Tanobada Sivarai Ena Anina
Sibona ena Ura
Bese gunalaia tauna Adolf Hitler be lagani 1933 ai siahu ia abia murinai ia bona Katolik Dubu be gwauhamata idia karaia. Unai gwauhamata dainai Hitler be dubu totona kara haida ia karaia durudia totona, bona dubu be German bisop taudia idia abia dae gwauraia neganai Hitler dekenai gwaumaoro idia henia unai taudia idia abia dae eiava lasi totona. To unai gwauhamata idia karaia kahana rua taudia be namo bada idia abia, a? French Katolik encyclopedia buka matamatana ese unai henanadai ia haerelaia.
Ia gwau: “Pope Pius XI . . . ia laloa German dubu do ia dika garina gau badana be gwauhamata idia karaia. Unai gwauhamata idia karaia lagani 1933 ai, April bona July huanai. Ena be guna unai gwauhamata dainai Katolik Dubu be heduru bada idia abia, to gabeai Hitler ia durua bada herea, badina Katolik Dubu ese iena gavamani matamatana ia abia dae. Danu, Hitler be nega momo unai gwauhamata ia hamakohia dainai, taunimanima idia gwau pope be unai gwauhamata kavakavana ia karaia neganai Katolik taudia ia koidia bona bisop taudia edia siahu ia kokia.”
Harihari, France bona Germany lalonai, Katolik Dubu idia gwauraia dika badina guna dubu gunalaia taudia edia kara idia haidaua momo dainai. Unai bamona hekwakwanai idia vara dubu gunalaia taudia be Iesu Keriso ena hereva idia badinaia lasi bona ena kara idia tohotohoa lasi neganai. Iesu be ena hahediba korikori taudia ia gwauraia inai bamona: “Idia be tanobada ena lasi, lau hegeregerena, lau be tanobada ena lasi.” (Ioane 17:16) Momokani, dubu gunalaia taudia edia koikoi karana amo politikol orea edia lalo-namo idia dekenai idia tahua, to unai bamona kara be ia durua edia hebamo karana Dirava dekenai do idia hanamoa totona, a? Ena Keristen bamodia ia toretore henidia neganai, Iesu ena hahediba tauna Iakobo ese inai sisiba ia henia: “Bema umui ura tanobada danu umui turana karaia neganai Dirava umui tuari henia noho.”—Iakobo 4:4.
Laki Gadara Idia Lusi
Laki Lotto oi uini diba be hegeregere taunimanima 14 milion amo tamona sibona ia uini diba bamona. To, taunimanima milion momo be hanaihanai gavamani ese ia haginia laki gadara idia karaia, unai hereva be Canada ena niuspepa, The Globe and Mail dekenai idia torea. Unai bamona kara idia tahua neganai, ia hedinarai taunimanima be unai laki gadara idia karaia badina idia ura moni badana idia uini, bona idia karaia badina idia herevalaia momo, idia gwau “gau namona do oi uini diba, to bema tiketi oi hoia lasi gau ta do oi uinia diba lasi.” Laki gadara idia haginia badina idia ura moni bada do idia abia, to idia ura lasi taunimanima momo do idia uini; unai gadara idia habadaia totona naria taudia be dina ibounai idia gwauraia badina idia ura “taunimanima be hanaihanai tiketi do idia hoia.”
Edia gaukara ia kwalimu, a? Oibe! Magasin ta ladana American Health lalonai idia gwau laki gadara idia karaia matamata taudia edia namba ia daekau lao noho, Dr. Durand Jacobs ia gwau laki gadara idia karaia badina “moni bada idia halusia lasi, tiketi idia hoia be auka lasi, bona taunimanima idia gwau unai bamona gadara be ia dika lasi.” Ma ia gwau: “Laki gadara be taunimanima ia hakaua moni gadara ma haida idia karaia hanaihanai totona.” Canada dekenai moni gadara idia karaia hanaihanai taudia edia kara ia tahua tauna ta ia gwau: “Bema taunimanima oi idia hamaoroa laki gadara be moni gadara lasi, unai taudia be idia hevaseha eiava idia be kavakava taudia. . . . Taunimanima be moni milion momo idia negea laki gadara idia ura uinia dainai. Unai be moni gadara karana.”
Laki gadara be moni ura henia karana ia habadaia. Dr. Marvin Steinberg, be Connecticut Council on Compulsive Gambling oreana ena presiden, bona ia gwau moni gadara ena hekwakwanai idia abia memero bona kekeni be moni gadara do idia karaia noho totona idia ese moni idia henaoa, sitoa amo idia henaohenao, bona edia dina tubua aniani monina idia gaukaralaia. Aposetolo Paulo ena hereva be idia momokani, ia gwau: “Moni ura henia kara ese dika idauidau ibounai ia havaraia noho. Bona moni idia ura bada taudia haida . . . [idia] lalohisihisi momo, edia mauri idia hadikaia ore vadaeni.”—1 Timoteo 6:9, 10.