Dika Ena Davana Ita Henia be Maoro, Eiava?

United States ena dala badana ta dekenai, motuka ia taria tauna ta ia ura ma motuka ta ia hanaia. Ia hanaia toho motukana be metairametaira ia lao dainai murinai ia heau motukana ia taria tauna be ia badu bona ia vairanai ia heau metairametaira motukana lalonai dika ia karaia lasi pasendia ta ia pidia mase.

Sikuli ta dekenai, ulato kekeni ta be drama dekenai kahana ta ia abia lasi badina ma kekeni ta ese ia abia. Davana ia henia dalana be drama ena kahana ia abia kekenina ena turana merona ia hamaoroa unai kekeni be ma sikuli merona ta ia tura henia. Unai amo unai kekeni bona mero edia turana karana ia hadikaia.

TAUNIMANIMA momo idia laloa dika idia abia neganai davana idia henia be maoro. Dala idauidau dekenai, inai hereva ta idia badinaia: “Oi badu lasi, to dika ena davana oi henia.” Hari inai nega lalonai, dekena tauna lalokau henia karadia be momo lasi, bona dika davana henia karana ia bada ia lao.​—Mataio 24:12.

To, dahaka oi laloa dika ena davana henia karana dekenai? Bema Bible oi abia dae, reana oi laloa dika ena davana henia karana be maoro lasi. To ita be Dirava idia laloa lasi tanobadana taudia huanai ita noho dainai, reana oi laloa kerere gwauatao karana, dika ena davana henia karana amo ia idau karana, be hekwakwanai hanaia dalana lasi. Bema oi idia koia eiava oiemu tauanina idia botaia oiemu gau ta idia henaoa totona, dahaka do oi laloa? Bema ta ese oi ia laloa lasi eiava ma haida dekenai oi ia gwauraia dika, oi ura iena dika ena davana oi henia lou, a? Oi be dika ena davana henia tauna ta eiava oi be dika gwauatao tauna ta?

Dika Davana Henia Lalohadailaia Karana ese Taunimanima Ia Hadikaia

Momokani, dika be idauidau. To dika davana idia ura idia henia taudia momo be tauanina dekenai bero idia davaria henao taudia ese idia botaia taudia lasi. Inai sivarai ena hamatamaia kahana dekenai, dika davana idia henia taudia idia laloa unai dika be bada to ita diba unai gau “dikadia” be dika badadia lasi.

Bible ia gwau dika davana henia karana ita lalohadailaia momo lasi. Hereva Lada-isidia 24:29 ena sisiba be: “Oi gwau lasi: ‘Lau dekenai ia karaia hegeregerena, ia dekenai do lau karaia. Lau ese ta ta edia kara davana dohore lau henidia.’ ” Badina be dahaka? Badina ta be unai bamona ia lalohadai tauna ese iena lalona ena mamina bona iena tauanina ia hadikaia. Davana henia lalohadai be lalohadai ena maino ia kokia bona laloa namonamo karana ia koua. Inai sivarai oi laloa: “Uma naria tatau rua be motuka atoa gabuna ta dekenai, edia traka amo, ipidi amo idia tuari heheni bona idia ruaosi idia mase, unai neganai, lagani 40 lalonai idia hepapahuahu karana, idia be edia natudia negana amo idia hepapahuahu karana unai, idia hadokoa.” Oi laloa. Edia mauri dinadia ibounai dekenai unai tatau rua edia lalohadai idia dika badina idia be dika davana henia karana idia lalohadailaia momo!​—Hereva Lada-isidia 14:​29, 30.

Dika davana henia karana lalohadailaia momo lasi ena badina ma ta be dika idia karaia taudia​—dika bada idia karaia taudia danu​—ese edia kara idia haidaua diba. Haheitalai ta be aposetolo Paulo; ia be hahediba tauna, Stefano, “ena mase ia ura henia” bona “Lohiabada ena diba tahua taudia hagaria bona alaia hereva momo ia gwauraia noho.” To iena kara ia haidaua. Nega gunadia ai, Paulo ia ura Petro ia hamasea, to lagani momo murinai aposetolo Petro ese Paulo ia gwauraia “iseda varavara lalokau tauna Paulo.” (Kara 8:1; 9:1; 2 Petero 3:15) Keristen taudia be Paulo ena dika davana idia henia diba; Damaseko dekenai unai bamona idia karaia diba, Paulo ia matakepulu bona Damaseko dekenai ia naria neganai, Keristen taudia be Paulo ena dika idia henia lou diba. (Kara 9:​3-15) Bema unai bamona idia karaia neganai, unai be dika ia havaraia kerere badana momokanina ta!

Unai dainai, Roma 12:20 dekenai, Paulo be inai sisiba namona ia henia diba, ia gwau: “Oi dekenai badu henia tauna, bema ia hitolo, aniani do oi henia, bema ia ranu mase, ranu do oi henia.” Badina be dahaka? Badina ita ia hadikaia tauna ena dika ita henia lou neganai, iena lalohadai dika karana dekenai do ia auka noho bona iseda huanai ia noho baduna do ita habadaia. To bema ita ia hadikaia eiava ita ia hahisia tauna dekenai namo ita karaia neganai, iena lalohadai aukana ita hamanokaia diba bona ita ia badu henia tauna be iseda turana ai ita halaoa diba.

Iseda manoka ita laloa neganai unai ese ita ia durua dika davana ita henia karana ena badu ita hanaia totona. Salamo ia torea tauna ia henanadai, ia gwau: “Iehova e, bema kerere sibona oi laloa noho, daika ia gini diba?” (Salamo 130:3) Ita ibounai be ma haida ita hadikaia eiava ita hahisidia vadaeni. Bema iseda dika ena davana ita idia henia lasi, ita moale, ani? Unai dainai, ita be unai bamona ita karaia be namo, ani? Iesu ena sisiba be inai: “Gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”​—Mataio 7:12.

