India Davara Motumotudia ese Sivarai Namona Idia Kamonai

MADAGASCAR ena north east bona south east kahana dekenai India ena davara badana ena west kahana ena 1.5 milion sikoea mile dekenai, motumotu haida idia noho, idia be Rodrigues, Mauritius, Réunion, Seychelles, Mayotte, bona Comoros. Ena be davara bada dekenai idia noho, to unai motumotu iboudiai edia tano ena bada be 7,300 sikoea kilomita sibona. Unuseniai idia noho taudia edia namba be 2.3 milion, unai dainai tanobada ena motumotu iboudiai lalonai taunimanima momo be India Davara ena motumotudia dekenai idia noho.

Unai taunimanima ibounai huanai Iehova ena Witness taudia 2,900 idia noho, bona idia be Dirava ena Basileia sivarai namona idia harorolaia goadagoada unai motumotu taudia dekenai. Gabu daudau dekenai idia noho dainai, unai Witness taudia ese sekit naria taudia edia vadivadi idia moalelaia bada bona Watch Tower Society ena branch opesi Vocoa, Mauritus dekenai ese lagani ta ta ai edia hebouhebou idia hegaegaelaia dainai idia moale danu. Unai nega lalodiai idia ese Isaia 42:10 ena hereva ena anina idia moalelaia bada, ia gwau: “Ane matamata umui abia Iehova dekenai; tanobada ena dokona amo iena ladana umui hanamoa. Davara dekenai bona davara lalonai idia noho gaudia ibounai dekenai umui diho lao taudia, umui motumotu bona umui noholaia taudia danu.”

Daudau lasi gunanai, branch opesi ese tadikaka haida idia siaia lao unai motumotu edia kongregesen ibounai idia vadivadi henia totona, bona idia ese dina-tamona hebouheboudia idia karaia totona, bona unai hebouhebou ena hereva badana be “Emu Kara Iboudiai Dekenai Oi Helaga,” unai hereva be 1 Petero 1:15 dekena amo idia abia. Unai davara badana ena motumotu ibounai ai lao henidia totona, peleini amo ai lao, nega haida jumbo jet peleini dekena amo ai lao, to nega haida peleini maragidia dekenai ai lao. Nega haida mai edia palai bouti badadia bona maragidia amo ai lao. Umui mai ai danu, bona umui ese gabu daudau ai ia noho India Davarana ena motumotu dekenai sivarai namona idia kamonai dalana umui itaia!

Rodrigues Ai Vadivadi Henia Guna

Mauritius dekenai peleini amo ai roho hora ta bona mai kahana murinai, ai ese nadi kuro motumotuna (coral reef) ta davara dekenai ai itaia. Ia ese gohu badana ta ena hetoana ia makaia, India Davarana dekenai tano ta ia noho. Unuseniai ai ginidae guna, Rodrigues motumotuna dekenai.

Peleini ia diho gabuna be davara nadi amo idia karaia, ena ladana be Point Coraille. Unai gabu dekenai davara nadidia be uduna masemase dainai idia utua diba bona biriki badadia idia karaia bona idia gaukaralaia ruma idia haginia totona. Basi maragina ta dekenai ai guia bona ia giroa momo dala maragina ta dekenai ai heau lao Port Mathurin ena taoni badana dekenai. Ai heau lao noho lalonai, motumotu ena kahana amo aiemai matana ai negea lao neganai, ai ese gabu daudau dekenai davara nadi motumotu, gohu gadokagadokana, bona kone mai nadi badadia danu ai itaia diba. Medu ena nega be daudau lasi ia ore dainai, ororo maragidia dekenai ava manokadia idia tubu, bona boromakau, mamoe, bona nanigosi be unai ava idia ania noho.

