Tanobada Sivarai ena Anina

Dahaka Dainai Ita Haroro?

Dubu dekenai idia lao taudia be haroro gaukara idia karaia lasi dainai, taunimanima haida idia laloa dubu badadia edia memba taudia ena namba ia diho ia lao. Lagani 1988 ai, United Church of Christ ena dubu taudia be unai hekwakwanai dainai idia lalo-hekwarahi bada, bona idia gwau namona be lagani 4 lalodiai idia goada karaia “haroro gaukara bona dubu ena memba taudia ena namba ia daekau dalana” idia laloa bada totona.

Magasin ta, ladana St. Petersburg Times, dekenai ia gwau United States dekenai, dubu badadia, hegeregere, Presbyterian Dubu bona Episcopal Dubu be unai gaukara idia laloa bada danu. To, United Church of Christ ena dubu 200 bona ma haida dekenai, memba taudia 1.6 milion idia henanadai henia neganai, momo herea idia ura lasi edia abidadama karana ma haida dekenai idia harorolaia. Memba ta ia gwau: “Bema kara namo ita karaia, dahaka dainai ma haida ita hadibaia?” Ma ta ia gwau: “Bema emu mauri lalonai oi hahedinaraia oi be abidadama tauna, oi herevalaia be anina lasi.”

To, ena buka, ladana American Mainline Religion lalonai, torea tauna ta Wade Clark Roof, ia gwau “taunimanima ese edia tomadiho lauma gaudia edia mauri lalonai idia kikilaia be gau badana edia abidadama karana ia goada noho totona.”

Bema Dirava ia moale taunimanima ese “kara namo idia karaia” bona idia be mai edia “abidadama” sibona dainai, dahaka dainai aposetolo Paulo ia gwau: “Bema Sivarai Namona lau harorolaia lasi neganai, madi, lau be dika momokani!” Roma lalonai ia bamoa kamonai taudia dekenai ia gwau: “Bema oiemu uduna dekenai Iesu oi gwauraia ia be Lohiabada, bona oiemu kudouna dekenai do oi abia dae Dirava ese mase dekena amo Iesu ia hatorea isi, vadaeni do oi mauri. Badina be iseda kudouna ena abidadama dekena amo Dirava vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria.”​—1 Korinto 9:16; Roma 10: 9, 10.

Sihari Kava Habadaia Karana

Profesa Mamoru Fukutomi ia gwau Japan dekenai idia halasia komik buka idauidau, natudia idia duahia gaudia danu, 1,100 amo 560 bamona be mahuta hebou karana idia hahedinaraia. Tokyo dekenai, unai tau be gaukara ta ia gunalaia, unai gaukara be ia ese hua tamona lalonai taunimanima idia hoia magasin 390 bona ma buka haida idia hahedinaraia gaudia ia tahua.

Profesa Fukutomi ia gwau: ‘Unai magasin edia laulau momo idia hahedinaraia tatau be hahine edia lalona idia ania [idia mahuta hebou totona] bona hahine be idia ura lasi, to gabeai, mai edia ura danu idia ura karaia.’ Niuspepa ta, ladana The Daily Yomiuri dekenai, ia gwau Japan dekenai, taunimanima idia hoia momo magasin edia laulau 6,861 amo, kahirakahira 80 pesen ese “hahine edia tauanina idia hahedinaraia sihari kava urana havaraia totona.” Unai laulau dekenai, hahine haida be “piripou, rata kou, digudigu dabua idia karaia, eiava kopi kavakava dekenai idia noho” bona laulau 100 100 amo 40 40 sibona be mai edia dabua, to tatau edia laulau 100 100 amo 75 75 be mai edia dabua.

Memero kekeni be unai bamona kara idia raraia momo neganai dahaka do ia vara idia dekenai? Bible buka Hereva Lada-isidia dekenai, tauhau ena sivarai ia gwauraia, ia gwau ia be “darana lasi” badina ariara hahine ena ruma dekenai ia ura vareai. (Hereva Lada-isidia 7:7) Bona ariara hahine be edena bamona? Bible ia gwau: “Nega haida ariara ai, ma nega haida hoihoi gabuna ai, ariara edia daiguni ibounai dekenai ia naria noho. Ia ese unai tauhau ia rosia.” (Hereva Lada-isidia 7:​8-13) Hari inai negai, buka dekenai idia torea gaudia ese ‘memero bona kekeni idia naria noho,’ edia lalona idia veria totona. To, Bible ena sisiba be inai: “Emu lalona be do ia raka lao unai hahine ena dala ai, ena dala lalodiai do oi raka lasi.”​—Hereva Lada-isidia 7:25.

Keristen “Namona” be Daika?

“Bema Keristen tauna ta be dala ia abia hidi tuari tauna ai do ia lao totona, eiava ena lalona ia hegeregere lasi dainai, unai dala ia dadaraia, namo lasi ia gwau ma Keristen taudia haida ia hanaia idia abia hidi dalana be idau dainai, eiava ia gwau idia be Keristen momokani lasi taudia.”

Evangelical Lutheran Church Council, Germany dekenai, ese July 1989 ai, unai hereva idia halasia. Dahaka dainai? Badina tau badadia idia gwau, dubu lalonai, taunimanima haida idia laloa tuari karana idia dadaraia be Keristen “toana momokani,” to tuari dekenai vareai karana be Keristen toana lasi. Dubu ena kaunsolo taudia idia gwau, momokani Keristen taudia be tuari idia haorea diba bema “ta ta iboudiai be dagedage karadia idia dadaraia,” to idia gwau maino havaraia totona, tuari orea ena goada amo dagedage idia koua diba danu.

Edward Gibbon ena buka History of Christianity lalonai, ia gwau Keristen taudia ginigunadia be “gavamani eiava ami dekenai idia vareai diba lasi” bona “bema Keristen taudia be ami dekenai idia vareai, kota naria eiava lohia dagina idia abia, unai ese edia hahelaga gaukara do ia hadikaia.”

Vadaeni, daika be Keristen “namona” be henanadai badana lasi, to gau badana be ita diba bema tau ta be Keristen lasi dalana dekenai ia raka, ia be Keristen tauna lasi. Paulo ia gwau: “Momokani ai be tanobada dekenai ai noho, to aiemai tuari be tanobada taudia edia tuari bamona lasi. Badina be aiemai tuari gaudia be tanobada ena tuari gaudia bamona lasi. Lasi, to Dirava dekena amo ia mai siahuna ai ese ai gaukaralaia, ia ese tanobada ena siahu ia haorea diba.”​—2 Korinto 10:​3, 4.