Ia Kwalimu Diba Boga-Aukana

“Metau lalonai do umui gini goada, do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia.”​—HEBERU 10:36.

1. Badina be dahaka hari inai nega lalonai Iehova Dirava idia hesiai henia taudia iboudiai idia boga-auka be gau badana?

TANOBADA ibounai be gwau-edeede diravana ta ena siahu henunai ia noho. Unai lohia tauna, Satana Diabolo, ita itaia diba lasi, bona ia gaukara goadagoada Iehova ia inai henia totona bona, Mesia Basileiana amo, Iehova ena atai herea lohia dalana hamomokania karana ia koua toho. Ia gwau Dirava ese guba bona tanobada ia lohiaia be maoro tauna, bona daika do ia lohia ena hepapahuahu dekenai Iehova ena kahana dekenai ia gini tauna, be tanobada taudia ese do idia dagedage henia. (Ioane 15:​18-20; 1 Ioane 5:19) Unai dainai, ita ibounai ita boga-auka totona ita hegaegae be gau badana, unai ita karaia ela bona hari tanobadana be Aramagedono dekenai ia moru. Edia abidadama bona gini goada amo tanobada dekenai Dirava ena taunimanima idia kwalimu, bona idia ida ita gini be namo, unai neganai do ita gini auka ela bona dokona. (1 Ioane 5:4) Edena dala ai unai bamona ita karaia diba?

2, 3. Edena dala ai Iehova Dirava bona Iesu Keriso be boga-auka edia haheitalai badadia?

² Gau tamona be idia boga-auka haheitalai namodia rua ita itaia ita goada totona. Idia be daidia? Idia ta be Iesu Keriso, “ia be vara guna Natuna,” idau negai ita diba lasi negana amo, ia be Dirava ena hesiai gaukara dekenai mai abidadama ida ia boga-auka. Mai abidadama bona boga-auka danu Dirava ia hesiai henia dainai Iesu be guba bona tanobada dekenai gabeai idia vara mai edia aonega mauri gaudia iboudiai dekenai, haheitalai namona ia lao. (Kolose 1:​15, 16) To, boga-auka ia haheitalaia tauna badana be Iehova Dirava, ia be nega daudau lalonai iena atai herea lohia siahuna idia gwau-edeede henia taudia dekenai ia boga-auka, bona do ia karaia noho ela bona atai herea lohia siahuna ena hepapahuahu be do ia hadokoa momokani.

³ Iehova be iena kara momokanina bona iena lalohadai ena mamina dekenai boga-auka ena haheitalai namona ia karaia. Ena be ia badu momokani, to iena ladana idia hadikaia taudia dekenai sibona ena badu ia dogoatao​—unai be Satana Diabolo dekenai ia karaia danu. Dirava ia boga-auka bona ia hebogahisi dainai ita moale. Bema unai bamona ia karaia lasi, vadaeni, nega sisina ita noho diba lasi danu. Momokani, Iehova Dirava be iena boga-auka dainai ia hahedinaraia iena kara be idau momokani.

4, 5. (a) Edena dala ai Paulo be uro karaia tauna ena laulau herevana amo Dirava ena boga-auka bona ena hebogahisi ia haheitalaia? (b) Edena dala ai ia hedinarai Dirava ena hebogahisi ia hahedinaraia kava lasi?

⁴ Aposetolo Paulo be Dirava ena boga-auka bona ena hebogahisi ia herevalaia, ia gwau: “Uro karaia tauna ia siahu lasi, a, uro karaia tano do ia gaukaralaia iena ura hegeregerena? Bona bema ia ura neganai uro rua do ia karaia raro tamona dekena amo. Uro ta be dina ibounai idia iusilaia gauna, ma ta be aria neganai sibona gauna. Dirava be inai bamona ia karaia vadaeni. Ia ura be iena badu bona iena siahu do ia hedinaraia. Unai dainai ia ese ia badu henia gaudia dekenai ia haheauka henia ela bona do idia mase ore. Bona ia ura danu iena hairai badana do ia hedinaraia. Ia ese inai hairai haida ia henia vadaeni ita dekenai. Oibe, mai bogahisihisi, danu ia ese ita ia karaia hegaegae vadaeni, iena hairai do ita abia totona. Badina be ia ese ita ia boiria, ai Iuda taudia sibona lasi, to umui Iuda lasi taudia danu.”​—Roma 9:​21-24.