Kingdom Hall namo herea maragina ta be Port Mathurin taoni huanai ia noho bona unuseniai aiemai dina-tamona hebouhebouna do ai abia. Lagani 1964 lalonai, haroro gaukara be Rodrigues dekenai idia hamatamaia. Hari unai gabu dekenai idia noho taudia iboudiai be 37,000, bona Bible sivarai namona harorolaia pablisa taudia iboudiai be 36. Ai moale bada badina hebouhebou dekenai idia mai taudia ibounai be 53 bona ena mauri lagani 18 merona ta ia bapatiso. Unai mero ena sinana be ia duahiduahi bona ia toretore diba lasi, to ia ese lagani 1969 lalonai hereva momokani ia abia dae, bona unai negana amo ema bona hari, ia ese Iehova ena hesiai gaukara ia karaia noho, ena be ena ruma bese bona ena varavara taudia dekena amo dagedage ia davaria. Hari ena natuna rua be Iehova dekenai idia gwauhamata bona bapatiso idia abia.

Hebouhebou murinai, wiki ta bamona unai motumotu dekenai haroro gaukara ai karaia. Ai be Mauritian Creole gadona dekenai ai hereva badina Rodrigues dekenai unai gado idia kikilaia. Basi amo bona aena dekena amo ai raka lao teritori gabuna dekenai​—unai gabu ena taora dekenai tubutubu gaudia be momo, atai gabuna amo dala ia diho lao ela bona davara dekenai. Unai gabu ena toana be namo herea​—gohu gadokagadokana, davara nadi kurokurona bona davara badana gadokagadokana be muri kahana amo idia hedinarai! Hodahoda be namo herea bona ia be miro lasi dainai ai ia hagoadaia bona ai hegaegae do ai lao haroro totona.

Dala maragidia dekenai ai raka lao bona sinavai maragina be nega momo ai hanaia unai taora dekenai idia noho rumadia momo ai lao henidia totona. Ruma ta ta iboudiai dekenai ai idia abia dae mai edia moale danu, bona ai ese ruma taudia ai hadibadia Basileia ena hahenamo be kahirakahira do ia vara. Unai murinai ai be taora ena henuna kahana dekenai, bona nega ia ginidae ai giroa lao aiemai gabu dekenai. Unai anina be ororo dekenai do ai daekau bona hora momo lalonai do ai raka ela bona do ai ginidae emai gabu dekenai, to unuseniai idia noho taudia haida ese ai idia durua​—ai idia hamaoroa edia jeep motuka dekenai ai guia diba.

Ai lao gabuna dekenai ai gaukara bada murinai, ai moale Betele rumana namona Vacoas dekenai ai giroa lao neganai. Municipal Hall dekenai dina-tamona hebouheboudia rua idia hegaegaelaia. Dina ginigunana dekenai, taunimanima 760 idia mai hebouhebou totona. Idia ibounai be unai motumotu ena kongregesen 6 amo idia mai. Dina iharuana dekenai, program tamona ma ai abia bona kongregesen oredia 6 amo taunimanima 786 idia mai. Unai Saturday bona Sunday lalonai, taunimanima matamatadia 4 idia bapatiso. Unuseniai special pioneer taudia 30 bona regular pioneer taudia 50 idia noho, bona idia heduru Bible ena sivarai namona unai motumotu taudia dekenai idia harorolaia totona.

Daudau Herea Seychelle Motumotudia

Hari be nega ia ginidae peleini dekenai do ai guia lou, bona maoromaoro north kahana dekenai do ai lao, ena daudau be 1,600 kilomita bamona, bona davara badana do ai hanaia bona do ai ginidae motumotu ta ladana Mahé dekenai, unai be Seychelles dekenai. Creole gadona dekenai ena ladana be Zil Elwannyen Sesel, anina be “Gabu Daudau Seychelle Motumotudia.” Unai motumotu be daudau herea gabuna dekenai idia noho dainai, branch opesi ese lagani ta ta iboudiai lalonai vadivadi rua sibona idia hegaegaelaia. Unai dina-tamona hebouhebouna bona sekit hebouhebouna be hanaihanai idia abia heboudia, tubutubu gaudia idia vara lou negana ai idia abidia. Distrik hebouhebouna be gabeai unai lagani lalonai idia abia. Hari October ihuana dekenai, distrik hebouhebouna do ai karaia totona ai mai iniseni, bona murinai wiki ta lalonai kongregesen do ai vadivadi henia. Unuseniai danu ai ese Mauritian Creole gadona ai kikilaia diba.

