Dirava Ena Davana Henia Dinana

SIVARAI gunana lalonai ita itaia hegeregerena, dika ena davana ita henia be namo lasi be mai ena badina haida. Ia be namo lasi badina ena dokona ai be gau namona ta ia havaraia lasi. Ia be namo lasi badina badu sibona ia havaraia bona hetura heni karana ia koua. Ia be namo lasi badina dika davana henia ia lalohadailaia tauna be sibona ena tauanina ia hadikaia.

To taunimanima be dika davana idia henia lasi ena badina badana be Mose ena hereva Israel taudia dekenai ita itaia, ia gwau: “Iehova emui Dirava be hebogahisi Diravana.” (Deuteronomi 4:31) Dirava be hebogahisi tauna dainai, namona be ita danu be ia bamona ita hebogahisi. Iesu be ia murinai idia raka taudia ia hamaorodia: “Bogahisihisi kara sibona do umui karaia, emui Tamana bamona, ia be mai ena bogahisihisi.”​—Luka 6:36.

To, Bible ia gwau Iehova be “dika davana ia henia karadia ia karaia Diravana.” (Salamo 94:1) Peroveta tauna Isaia be “Iehova ena lalo-namo laganina bona” danu iena “dika davana henia dinana” ia herevalaia. (Isaia 61:2) Dirava be edena bamona ia hebogahisi diba to dika davana ia henia diba danu? Bona bema Dirava ena hebogahisi ita tohotohoa be namo, badina be dahaka ia bamona dika ena davana ita henia lou be namo lasi?

Henanadai ginigunana ena haere be inai: Dirava be hebogahisi tauna badina taunimanima ia lalokau henidia, bona kara dika momo ia gwauatao nega daudau lalonai, badina ia ura taunimanima ese edia kara dika idia haidaua dalana ia kehoa. Taunimanima momo, aposetolo Paulo bamona, be unai hebogahisi dalana amo namo idia davaria. To Dirava be dika davana ia henia danu​—anina be hahemaoro maoromaoro ia karaia​—badina unai bamona hebogahisi be nega daudau lalonai do ia karaia to unai nega do ia halataia kava lasi. Taunimanima haida idia hahedinaraia edia kara do idia haidaua lasi neganai, Dirava be iena dika davana henia dinana lalonai idia do ia hahemaoro henidia.

Henanadai iharuana ena haere be inai: Ita ese dika ena davana ita henia diba lasi badina Dirava ese dika ena davana do ia henia. Iehova be hahemaoro karana dekenai ia goevadae. Taunimanima idia goevadae lasi. Dirava ese hepapahuahu ena kahana iboudiai ia diba bona nega ibounai ia be hahemaoro herevana maoromaorona ia karaia. Ita be unai bamona ita karaia diba lasi. Unai dainai Paulo ena sisiba be: “Lauegu lalokau taudia e, dika ena davana do umui karaia lasi, davana be, Dirava sibona. Badina be Buka Helaga ia gwau, ‘[Iehova] ia gwau, “Dika ena davana be lau sibona ese do lau karaia.” ’ ” (Roma 12:19) Namona be Iehova ena imana dekenai dika ena davana henia karana ita atoa.

Badina be Dahaka Dika Davana Henia Dinana Do Ia Vara?

To, nega momo Bible ia gwau idia helalo-kerehai lasi kara dika taudia edia dika ena davana idia abia be namo. Haheitalai be aposetolo Paulo ena peroveta herevana, ia gwau Iesu ena amo, Dirava be “Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia.” (2 Tesalonika 1:8) Unai hereva ita abia dae be mai ena badina korikoridia. Dahaka dainai?

Badina ta be inai: Hari inai nega lalonai taunimanima momo be Havaraia Tauna ena atai lohia siahuna idia dadaraia, unai dainai iena kara maoromaoro taravatudia idia badinaia lasi. Herevana idia gwau Dirava idia abia dae eiava lasi, edia kara amo idia hahedinaraia idia laloa Dirava vairanai edia kara dainai kota do idia abia lasi. Salamo torea tauna ena hereva be mai anina unai taudia iboudiai dekenai, ia gwau: “Badina be dahaka kara dika tauna ese Dirava ia dadaraia? Iena kudouna lalonai ia gwau: ‘Lauegu kara ena davana do lau henia lasi.’ ” (Salamo 10:13) Iehova be unai bamona ia idia hevasehalaia karana do ia hadokoa. Ena be ia be lalokau Diravana, to ia be hahemaoro maoromaoro Diravana danu. Hahemaoro maoromaoro idia laloa bada taudia edia boiboi do ia kamonai henia, idia gwau: “Iehova e, oi toreisi! Dirava e, oiemu imana oi abia isi! Hisihisi idia ania taudia oi laloaboio lasi.”​—Salamo 10:12.