Momokani, Bible ia gwau: “Kara dika oi inai henia.” (Salamo 97:10; Amos 5:5) To ia gwau lasi dika ia karaia tauna ita inai henia. Iesu ena hahegani be inai: “Umui dekenai idia badu henia taudia do umui lalokau henia, bona umui dekenai idia dagedage henia taudia dainai umui guriguri.” (Mataio 5:44) Bema dika ena davana ita henia ita be kara dika tauna ena kara ita tohotohoa. Idau negai hereva aonegana ta be inai: “Inai bamona oi hereva lasi: ‘Lau ia hadikaia tauna ena davana do lau henia!’ Iehova dekenai oi helaro, bona ia ese oi do ia hamauria.” (Hereva Lada-isidia 20:22) Unai be aonega lalohadaina! Namona be ita hahedinaraia ita be kwalimu taudia badina ita be kara dika taudia ita tohotohoa lasi.​—Ioane 16:33; Roma 12:​17, 21.

Dika Davana Henia​—Daika ese Do Ia Henia?

Momokani, kara haida be taunimanima tamona hadikaia eiava hahisia karana edia dika idia hanaia. Ita be edena bamona bema taravatu utua taudia ese ita idia hadikaia? Momokani, ita laloa hahemaoro maoromaoro karana dainai, namona be gau ta ia vara. To dahaka ia vara be namo? Gabu haida dekenai, dika ia davaria tauna be ia sibona ia toreisi bona dika davana ia henia be vaia unai gabu taudia edia kara. To unai gabu dekenai, nega momo unai kara ese hepapahuahu bada idia havaraia. Hari inai nega lalonai, Dirava ena taravatu, bona nega momo taunimanima edia taravatu, idia gwau lasi taunimanima tamona sibona be ia davaria dikana ena davana ia henia diba; bona unai taravatu be mai badina namona. Unai bamona taunimanima tamona be dika ena davana ia henia lou neganai, ma dagedage karadia haida ia havaraia sibona.

Unai dainai, taravatu utua taudia ese idia hadikaia tauna be gau ta ia karaia lasi bona dika ia koua toho lasi be namo, a? Reana lasi. Iseda tauanina eiava iseda kohu idia hadikaia neganai, siahu taudia dekenai ita lao diba. Reana polisi oi boiridia diba. Gaukara dekenai, gaukara naria tauna dekenai oi lao. Sikuli dekenai, reana headmaster dekenai oi lao diba. Unai taudia idia noho ena badina ta be hahemaoro maoromaoro karana idia karaia totona. Bible ia gwau lohia siahu taudia be “Dirava ena hesiai tauna, ia ese kara dika tauna ena davana do ia henia.” (Roma 13:4) Hahemaoro maoromaoro karana dainai namona be gavamani taudia be edia siahu idia gaukaralaia, kara dika idia koua, bona dika idia karaia taudia edia davana idia henia.

Momokani, nega haida hahemaoro maoromaorona ia vara haraga lasi. Tanobada ena kara ia hesikulaia toretore tauna ta ia gwau: “Hahemaoro maoromaoro karana be hanaihanai ia mai leiti train bamona.” Momokani, nega haida unai train ia ginidae lasi danu. Reana hahemaoro maoromaoro idia karaia lasi taudia edia siahu be bada dainai, siahu taudia ese idia koudia diba lasi. To, aonega dalana be iseda lalona ita do dogoatao noho. Bible ia gwau: “Kava tauna ese ena lauma ibounai ia ruhaia, to aonega tauna ese ia dogoatao, ia manau.”​—Hereva Lada-isidia 29:11.

Dika Ena Davana Henia Karana​—Daika ese Do Ia Karaia?

Dika ena davana ita henia karana ita koua neganai ita be namo ita davaria, bona ita be lalo-maino dekenai ita naria noho diba, badina ita diba hahemaoro maoromaoro do ia henia totona, Dirava be nega korikori dekenai do ia karaia. Iehova ia diba kara dika koua lasi karana ese dika bada momokani ia havaraia. (Kohelete 8:11) Ia ura lasi edia kara dekenai idia auka noho taudia be taunimanima do idia hadikaia ela bona hanaihanai. Unai badina dainai, aposetolo Paulo be ita ia sisiba henia, ia gwau: “Lauegu lalokau taudia e, dika ena davana do umui karaia lasi, davana be, Dirava sibona. Badina be Buka Helaga ia gwau, ‘[Iehova] ia gwau, “Dika ena davana be lau sibona ese do lau karaia.” ’ ” (Roma 12:19) Momokani, Bible be Havaraia Tauna ena dika davana henia dinana ia herevalaia. Unai dika davana henia dinana be dahaka? Bona daidia be Dirava ena badu do idia davaria? Sivarai gabena dekenai unai do ita herevalaia.

[Box on page 4]

Dika davana henia lalohadailaia dalana ita koua totona namona be ita laloatao

□ Dirava be hahemaoro maoromaoro karana ia laloa bada

□ dika davana henia lalohadaina ita dogoatao neganai, tauanina ita hadikaia diba

□ ita hebogahisi neganai ma haida dekenai ita hekwakwanai karana be nega momo ia koua

□ taunimanima be iseda kerere momo idia laloa lasi

□ kara dika taudia be edia kara idia haidaua diba

□ tanobada ita kwalimu henia diba bema ena kara ita koua neganai