Praslin motumotuna bona La Digue motumotuna idia noho kahirakahira bona unuseni amo tadikaka bona taihu idia ginidae vadaeni. Ai moale bada badina bese idauidau 12 amo taunimanima idia mai hebouhebou dekenai! Witness tadikaka ta ena ruma murinai, motuka atoa rumana be edia Kingdom Hall ai idia halaoa bona unuseniai distrik hebouhebou ai abia. Tadikaka 6 sibodia​—idia haida be vadivadi tadikakadia​—be idia hegeregere program ena hereva idia henia totona. Unai dainai, haida be hahenamo idia davaria badina program ena hereva tamona sibona lasi to hereva haida idia henia diba, unai hebouhebou dinadia 4 lalonai. Unai pablisa taudia 81 be idia moale bada badina hebouhebou ena dina ginigabena dekenai taunimanima 216 be idia danu unai hebouhebou dekenai idia noho.

Hebouhebou murinai, mai ena palai boutina dekenai ai gui bona ai lao Praslin dekenai, ia be Mahé ena northeast kahana dekenai, ena daudau be 40 kilomita bamona. Unai 18 mita boutina be tacamahac ena au amo idia karaia. Unai bouti dekenai taunimanima 50 idia guia diba bona kohu idauidau mai edia metau 40 ton bamona ia udaia diba. Mahé ai rakatania bona bouti ena vairana kahana be Praslin ena gabu ia vaira henia, bona ai be unai gabu daudau gabuna ai itaia diba; diesel ensini ena siahu ai mamia diba bona autubua rua edia palai idia veria daekau ensini idia durua totona.

Hora rua mai kahana murinai, ai ese nadi idukana ta ai heau hegegea bona hairai gabuna, Bay St. Anne, ena hurehure lasi gohuna dekenai ai heau vareai. Uopu latana dekenai ai gini neganai, iseda tadikaka ai itadia idia be ai idia naria noho. Unai motumotu maragina dekenai pablisa taudia 13 idia noho bona vadivadi taudia 8 be ma gabu haida dekena amo idia mai. Unai dainai ai moale bada badina taunimanima 39 be unai hebou gabuna maragina idia hahonua special pablik tok idia kamonaia totona. Unai namba ia bada daekau haraga diba!

Praslin dekenai ai noho lalonai, gabu mai hairaina ladana Vallée de Mai ai lao vadivadi henia. Coco-de-mer, niu bamona auna ta, be unuseniai ia tubu momo, tanobada ibounai dekenai uhe ibounai amo Coco-de-mer auna ena uhena be bada herea momokani, uhe ta ena metau be 20 kilogram bamona. Unai uda ena ikerukeru dekenai, ai ese unai au edia bada idauidau ai itaia. Vadivadi taudia edia hadibaia hereva ta idia torea, unai hereva be ia gwau, unuseniai au lata hereana ena lata be 31 mita, to unai be lagani 1968 lalonai idia hahetohoa. Haida idia gwau unai au lata herea haida edia mauri laganidia be 800 bamona. Unai au ese ena huahua ia atoa lasi ela bona lagani 25 idia ore, bona ena huahua do ia mage lasi ela bona ma lagani 7 idia ore. Unai dainai buklet ena taravatu ia gwau: “Laulau sibona umui abia, aena palapala toana sibona umui rakatania”!

