Brazil Dekenai Uiti Gogoa Negana Ia Ginidae

“EMUI matana umui abia isi, uma gabu umui itaia, anina be idia auka bona mage vadaeni, utua nega danu ia hegeregere. Utua tauna ese ena davana ia abia, vadaeni anina ia haboua, mauri hanaihanai gauna.” (Ioane 4:​35, 36) Iesu Keriso ena peroveta hereva be momokani South America tanona, Brazil, ena daudau gabudia dekenai.

Lagani momo lalodiai, Iehova ena Witness taudia Brazil dekenai edia namba idia bada daekau. April 1991 lalonai, Basileia ena uiti gogoa taudia 308,973 be Bible stadi 401,574 idia karaia. March 30, 1991 ai, taunimanima 897,739 be Iesu, uiti gogoa gaukarana ia havaraia tauna, ena mase ena Anibou totona idia hebou.

To ena be idia gaukara bada, uma ena gabu badana ena uiti gogoa gaukarana bada ia do noho. Brazil dekenai, taunimanima 5,000,000 bona ma haida be Iehova ena Witness taudia idia haroro lasi eiava idia haroro momo lasi gabudia dekenai idia noho. Dahaka idia karaia uiti gogoa gaukarana be unai gabu dekenai idia karaia totona?

Pioneer Taudia be Uiti Gogoa Gaukarana Idia Karaia

Guna, hua 6 lalodiai, Watch Tower Society ena branch opesi Brazil dekenai be nega ibounai Basileia idia harorolaia taudia​—nega sisina lalonai do idia special pioneer taudia 100 bona regular pioneer taudia 97​—be hanua 97 dekenai idia siaia; unai hanua momo be unai tano ena hanua badadia, east kahana dekenai. Kongregesen idauidau edia Basileia harorolaia taudia momo idia gwau idia danu be nega sisina lalonai unai gabudia dekenai do idia haroro diba. Ena be hekwakwanai momo idia hanaia, to idia karaia gaukarana be namo.

Haheitalai be São João da Ponte dekenai, Minas Gerais gabuna ai, pioneer taudia be sikuli ena tomadiho tisa tauna ta dekenai idia lao. Edia sivarai ia kamonai henia murinai, ia be Memero Kekeni​—Moale Umui Davaria Dalana buka 50 ia oda henia iena tomadiho kalasi taudia totona. Pioneer taudia ese idia rakatania neganai ma tisa ta ia gwau: “Umui lao be namo lasi, badina iniseniai gaukara namona umui karaia. Umui sibona be Bible ena hereva ena anina umui gwauraia hedinarai namonamo diba.”

To taunimanima iboudiai be unai gaukara namona idia moalelaia lasi. Hegeregere, niuspepa ta, Diário de Montes Claros, lalonai revareva ta idia torea. Ena hereva kwarana be “Dubu Tauna Ta be Ia Dagedage bona Taunimanima Dadaraia Karana Ia Havaraia.” Unai revareva ia gwau: “Dubu lalonai, [dubu tauna] ena kara be ma tomadiho orea idia badinaia taudia ia gwauraidia dika, ena be iniseniai idia noho dubu taudia be abidadama taudia dekenai Katolik bona Keristen hadibaia hereva Evanelia amo idia hadibaia namonamo lasi. Mass ia gwauraia neganai, ia be taoni dekenai idia noho Iehova ena Witness edia haroro taudia ia gwauraidia dika, to idia be Katolik taudia idia gwauraidia dika lasi.” Unai revareva ia torea tauna (tomadiho tauna ta) be pioneer taudia ese idia henia Bible hereva ena pablik tok ia kamonai henia bona ia be idia ura kamonai taudia ma haida ia mailaia danu. Idia iboudiai be hebou idia moalelaia.

Tadikaka 4, Fortaleza amo, be peleini dekenai idia lao Fernando de Noronha Motumotu ai; unai motumotu ena daudau Brazil ena tano badana amo be kilomita 400. Lagani 15 bona ma haida lalonai, unai motumotu ena taunimanima 1,500 idia haroro henidia namonamo lasi. Dina 10 lalodiai, tadikaka be buka 50 bona magasin bona buklet 245 idia hariharilaia, bona idia be Bible stadi 15 idia hamatamaia. Idia vadivadi negana be Anibou negana bona taunimanima 12 idia mai. Pioneer taudia idia ura nega sisina murinai, Iehova ena heduru amo, haroro gaukara be unuseniai do idia karaia namonamo diba. Tadikaka haida idia laloa reana do idia noho unai motumotu dekenai.

