Buka Matamatana Dainai Taunimanima Milion Momo Idia Moale

JUNE 1991 dekenai, “Mauri Namona Ura Henia Taudia” Distrik Hebouheboudia idia hamatamaia, bona ena hereva badana ta ena ladana be “Tau Hereadaena.” Unai hereva dokona lalonai buka ta idia halasia, ena ladana be unai hereva ena ladana hegeregerena. Taunimanima milion 6 bona ma haida be unai hebouhebou ta dekenai idia lao bona unai hereva idia kamonai henia vadaeni. Inai magasin ena rau 8 bona rau 13 dekenai idia hedinarai sivaraidia rua lalonai unai hereva haida idia torea.

“Tau Hereadaena” bukana ena kope 12 milion bona ma haida be gado 60 bamona dekenai idia printaia vadaeni. East Europe tanodia dekenai, Albania, Croatia, Hungary, Macedonia, Poland, Russia, Serbia, bona Slovenia gadodia dekenai idia karaia danu. Soviet Union lalonai, hebouhebou 7 dekenai idia lao taudia 74,000 be idia moale bada herea unai buka be Russia gadona dekenai idia abia dainai.

Buka Ia Vara Dalana

April 1, lagani 1985 dekenai, unai buka ena sivarai be ia hedinarai hamatamaia The Watchtower magasin lalonai (Gima Kohorona dekenai November 1985 ai ia matamaia), bona unai nega amo sivarai 149 be Watchtower magasin dekenai idia hedinarai vadaeni. Inai magasin idia duahia taudia momo idia gwau June 1, 1991 gauna lalonai unai sivarai idia doko dainai idia lalohisihisi. Italy lalonai, lagani 12 kekenina, Melissa, ese The Watchtower magasin lalonai unai sivarai ginigabena ia duahia neganai ia tai. Ia gwau: “Hebouhebou ia do kehoa lasi hanuaboina dekenai lau guriguri Iehova dekenai, lau noia Iesu ena mauri ia gwauraia bukana ta do idia karaia. Unai buka idia halasia neganai, egu imana lau hapatapataia bada herea momokani.”

The Watchtower magasin dekenai idia hedinarai vadaeni sivaraidia idia haidaua sisina bona unai rau 448 mai hairai buka matamatana dekenai idia haboudia, ena karoa be 133. Buka ai hegaegaelaia neganai, Evanelia buka haniosi dekenai Iesu ena hereva iboudiai bona ena mauri dekenai idia vara karadia iboudiai, ena haheitalai herevadia bona ia karaia hoa karadia iboudiai danu, edia sivarai ai torea. Bona ai hekwarahi badina ai ura unai kara iboudiai ai torea dalana be edia vara negadia hegeregerena. Karoa ta ta iboudiai dokodiai karoa dekenai tadikaka ese idia gaukaralaia Bible siridia idia torea.

Reana oi gwau, ‘To, unai buka lau duahia vadaeni, badina The Watchtower magasin lalonai unai sivarai ibounai lau duahia vadaeni.’ To, lagani 6 bamona lalonai pura rua rua iboudiai dekenai, Iesu ena mauri sivaraina ena kahana maragina ta sibona oi itaia. Ena sivarai sisina sibona oi duahia, to Iesu ena kara oi ia hadibaia. To, mani oi laloa, inai buka dekenai nega tamona lalonai tau hereadaena ena sivarai ibounai do oi duahia diba, unai be moale momokani gauna, ani? Unai be abidadama hagoadaia momokani karana!

Abidadama Ia Hagoadaia

Hahine ta, Washington, D.C., U.S.A. amo, ia gwau: “Unai buka be pura rua lalonai lau duahia haorea. Unai sivarai lau duahia neganai egu matana amo ranu ia diho bona lau tai. Unai neganai duahiduahi lau hadokoa bona mai guriguri danu lau tai. Lau be hegeregere Iesu danu lau noho, ia danu lau hisihisi noho. Unai buka lau duahia pura ta murinai, lau duahia sivaraidia lau lalodia lou neganai, ma lau tai. Iehova ese iena Natuna ia henia dainai lau be ia kahirakahira dekenai lau mai ena mamina lau abia.”

Hahine ta, Pittsburgh, Pennsylvania, U.S.A. dekena amo, ia torea inai bamona: “Hari dina, lau ese Iesu ena sivarai ia gwauraia bukana lau duahia haorea. Unai sivarai be namo herea momokani. Ena karoa ginigabedia lau duahia neganai, egu matana be mai ranu danu. Nega tamona unai sivarai iboudiai lau duahia be namo herea. Egu hemami ena moale ena bada lau gwauraia namonamo diba lasi​—to unai buka lau ura henia dikadika!”

