Umui Hagoadaia Heheni Dina Ia Mai Kahirakahira Neganai
“Umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”—HEBERU 10:25.
1, 2. Dahaka dina ia mai kahirakahira, bona namona be Iehova ena orea taudia edia lalohadai be dahaka?
HARI idia gwau, ‘Oi mai bona mauri ranuna oi abia’ taudia be ma taunimanima iboudiai amo idia gini siri lasi. Iehova ena kwalimu dinana badana ia mai kahirakahira neganai, Bible ena sisiba idia laloa, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi haida ese idia hadokoa bamona. To umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.”—Heberu 10:24, 25.
2 Bible lalonai unai “Dina” idia perovetalaia neganai idia gwau ia be “Lohiabada [Iehova] ena Dina.” (2 Petero 3:10) Iehova be Atai Momokani bona siahu ibounai Diravana dainai, iena dina ese ma dina iboudiai ia hanaia. (Kara 2:20) Iena dina ai do ia hedinarai ia ese guba bona tanobada ibounai ia lohiaia be maoro. Unai dina bada hereana ia mai kahirakahira.
3. Lagani 100 C.E. ia do mai lasi neganai, Iehova ena dina be edena bamona ia mai kahirakahira Keristen taudia dekenai, bona hari inai negai ita dekenai unai dina be edena bamona?
3 Lagani 100 C.E. ia do mai lasi neganai, aposetolo Paulo ese Keristen taudia ia hamaoroa Iehova ena dina ia mai kahirakahira. Mai edia moale ida unai dina idia naria, to unai nega amo ema bona unai dina ia mai neganai lagani 1,900 idia noho. (2 Tesalonika 2:1-3) To herevana, namona be idia lalo-goada badina momokani unai dina do ia mai, bona bema Keristen taudia be mai edia abidadama ida idia haheauka noho, unai dina namona lalonai do idia vareai. (2 Timoteo 4:8) Unai negai, idia laloa unai dina ia mai kahirakahira. Hari inai negai, ita dekenai Iehova ena dina ia mai kahirakahira momokani. Bible ena peroveta herevadia iboudiai idia vara guguru dainai, idia ese unai moale gauna idia hamomokania. Nega sisina murinai, Iehova ese iena ladana do ia hahelagaia ela bona hanaihanai.—Luka 11:2.
Dirava ena Ladana Dainai Idia Lalo-Goada
4. Apokalupo 19:6 ena hereva hegeregerena, daika be King ai do ia lao, bona iena ladana be edena bamona ia hedinarai?
4 Taunimanima iboudiai ese Dirava ena ladana idia laloa momo be maoro. Today’s English Version Bible lalonai ia gwau: “Dirava oi hanamoa. Badina iseda Lohiabada, Siahu Ibounai Diravana, be King!” (Apokalupo 19:6) Unai Bible lalonai ia gwau ia be Lohiabada, siahu ibounai Diravana. Unai Bible bona hari inai negai idia karaia Bible momo ese unai Dirava, King ai ia lao Tauna, ena ladana idia gwauraia lasi. To Dirava ena ladana be “Hallelujah!” (“Iehova hanamoa”) herevana lalonai ia noho, Revised Standard Version lalonai, New International Version lalonai, bona Moffatt ese ia hahanaia gauna lalonai, Apokalupo 19:6 dekenai. Aposetolo edia nega amo ema bona hari, nega momo, Bible idauidau ai, Dirava ena ladana idia hunia. To gabeai do ita itaia, unai ladana dainai Dirava ena orea taudia idia lalo-goada momokani, idau negai bona hari inai negai danu.
5, 6. (a) Dahaka dainai Mose be Iena hereva ia halasia Diravana ena ladana ia diba be gau badana? (b) Mose ese Dirava ena ladana ia gwauraia goevagoeva neganai, Israel taudia edia mamina be edena bamona?
5 Ita laloatao, Israel besena taudia be ‘Aigupito lalonai hesiai gaukara dekenai idia guia bona Atai Herea Diravana ese Mose ia siaia idia dekenai. Vadaeni, Israel taudia idia henanadai daika ese Mose ia siaia. Mose ia lalo-parara idia hisihisi noho Iuda taudia do idia ura diba Mose ia siaia Diravana ena ladana be daika. Esodo 3:15 dekenai ia gwau: “Dirava ia hereva lou Mose dekenai, ia gwau, Israela taudia dekenai dohore oi hamaoroa, oi gwau, ‘Iehova, umui emui sene taudia edia Dirava, Aberahamo ena Dirava, Isako ena Dirava, Iakobo ena Dirava ia siaia lau umui dekenai.’ Lauegu ladana be inai, ia lao hanaihanai, gabeai ia mai nega ibounai lalonai inai bamona lauegu ladana dohore umui gwauraia.”
