Taravatu Mainona ena Anina Korikorina be Dahaka?

DIRAVA ese do ia mailaia tanobada mainona be tanobada ibounai tuari haorea karana eiava niuklia kohu haboua karana sibona lasi. Bible ese unai hereva “maino” ia gaukaralaia dalana amo unai ia hedinarai.

Haheitalai be, Heberu Revareva lalonai (“Taravatu Gunana” dekenai) maino ena hereva be sha·lohmʹ. Genese 37:14 dekenai unai hereva idia gaukaralaia. Unuseniai ruma bese biaguna Iakobo ese ena natuna Iosef ia hadibaia: “Oi itadia, oiemu kakana taudia be idia namo o lasi, bona mamoe be edana bamona. Unai murinai oi giroa mai, oi hadibaia lau.”a Genese 41:16 dekenai unai hereva sha·lohmʹ idia gaukaralaia lou, bona unuseniai idia gwau “maino herevana.”

Unai dainai, Bible ese ia herevalaia mainona ena anina be tuari ia ore sibona lasi, to tauanina goadana ita abia bona ita noho namo. Aiemai magasin gunana ta dekenai ia hahedinaraia taunimanima idia hegeregere lasi maino mailaia ena dala idia davaria totona. Iesu Keriso, “Maino Lohiana” sibona be unai hekwakwanai do ia kokia diba bona tanobada dekenai maino korikori do ia mailaia. (Isaia 9:​6, 7) Bible ena peroveta hereva Salamo 72:​7, 8 dekenai, unai tauna ena lohia dalana ia herevalaia dalana oi laloa: “Iena nega lalonai kara maoromaoro tauna do ia tubu, bona maino bada herea do ia noho ela bona hua do ia ore. Bona davara ta amo ela bona davara ta, do ia lohia; Sinavai Badana ela bona tanobada dokodia danu.” Unai oi laloa, tanobada ibounai dekenai gorere be lasi, taunimanima be dika do idia abia lasi bona do idia noho namo! Politikol taudia ese idia karaia maino gwauhamatana ta ese unai do ia havaraia diba lasi. Dirava ena Basileia sibona ese do ia karaia, bona ma gau haida do ia havaraia diba danu. Bible ese gabeai do ia mai tanobada mainona ena peroveta hereva ia gwauraia. Namona be unai haida ita laloa sisina.

Tanobada Ibounai ena Tuari Kohu Do Idia Negea​—Dirava ena Dala Dekenai!

Salamo 46:​8, 9 ia gwau: “Umui mai, Iehova ena gaukara umui itaia; hoa karadia tanobada dekenai ia karaia vadaeni. Tuari ia hadokoa ela bona tanobada dokona. Peva ia hamakohia bona io ia hakwaidua; kariota na lahi dekenai ia araia.” Unai hereva “peva,” “io,” bona “kariota” be tuari kohudia idia laulaulaia herevadia. Unai dainai, Iehova ese tuari kohudia hamaragia eiava negea karana sibona do ia karaia lasi. Ia ese niuklia tuari gaudia, ipidi badadia, tank, gabu daudau idia siaia bomu gaudia, bomu maragidia, plestik hapoua gaudia, ipidi latadia, ipidi kwadogidia​—tanobada mainona idia hadikaia diba gaudia iboudiai do ia negea momokani!

To tuari kohu sibona ese tuari idia havaraia lasi. Nega momo, tuari ia vara badina taunimanima idia badu, idia mata-ganigani, eiava idia dagedage dainai. (Iakobo 4:​1-3 danu hahegeregerea.) Unai dainai, Dirava ena Basileia ese unai tuari ena badina do ia kokia, ia ese taunimanima edia kara dikadia ia kokidia neganai. Edena dala ai? Tanobada ibounai dekenai taunimanima iboudiai hadibaia dalana ta amo. “Tanobada ibounai be Iehova diba maorona amo dohore ia honudae, davara ia honudae hegeregerena.”​—Isaia 11:9.

