“Gabeai Iena Tau Dekenai Ia Henia Danu”

GAIGAI ese Eva ia hereva henia bona ia koia Dirava ia gwau-edeede henia totona, unai neganai Adam ia noho danu, a? Bible be unai bamona ia vara ia hahedinaraia lasi. Genese 3:6 lalonai, ia gwau Eva ese “au ena huahua ia abia, bona ia ania. Bena gabeai iena tau dekenai ia henia danu.” (NW) To, Bible haida dekenai, anina idauna idia hahedinaraia. King James Version Bible lalonai, unai siri idia torea inai bamona: “Ia ese au huahua ia abia, bona ia ania, bona adavana ia noho danu, unai dainai ia henia; bona ia danu ia ania.”

Unai siri lalonai, hari hereva “henia” Heberu gado amo idia hahanaia, bona Heberu gado ai unai hereva badinai “bona” [Heberu gado, wau] ia noho. Unai dainai, hari New World Translation Bible be nega momo unai Heberu gado herevana wau, Genese 3:6 dekenai, ena anina korikori ia henia; ena anina be “bona” sibona lasi, to ena anina danu be “murinai”, “unai dainai,” bona “gabeai.” Hari New World Translation Bible ese unai siri ia hahanaia maoromaoro unai.

Gaigai bona Adam adavana idia herevahereva neganai, bona gaigai uduna amo unai gwau-edeede lauma dikana ese koikoi herevana ia gwauraia neganai, oi laloa Adam do ia kamonai kava bona hereva ta do ia gwauraia lasi, a? Bible ia tahua Germany tauna ladana J.P. Lange ese unai hereva ia dadaraia, ia gwau: “Koikoi karana ia vara neganai, ita gwau diba lasi tau ia noho danu bona ia hereva lasi.” Bona unai hereva, “ia noho danu”, ena anina ia gwauraia neganai, Iuda tauna ladana B. Jacob, ia gwau unai ita gwau diba lasi unai ena anina be “(gaigai ia koia neganai eiava au huahua ia ania neganai) tau be ia danu ia noho.”

Eva ese gaigai ia hereva henia neganai, ia hahedinaraia ia diba Dirava ia gwau au huahua do ia ania lasi, badina ena adavana ia hamaoroa vadaeni. (Genese 3:3) Adam be Eva ena kwarana dainai, unai hereva ia hadibaia neganai, ena maduna ia hagugurua. To, Diabolo ese Dirava ia karaia kwarana dalana ia dadaraia, bona mai aonega danu ia naria ela bona Eva be sibona ia noho. Gabeai, Eva ia haere, ia gwau: “Gaigai ese lau dekenai ia koikoi, bona lau ania.” (Genese 3:13) Eva ese koikoi herevana ia abia dae dainai, gaigai ia koia diba, to unai ese ena kerere ia hamaoromaoroa diba lasi. Iena kara be haheitalai ita dekenai, bema ita diba Iehova ese kara ta ia ura henia lasi to ita karaia, gabeai sori herevana be unai dika ia hamaragia lasi.​—1 Timoteo 2:14.