6 Israel taudia ese unai hereva idia kamonaia neganai, edia lalona ia hagoadaia bada. Iehova, Dirava momokanina tamona, ia gwauhamata do ia hamauridia. Bona idia lalo-goada badina idia be mai edia dala Dirava do idia diba ia ese iena ladana ena anina ia hahedinaraia neganai. Dirava be ia hekokoroku lasi dainai taunimanima amo ia gini siri lasi!—Esodo 3:13; 4:29-31.
7. (a) Edena bamona ita diba Iesu ena hahediba taudia be Dirava ena ladana idia diba? (b) Taunimanima ese Dirava ena ladana edena bamona idia hunia?
7 Iehova ena ladana bona unai ladana ena anina ese Lohiabada Iesu Keriso ena hahediba taudia edia lalona idia hagoadaia danu. (Ioane 17:6, 26) Iesu be tanobada dekenai ia gaukara neganai, ia ese Dirava ena ladana ia hunia lasi, bona ia ura lasi ia sibona ena ladana do ia abia isi Iehova ena ladana ataiai. Keristen tomadiho momokanina idia dadaraia murinai, Dirava ena ladana idia hunia, oibe, unai neganai Keristen taudia idia herevahereva hebou neganai, unai ladana idia gwauraia lasi. (Kara 20:29, 30) Dirava ena Natuna ena ladana idia abia isi bona Tamana ena ladana idia atoa diho murinai, sibodia idia gwauraia Keristen taudia idia davaria, Tamana idia tomadiho henia neganai ia kahirakahira dekenai idia lao lasi, ia be edia Tamana bamona lasi, bona edia tomadiho ese lalona ia hagoadaia lasi.
8. Dirava ena orea taudia ese ladana Iehova ena Witness taudia idia abia dainai, edena bamona idia noho?
8 Unai dainai, lagani 1931 ai, International Bible Student taudia, Watch Tower Society ida idia raka hebou taudia, ese ladana Iehova ena Witness taudia idia abia dae neganai, idia moale dikadika. Unai ese moale sibona ia havaraia lasi, to danu edia lalona ia hagoadaia. Unai dainai unai ladana matamatana idia abia Bible student taudia idia hagoadaia heheni diba.—Isaia 43:12 danu hahegeregerea.
9. Keristen taudia momokanidia be edena bamona Iehova idia laloa, idia be Iena Witness taudia dainai?
9 Bible ia perovetalaia, Keristen taudia momokanidia be Tau Ta ena Witness taudia. Unai dainai, hari inai negai idia davaria ia maoro bema unai tau ena ladana idia hahedinaraia goevagoeva, edia Hakaua Tauna Iesu Keriso be tanobada dekenai ia noho neganai ia karaia hegeregerena. (Apokalupo 1:1, 2) Oibe, idia hahedinaraia unai tau ena ladana be Iehova bona ia sibona ese unai ladana ia abia.—Salamo 83:18.
Moale bona Lauma Helaga Amo Idia Honu
10-12. (a) Gaukara siahuna dainai Iesu idia badinaia taudia be edena bamona idia noho? (b) Lauma helaga ese moale ia henidia dainai, Iehova ena Witness taudia idia ura edena bamona idia kara heheni?
10 Iesu Keriso ese iena aposetolo taudia ia rakatania gwauraia neganai, ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia. Bona do umui kamonai bona laloa noho, lau be hanaihanai umui danu ita noho ela bona tanobada dokona.”—Mataio 28:19, 20.
11 Idia kamonai matamata Keristen taudia be lauma helaga ena ladana ai idia bapatiso be namo. Unai lauma helaga be lauma tauna ta lasi, to ia be Iehova Dirava ena gaukara siahuna, Iesu Keriso ena amo ia gaukaralaia gauna. Pentekoste dinana ai, Iehova Dirava be Iesu ena amo unai gaukara siahuna ia bubua diho Iesu murinai idia raka gwauhamata taudia latanai. (Kara 2:33) Unai lauma amo idia honu, bona unai lauma ena kara, o huahua, ta be moale. (Galatia 5:22, 23; Efeso 5:18-20) Moale ese lalona ia hagoadaia. Namona be hahediba taudia be lauma helaga ena moale amo idia honu. Aposetolo Paulo ena guriguri be namo, ia gwau: “Dirava be iseda abidadama ena badina korikori dainai ia dekenai ita naria noho. Ia ese umui emui abidadama dainai moale momokani bona maino momokani do ia henia umui dekenai. Inai dainai umui ese Dirava ena nega namona umui naria dalana be do ia tubu daekau noho, Lauma Helaga ena siahu dekena amo.”—Roma 15:13.