Kerukeru dabai, 7 o’clock ai, bouti ta dekenai ai gui bona ai lao La Digue motumotu maragina dekenai. Bouti maragidia momo be uopu gabuna dekenai idia hetu hebou. Unai bouti maragidia be ma tano idauidau amo idia mai kohu gaudia be unuseniai idia noho taudia 2,000 dekenai idia abia lao. Switzerland tadikaka burukana ta mai ena adavana ese ai idia hedavari henia, idia be lagani 1975 lalonai unai motumotu dekenai idia ginidae. Boromakau ese ia veria gauna dekenai ai guia lasi to kone dekenai ai raka lao, bona kone dekenai idia noho nadi badadia bona aukadia ai itaia edia kala be sisina kakakaka, idia manadamanada badina nega hanaihanai davara bona medu ese unai nadi idia botaia dainai. Daba aniani ai ania murinai, ai ese gabu maragina ta ai raka hanaia, unuseniai manu koremadia ladana flycatcher be momo; bena kamonai taudia haida edia ruma dekenai ai ginidae. Taunimanima 13 idia mai hebou Creole gadona dekenai hereva idia kamonai totona. Ai ese kamonai tauna ta bona ena adavana ai hedavari henia, idia ruaosi idia hegaegae vadaeni edia headava do idia hamaoromaoroa totona, badina idia ura lauma dalanai do idia tubu daekau totona. Momokani, Iehova be kohu namodia bamona taudia be bese idauidau amo ia gogodia, unai daudau herea motumotudia dekenai danu.

Réunion Dekenai Ai Giroa Lao

Emai laolao lalonai ai vadivadi henidia motumotudia iboudiai amo, Réunion motumotuna be gavamani ese ia hanamoa namo herea. Tano ai heau henia kahirakahira neganai, motuka laini 4 idia heau diba dala badana ai itaia, unuseniai motuka momo idia heau mai Saint Denis amo, ia be unai gabu ena taoni badana. Ruma latadia be davara bona ororo badadia huanai idia noho. Unai motumotu dekenai idia noho taudia iboudiai be 580,000 bona Basileia harorolaia gaukara amo huahua momo idia davaria. (Mataio 9:​37, 38) Hari unai gabu dekenai sivarai namona idia harorolaia goadagoada pablisa taudia 2,000 idia noho bona kongregesen ibounai be 21.

Unai dina-tamona hebouhebouna be mai ena guhi steidiam badana ta dekenai idia abia. Ai moale badina taunimanima 3,332 be idia mai unai hebouhebou totona, bona ai moale bada badina kamonai matamata taudia 67 idia bapatiso! Misinari taudia edia hebamo ai moalelaia murinai, ai lao emai vadivadi gabuna ta dekenai.

Mayotte​—Bonana Namo Motumotuna

Taunimanima 40 idia guia diba peleinina dekenai hora rua ai heau murinai, ai diho Pamanzi peleini gabuna dekenai, bona unai motumotu amo dala ia lao 1.9 kilomita, bona ia lao Dzaoudzi motumotuna dekenai, Dzaoudzi be Mayotte ena taoni badana. Guba gadokagadokana, ori kurokurodia, ororo mai ena ava namodia bona davara bada gadokagadokana ese maino paradaiso gabu namona idia hahedinaraia. Mayotte ena ladana ta be Bonana Namo Motumotuna badina bonana namo au ladana ilang-ilang be unuseniai ia tubu momo. Ena palaoapalaoa ena ranuna idia kokia bona idia siaia lao France dekenai bona unuseniai idia ese lada bada bonana namo muramuradia idauidau idia karaia.

Miniti 15 bamona ai heau lao motumotu badana dekenai. Misinari rumana dekenai ai aniani bona ranu ai inua, bena murinai ai idia boiria do ai lao buka stadi totona, ia be motumotu ena kahana dekenai, ena daudau be kilomita 19 bamona. Ai laloa do ai hekwarahi lasi ai vadivadi neganai! To lasi, jeep motukana ai guia bona dala maragina ta dekenai mai gari danu ai heau lao. Ai laloa dala dekenai idia raka taudia bona boromakau bona motuka haida be kahirakahira ai bampa henidia. To aiemai motuka ia taria France tauna be dala ia diba. Daudau lasi murinai Chiconi dekenai ai ginidae, unuseniai ruma bese ta ai hedavari henidia bona edia ruma dekenai buka stadi ai karaia.