Ma danu, taravatu idia dadaraia taudia be ita noholaia tanobadana idia hadikaia. Idia be hodahoda, tano, bona ranu idia hamiroa; edia kara dika bona dagedage karadia be tanobada idia hahonua. Bona muramura, niuklia kohu, bona ma hamasea tuari gaudia haida idia haboua dainai, taunimanima iboudiai idia hamasedia ore diba. Namona be Dirava ese gau ta ia karaia kamonai taudia be gabeai mauri namona idia davaria totona. (Apokalupo 11:18) Dirava ese unai do ia karaia karana be Isaia ese ia herevalaia neganai, ia gwauraia dika ena davana henia lou dinana.

Dirava ese Dika Ena Davana Henia Dinana amo Dahaka Do Ia Hagugurua?

Vine’s Expository Dictionary of Old and New Testament Words bukana ia gwau, Greek Revarevadia lalonai, Dirava ena kara idia gwauraia neganai, dika davana henia karana ena hereva ena anina be “ ‘hahemaoro maoromaoro ese ia havaraia karana.’ Unai be taunimanima idia karaia hahemaorona bamona lasi, idia be hisihisi idia mamia dainai eiava idia badu dainai dika ena davana idia henia lou karana.” Unai dainai, Dirava be iena inai taudia edia dika davana ia henia neganai, ia be rara do ia bubua kava lasi, hegeregerena tau ta ia badu bamona ta ese ia kara dika henia neganai. Bible be ita ia hadibaia: “Hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.”​—2 Petero 2:9.

Dirava ena hesiai taudia be Dirava ese dika ena davana ia henia dinana idia naria, badina idia diba unai be kara maoromaoro hamomokania negana bona unai negai, kara maoromaoro taudia be kara dika taudia edia dagedage amo do ia hamauridia. Anina lasi idia ura haida idia hadikaia eiava unai taudia be edia dika davana idia abia karana idia moalelaia. Bible ena sisiba be: “Ta ena hisihisi ia moalelaia tauna be dika davana do ia abia.” (Hereva Lada-isidia 17:5) To, idia hebogahisi, bona taunimanima edia hisihisi dainai idia taitai, bona dika davana henia karana be Dirava ena imana dekenai idia atoa.

Momokani, badu taudia be unai bamona idia karaia ia auka. To idia karaia diba, bona taunimanima momo idia karaia vadaeni. Haheitalai ta be Pedro; ia be mero neganai ia moale lasi bona nega momo iena kakana ese ia botaia. Unai dainai ia bada neganai ia dagedage, hanaihanai polisi danu ia heai bona iena kakana dekenai ia badu dainai ia sibona ena hahine bona natudia dekenai unai badu ia hahedinaraia. Murinai, ia be Iehova ena Witness tauna ta ia kamonai henia bona gabeai Bible stadi ia hamatamaia. Ia gwau: “Iehova ena heduru amo lauegu kara lau haidaua bona hari lau be taunimanima lau hepapahuahu henidia lasi, to lau be Keristen elda dainai idia lau durudia.” Bible bona lauma helaga edia heduru dainai, edia namba ita duahia diba lasi taudia momo be unai bamona badu bona dika ena davana henia lalohadaina idia rakatania, bona ma haida dekenai lalokau bona haheauka idia hahedinaraia.

Dahaka Do Oi Karaia?

Ita be Dirava ese dika ena davana do ia henia dinana ita laloatao noho neganai, unai ese ita do ia durua Iehova ena haheauka amo namo ita tahua totona. To unai nega be mai ena dokona. Unai nega ena dokona be kahirakahira do ia ginidae. Aposetolo Petro ia hahedinaraia badina be dahaka unai ia do vara lasi, ia gwau: “[Iehova] ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”​—2 Petero 3:9.

Unai dainai, gau badana be Dirava ese dika ena davana ia henia dinana totona harihari ita hegaegae bona ita be Bible bona ena sisiba ita stadilaia bona ita badinaia. Unai ese ita ia durua salamo ia torea tauna ena hereva ita badinaia totona, ia gwau: “Badu oi ura henia lasi bona badu karadia oi rakatanidia; oiemu lalona ia siahu bona kara dika oi karaia be namo lasi. Kara dika taudia be do idia ore, to Iehova idia naria taudia be tanobada do idia abia.”​—Salamo 37:​8, 9.

[Picture on page 7]

Dirava ese dika ena davana ia henia dinana murinai, ‘Iehova idia naria taudia be tanobada do idia abia’