‘Iehova ena diba maorona idia abia’ dainai, taunimanima be bese idauidau dainai do idia hepapahuahu lasi, do idia badu lasi, eiava do idia hekokoroku lasi. (Ioane 6:45) “Dirava ese taunimanima edia toana ia laloa lasi,” bona tanobada taudia be iena kara do idia tohotohoa. (Kara 10:34) Basileia ese bese idia hepapahuahu dalana do ia kokia ia ese bese edia tano hapararaia maka ia kokidia neganai. ‘Davara ta amo ia lao davara ta, bona tanobada dokona amo ia lao tanobada dokona ai,’ taunimanima iboudiai be Keriso ena lohia dalana do idia abia dae mai moale danu.​—Salamo 72:8.

Unai bamona mainona ia noho daudau totona, Basileia ese tanobada ena sivarai lalonai, taunimanima ia hapararadia bada gauna ta do ia kokia danu: unai be tomadiho koikoi. (Sefania 2:11) Taunimanima iboudiai be lalo-tamona dekenai Dirava korikori do idia tomadiho henia. (Isaia 2:​2, 3) Tanobada ibounai tadikaka oreana do ia noho!

Ruma Bese Dekenai Ia Noho Mainona

To, bema ruma bese dekenai taunimanima hadikaia herevadia, bona badu herevadia idia gwauraia hanaihanai, tanobada mainona ena kara be lasi, ani? Ruma bese momo be hari inai negai unai bamona idia noho. Ma ruma bese haida be toana aukana amo edia badu dikana idia hunia.

Unai dainai, namona be maino korikorina ese ruma bese dekenai maino ia havaraia danu. Basileia ena hadibaia dalana amo, tatau bona hahine do idia hadibaia idia kara heheni mai lalokau bona hemataurai dekenai. (Kolose 3:​18, 19) Natudia do idia hadibaia ‘gau iboudiai dekenai edia tama sina idia kamonai henidia’ totona. (Kolose 3:20) Gwau-edeede natudia do idia noho lasi edia tama sina dekenai lalo-hekwarahi idia henia totona. Kara badana be kamonai bona heduru heheni karana. Natudia ita itaia neganai bona idia danu ita noho neganai do ita moale.

Hari inai negai, moni dekenai idia hekwarahi dainai, ruma bese momo be mai edia metau, badina nega momo tama sina ruaosi be moni gaukara ena metau idia abia. To Keriso ena lohia dalana henunai, ruma bese taudia be moni ena metau bada hereana do idia abia lasi​—rent moni bada, mortgage moni bada, takisi moni bada, gaukara lasi ena metau. Idia moalelaia diba gaukaradia momo do idia noho. Bona idia iboudiai be ruma idia abia diba. Isaia 65:​21-23 ese unai hereva ia gwauraia bada: “Bona dohore idia ese ruma do idia haginidia, bena do idia noholaidia; . . . Ruma do idia haginidia bena idauna ta ese do ia noholaidia lasi; bona do idia hadohado bena idauna ta ese do ia ania lasi. . . . Lau abia hidi taudia ese edia imana edia gaukara ena anina ibounai do idia abia. Do idia hekwarahi kava lasi, bona edia natudia idia havaradia, dika idia abia totona lasi; badina be idia be Iehova ena abia hidi taudia, bona edia natudia danu idia ida.”

Unai oi laloa sisina. Oi ia hadikaia lasi gabuna dekenai do oi noho! Hanua dekenai oi itaia gaudia, oi kamonai gaudia, bona oi bonaia gaudia ese oi do idia hadikaia lasi! Oiemu tano namona dekenai oi noho​—ia hegaegae namonamo bona ia toana ia namo tanona unai. Hodahoda goevana oi hahodia diba; hari inai nega ena regerege momo gaudia do oi kamonai lasi, to oiemu taiana ia moalelaia tano gaudia edia regerege sibona. Momokani, hari inai negai taunimanima haida be unai gaudia haida idia moalelaia diba. To Dirava ena Basileia henunai, taunimanima iboudiai be maino bona noho namona do idia moalelaia. Ogogami taudia, hitolo taudia, bona idia noho dika taudia be do idia noho lasi.​—Salamo 72:​13, 14, 16.