Ruma tamana be guna Muslim tomadiho tauna bona ia ese iena natuna ibounai 8 be ai ia hahedinarai henia. Iena natuna mero ginigabena ena mauri lagani be 4, bona ia ese sene dalanai ai ia hanamoa. Ia ese ima palapalana ta dekenai imana iharuana ia atoa bona ai vairanai ia gini mai haheauka danu, ena imana rua ai dekenai ia duduia. Imana ai udeudea toho, to unai be kerere, bena egu hahine ese mero ena imana rua ia abia bona ia sibona ena kwarana dekenai ia atodia toho. Unai danu be maoro lasi bona unai mero maragi be ena matana badana amo ai ia raraia noho, ai ese dahaka do ai karaia ia daradaralaia. Murinai dala maorona ai davaria​—mero ena imana rua be unai mero sibona ena kwarana latanai ai atoa. Stadi ai hamatamaia bona taunimanima 14 be unai stadi lalonai idia noho. Stadi ai karaia lalonai, tau ta ia raka vareai bona ai ibounai emai imana ia udeudea. Unai danu be edia bese karana ta.

Hanuaboi dekenai gunika gabuna lalona amo ai giroa lao neganai, mariboi badadia ai itaia idia roho lao au huahua audia dekenai, edia hanuaboi aniani do idia ania totona. Bona ia giroa momo dalana dekenai idia moru au huahua haida ladana jackfruit ena bonana aukana ai bonaia diba, bona ma huahua haida danu, vaivai, loku, bona guava edia bonana namona ai bonaia diba. Unai gabu dekenai lemur idia noho, idia be moniki bamona bona ena vaira toana be uda sisia ta ladana fox bamona ia lata, bona edia iuna be idia gegea bona au ena rigi eiava ma gau haida dekenai idia dogoatao diba. Ororo maragina dekenai ai heau hegegea neganai gau namona ta ai itaia. Hua kuboruna be gohu ena kahana dekenai ia daekau bona ena toana be kakakaka bamona bona ena diari be mai hairaina danu davara dekenai ia hedinarai. Aiemai motuka taria tauna danu be motuka ia haheaua metairametaira unai hua ia itaia totona, bona dala ia giroa gabudia iboudiai hua ai itaia diba.

Daba ia ginidae neganai, misinari taudia danu ai lao haroro. Tau matamatana ta ai davaria guna, ia be tisa tauna bona France gadona ia gwauraia namonamo. Ia be reirei dekenai ia helai bona ai be iena mahuta gauna dekenai ai helai. Stadi iharuana be tau matamatana ta danu, bona ai ia hamaoroa ena daiutu maragina lalonai ena mahuta gedana, reirei dekenai ia noho gauna, latanai do ai helai totona. Nega sisina murinai ai helai namo lasi, badina emai aena idia tamoru bona emai doruna dekenai varahu ia diho lao, siahu bada dainai. Stadi hereva kamonai be taina ia auka badina France gadona ai bona Mahoria gadona ai idia karaia, bona ruma kahirakahira dekena amo reidio idia kehoa badabada bona pop miusik ane matamatadia idia kamonai.

Aiemai stadi ginigabena be Comoros motumotuna dekenai, bona ia danu be tau matamatana ta. Ena sori hereva ia gwauraia badina France gadona ia gwauraia namonamo lasi dainai, bena ena buklet ia abia bona ia helai hegaegae stadi ai hamatamaia totona. Misinari tadikaka ese hereva ena anina ia hadibalaia lau dekenai neganai, unai stadi tauna ese misinari tadikaka ena hereva ia utua bona ia gwau paragraf do ia duahia. Mai ena hemataurai danu ai ia hamaoroa regerege ta do ai karaia lasi. Unai taudia ibounai be Muslim tomadiho taudia, to Bible dekenai idia stadilaia gaudia idia laloa bada.

