Emu Adavana Oi Laloaboio Lasi!

HEADAVA taudia rua be Kingdom Hall idia rakatania. Ruaosi edia vairana dekenai moale toana ese ia hahedinaraia idia ruaosi be ‘tauanina tamona’ bona lalo-tamona ai Iehova idia tomadiho henia hebou. (Mataio 19:6) To, guna idia ruaosi edia huanai unai lalo-tamona tomadiho dalana be ia noho lasi. Guna unai hahine, ladana Atsuko, be sibona ia lao hebouhebou dekenai. Hebou ia ore murinai ruma dekenai ia giroa mai neganai ena adavana be mai badu danu ia boiboi henia. Ena tau, ladana Kazutaka, be nega ta ia badu dikadika dainai pata mai aniani danu be nega tamona ia abia isi bona ia negea bena aniani iboudiai be tano dekenai idia moru.

Iesu ese ia perovetalaia hegeregerena hereva momokani dainai ruma bese momo be do idia parara. (Mataio 10:​34, 35) To haida, Kazutaka bona Atsuko bamona, be lalo-tamona ai idia tomadiho hebou bona moale idia davaria vadaeni edia ruma bese lalonai. To unai lalo-tamona be ia vara kava lasi. Sibodia hereva momokani ai idia noho adavadia be dahaka idia karaia unai hekwakwanai idia hanaia totona bena edia ruma bese lalonai moale bona lalo-tamona do ia vara? Unai henanadai ita do haerelaia lasi lalonai, namona be ita tahua dahaka dainai orea ai idia vareai lasi adavadia be idia dagedage.

Dahaka Dainai Idia Dagedage?

Atsuko ia gwau: “Hari, lau laloa lou neganai, lau lalo-parara, lau be hebou totona lau raka neganai egu adavana be lau hadibaia lasi.” Madi, sibona ruma dekenai ia noho dainai bona ena hahine ena lao gabuna ia diba lasi dainai, Kazutaka ia lalohisihisi bada.

Dagedage ia havaraia gauna ta be mama. Headava matamata mero ta, ladana Shigeo, be ena hahine ena turana matamatadia dainai ia mama kava momo. “Lauegu adavana be hebou totona ia hegaegae dainai ena huina ia duaria bona toana ia hanamoa neganai, lau laloa sedira ia be ma tau ta dekenai ia lao.” Iena adavana Masako ia gwau: “Ai ruaosi be nega momo ai helai hebou lasi bona ai herevahereva diba lasi. Ena be egu kudouna ai lau ura dikadika ia danu be Keristen ena hereva momokani ia diba, to ena vairana dekenai egu ura korikori lau gwauraia hedinarai lasi.”

Moni gaukara ia karaia lasi hahine ta, ladana Toshiko, ena hemami be Shigeo ena danu ia hegeregere. “Lauegu adavana be Iehova ena Witness taudia danu ia stadi matama neganai, lau dagedage badina ena nega bada ia henia kongregesen ena gaukara dekenai. Ia lao murinai, kekero muramura lau inua egu hemami dikana hanamoa totona.”

Toshiko ena kara ese dagedage ena anina ma ta ia hahedinaraia​—sibona ia noho dainai ia lalohisihisi. Guna idia dagedage adavadia momo be unai bamona hemami idia abia edia adavana be hebou dekenai idia lao neganai. Tau ta ia gwau: “Sibona ruma dekenai lau noho bona egu hemami be hegeregere taunimanima ibounai ese lau idia negea momokani.” Ma ta ia gwau: “Egu hemami be hegeregere egu adavana bona natudia ese lau idia rakatania vadaeni.” Tatau idia hemarai edia ura korikori idia gwauraia edia hahine vairanai, hegeregere, inai bamona idia hereva be auka sisina: “Lau ura lasi sibona lau noho, mani emu kara, oi lao lasi, ita noho.” Unai dainai nega momo idia ese hahine ena tomadiho lao heni karana idia koua toho.

Nega haida guna ia dagedage lasi adavana be gabeai ia dagedage, badina ena turana bona varavara taudia ese ena lalona idia ania dainai. Asia tanodia ai, hahine be “ena adavana sibona danu ia lalo-tamona be hegeregere lasi, to tau ena bese ibounai ese ia do idia abia dae.” Unai dainai varavara edia lalo-ani ese hepapahuahu ia havaraia diba. Takashi ena adavana be Keristen hahine dainai ia ura lasi Takashi ena bese danu ia tomadiho hebou edia Buddhist pata helagana vairanai. Takashi ia gwau: “Bona ma hekwakwanai badana ta be aiemai noho gabuna be daudau lasi egu tamana bona sinana edia ruma amo. Egu sinana ena hereva momo dainai, lau ese egu adavana dekenai hagaria herevadia lau gwauraia bona lau botaia danu.”

