Tanobada Sivarai Ena Anina

Ita Tohotohodia be Namo

Vanegai, New Haven Register, Connecticut ena niuspepa ta, lalonai revareva ta idia printaia. Unai revareva ese Iehova ena Witness taudia ia herevalaidia. Ia gwau: “Vanegai, Iehova ena Witness taudia ese edia hebouhebou badana, lagani iboudiai idia karaia hebouhebouna, be Coliseum dekenai idia karaia. Orea idauidau ese Coliseum idia gaukaralaia, to idia iboudiai amo Coliseum naria taudia ese Iehova ena Witness taudia idia ura henidia bada. Idia hebou negana vairanai bona murinai Coliseum idia hagoevaia namonamo. Idia rakatania murinai ia be unai bamona do ia goeva lasi ela bona idia hebou lou.”

Unai revareva ia torea tauna ese lagani haida gunanai Witness taudia ese idia karaia hebouhebouna ta ia herevalaia. Ia gwau: “Witness taudia 75,000 be Yankee Stadium lalonai idia hebou, bona ma 20,000 be murimuri ai idia helai, hebou ena hereva be laud spika dekena amo idia kamonai totona. New York taudia ese edia kara idia hoalaia. Idia hebou dinana ginigunana dekenai, pulisi taudia 200 idia siaidia, unai be hebou badadia dekenai idia siaidia pulisi taudia edia namba hegeregerena. To idia hebou dinadia oredia ai, pulisi taudia rua sibodia idia siaidia, heduru do idia henia totona. New York City ena dipatmen idauidau ese gorere koua karana idia stadilaia taudia, aniani hegaegaelaia taudia, pulisi taudia bona lahi habodoa taudia idia siaidia, Witness taudia edia gaukara dalana namo hereana do idia stadilaia bena diba do idia abia totona. Ena be Witness taudia be unai gabu dekenai idia aniani, to unai gabu idia rakatania murinai, aniani o momoru ta idia itaia diba lasi. Herevana oi ese tomadiho ma ta oi badinaia eiava tomadiho iboudiai oi dadaraidia, . . . to Witness taudia ita hanamodia be namo, edia gaukara goadana, edia kara goeva, edia kara namo bona mauri dalana namona dainai. Namona be ita ibounai ese unai manau bona gaukara goadagoada taudia edia kara namodia ita tohotohodia bona ita badinadia.”

Ena be taunimanima momo idia laloa Iehova ena Witness taudia edia kara be idau, to Witness taudia idia diba Keristen taudia korikoridia edia mauri be “Lauma Helaga ese . . . ia biagua be namo.” Dirava ena lauma helaga ese “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana” be idia lalodiai ia havaradia. Unai kara namodia idia tohotohodia be namo.​—⁠Galatia 5⁠:​22, 23, 25.

Ia Hahekwakwanaidia Korona Ta

Spain dekenai, Málaga hanuana taudia handred momo ese edia moni idia henia, Maria “Iseda Helaro Hahinena” ena kaivakuku ta, ena golo korona do idia hoia totona. Lagani rua gunanai, taunimanima idia veridia moni do idia henia totona, inai hereva idia halasia: “Golo giram tamona oi henia, Maria totona.” Unai nega amo ema bona hari, herahera gaudia idauidau idia henia​—⁠taiana heraheradia, medolo, headava rini bona golo gaudia ma haida. Unai golo gaudia iboudiai idia havevedia neganai edia metau be 1.5 kilogram. Unai be hegeregere golo korona ta do idia karaia unai kaivakuku totona.

June 1988 dekenai “Iseda Helaro Hahinena” ena kwarana dekenai golo korona idia atoa. Unai kara idia gunalaia taudia be pope ena gaukara tauna ta bona Spain ena ladana bada bisop taudia haida. To Katolik taudia momo ese unai kara idia moalelaia lasi. Spain ena niuspepa ta, El País ia gwau Katolik hahediba taudia 20 ese revareva ta idia torea. Unai revareva lalonai idia gwau: “Iseda anina lasi tomadiho karadia dainai, abidadama taudia bona abidadama lasi taudia ita hahekwakwanidia, ani?” Katolik taudia ma haida ese pope ena revareva ta idia gwauraia, unai revareva lalonai pope ia gwau namona be mai edia abidadama taudia ese “edia kohu namodia be ogogami taudia do idia henidia.” Unai dainai unai Katolik taudia idia badu, unai “davana bada korona” dainai bona “dava bada hebouna ta idia karaia unai korona be kaivakuku ena kwarana dekenai idia atoa totona” dainai.

Kudou-maoro taudia ese kaivakuku hahairaia karana idia badulaia be hoa gauna lasi. Dirava danu ia badu. Idau negai, Dirava ese Israel bese taudia ia gwau henidia, badina unai kara idia karaia dainai. Iehova be peroveta tauna Esekiel ena amo ia gwau: “Edia herahera mai hairaidia idia heagilaidia, bona edia kaivakuku dika rohorohodia bona edia gau dika hereadia be unai gaudia amo idia karadia.” (Esekiel 7⁠:20) Unai dainai, hereva momokani idia ura henia taudia be mai edia aonega ida inai Bible sisibana idia badinaia: ‘Kaivakuku umui rakatania.’​—⁠1 Korinto 10⁠:14.