivarai bona headava matamata tauna mai ena adavana edia sivarai be edena bamona idia hegeregere? Edia Tamana ese ia taravatua au huahuana idia ania dainai edia noho gabuna mai hairaina amo ia luludia. Eden ena Paradaiso murimurinai, unai tau mai ena adavana, Adam bona Eva, be au ginigini bona ava ginigini momo gabunai idia noho. Guna, idia goevadae, to murimuri ai idia noho neganai idia goevadae lasi. Unai neganai idia mauri hanaihanai diba lasi, to idia mase matamaia. Edia natudia ese idia edia amo kara dika bona mase idia abia.—Roma 5:12.
Gabeai, “Iehova ese taunimanima ia itaia, edia kara dika be bada herea.” Unai dainai, Noa ena nega lalonai Dirava ese Abata ia gaukaralaia, tanobada ia hagoevaia totona. Taunimanima haida idia roho mauri, a? Taunimanima 8 sibodia—Noa bona ena natudia toi, bona edia adavadia hani. Dirava ena hahegani idia badinaia, bona lagatoi badana idia haginia. Ena bada be hegeregere, idia, animal idauidau, bona aniani momo be ia lalonai do idia atoa vareai. Unai dala amo idia hegaegae tanobada matamatana do idia lao henia totona. (Genese 6:5-7, 13-22) Adam bona Eva ese guna idia moalelaia imeana be Abata ese ia hadikaia ore. Unai dala amo Paradaiso ia boio, to ia boio vaitani lasi!
Paradaiso Ia Vara Lou
Lagani handred momo murinai, Dirava ese ena vara guna Natuna be tanobada dekenai ia siaia, taunimanima be kara dika bona mase amo do ia hamauridia totona. Unai ese dala ia kehoa Iesu Keriso idia abidadama henia taudia ese mauri hanaihanai do idia abia totona. (Ioane 3:16) Iesu ia peroveta danu Paradaiso be do ia vara lou. Momokani, Iesu be satauro dekenai ia mase neganai, ia badinai idia hasatauroa kara dika tauna ia hamaoroa, ia gwau: “Lau danu Paradaiso dekenai do ita noho.”—Luka 23:43, NW.
Paradaiso be inai tanobada dikana ena dokona murinai do ia vara lou. Iesu ese unai ia perovetalaia ena hahediba taudia be inai bamona idia henanadai neganai: “Do oi giroa mai, bona tanobada dokona danu, ena toana be dahaka?” Iesu ia haere neganai ia gwau, tuari, doe, tano mareremarere, bona daihanai goreredia do idia vara; kara dika do ia bada daekau bona tanobada ibounai lalonai Basileia do idia harorolaia. Lagani 1914 amo ema bona hari unai gaudia bona ma gau haida danu ita itadia; idia be Iesu ese ia gwauraia toana ena kahana ta ta. (Mataio 24:3-14) Idia hahedinaraia inai tanobada oromana be do ia doko bona Paradaiso be inai tanobada dekenai do ia vara lou.
Unai peroveta herevana lalonai, Iesu be ma ia gwau: “Fig auna dekena amo inai parabole do umui diba. Au rigina tuhutuhuna ia tubu daekau, ena raurau idia kehoa neganai, umui diba vadaeni lai be dina diho kahana dekena amo kahirakahira do ia mai. Inai dainai, umui danu inai gau ibounai idia vara do umui itaia, do umui diba ia be ia kahirakahira vadaeni, iduara dekenai ia gini momokani. Umui lau hamaoroa momokani, inai nega idia noho taudia do idia mase ore lasi neganai be inai gaudia ibounai do idia vara momokani.” (Mataio 24:32-35) Bible ena peroveta herevadia ma haida danu ese idia hahedinaraia Paradaiso be daudau lasi do ia vara lou, tanobada matamatana be kahirakahira momokani. To unai Paradaiso be edena bamona?
Tanobada Matamatana—Idau Vaitani!
Dirava ena Basileia ese hari inai negai idia noho gavamanidia edia gabu do ia abia. (Daniel 2:44) Iesu Keriso, “Maino Lohiana” ese Basileia ia haginia neganai, tanobada matamatana idia noholaia taudia iboudiai ese hahemaoro goevagoeva bona maino hanaihanaina do idia davaria. (Isaia 9:6, 7) Iesu ese kara dika taudia bona taravatu utua taudia, hari taunimanima idia biagudia taudia unai, do ia hadikadia ore, unai dainai maino idia ura henia “kara namo” taudia sibodia do idia noho. (Hereva Lada-isidia 2:21, 22; Apokalupo 19:11-21; 16:14-16) Oibe, do idia roho mauri taudia be manau taudia, maino ura henia taudia. Unai neganai lalo-hekwarahi do ia ore vaitani!
Idau bese taudia bona taunimanima ma haida dadaraidia karadia iboudiai be tanobada matamatana lalonai do idia noho lasi. Momokani, taunimanima hutuma ese unai kara idia rakatanidia vadaeni. Idia be daidia? Iehova ena Witness taudia. Badina be dahaka idia idau? Badina Bible idia stadilaia namonamo, ena hereva idia badinaia, bona idia lalokau heheni dainai. (Ioane 13:34, 35; Kara 10:34, 35) Tanobada ibounai lalonai Witness taudia iboudiai be milion toi mai kahana hari, to Bible ia gwau, gabeai, tanobada dekenai Iehova do idia tomadiho henia taudia be “hutuma bada herea . . . duahia diba lasi. Idia be bese idauidau, iduhu idauidau, kopina idauidau, bona gado idauidau.”—Apokalupo 7:9.