12 Unai moale havaraia lauma helagana amo idia honu dainai, hari inai negai Iehova ena Witness taudia, “hutuma bada herea” taudia danu, idia ura, oibe, idia ura dikadika, idia hagoadaia heheni, hari nega dikana lalonai idia badu henidia taudia bogaragidiai idia noho neganai. Unai hegeregerena, aposetolo Paulo ia gwau: “Umui emui abidadama ese ia durua lau, bona lauegu abidadama ese ia durua umui. Inai bamona be goada ita abia nega tamona.”—Apokalupo 7:9, 10; Roma 1:12; 14:17.
Badina Momo Dainai Ita Lalo-Goada Diba
13. Dahaka badina dainai ita lalo-goada bona ita hagoadaia heheni be namo?
13 Kara maoromaoro ibounai ia inai henia tauna ese hari nega dikana ia lohiaia, bona ia be ena dirava. Hari, Keristen taudia idia davaria, idia be inai nega dikana lalonai idia noho. Unai dainai idia ura idia hagoadaia heheni, tanobada ibounai dekenai ia noho Keristen kongregesen lalonai idia noho neganai. Iehova Dirava ena lauma helaga be unai kongregesen lalonai ia noho. (Heberu 10:24, 25; Kara 20:28) Badina momo dainai ita lalo-goada be namo. Oibe, ita moale badina diba maorona ita abia Iehova Dirava dekenai, iena Natuna dekenai bona idia gaukaralaia siahuna, lauma helaga, dekenai! Ita moale badina helaro namona idia henia! Unai dainai, iseda tomadiho karana be mai moale bada danu. Aposetolo Paulo ese Heberu Keristen taudia ia hamaorodia, namona be idia hagoadaia heheni bona abidadama dekenai idia durua heheni. Unai kara do idia ‘habadaia be namo, badina Lohiabada ena Dina be kahirakahira do ia ginidae’ dainai. Danu, inai tanobada ena politikol siahudia ese Keristen koikoi tomadihona, bona tomadiho koikoidia ma iboudiai, do idia hadikaia ore neganai, ita hagoadaia heheni be gau badana.
14. Namona be daika daika idia hagoadaia heheni, bona edena bamona idia karaia be namo?
14 Ena be sibona edia kongregesen lalonai elda taudia ese mamoe hagoadaia gaukarana idia gunalaia, to Keristen taudia iboudiai idia hagoadaia heheni be namo, Heberu 10:25 ena sisiba hegeregerena. Momokani, unai be Keristen taudia edia taravatu ta. Bema oi be Keristen kongregesen lalonai oi noho, tadikaka bona taihu edia lalona oi hagoadaia, a? Reana do oi henanadai, ‘Edena bamona unai lau karaia diba? Dahaka lau karaia diba?’ Gau ginigunana be inai: Oi be Keristen hebou dekenai oi mai bona Keristen oreana oi durua neganai, tadikaka bona taihu ma iboudiai edia lalona oi hagoadaia. Unai hegeregerena, oi ese tadikaka bona taihu oi itaia neganai, idia be kongregesen ena hebou dekenai idia mai, unai ese emu lalona ia hagoadaia, ani? Danu, oi ese Keristen haheauka karana oi haheitalaia neganai, unai ese edia lalona ia hagoadaia diba. Ena be hekwakwanai bona hekwarahi oi davaria, to Keristen dalana oi badinaia noho bona oi hesiku lasi neganai, haheitalai namona oi hahedinaraia diba.
Diabolo ena Lalona Hamanokaia Karana Oi Dadaraia
15. Dahaka dainai Diabolo be mai ena “badu dikadika,” bona daika daika ia badu henidia?
15 Ita sibona lasi, to Satana Diabolo danu, ia diba Iehova ena dina ia mai kahirakahira. Apokalupo 12:12 lalonai ia gwau, hari tanobada ia hisihisi noho, “badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” Apokalupo 12:17 ia hahedinaraia, ia badu dikadika henidia taudia be inai: “Idia ese Dirava ena taravatu idia badinaia momokani. Bona Iesu ena hereva momokani idia gwauraia hedinarai, ma idia badinaia danu.” Momokani—Diabolo ia ura iseda lalona ia hamanokaia! Bona ia diba edena dala amo ia karaia toho. Iseda manoka gabudia bona iseda hekwakwanai ia diba, bona unai gau ia gaukaralaia.
