Tanobada Sivarai ena Anina

Homosexual Taudia​—Dirava Vairanai Edia Gini be Taunimanima Iboudiai Hegeregerena, A?

Queensland State, Australia dekenai, tatau be tatau danu idia mahuta hebou (homosexual karadia) be taravatu​—bema ma taunimanima haida vairanai idia karaia lasi bona idia ura idia karaia be herevana. Vanegai, dubu oreana ta unai gabu dekenai ese unai taravatu idia gwauraia dika; idia ura homosexual karadia idia taravatulaia lasi.

Niuspepa ta, The Courier-Mail, lalonai ia gwau, unai orea, Joint Church Social Justice Group, ena memba taudia be Anglican, Roman Katolik, Lutheran, Baptist, bona Uniting dubudia bona Quakers (Society of Friends) dubuna amo idia mai. Idia gwau hari idia noho taravatudia be diba lasi dainai idia karaia bona taunimanima haida idia dadaraia karana. Idia gwau: “Unai lalohadai ai abia badina ai abidadama henia gauna be taunimanima iboudiai edia gini Dirava vairanai be tamona bona namona be taravatu vairanai edia gini be tamona danu. Aiemai lalohadai be homosexual tauna ta be taunimanima korikorina ta, homosexual lasi tauna hegeregerena.”

Momokani, taunimanima iboudiai idia vara neganai ta ese ta ia hanaia lasi, to Dirava ese homosexual karadia edena bamona ia lalohadailaia? Bible lalonai homosexual karadia iboudiai ia gwauraia dika bona ia gwau idia ese taunimanima edia mauri ia hadikaia, bona Dirava ese ia ura henia lasi bona edia dokona be mase. Idau negai Israel tanona dekenai sibona lasi, to Keristen taudia edia negai danu unai be momokani. (Levitiko 18:22; Roma 1:​26, 27) Bible ese ia hahedinaraia goevagoeva unai kara idia dika, bona taunimanima ese ena hereva ena anina idia haidaua be anina lasi. Bible ia gwau: “Lebulebu taudia, . . . lebulebu hahine edia kara idia tohotohoa tatau, eiava tatau ese tatau danu hemarai karadia idia karaia taudia . . . ta lasi be Dirava ena Basileia do ia davaria diba.”​—1 Korinto 6:​9, 10.

Keristen taudia korikoridia ese dala idia tahua lasi homosexual karana idia taravatulaia lasi totona, to idau, unai ladana hadikaia karana dekenai idia guia taudia idia hagoadaia Dirava ena Hereva momokanina idia abia dae bena unai kara idia rakatania totona.

Rara Atoa Hanai Ena Dika Idia Do Noho

Diba tahua taudia haida idia davaria American Red Cross oreana ese rara dikana ia davaria neganai, dala maorona ia badinaia lasi, to nega handred handred ai unai rara ia gaukaralaia kerere. United States dekenai, lagani ta ta iboudiai rara unit 12 milion ia lao 15 milion idia gaukaralaia, bona unai rara unit rua rua iboudiai amo kahirakahira tamona tamona be American Red Cross oreana amo idia abia. Bema rara be taunimanima dekenai idia siaia idia gaukaralaia totona bena gabeai idia davaria unai rara lalonai gorere ia noho, gavamani ena taravatu be FDA (Food and Drug Administration), federal gavamani ena orea ta, idia hadibaia. To The New York Times lalonai ia gwau, federal inspekta ia gwau Red Cross oreana be nega momo unai bamona ia karaia lasi. Ia gwau edia buka ia tahua neganai, ia davaria nega 380 rara mai gorerena idia gaukaralaia kerere, to gavamani idia hadibaia lasi. Danu, reana rara henia karana dainai taunimanima 228 ese AIDS gorerena idia abia, to inspekta ia davaria Red Cross oreana ese unai taudia 4 sibona edia sivarai be FDA dekenai ia hadibaia.

Taunimanima momo idia laloa noho rara ese taunimanima ia hamauria, to lagani ta ta iboudiai taunimanima tausen tausen idia mase, rara idia abia dainai. To Dirava idia tomadiho henia momokani taudia ese iena taravatu rara dekenai idia badinaia, bona nega tamona unai ese idia ia naria rara amo dika idia davaria lasi totona. Dirava ena hahegani be inai: “[Rara] umui ania lasi, tano dekenai umui bubua, ranu umui bubua bamona . . . umui bona emui natudia umui murinai do idia mai taudia, emui mauri do ia namo totona, badina kara maoromaoro do umui badinaia dainai.”​—Deuteronomi 12:​23-25.

Pope ese Tuari Gaukara Ia Herevalaia

Lagani 1989 ai, Cecchignola garrison (tuari taudia edia gabu), Rome dekenai, pope be tuari orea cadet taudia 7,000 bona ma haida danu idia hebou. Unai negai, ofisa taudia matamatadia 4 ese unai gabu dekenai idia noho tuari taudia iboudiai edia henanadai be pope dekenai idia henia; ia idia nanadaia tuari gaukarana ese Keristen lalo-goeva ia hadikaia, eiava. Vatican City ena niuspepa L’ Osservatore Romano lalonai ia gwau edia henanadai be inai: “Taunimanima ta ese Keristen dalana ia badinaia momokani diba, bona nega tamona tuari tauna ena gaukara ia karaia namonamo diba, a?” Pope ia haere ia gwau: “Keristen gaukara bona tuari gaukara hatamonaia be auka lasi. Bema tuari gaukarana ita laloa namo, do ita itaia diba ia be gaukara hairaina bona mai anina bada, bona ia be gau namona.”

To ena lalohadai be Keristen taudia ginigunadia edia kara hegeregerena, a? Idia be tuari lalonai idia vareai lasi. Arnold Toynbee be ena buka, An Historian’s Approach to Religion, lalonai, Maximilianus ena sivarai ia gwauraia, lagani 200 C.E. murinai iena abidadama dainai unai tau idia hamasea. Ia ura lasi tuari oreana lalonai ia vareai. Unai dainai, Roma kota taudia idia hamaoroa do idia hamasea. To ia gwau: “Unai gaukara do lau karaia lasi. Ena be lauegu kwarana do umui utua, to Inai Tanobada ena gavamani do lau hesiai henia lasi; egu lalona lau hadaia egu Dirava do lau hesiai henia.” Ena be ia diba ia do idia hamasea, to dahaka dainai ia ura lasi tuari gaukarana lalonai ia vareai? Badina ia laloa Iesu idia badinaia momokani taudia be “tanobada ena lasi,” hegeregere Iesu be tanobada ena lasi bamona. Danu, ia laloa Keristen taudia be lauma dalanai idia tuari, aposetolo Paulo ena hereva hegeregerena, ia gwau: “Aiemai tuari be tanobada taudia edia tuari bamona lasi. Badina be aiemai tuari gaudia be tanobada ena tuari gaudia bamona lasi.”​—Ioane 17:16; 2 Korinto 10:3, 4.