Tanobada Sivarai ena Anina

Lalohadai Gunana, A?

Adelaide, Australia dekenai, Anglican dubu tauna ta ia gwau bema haida idia sisiba tau-anina gadaralaia karana ese sihari kava karana eiava heudahanai dalana ia kehoa, unai be lalohadai gunana bona unai be Keristen lasi herevana ta. Ia ese mahuta hebou karana ia stadilaia, bona ia gwau bema tau bona hahine idia maoheni vadaeni bona idia mahuta hebou idia do headava lasi neganai, unai be reana kara dikana lasi. Unai stadi herevana ia gwau tatau be tatau danu idia mahuta hebou karana be nega haida ia hegeregere. Brisbane ena Courier Mail niuspepa dekenai, Australia ena Uniting Church ena hereva tauna ta ia gwau “unai ripoti ena hereva badadia danu ai lalo-tamona.”

To, Bible ia gwau Dirava ena ura be “heudahanai karadia do umui rakatania momokani”, bona “lebulebu taudia, kaivakuku idia tomadiho henia taudia, heudahanai taudia, eiava lebulebu hahine edia kara idia tohotohoa tatau, eiava tatau ese tatau danu hemarai karadia idia karaia taudia . . . ta lasi be Dirava ena Basileia do ia davaria.” (1 Tesalonika 4:​3, 4; 1 Korinto 6:​9, 10) Momokani, Bible be Dirava ena lauma ese ia havaraia Herevana idia abia dae taudia idia diba unai buka ena hereva mahuta hebou karana dekenai be aonega ibounai, gau ibounai Havaraia Tauna ena lalohadai. Bible ena taravatu idia badinaia taudia edia noho namo ese ia hamomokania taunimanima ese idia gwauraia lalohadai gunadia be ruma bese ena noho ia naria namonamo, bona sihari kava karana ese ia havaradia gorere dikadia bona lalo-hisihisi idia koua diba.

Koua Dalana Hereana

Drag ania kava karana be hekwakwanai badana. Unai dainai, edena dala be namo matamata taudia ia koua drag idia ania kava lasi totona? Brazil ena niuspepa, O Estado de S.Paulo dekenai, France ena profesa bona darana ena doketa tauna ta, Claude Olievenstein ia gwau namona be hakaua dalana bona lalokau ena heduru idia abia. Ia gwau: “Hari inai negai, taunimanima be drag idia herevalaia neganai, idia be polisi, kota, bona sikuli edia gaukara idia herevalaia. To, gau badana be ruma bese ese [drag ania karana] idia koua. . . . Natudia momo idia diba lasi tamana ena dagi be dahaka. Tamana ia noho lasi bamona; hegeregere ena dagi ia negea bamona.”

Ruma bese ese drag ania karana koua dalana be gau badana ena badina ia herevalaia neganai, Doketa Olievenstein be ma ia gwau: “Hari inai negai, taunimanima be moni idia laloa bada, bona idia hemarai mauri ena taravatu idia badinaia totona. Bema drag idia ania dainai, iseda natudia be kara idauna idia hahedinaraia, unai anina be mauri ena taravatu ita hadibaia lasi. Iseda nega lalonai idia mauri noho taudia idia lalo-auka, idia hebogahisi lasi, bisinesi sibona idia laloa. Taunimanima be mauri ena hekwarahi sibona idia laloa.”

Superinteressante magasin dekenai, United States ese taunimanima idia henanadai henia ena sivarai dekenai, tama sina edia dagi ena anina bada ia hamomokania. Unai magasin ia gwau: “Sikuli dekenai idia kwalimu natudia momo edia ruma bese dekenai tama sina ese edia dagi ena siahu idia gaukaralaia, bona mauri ena taravatu natudia idia henia. Bona natudia be unai taravatu ena maka lalonai gaukara idauidau idia karaia diba. Unai bamona ruma bese dekenai, drag bona inuinu momo idia karaia natudia be momo lasi.”

Mai badina namona danu, Bible ese tama sina ia sisiba henidia: “Oiemu natuna oi sisiba henia, bena ia ese laga-ani do ia henia oi dekenai, bona oiemu lalona do ia hamoalea.” (Hereva Lada-isidia 29:17) Oibe, Bible ena amo sisiba idia henia neganai, tama sina be drag ania kava karana idia koua diba bona ruma bese ena noho idia hanamoa diba.