Taunimanima be tuari dainai do idia mase lasi. Kina bilion momo do idia negea lasi, niuklia tuari gaudia, tuari gaudia ma haida bona tuari oreadia do idia hoidia totona. Gavamani gwau-edeede henia karadia, bese idauidau tuari heheni karadia, bona dagedage karadia ma haida do idia ore. (Isaia 2:4) Tuari karadia dekenai taunimanima do idia hadibadia lasi bona do idia doridia lasi tuari oreana lalonai do idia vareai totona, badina be unai neganai tuari iboudiai do idia ore. Dirava ese tuari iboudiai ia haoredia neganai moale bada do ia vara!—Salamo 46:8, 9.
Maino momokanina be do ia vara. Salamo torea tauna ia gwau: “Bona nega sisina murinai, kara dika tauna do ia noho lasi; . . . to manau taudia ese tanobada do idia abia, bona maino bada dainai do idia moale dikadika.”—Salamo 37:10, 11.
Doe do idia ore bena aniani do ia bada herea. Gabu momo dekenai, ogogami biru taudia be ava ginigini dainai, tano dikana dainai, tano gagaena ia bada ia lao dainai, medu ia diho lasi dainai, bona kwadi hutuma ese uma anianidia idia hadikaia dainai, idia hekwarahi bada. Unai dika iboudiai do idia ore. (Isaia 35:1, 6, 7) Bena tanobada ese aniani bada do ia havaraia! (Salamo 72:16) Aniani bona inuinu do idia bada dainai, Iehova ese “aria namo herea” do ia karaia!—Isaia 25:6.
Taunimanima iboudiai ese mai anina bada gaukarana do idia moalelaia. Ruma haginidia, huahua audia hadodia, bona uma gabudia naridia gaukaradia amo moale do ita davaria! Sibona emu fig auna ikerukeruna ai do oi helai bona ena huahua do oi ania neganai, do oi moale bada!—Mika 4:4.
Taunimanima iboudiai be mai sibodia edia ruma namo hereadia. Hari inai negai taunimanima milion momo be ruma dikadia o gabu dikadia ai idia noho. Edia mauri be dika herea! Africa lalonai korema taudia milion momo be edia hanua maragidia idia rakatanidia, taoni dekenai idia lao, unuseniai do idia noho totona, to idia momo edia ruma be kopukopu eiava raro amo idia karaia, bona edia guhi sibona be auri, bona ranu bona toileti be hegeregere lasi, bona taunimanima momo be daiutu tamona lalonai idia mahuta. To, tanobada matamatana lalonai, taunimanima ese ruma namodia do idia haginidia, bona do idia noholaidia.—Isaia 65:21, 22.
Taunimanima ese AIDS gorerena bona gorere ma haida do idia abia lasi, to taunimanima edia tauanina do idia goada bona do idia goevadae. Iehova ena peroveta tauna ta ia gwau, tau ta do ia gwau lasi, “Lau gorere.” Danu, kahirakahira do ia mai tanobada matamatana ai, “matakepulu taudia edia matana do ia kehoa, bona taia kudima taudia edia taiana do ia kehoa. Unai neganai aena dika tauna do ia raka daekau dia bamona, bona mu tauna ena malana do ia boiboi mai ena moale ida.”—Isaia 33:24; 35:5, 6.
Mase, mata ranuna, bona gara gabudia do idia ore. (Apokalupo 21:4) To idia mase vadaeni taudia bilion momo dekenai dahaka do ia vara? Iesu be tanobada dekenai ia noho neganai, taunimanima haida be mase amo ia hatoredia isi lou. Hegeregere, nega ta taunimanima haida ia itadia, mase tauhauna ena tauanina idia huaia lao gara gabuna. Unai mase tauna be Nain hanuana dekenai ia mase. Iesu ese ena sinana, vabu ta, ia gado namo henia murinai, ia gwau: “Uhau tauna e, lau hereva henia oi dekenai, oi toreisi.” Bena ia helai tore! (Luka 7:11-17) Nega ma ta dekenai, Iesu ese inai hereva namona ia gwauraia: “Nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.” (Ioane 5:28, 29) Iehova ese hisiu bona guba gaudia momo herea momokani ia karadia, bona idia “iboudiai edia ladana ia hatoa.” Unai dainai, taunimanima bilion haida do ia hatoredia isi lou be auka lasi ia dekenai.—Isaia 40:26.
Tanobada Matamatana Oi Ura Henia, A?
Matamata neganai, Iehova Dirava ia ura taunimanima do idia mase lasi, to ia ura mai ena lalokau ida ia henidia gaudia do idia moalelaidia ela bona hanaihanai. Mani inai oi laloa: tanobada matamatana lalonai, ruma bese taudia do idia noho namo mai edia moale ida! Hari inai negai animal haida idia dagedage, to unai neganai maragidia be unai animal ida do idia gadara hebou diba, bona dika do idia davaria lasi. (Isaia 11:6-9) Mani inai hahenamo oi lalodia: maino, ruma namodia, gaukara namodia bona aniani namodia momo. Oibe, bona mauri hanaihanai tanobada paradaisona lalonai mani oi laloa.
Unai tanobada paradaisona dekenai do oi noho diba, a? Oibe, bema Dirava ena Hereva oi diba namonamo bona oi badinaia. Iehova ena Witness taudia idia ura oi do idia durua, Dirava ena gwauhamata momokanidia do oi abidadama henidia diba totona. Inai do oi diba momokani, Paradaiso be kahirakahira do ia vara lou, badina tanobada matamatana be ia kahirakahira momokani!