Unai buka ena hairai laulaudia ese iseda moale mamina ia habadaia, duahia tauna ta ia hereva hegeregerena, ia gwau: “Idia ese mase natuna idia taitailaia sivaraina lau duahia neganai (karoa 47), idia lau kamonai henidia bamona, eiava lagani momo rara moru gorerena ia abia hahine ese Iesu ia dogoatao bona ia namo sivaraina lau duahia neganai (karoa 46), lau laloa ita diba Iesu ena lalohadai be dahaka unai kara ia karaia neganai. Laulau dekenai edia vaira toana idia hedinarai goevagoeva dainai hebogahisi bada mamina lau abia. . . . Lau duahia be hekwarahi gauna lasi, to dina ta ta dokonai unai buka lau duahia karana ese lau ia hamoalea. Unai buka idia torea dalana ese Iesu ena kara sivarai ia gwauraia mo sibona lasi, to iena lalohadai bona ia abia mamina ia hahedinaraia goevagoeva danu.”

Gaukaralaia Daladia Idauidau

Momo herea ese edia ruma bese stadi lalonai unai buka idia gaukaralaia. Tau ta mai ena hahine, Silverton, Oregon, U.S.A. dekena amo, be inai bamona idia torea: “Aiemai natudia maragidia be toi, bona unai buka be namo herea ‘hanuaboi ta ta ibounai lalonai ruma bese stadi’ ai karaia totona. Momokani, iseda lalokau Pavapavana, Keriso Iesu, ena sivarai ita stadilaia namonamo be maoro.”

Kekeni ta Japan amo ia gwau: “Hanuaboi iboudiai aniani ai haorea bena ai laga-ani neganai, egu tamana be ai dekenai unai buka ia duahia. Aiemai ruma bese be unai buka ena sivarai ginigunadia gabuna amo ai duahia lao, to lau laloa hanuaboi iboudiai, lau do mahuta lasi neganai, namona be unai buka ena kahana dokona dekena amo sivarai ta do lau duahia. To, unai buka ena sivarai be idia namo herea dainai, nega lau laloa lasi bona nega momo lau duahia ela bona 1 o’ clock daba kahanai.”

Taunimanima momo idia hoa badina unai sivarai idauidau lalonai gau momo idia herevalaia. Witness hahine ta ia torea inai bamona: “Lau diba lasi gaudia momo be hari lau diba.” California, U.S.A. dekena amo idia siaia revareva ta ia gwau: “Lau bona egu hahine be lagani 35 bona ma haida be hereva momokani dekenai ai noho, bona idia halasia bukadia iboudiai ai moalelaidia, to unai buka be ai moalelaia bada herea momokani.”

Taunimanima haida idia gwau Iehova ena Witness taudia be Iesu idia abia dae lasi, to unai buka be heduru namona edia hereva do ia hakoikoia totona. Duahia tauna ta be mai moale danu ia gwau: “Unai buka lau atoa diho diba lasi, badina ena be taunimanima idia gwau kava Iehova ena taunimanima be Iesu Keriso idia abia dae lasi bona idia hanamoa lasi, to unai buka ese edia hereva ia hakoikoia. Hari, unai bamona idia hereva kava taudia edia imadia dekenai unai buka ita atoa, bena do idia lalo-parara.”

Iehova ena Witness taudia edia haroro gaukara dekenai unai buka be mai anina bada. Witness hahine ta ia gwau: “Hahine ta ida Bible stadi lau karaia bona unai buka ta ia lau henia, bona murinai iena kara ia haidaua be hoa karana ta bamona. Ai be lagani tamona ai stadi vadaeni, to hebou dekenai do ia mai totona lau hekwarahi.” Witness hahine ia gwau, unai Bible stadi hahinena be unai buka matamatana ena karoa idauidau 45 ia duahia murinai, “lau ia hadibaia Sunday dinana dekenai hebou dekenai do ia mai, badina nega ia ginidae ena abidadama ia hamomokania totona.”

Ena Namo be Idauidau

Oibe, Tau Hereadaena bukana ese Evanelia bukadia edia sivarai ia hahedinaraia. Iesu ese ia gwauraia herevadia bona ia hadibaia herevadia momo edia anina ia hahedinaraia, unai dainai, diba abia totona unai buka idia stadilaia be namo, badina Bible ena sivarai ia gwauraia hedinarai goevagoeva.

Gau namona ta be inai: unai sivarai ta ta idia vara ena nega ena nega hegeregerena ai idia torea. Unai oi laloatao neganai, unai buka ena rau oi kehodia lao lalonai, oi ia durua Iesu ena haroro gaukara sivaraidia edia vara negadia korikori do oi diba totona. Evanelia buka haniosi idia duahia taudia haida idia laloa, kerere haida idia noho. Unai buka matamatana ese idia gwauraia kereredia ia gwauraia hedinarai lasi, to unai idia daradaralaia herevadia ia hahegeregeredia bona edia anina ia torea hedinarai.

Ita be Keristen taudia dainai, namona be ita ura iseda Haheitalai Namona Tauna, Iesu Keriso, ena mauri ita stadilaia namonamo. Unai dainai, namona be unai buka Tau Hereadaena ena heduru amo, Evanelia bukadia edia sivarai ita stadilaia namonamo.