Heatu bona botaia karana idia vara anidia be: taunimanima idia herevahereva hebou lasi dainai kara ena anina idia lalo-pararalaia lasi, o mama kava dainai, eiava ta be sibona ia noho dainai ia moale lasi, o varavara edia lalo-ani bona sisiba kerere karadia dainai. Guna ena hahine ia botaia tauna ta ia gwau: “Lau ura lasi egu ruma bese be dubu ta dainai lau halusia.” Ma ta ia gwau: “Ruma dekenai lau ginidae neganai ta ia noho lasi, unai ese lau ia habadua dikadika.” Sedira idia gwau inai lalohadai be maoro: “Egu hereva ese inai tomadiho lao henia karana ia hadokoa lasi, bema lau paisia do ia hadokoa momokani.”

To sivarai namona be hari ita herevalaia headava taudia iboudiai be gabeai lalo-tamona ai idia tomadiho hebou. Bona unai guna idia karaia badu karadia be idia ore vadaeni. To unai bamona hekwakwanai idia davaria vadaeni dainai, bema ma haida edia headava maurina be tomadiho dalanai ia parara dainai badu o dagedage idia davaria neganai, vadaeni, hari ita herevalaidia tadikakadia ese do idia durudia namonamo diba.

Hereva Momokani Ai Gini Goada

Bema oi be ia maloa gwauraia tauna ta oi ura hamauria dainai emu imana oi henia, namona be oi gini goada. Bema oi gini goada lasi neganai, sedira oi do ia veria diho ranu lalonai. Unai hegeregerena, emu adavana durua dalana korikorina be oi sibona be hahemauri hereva momokanina dekenai oi gini goada. Guna ia dagedage tauna ta ia gwau: “Lau dagedage dikadika neganai, egu hahine be emai natudia ia hakaudia idia lao hebou totona. Bema egu hahine ia manoka sisina, sedira do lau laloa ena abidadama be ia goada lasi.”

Kazutaka, guna pata mai aniani danu ia negea tauna, ia kiki dahaka ese ena lalohadai ia haidaua, ia gwau: “Vadaeni, lau ese PMV davana moni lau henia lasi Atsuko dekenai. To unai ese ia bona emai natuna ia koua lasi hebou dekenai idia lao totona badina egu adavana ese sibona ena kohu ta ta ia hoihoilaidia PMV ena davana moni karaia totona. Unai ese lau ia hahemaraia dikadika bena egu lalohadai dikadia bona dagedage karadia iboudiai lau hadokoa. To, lauegu adavana ese lau totona ia rakatania magasin lau duahia hamatamaia.”

Emu Adavana Danu Oi Herevahereva Hebou

Kazutaka ena adavana, Atsuko, ia gwau: “Hari lau lalo-parara, namona be unai neganai lau ese egu adavana lau boiria bona lau hadibaia egu ura be ai ruaosi Bible ai stadilaia hebou. Egu adavana be ia lalo-hekwarahi lau bona emai natudia dainai. Bema unai negai lau be ia danu ai herevahereva hebou, unai lalohadai kereredia momo idia vara lasi.” Oibe, herevahereva hebou karana ese lalo-parara bona aonega ia havaraia. Buka Helaga ena sisiba ia gwau: “Bema palani ta idia herevalaia hebou lasi, do idia kwalimu lasi.” (Hereva Lada-isidia 15:22) Oibe, bema oi ura emu adavana danu oiemu tomadiho ena dala umui “herevalaia hebou,” namona be aonega bona lalo-parara oi gaukaralaia. Bible ia gwau: “Aonega tauna ena kudouna ese ena uduna amo lalo-parara ia hahedinaraia, bona iena bibina ese taunimanima edia lalona ia veria.” (Hereva Lada-isidia 16:23) Bona gau badana ta be mai lalokau danu nega maorona oi abia hidi oi hereva henia totona.​—Kohelete 3:7.

Oi hereva dalana bona emu uduna amo idia mai herevadia oi naridia danu be gau badana. Aposetolo Paulo ena hahegani hegeregerena: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kolose 4:6) Bema oi hereva mai lalo-namo bona mai hemataurai danu neganai, emu adavana ese emu hereva ia koua lasi, to oi do ia hakala henia.

Tatau momo idia ura lasi edia hahine ese idia hadibadia. Unai dainai hahine ese durua dala idauidau idia tahua be namo. Kikuyo ese Watch Tower Society ena magasin bona buka ia gaukaralaia namonamo. Ia gwau: “Egu Noga! magasin ia ginidae neganai, lau duahia guna bena lau itaia edena sivarai ese egu tau ena lalona do idia veria. Vadaeni, unai murinai, lau guriguri Iehova ese dala ia kehoa, egu tau danu unai sivarai ai kikilaia hebou totona.” Unai hahine ese magasin be digu rumana dekenai ia rakatania bona dina iboudiai ia itaia, ena tau be ia duahia, eiava. Bema ia davaria ena tau ese ia duahia lasi neganai, vadaeni, ma magasin idauna ta ia atoa. Harihari, Kikuyo ena tau be kongregesen ena hesiai tauna ta bona pioneer tauna ta danu.