⁵ Unai hereva ese idia hahedinaraia hegeregerena, hari ia boga-auka ena nega lalonai, Iehova be iena ura hereana ia hagugurua noho bona taunimanima haida ia hebogahisi henidia. Unai taudia ia hegaegaelaidia hairai hanaihanai do idia abia totona, bona unai dala amo iena inai tauna badana, Satana Diabolo, bona Satana ena orea taudia iboudiai edia ura dikadia ia negea momokani. Taunimanima haida be ia badu henia bona do ia hadikaia ore be namo, to taunimanima haida ia badu henidia lasi. Unai ese Siahu Ibounai Diravana ena nega daudau lalonai ia karaia boga-auka karana ia hahedinaraia. Iena hebogahisi be mai anina. Iena hebogahisi ese do ia havaraia gaudia be (1) Iehova ena lalokau Natuna, Iesu Keriso, ena henunai guba Basileia ena bese hereana ta bona (2) paradaiso tanobadana dekenai, ia hamauridia bona goevadae ai idia lao besena ta; idia iboudiai be mauri hanaihanai do idia abia.

Boga-Auka ela bona Dokona

6. (a) Badina be dahaka dala ia noho lasi Keristen taudia be edia boga-auka tohoa karadia idia koua diba totona? (b) Greek gado lalonai “boga-auka” ena anina be dahaka?

⁶ Gabeai be helaro namo hereana dainai, namona be nega ibounai Iesu ena hagoadaia herevana ita laloa, ia gwau: “Ena lalona do ia goada noho ela bona dokona, unai tauna be do ia mauri.” (Mataio 24:13) Keristen hahediba dalana dekenai ita raka matamata neganai namona be ita karaia namonamo. To ita boga-auka bona ita heau ela bona dokona be gau badana. Aposetolo Paulo be unai ia gwauraia bada, ia be inai bamona ia hereva neganai, ia gwau: “Metau lalonai do umui gini goada, do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia.” (Heberu 10:36) Unai hereva “haheauka” Greek gado dekenai be hy·po·mo·ne΄. Nega momo unai hereva ena anina be gari lasi karana, gini goada, eiava boga-auka mai haheauka, bona koua gaudia, dagedage, hahetoho, bona hedibagani lalonai helaro ia boio lasi karana. Bema ita ura hahemauri ita abia, namona be iseda boga-auka tohoa karana ita haheaukalaia; unai be hahemauri totona ita hegaegae karana.

7. Dahaka lalohadai kerere ita dadaraia be namo, bona daika ena haheitalai ese ita do ia durua do ita boga-auka totona?

⁷ Namo lasi sibona ita koia bena ita gwau unai hahetoho be haraga do ita hanaia. Iehova be atai herea lohiana eiava lasi herevana bona taunimanima edia abidadama hepapahuahulaia herevana edia haere ia karaia namonamo totona, Iehova ia hesiku lasi. Ena be unai taudia ia hamasedia haraga diba, to ia karaia lasi bona gau dikadia dekenai ia boga-auka. Iesu Keriso danu be haheitalai namona ia karaia. (1 Petero 2:21; Roma 15:​3-5 danu hahegeregerea.) Unai haheitalai namodia be idia noho dainai, ita danu ita ura do ita boga-auka ela bona dokona.​—Heberu 12:​2, 3.

Namona be Ita Hahedinaraia Karana Ta

8. Aposetolo Paulo ese dahaka kara ia haheitalaia bona ita ibounai danu ita karaia be namo?

⁸ Gunaguna negadia amo ema bona hari, Dirava ena hesiai taudia iboudiai idia boga-auka bona edia abidadama idia tohoa gaudia idia hanaidia be gau badana. Bible lalonai idia gwauraidia bada taudia be idia abidadama ela bona dokona, bona mauri hanaihanai be guba lalonai idia abia totona, edia gini auka karana idia hamomokania guna. Haheitalai be guna Farisea tauna, Tarso tauna, Saulo, be Korinto taudia ia hereva henidia, ia gwau: “Emui ‘aposetolo taudia namo herea’ ese lau idia hereaia lasi. Umui dekenai lau noho neganai toa bona hoa karadia lau karaia gaudia ese lauegu aposetolo dagi idia hamomokania. Mai siahu bona mai haheauka danu umui huanai unai kara lau karaia.” (2 Korinto 12:​11, 12) Ena be gaukara be mai metau, Paulo be iena hesiai gaukara ia laloa bada dainai, gau momo dekenai ia boga-auka bona ia gaukara goadagoada, gau ta ese ia hadikaia lasi totona.​—2 Korinto 6:​3, 4, 9.

9. (a) Horoa orena taudia be edena dala ai boga-auka idia hahedinaraia, bona dahaka ia vara? (b) Dahaka ese ita ia durua Dirava ena hesiai gaukara dekenai ita abidadama noho totona?

