Tanobada Kopina bona Hodahoda Ia Dika Ia Lao

‘Bema kara ta ita karaia haraga lasi, tanobada ibounai dekenai tanobada ena moni gaukaralaia dalana bona taunimanima edia noho do ia dika’

UNAI be Lester Brown, Worldwatch Institute ena presiden ena hereva. Worldwatch Institute ese tanobada kopina bona hodahoda ia stadilaia. Lagani iboudiai “tanobada toana” ena ripoti idia karaia bukana lalonai unai bamona ia hereva.

Brown ia gwau tanobada kopina bona hodahoda ia dika ia lao noho. Bema hodahoda hadikaia dalana, medu lasi negadia, uda edia au utua ore karana, tano ia ore ia lao dalana, bona taunimanima idia hutuma idia lao dalana edia hekwakwanai ita hanamoa lasi, “tanobada ena moni gaukaralaia dalana bona taunimanima edia noho do ia dika.” Ia gwau lagani 1984 ena nega amo, tanobada aniani haboua karana taunimanima ta ta iboudiai totona be 14 pesen amo ia diho bona hanaia lagani 15 lalonai tubutubu gaudia edia aniani ia diho momokani.

Brown be danu ia gwau: “Nega be hegeregere lasi kara ita karaia totona. . . . Namona be lagani 1990 ia lao lagani 2000 edia huanai kara ta ita karaia. Unai murinai ita karaia negana be hegeregere lasi. . . . Bema ita be medu lasi negana murinai aniani ma ita haboua toho, do ita hoa bada herea. Unai neganai do ita davaria iseda aniani be lasi ma tano haida dekenai ita siaia totona, bona aniani ena davana do ia bada nega rua eiava nega toi bamona. Tanobada ena moni gaukaralaia dalana do ia dika momokani dainai do ita laloa oela idia hegeregere lasi negana ena dika be dika momokani lasi.” Danu ia laloa: “Africa ena gabu haida dekenai ia dika vadaeni. Unuseniai be dala lasi idia hanamoa totona. . . . Latin America be reana hekwakanai bada do idia abia.”

Unai bamona gaudia idia vara neganai, unai be Bible peroveta herevadia bamona. Ia ese doe, gorere, tuari, bona mase, ia herevalaia bona iseda nega lalonai taunimanima be “tanobada idia hadikaia vadaeni.” Iesu ia peroveta “hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari.” Unai anina be hari nega dikana do ia ore, bona Dirava ese ia havaraia tanobada matamatana do ia vara.​—Apokalupo 6:​1-8; 11:18; Mataio 24:21; 2 Petero 3:​10-13.