16. Dahaka dainai Diabolo ese lalona hamanokaia karana ia gaukaralaia, tuari gauna ta bamona?
16 Dahaka dainai Diabolo ese lalona hamanokaia karana ia gaukaralaia, tuari gauna ta bamona? Badina nega momo unai bamona ia karaia neganai, ia kwalimu. Ena be tau ta ese dagedage ia haheaukalaia vadaeni, to reana lalona hamanokaia karana dainai ia moru. Satana ia ura Iehova Dirava ia gwau henia bona dala ia tahua ia hamomokania Dirava ena hesiai gaukara amo taunimanima ia veria oho diba. (Hereva Lada-isidia 27:11; Iobu 2:4, 5; Apokalupo 12:10 danu hahegeregerea.) Bema oiemu lalona ia hamanokaia diba, reana oiemu hesiai gaukara Dirava dekenai do oi goadalaia lasi; reana do oi rakatania momokani, bona Basileia ena sivarai namona do oi harorolaia lasi.—2 Korinto 2:10, 11; Efeso 6:11; 1 Petero 5:8.
17. Mose ena nega ai, taunimanima edia lalona hamanokaia karana ese ia havaraia gau dikadia be edena bamona idia hedinarai?
17 Idau negai Aigupito tanona dekenai idia noho Israel taudia edia sivarai ese ia haheitalaia taunimanima edia lalona hamanokaia karana ese dahaka gau dikadia be ia havaraia diba. Mose ese Farao ia hereva henia murinai, unai dagedage tauna ese Israel taudia edia metau ia habadaia, bona ia kara dika henidia bada. Dirava ese Mose ia hamaoroa Israel taudia do ia hadibaia, momokani do Ia hamauridia, Iena orea taudia ai do Ia halaodia, do Ia durudia idia mauri totona, bona gwauhamata tanona dekenai do Ia hakaudia lao. Mose ese unai hereva be Israel besena taudia dekenai ia gwauraia. To Esodo 6:9 ia gwau: “Idia kamonai lasi [Mose] dekenai, edia laloa ibounai ia ore, edia gaukara ia metau momo dekenai.” Edia kara ese Mose ena lalona ia hamanokaia bona ia ura lasi Dirava ese ia henia herevana Farao dekenai ia herevalaia. Mose be unai bamona ia laloa ela bona Iehova ese ia hagoadaia lou.—Esodo 6:10-13.
18. Dahaka dainai Dirava ena orea taudia ese Diabolo ena lalona hamanokaia karana idia dadaraia be gau badana?
18 Satana Diabolo ia diba lalo-manoka ese Dirava ena hesiai tauna ta ia hadikaia diba. Hereva Lada-isidia 24:10 ia gwau: “Hekwakwanai dinana dekenai oi lalo-manoka, a? Oiemu goada do ia maragimaragi.” Ita be nega dokona momokani dekenai ita noho dainai, gau badana be lauma dalana ai siahu ita abia bona ita goada. Iseda kara dika, iseda manoka, bona iseda kerere dainai ita hekwarahi bona reana ita goada haraga lasi; to Satana ese iseda manoka ia gaukaralaia danu, unai dainai heduru ita abia be gau badana.
Keriso ena Boubou Dekenai Oi Tabekau Momokani
19. Dahaka ese ita do ia durua lalo-manoka do ita hanaia totona, bona dahaka dainai?
19 Heduru gauna badana be Iehova ese Iesu Keriso amo ia henia gauna, Iesu ena boubou gauna. Bema unai boubou dekenai ita tabekau momokani, do ita kwalimu. Bema unai heduru ita laloa maragi, dika ita davaria diba. Oibe, ita kara dika noho, badina ita goevadae lasi. To bema ita lalo-manoka, gaukara ita rakatania, bona ita laloa iseda helaro be lasi, unai be namo lasi. Bema unai bamona ita karaia, ita be Satana ena tarapu lalonai do ita moru. Ita diba Iesu ena boubou ia hegeregere momokani kara dika gwauatao totona. Unai boubou ese kara dika ia kokia diba. Bema ita be “hutuma bada herea” lalonai ita noho, gau badana be mai eda abidadama ibounai iseda dabua ita huria bona ita hakurokuroa Mamoe ena Natuna ena rara dekenai.—Apokalupo 7:9, 14.