Kara Namo Ena Siahu

To bema emu adavana ia ura lasi tomadiho umui kikilaia hebou, edena bamona? Bema emu adavana be Keristen tadikaka haida ia dibadia, reana ena dagedage kara do ia negea bona Bible do ia stadilaia. Masao, harihari ia be elda ta, be guna Iehova ena Witness taudia dekenai taravatu ia atoa, ena ruma dekenai idia vareai lasi. Ia gwau: “Nega ta egu hahine ese lau ia noia Kingdom Hall haginia gaukara ai lau heduru. Egu kudouna ia hamarerea gauna be inai: taunimanima be davana moni idia abia lasi​—to mai moale danu idia gaukara hebou. Unai kara lau itaia murinai, Bible stadi lau hamatamaia.”

Bema emu adavana ia ura lasi momokani tomadiho dala be taunimanima ta danu ia herevalaia, dahaka oi karaia diba? Aposetolo Petro ia gwau, haida be “Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai sedira do idia laloa namonamo.” Hegeregere, Keristen hahine ese dahaka kara ia hahedinaraia neganai ena adavana ese do ia lalo-namo henia? Petro ia gwau, ‘emui kara goevagoeva bona emui hemataurai kara’ ese idia hahedinaraia “emui hairai korikori be emui lalona dekenai ia noho. Herahera namodia, do idia dika diba lasi gaudia, hegeregere laloa manau, bona dagedage lasi, emui lalona dekenai do umui atoa.”​—1 Petero 3:​1-4.

Keristen hahine ta ese inai sisiba ia badinaia ena tau be taravatu utua karana ai ia vareai neganai. Ena be unai kara ese tau ena ladana ia hadikaia bona ena moni ibounai ia halusia, hahine bona natudia ese maumau hereva ta idia gwauraia lasi ia latanai. Tau sibona ia hereva hedinarai, ia gwau: “Lau diba edia kara namona ena badina korikori be Bible stadi idia karaia dainai.” Unai tau be lagani momo lalonai hereva momokani ia dadaraia, to unai murinai, Bible duahia ia hamatamaia. Edia adavana murinai orea dekenai idia vareai tataudia ma haida idia gwau: “Guna egu hahine ese lau ia doria momo, to lau hoa badina nega sisina lalonai ena kara ia haidaua bona lau ia matauraia ruma ena kwarana bamona.” “Moni gaukara turadia be emai ruma ai idia mai neganai, egu hahine ese ia abidia dae mai moale danu. Ena kara matamata ese lau ia hamoalea.”

Natudia edia kara namona danu ese idia dagedage adavadia edia kudouna ia hamanokaia diba. Guna ena hahine ia dagedage henia tauna ta idia nanadaia, dahaka ese ena lalona ia haidaua, bona ia haere, ia gwau: “Lauegu natuna mero ena lagani be rua mai kahana neganai, bema ia mamia do lau badu dikadika, do ia boiboi badabada, ia gwau: ‘Lalokau be ia dekenai ia kara dika tauna davana ia laloa lasi. Lalokau be mai ena bogahisihisi, haida durua totona.’ ” (1 Korinto 13:​4-7) Unai mero ena sinana ese ia hadibaia namonamo bona ena kara dainai iena tamana ese Buka Helaga ena hereva ia tahua. Tama momo ese Buka Helaga ena hereva idia tahua badina natudia ese idia noia dainai.

Hereva dokonai be inai: moale toana bona moale karaia herevana amo oi ese emu adavana ena lalona oi hanamoa diba. Tau ta ese ena hahine ia lulua bona ia hamaoroa, ena kohu ibounai ia gogoa bona ia diho, do ia giroa lou lasi. To hahine ia hereva, ia gwau: “Lau ura lasi egu natuna eiava moni o kohu ta.” Vadaeni, hahine ese ena furoshiki (Japan taudia edia kohu udaia dabuana) badana ia kehoa bona ia gwau: “Inai tanobada dekenai ma gau ta be lau ura lasi oi lau ura henia hegeregerena. Furoshiki lalonai oi helai. Oi be lau danu nega tamona do ita lao.” Unai neganai tau ese ena dagedage karadia ibounai ia negea, bona Bible ia stadilaia matamaia bona hari ia be elda tauna ta.

Bema oi be hereva momokani ai oi gini auka, emu adavana danu umui herevahereva hebou, oi bamoa namonamo, bona hemataurai kara oi hahedinaraia, vadaeni, reana emu adavana oi durua diba hereva momokani ia abia dae totona. Guna ia dagedage adavana ta ia gwau: “Ena be emu adavana ena toana be hegeregere orea lalonai do ia vareai lasi, to sedira ena kudouna be sisina sisina ia giroa.” Unai dainai oi hesiku lasi. Aposetolo Paulo ena hahegoada herevana edia adavana ekalesia lasi taudia dekenai oi laloa, ia gwau: “Oi ekalesia hahine, sedira bema ia danu oi noho, oiemu tau do oi durua diba ekalesia lalonai do ia vareai, ani? Bona oi ekalesia tauna, sedira bema ia danu oi noho, oiemu hahine do oi durua diba ekalesia lalonai do ia vareai, ani?”​—1 Korinto 7:16.