Ma danu, Bible ia gwauhamata “kara dika taudia be tanobada amo do idia utudia oho.” (Hereva Lada-isidia 2:22) Unai anina be taravatu utua karadia do idia ore. Bema oiemu natuna maragina ta do ia lao gadara, do oi lalo-hekwarahi lasi ta ese ia hadikaia eiava ta ese do ia henaoa, eiava inuinu kekero taudia ese motuka idia taria kerere dainai do idia hadikaia, eiava drag dikadia idia ania kava taudia ese do idia haberoa. Oiemu natudia be maino bona noho namona dekenai do idia gadara.

Maino bona Oiemu Tauanina ena Goada

Oiemu tauanina ena goada danu ita laloa. Paradaiso ena toana ese kensa gorere ena hisihisi eiava roki ena hisihisi ia kokia diba lasi. Unai dainai, maino korikori ena anina be gorere bona mase idia ore be namo. Unai bamona ia vara diba, a? Tanobada dekenai ia noho neganai, Iesu Keriso be nega momo ia hahedinaraia ia be mai ena siahu taunimanima edia gorere kokia totona. (Mataio 8:​14-17) Guba amo Keriso be tanobada ibounai dekenai hoa karadia do ia karaia diba! Bible ia gwau: “Unai neganai mata-kepulu taudia edia matana do idia kehoa, bona taia-kudima taudia edia taiana do idia kehoa. Unai neganai aena dika tauna do ia raka daekau dia bamona, bona mu tauna ena malana do ia boiboi mai ena moale ida.”​—Isaia 33:24; 35:​5, 6.

To Keriso ese taunimanima edia hisihisi haorea karana be unuseniai do ia hadokoa lasi. Aposetolo Paulo be Keriso ena lohia dalana inai bamona ia herevalaia: “Badina be Keriso ese gau ibounai do ia biagua, ela bona Dirava ese ia dekenai idia tuari taudia ibounai iena aena henunai do ia atodia. Ia dekenai idia tuari taudia ibounai ia ese ia haorea murinai, Dirava ese mase danu do ia haorea.” (1 Korinto 15:​25, 26) Anina be matamana negana amo, taunimanima dekenai mase ese ia havaraia hisihisi iboudiai do ia kokia. Iesu Keriso sibona ia hereva hegeregerena: “Nega ta do ia mai, mase guria gabu dekenai idia noho taudia ibounai ese [Keriso ena] gadona do idia kamonai. Vadaeni guria gabu dekena amo do idia toreisi.” (Ioane 5:​28, 29) Unai amo, gunaguna hisihisi dekenai idia mauri bona idia mase taunimanima milion momo be mai edia dala gabeai do ia mai tanobada mainona idia abia totona.

Oi ese do oi abia diba, a? Iehova ena Witness taudia be oi idia hagoadaia Bible ena hereva unai dekenai oi diba totona.b Tanobada mainona ena helaro be namo herea, do ia vara momokani, bona ita laloa lasi be namo lasi. Bema oi gaukara goadagoada bona Dirava ena Hereva dekenai diba oi abia bona oi badinaia, “maino ia henia Diravana be umui danu do ia noho”​—ela bona hanaihanai!​—Filipi 4:9.

[Footnotes]

[Picture on page 5]

Iehova be tuari do ia haorea “ela bona tanobada ena tano dokona ai”

[Credit Line]

USAF Official Photo

[Picture on page 6]

Tatau bona hahine do idia hadibaia maino dekenai idia kara heheni totona