Ai laloa dahaka dainai, tatau matamatadia momo idia stadi, to hahine bona kekeni be momo lasi. Ai idia hamaoroa unai be edia tano ena kastom karadia bona bese ena sene karadia dainai. Tau ta be hahine momo ia adavaia diba bona tomadiho taudia bona hanua taudia ese unai kara idia abia dae. Unai hahine ta ta be edia ruma ta ta dekenai idia noho, unai dainai tamana ena siahu natuna dekenai be maragi sibona; sinana ese gau ibounai ia naria eiava ia gunalaia. Edia natu kekenidia be edia sinana ena ruma dekenai idia noho ela bona edia headava dinanai. To, edia natudia mero be tau matamata ai idia lao neganai, ruma idia rakatania bona sibodia edia ruma, ladana banga idia karaia, eiava memero matamata haida danu banga ta dekenai idia noho hebou. Unai dainai tatau matamatadia be edia ura hegeregerenai idia stadi diba, to kekeni momo lasi be unai bamona idia karaia diba.

Sunday dekenai be dina-tamona hebouhebouna ena dina. Daba kahanai dina ena toana be namo, to dina tubua dekenai ori ese guba ia koua bona medu bada ia diho. Tau ta lasi be unai medu ese ia hahekwakwanaia badina medu ese unai gabu ia hakerua. Unai gabu dekenai lauma dalanai idia taga badina taunimanima 83 be hebouhebou dekenai idia lao bona kamonai matamata taudia toi idia bapatiso, unai dainai pablisa bona pioneer taudia 36 idia moale.

Mauri Hanaihanai Tanobada Dekenai Oi Abia! buklet be edia gado dekenai idia halasia neganai unai ese moale bada ia havaraia. Unai be Watch Tower ena buklet tamona sibona be Mahoria gadona dekenai idia torea, bona unai gado dekenai ma buka ta be lasi. Roman toretore henunai ma Arabic toretore letadia idia torea. Unai gabu dekenai, sikuli lalonai taunimanima be Arabic toretore idia stadilaia to Arabic gadona idia stadilaia lasi. Idia ese Arabic guriguridia idia herevalaia diba bona Koran bukana dekenai Arabic gadona idia duahia diba; to idia gwauraia herevadia edia anina idia diba lasi. Iseda buka lalonai Arabic toretorena idia duahia neganai, idia hoa bada badina ena anina idia abia. Idia duahia neganai edia gado regena be edia gado korikorina, Mahoria gado unai. Idia ese anina idia abia badina edia gado korikorina ena regena be Arabic letadia amo idia duahia. Ai moale bada ai itaia idia be anina idia abia neganai, bona edia moale ia hedinarai edia vairadia dekenai.

Taunimanima dekenai unai buklet hariharilaia be auka lasi. Hanua maragina ta dekenai hahine ta ai haroro henia noho lalonai, tau ta be ai dekenai ia mai. Mahoria gado dekenai iseda tadikaka ia hereva henia auka noho. Ai laloa ia be Witness taudia ia ura henidia lasi. Unai tau be taina daudau ia hereva noho bona imana danu ia negea noho ia hereva lalonai. Gabeai tadikaka ese ai ia hamaoroa unai tau ia maumau, ia gwau: “Edena bamona ai umui hamaoroa gaudia do ai laloatao diba badina umui be lagani tamona dekenai nega tamona sibona ai umui vadivadi henia? Dahaka dainai unai bamona umui karaia? Namona be nega momo umui mai bona unai gaudia umui kikilaia ai dekenai.”

Unai hereva dokodia dainai ai hebogahisi. Iehova be momokani iena Basileia sivarai namona amo bese iboudiai edia kohu namodia ia gogodia noho. Ena be davara badana ese edia hetoana ia karaia, to unai motumotu taudia danu be hanamoa boiboina idia henia idia ia Karaia Tauna, edia guba Tamana, Iehova Dirava dekenai.​—Hagai 2:7.

[Map on page 21]

(For fully formatted text, see publication.)

SEYCHELLES

INDIAN OCEAN

COMOROS

MAYOTTE

MADAGASCAR

MAURITIUS

RÉUNION

RODRIGUES

[Picture on page 23]

The rocky headland at Praslin, Bay St. Anne

[Picture on page 24]

Nadi idukana, Praslin, Bay St. Anne dekenai Boromakau ese ia veria gauna, La Digue, Seychelles ai

[Picture on page 25]

Buklet matamatana amo ai haroro Mayotte dekenai