Dubu Taudia be Taunimanima Edia Lalona Idia Veria Dainai Uiti Gogoa Gaukarana Idia Hadikaia Sisina

Rio de Janeiro dekenai, Arpoador Kongregesen ena Basileia pablisa taudia haida idia ura Minas Gerais gabuna ena hanua be wiki rua lalonai idia haroro henia; unai gabu ena daudau be kilomita 200. Idia moale bada badina idia davaria unai taudia edia heabidae karana be bada bona idia be hebogahisi taudia. Tatau edia kara be Dirava, eiava iena ladana, Iehova, idia gwauraia neganai hemataurai dekenai edia kwarana koua gaudia idia abia isi. To, idia be Dirava idia matauraia dainai, dubu taudia ese edia lalona idia veria haraga diba.

Hanua ta dekenai, dubu tauna be taunimanima ia hamaorodia Iehova ena Witness taudia idia kamonai henia lasi eiava edia hebou dekenai idia lao lasi. Danu tadikaka edia hebou negana lalonai Mass ta ia karaia bona unai Mass ena hereva be loudspeaker amo ena dubu amo ia boiboilaia bada. To herevana dahaka ia karaia, unai hanua taudia 29 be tadikaka danu idia hebou.

Ma hanua ta be idau momokani. Unuseniai dubu tauna be taunimanima ia hamaorodia Witness taudia idia mai neganai idia kamonai henia be namo. Unai amo edia hebou ginigunana dekenai, taunimanima 168 idia lao. Gabeai, ia hamaorodia Iehova ena Witness be Anibou idia karaia dalana idia itaia namonamo bona ia gwau “idia karaia dala maoromaorona dekenai.” Unai gabu dekenai wiki rua lalonai Basileia harorolaia gaukarana idia karaia lalonai, buka 1,014 bona magasin bona buklet 1,052 idia hariharilaia.

Idia Gaukara Noho Dainai Hahenamo Momo Idia Davaria

Hua tamona murinai, Basileia pablisa 34 idia giroa lao, idia vadivadi negana lalonai idia hamatamaia Bible stadi idia karaia totona. Gaukara ia gunalaia elda tadikaka ia torea, ia gwau: “Ai moale bada herea badina ai giroa lao neganai kamonai taudia be mai moale bada bona mai mata ranudia ai idia abia dae.” Taihu ta ia laloatao ia bona ma Witness haida ida dina tubua ai idia aniani neganai, hahine ta ia mai “ia noinoi, mai mata ranudia danu, ai be ia dekenai ai stadi henia totona.” Ma hahine ta be Witness taudia idia noho wikina lalonai, nega toi ia stadi. Nega ibounai stadi ia hegaegaelaia bona ia naria noho idia ginidae stadi karaia totona. Unai hahine ia gwau ia be Dirava momokanina, Iehova, dekenai ia guriguri henia hamatamaia. Ma danu ia gwau “Lauegu kudou lalonai nega daudau inai ita karaia karana lau naria.”

Gabeai, pioneer taihu rua idia siaia unai gabu ena kamonai taudia idia durua totona. Keristen taudia edia nega lalonai hegeregerena, “mauri hanaihanai abia totona taudia ibounai ese abidadama taudia idia halaoa.” (Kara 13:48) Bona Iakobo ena ranu guri dekenai, Iesu ese ia haroro henia Samaria hahinena bamona, idia diba gaudia be ma haida dekenai idia hadibaia. (Ioane 4:​5-30) Hari, unai pioneer rua ida idia gaukara hebou taudia be 6, bona wiki ta ta iboudiai taunimanima 20 idia mai hebou dekenai.

Unai gaukara badana idia moalelaia bada dainai, Arpoador Kongregesen ena pablisa taudia 29 idia lao Mutum hanua dekenai idia haroro totona; unai hanua ena daudau be kilomita 500. Unai grup ia gunalaia elda tadikaka ia gwau: “Ai idia abia dae dalana be idau momokani. Taunimanima idia kamonai namonamo dainai Bible stadi 170 ai hamatamaia, bona ai laloa idia momo do idia karaia noho.” Wiki rua lalonai, pablisa taudia ta ta idia haroro hora be 90 bona magasin bona buka 1,100 idia hariharilaia. Tadikaka ese idia henia pablik tok dekenai idia mai taudia edia namba be 181.

Hua haida murinai, kongregesen be Mutum lalonai ruma namona idia rentalaia bona idia gaukaralaia edia Kingdom Hall bona pioneer rumana totona. Pioneer taihu rua be Society dekenai edia ripoti ginigunana idia siaia neganai, idia gwau: “Ai be stadi momo ai hamatamaia dainai, ai ura ma pioneer haida idia mai. Ena be Rio de Janeiro amo tadikaka be hua tamona lalonai, nega tamona idia mai, to gaukara be ia bada momokani. Ruma taudia 10 10 amo, idia 9 9 idia ura ai giroa lao. Ai ura heduru ai abia hebou ai karaia totona.” Hari, ma pioneer ta ese ia durudia.