⁹ Hari inai nega lalonai, tanobada ibounai tuarina ginigunana ia do vara lasi neganai, Dirava idia hesiai henia horoa Keristen taudia idia diba 1914 be Idau Bese Taudia Edia Nega ena dokona do ia makaia, bona idia momo idia laloa unai lagani badana dekenai edia guba davana do idia abia. To unai bamona ia vara lasi. Idia vara gaudia ese idia hahedinaraia hegeregerena, idia vairanai be lagani momo idia noho. Edia tanobada maurina ia lata neganai, Iehova Dirava ese edia kara ia hamaoromaoroa noho. (Sekaria 13:9; Malaki 3:​2, 3) Idia boga-auka noho dainai idia namo idia lao. Idia be Iehova ena hesiai taudia dainai, idia moale bada badina iena ladana abia besena ai idia lao. (Isaia 43:​10-12; Kara 15:14) Hari inai nega lalonai, tanobada ibounai tuarina rua bona tuari maragidia momo herea amo idia roho mauri dainai, idia moale bada badina mamoe idaudia hutuma bada herea, hari idia be milion hani, ese idia durudia sivarai namona idia harorolaia totona. Idia moalelaia lauma paradaisona be tanobada ibounai ia lao, davara dekenai gabu daudau ai idia noho motumotudia dekenai danu. Unai namo, ita mauri noho lalonai ita moalelaia bada gauna, ita davaria dainai, ita ia hamarerea mai eda kamonai ida Dirava ena hesiai gaukara do ita karaia noho totona, ela bona Iehova ena ura ia guguru vadaeni.

10. Ita manoka garina, dahaka ita abia hanaihanai be namo?

¹⁰ Ita gini auka dainai davana do ita abia, unai dainai unai gini auka dekenai hagoadaia hereva ita abia loulou be namo. (1 Korinto 15:58; Kolose 1:23) Ita Iehova ena taunimanima do ita manoka lasi totona, namona be goada ita abia loulou, hereva momokani bona hereva momokani habadaia gaukarana namona do ita dogoatao noho totona. Unai hegeregerena, Keristen taudia ginigunadia edia negai, Paulo bona Banaba edia lou henia karana ese kongregesen matamatadia idia hagoadaia. (Kara 14:​21, 22) Namona be ita ura momokani aposetolo Ioane ia hereva bamona hereva momokani be ita dekenai do ia noho, “bona ita dekenai do ia noho ela bona hanaihanai.”​—2 Ioane 2.

Ia Marere Lasi Boga-Aukana Dekenai Ita Naria

11. Dirava ia ura iena hesiai taudia be dahaka idia karaia, bona Iosef ena sivarai dekenai edena bamona unai ia haheitalaia?

¹¹ Iseda hahetoho ia ore negana be ita vairanai. (Iakobo 1:​2-4) Naria! Naria! Naria! Iena hesiai taudia gunadia be edia abidadama dekenai idia boga-auka totona, hahetoho idia abia neganai Dirava ia ura idia naria. To idia naria dainai nega ibounai unai abidadama hesiai taudia be davana namona idia abia. Hegeregere, lagani 13 lalonai, Iosef be davana lasi hesiai tauna bona dibura dekenai ia naria, to unai ekspiriens ese iena kara ia hanamoa.​—Salamo 105:​17-19.

12, 13. (a) Abraham be edena dala ai kamonai bona boga-auka karana ia haheitalaia? (b) Edena dala ai Abraham ena abidadama bona boga-auka be haheitalai namona ita dekenai?

¹² Abraham ena lagani be kahirakahira 75 Dirava be Kaldea hanuana, Uru, amo ia boiria neganai, bona Gwauhamata Tanona ai ia siaia lao. Iena lagani be 125 neganai Dirava be iena gwauhamata ia hamomokania; Abraham be iena abidadama ia haheitalaia murinai bona ia be iena lalokau natuna, Isako, ia bouboulaia gwauraia neganai, maoromaoro unai ia vara. Unai neganai Iehova ena aneru ese Abraham ena imana ia koua bona unai boubou ia karaia lasi. (Genese 22:​1-18) Lagani 50 ena nega daudau lalonai, Abaraham be tano idauna dekenai ia loaloa, to ma lagani 50 lalonai ia boga-auka noho ela bona lagani 175 ia abia neganai ia mase. Unai nega ibounai lalonai, Abraham be Iehova Dirava ena abidadama witness tauna bona peroveta tauna.​—Salamo 105:​9-15.