20. Apokalupo 12:11 be edena bamona ia hahedinaraia, lalona hamanokaia tauna badana, Diabolo, ita halusia diba?
20 Apokalupo 12:10 dekenai ia gwau Satana be “Dirava ena vairanai, dina bona hanuaboi, ia gini, iseda varavara ia samania.” Ita be edena dala ai unai samani tauna bona lalona hamanokaia tauna dikana ita halusia diba? Apokalupo 12:11 ia haere ia gwau: “Iseda varavara ese Mamoe ena Natuna ena rarana dainai, bona iena hereva idia gwauraia dainai, Satani dekena amo idia kwalimu. Bona edia tanobada mauri idia laloa momo lasi, to Keriso dainai edia mauri idia atoa diho.” Unai dainai Iehova ena orea taudia ese Iesu ena boubou, Mamoe ena Natuna ena rara, dekenai idia abidadama momokani be gau badana. Dala oi goadalaia, haroro gaukara ese emu lalona ia hagoadaia noho totona, bona nega ibounai Dirava ena Basileia ena sivarai namona be oi gwauraia taunimanima iboudiai dekenai.
21. Ena be ita ura lasi, to ita be edena bamona Diabolo ena gaukara ita durua diba, bona iseda tadikaka edia lalona ita hamanokaia diba?
21 Nega haida, ena be ita ura lasi, to ita ese Diabolo ena gaukara ita durua bona iseda tadikaka edia lalona ita hamanokaia. Edena bamona? Iseda tadikaka ita gwauraia dika, eiava ita maumau momo, eiava ita laloa ita kara maoromaoro momokani bona idia ita hereaia. (Kohelete 7:16) Ita ibounai be mai eda kerere bona mai eda manoka. Namo lasi unai kara ita gaukaralaia, Diabolo hegeregerena. To idau, namona be ita ese iseda tadikaka bona Iehova ena orea ita gwauraia namo. Ita ura ita hagoadaia heheni, ita hamanokaia heheni garina.
Dina Ia Mai Kahirakahira Neganai Ita Hagoadaia Heheni
22, 23. (a) Dahaka dainai ia maoro lasi bema ita laloa, ita lasi, to elda taudia sibona, ese tadikaka edia lalona do idia hagoadaia be namo? (b) Keristen kongregesen lalonai idia noho naria taudia be edena bamona ita hagoadaia diba?
22 Namona be iseda lalona ita hadaia dina ia mai kahirakahira neganai do ita hagoadaia heheni. Emu abidadama amo bona emu lalona hagoadaia herevadia amo ma tadikaka haida oi hagoadaia. Unai kara dekenai Iehova bona Lohiabada Iesu Keriso oi tohotohoa. Namo lasi oi laloa, oi lasi, to elda taudia sibona, ese tadikaka edia lalona idia hagoadaia be namo. Momokani, elda taudia ita hagoadaia danu be namo. Mamoe taudia ma iboudiai hegeregerena, idia be mai edia manoka bona idia hekwarahi inai tanobada dikana lalonai edia ruma bese taudia idia naria totona. Danu, Paulo ia herevalaia gauna idia davaria: idia lalo-hekwarahi kongregesen dainai. (2 Korinto 11:28, 29) Edia gaukara be bada herea—ita hagoadaia be gau badana.
23 Bema oi be kongregesen ena naria taudia ida umui gaukara hebou namonamo, edia lalona oi hagoadaia bada diba. Unai neganai, oi ese Heberu 13:17 ena sisiba do oi badinaia, ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho nega ibounai. Gabeai idia ese Dirava ena vairanai edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia henunai do umui noho. Bema inai bamona umui karaia neganai edia gaukara mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.”
24. Hari, lalona hamanokaia negana ai ita noho dainai, dahaka ita karaia be namo, bona dahaka dainai?
24 Hari inai negai, gau momo ese lalona idia hamanokaia. Taunimanima edia kudouna ai idia gari dikadika tanobada dekenai idia vara gaudia dainai, Iesu ese ia perovetalaia hegeregerena. (Luka 21:25, 26) Hekwakwanai momo ese lalona idia hamanokaia diba dainai, “umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” Aposetolo Paulo ena sisiba namona 1 Tesalonika 5:11 dekenai oi badinaia, ia gwau: “Umui ta ta dekenai goada do umui henia, bona durua umui henia, harihari umui karaia noho bamona.”
Oiemu Haere be Dahaka?
◻ Dahaka dainai Keristen taudia idia hagoadaia heheni bona unai kara idia habadaia be namo?
◻ Iehova ena orea taudia ese Dirava ena ladana idia diba dainai, unai ese edena bamona edia lalona ia hagoadaia?
◻ Edena dala idauidau ai, ita ta ta ita hagoadaia heheni diba?
◻ Dahaka dainai Diabolo ena gaukara ita durua lasi bona iseda tadikaka ita hamanokaia lasi be gau badana?
[Picture on page 18]
Elda taudia be edia kongregesen lalonai mamoe hagoadaia gaukarana idia gunalaia