Edia Mauri Dalana Idia Haidaua

Hereva momokani idia hadoa bona huahua namona ia hedinarai dainai, unai ese ita ia hagoadaia. Ia ura kamonai hahinena ta ia torea, ia gwau: “Bible amo inai diba lau abia dainai be namo bada herea. Lauegu mauri ia namo ia lao, bona hari lau be lalo-hekwarahi ena mamina ia koua muramurana lau abia lasi. . . . Namona be Iehova ese davana namona ia henia umui dekenai, lau totona umui karaia gaudia ibounai dainai.”

Ma hahine ta ia gwau: “Lau hoa bada herea Iehova ese lauegu matana ia kehoa dalana dekenai. Ena be hari wiki lalonai, lauegu tubuna hahinena ia mase, hari lauegu helaro be ia do lau itaia lou. Lau ura bapatiso lau abia, to lau ura lau hegaegae namonamo guna. Namona be Iehova ese umui ia hanamoa iniseniai umui mai dainai bona mauri hanaihanai ena dala maragina ai dekenai umui hadibaia dainai.” Ma hahine ta ia gwau: “Lau ura umui diba hua gunanai, kuku ania karana lau rakatania. Umui siaia magasin dainai lau moale bada. Ia lalonai be hereva namodia idia noho lau idia durua kuku ania karana lau rakatania totona.” Momokani, uiti gogoa gaukarana dainai ita moale bada diba.

To, unai hahenamo idia mai totona, hekwarahi ia vara guna. Haheitalai ta be hahine ta bona iena natuna kekeni idia stadi hamatamaia neganai, dubu tauna ia gwau bema idia lao Witness edia hebou dekenai, dubu amo edia ladana do ia kokia. Idia be iena hereva idia kamonai henia lasi bona idia lao hebou dekenai. Edia turadia gunadia haida ese idia dadaraidia, idia gwau idia kavakava badina “unai Iehova” be Katolik Bible lalonai idia torea lasi. Unai hahine be iena Katolik Bible lalonai Iehova ena ladana ia davaria lasi dainai, iena dekena taudia ia hamaorodia namona be pioneer taudia idia mai iena stadi idia karaia dinana ai do idia mai. Hahine ta ia mai bona iena Catholic Paulinas Bible ia mailaia. Esodo 6:3 ena rau henuai ena hereva dekenai Dirava ena ladana ia duahia neganai, ia ura iena ruma lalonai Bible stadi idia karaia.

Uiti Gogoa Gaukarana Oi Karaia Goadagoada

Nega momo idia haroro henia lasi teritori lalonai idia gaukara dainai, unai haroro taudia be edena bamona? Basileia pablisa ta ia gwau: “Inai haroro gaukara ese aiemai abidadama bona aiemai turana karana Iehova dekenai ia hagoadaia, bona ai ia durua ai laloa namonamo bona anina bada gaudia ai tahua guna totona.” Ma pablisa ta ia gwau: “Unai dina 14 lalonai lauegu tadikaka lau lalokau henidia karana ia habadaia, ai be ruma bese tamona bamona ai gaukara hebou gau tamona ai abia totona: manau taudia ai tahua gaukarana unai. Aiemai sivarai idia abia dae taudia lau lalokau henia karana ia habadaia, nega momo idia taitai bamona, bona unai ese ia hahedinaraia idia be hereva momokani idia ura henia bada. Bona gau badana momokani be lau be mamina lau abia Iehova ese ai ia lalokau henia bada badina ia be hesiai gaukara namona ai ia henia dainai.”

Idia haroro henia momo lasi teritori dekenai ia haroro elda tadikakana ta ese unai gaukara gabudia bona hanua badadia edia mauri dalana edia idau ia hahedinaraia. Ia gwau: “Lau laloa bema tadikaka momo be gunika hanua dekenai idia noho edia mauri do ia namo ia lao. Dagedage karana be unuseniai ia vara momo lasi. Hanua maragidia dekenai mauri dalana be moni maragina dekenai idia noho diba bona tadikaka ida idia hebamo momo, bona lauma gaudia dekenai nega bada idia henia diba. Reana gaukara amo idia doko buruka tadikaka, ruma bese lasi matamata taudia, eiava gaukara tadikaka haida be unai gaukara namona idia karaia diba, bona idia sibodia dekenai, Iehova dekenai, bona edia dekena taudia ai, moale idia mailaia diba, ani”?

Brazil dekenai nega momo idia haroro henia lasi teritori ena sivarai amo, ita itaia uiti gogoa negana ia ginidae vadaeni. Lagani rua lalonai sibona, unuseniai idia gaukara dainai kongregesen bona grup maragidia 191 idia haginia. Gaukara bada ia do noho, to Iehova be hahenamo momo do ia henia Basileia harorolaia taudia ma haida be uiti gogoa gaukara dekenai idia vareai noho neganai. Oi danu be unai gaukara oi habadaia diba, a?

[Picture/Map on page 25]

Rio de Janeiro amo idia mai Witness taudia moaledia be uiti gogoa gaukara idia karaia

[Map]

(For fully formatted text, see publication)

BRAZIL

[Picture on page 26]

Minas Gerais gunika gabuna dekenai idia haroro