¹³ Abraham ena abidadama bona boga-auka be haheitalai ta Dirava ena hesiai taudia iboudiai dekenai, unai taudia idia ura Iesu Keriso, Abraham ena Garana, amo do idia mai gwauhamata edia namo do idia davaria. (Heberu 11:​8-10, 17-19) Heberu 6:​11-15 ese ia herevalaia, ia gwau: “Ai ura bada umui ta ta ese unai bamona do umui karaia goadagoada noho ela bona emui mauri dokona. Badina be unai neganai umui naria noho davana namona do umui abia. Umui lahedo lasi. To abidadama bona haheauka taudia edia kara bamona do umui karaia. Vadaeni Dirava ia gwauhamatalaia davana namona, iena natuna taudia do idia abia gauna, be umui ese do umui abia. Gunaguna Dirava ese [Abraham] dekenai ia gwauhamata neganai, ta ese Dirava ia hereaia lasi dainai unai gwauhamata ia henia sibona ena ladana dekenai. Ia gwau, lau gwauhamata inai, oi do lau hanamoa bada, bona tubuna momo herea oi do lau henia. [Abraham] ia haheauka noho dainai, Dirava ena gwauhamata gauna ia davaria.”

14. Badina be dahaka ia namo lasi bema ita laloa boga-auka ena hahetoho negana ena dokona be lasi bona davana abia be koikoi gauna bamona?

¹⁴ Horoa orena taudia idia laloa Keristen kongregesen korikorina be 1914 ai, Idau Bese Taudia Edia Nega ia ore laganina ai, guba ena hairai do idia abia; to lagani 77 lalonai idia hanai vadaeni to idia do naria noho. Orena taudia be do idia naria noho ela bona edena nega be ita diba lasi. Unai dainai, namona be ita daradara bona ita laloa naria negana ena dokona be lasi bona davana be koikoi gauna, a? Lasi! Unai ese Dirava ena atai lohiana siahuna do ia hamomokania lasi bona iena ladana do ia hanamoa lasi. Ita daradara neganai ita dekenai kwalimu davana, mauri hanaihanai, ia henia, vadaeni, iena kara ia do hamomokania maoromaoro diba lasi. Herevana idia naria negana ena lata be edena bamona, to orena taudia bona edia abidadama mamoe bamona turadia ese edia lalona idia hadaia do idia naria ela bona iena nega lalonai Iehova be gau ta do ia karaia. Unai bamona boga-auka idia haheitalaia neganai idia be Abraham bamona idia karaia.​—Roma 8:​23-25.

15. (a) Iseda hereva badana be dahaka, bona edena nega dikadia ai Dirava ese ita ia durua ita kwalimu totona? (b) Hari inai nega totona Paulo be dahaka sisiba ia henia?

¹⁵ Unai dainai, iseda hereva badana be Dirava ena ura ita karaia neganai daradara lasi dekenai ita boga-auka. (Roma 2:​6, 7) Guna ia be ita ia durua iseda hisihisi momo lalonai, ita idia hadiburaia neganai bona concentration kampa dekenai ita idia koua neganai danu, bona ia be kwalimu dekenai ita ia hakaua lao iena ladana bona iena ura ita hanamoa totona.a Ia do noho hahetoho negana lalonai, Iehova be unai bamona do ia karaia noho. Iseda nega totona Paulo ena hagoadaia hereva be mai anina, ia gwau: “Metau lalonai do umui gini goada, do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia.”​—Heberu 10:36; Roma 8:37.

16. Badina be dahaka ia namo lasi ita laloa iseda gwauhamata be nega sisina sibona lalonai, o gau haida sibona dekenai, ita hagugurua?

¹⁶ Hari tanobada dikana lalonai Iehova ena gaukara ia do noho neganai, Iesu ena haheitalai ita badinaia bona ita ura unai gaukara ita karaia ela bona ia ore. (Ioane 17:4) Iehova dekenai ita gwauhamata neganai, ita gwau lasi nega sisina sibona lalonai do ita hesiai henia bena Aramagedono do ia mai. Iseda gwauhamata be do ita karaia ela bona hanaihanai. Aramagedono ena tuari ia mai neganai, Dirava ena gaukara be ia ore lasi. To, Aramagedono ia do mai lasi neganai ia noho gaukarana ita karaia murinai sibona, ita be unai tuari badana murinai do idia vara gau namo hereadia do ita itaia diba. Bena, unai neganai do ita moale iena gaukara ita karaia noho diba dainai, bona nega daudau lalonai ia gwauhamatalaia bona ita naria hahenamodia do ita abia.​—Roma 8:32.

Dirava Ita Lalokau Henia Dainai Ita Boga-Auka Diba

17, 18. (a) Metau negadia ai, edena dala ai Dirava ena heduru amo ita boga-auka diba? (b) Dahaka ese ita do ia durua do ita kwalimu totona, bona ia do noho negana ita gwauraia neganai, dahaka ita gwau diba lasi?

¹⁷ Reana, nega dikadia lalonai, ita henanadai diba: ‘Edena bamona ita do boga-auka noho diba?’ Haere be dahaka? Dirava be iseda kudouna ibounai, darana ibounai, mauri ibounai, bona goada ibounai ida ita lalokau henia dainai ita karaia diba. “Lalokau be ia dekenai ia kara dika tauna davana ia laloa lasi. Lalokau be mai ena bogahisihisi, haida durua totona. Lalokau be kohu momo tauna ia mama henia lasi. Lalokau be ia heagi lasi, bona ia hekokoroku lasi. Lalokau be gaukara bona metau ibounai ia goadalaia. Nega ibounai iena abidadama ia goada noho. Nega ibounai Dirava ena nega namona ia naria noho mai moale danu. Bona metau ibounai lalonai ia gini goada noho. Lalokau be do ia doko lasi.” (1 Korinto 13:​4, 7, 8) Bema ita boga-auka to Dirava ita lalokau henia momokani lasi, vadaeni, iseda boga-auka ena anina be lasi. To bema metau ita huaia neganai ita karaia Iehova ita tabekau henia dainai, iseda boga-auka ese iseda lalokau ia dekenai ia habadaia. Dirava, iena Tamana, ia lalokau henia dainai, Iesu ia boga-auka diba. (Ioane 14:​30, 31; Heberu 12:2) Bema iseda ura korikorina be Dirava, iseda Tamana, ita lalokau henia, vadaeni, gau iboudiai dekenai ita boga-auka diba, ani?

¹⁸ Iehova Dirava ita lalokau henia bona ia dekenai ita daradara lasi dainai, iseda hahetoho ena nega dikadia momokani lalonai ita be tanobada ita do halusia noho diba. Bona herevana inai tanobada gunana ia noho ela bona edena negai, to Iehova, Iesu Keriso amo, be ita do ia durua noho. (1 Petero 5:10) Momokani, ita gwau diba lasi ia do noho negana ena daudau be edena bamona, bona ita be dina ta ita makaia lasi. Unai be Nega Ia Duahia Tauna Badana, Iehova Dirava, ena imana dekenai ita atoa.​—Salamo 31:15.

19, 20. (a) Edena dala ai ita boga-auka noho dinadia ta ta iboudiai ita lalodia noho? (b) Dahaka aonega lasi karana ita koua be namo, bona badina be dahaka?

¹⁹ To, idia perovetalaia “tanobada dokona” idia itaia uru taudia idia buruka momokani. (Mataio 24:​3, 32-35) Unai dainai, namona be ita diba dina ta ta iboudiai ita boga-auka noho neganai, Satana bona iena demoni be tanobada idia hamiroa negana ena dina ta ta idia lao ore, bona ita be Iehova ese “ia badu henia gaudia” ia boga-auka henidia negana do ia ore negana kahirakahira dekenai ita mai. (Roma 9:22) Nega kahirakahira, Iehova ena boga-auka do ia ore, bona ia be Dirava idia laloa lasi taudia dekenai iena badu do ia hahedinaraia. Unai dainai, ena be nega daudau lalonai ia koudia lasi, to edia kara dekenai iena badu do ia hahedinaraia.

²⁰ Ita be aonega lasi bema Iesu Keriso dainai do ita abia diba davana namo hereana ita abia totona, lalokau amo ita gaukara noho karana ita rakatania. To, iseda lalona ita hadaia abidadama dekenai do ita gaukara noho ita be Iehova ena Witness taudia dainai, inai anina bada negana lalonai, Iehova be Gau Ibounai Lohiaia Tauna do ia hamomokania negana ai.

[Footnotes]

Edena Bamona Do Oi Haere?

◻ Badina be dahaka dala ia noho lasi iseda boga-auka tohoa karana ita koua diba totona?

◻ Dahaka lalohadai kererena ita koua be namo?

◻ Ita manoka garina, dahaka ita abia be namo?

◻ Iseda hereva badana be dahaka?

◻ Nega dikadia lalonai, dahaka ese ita do ia durua do ita boga-auka totona?

[Picture on page 11]

Dirava ena taunimanima, inai Port of Spain, Trinidad, Witness taudia bamona, be nega ibounai idia ura Iehova idia naria