Iesu Ena Lalokau Do Oi Abia Dae, A?
“Keriso ena lalokau ese ai ia biagua noho.”—2 KORINTO 5:14.
1. Iesu ena lalokau karana be edena bamona ita gwauraia diba?
MOMOKANI, Iesu ena lalokau be bada herea! Ia ese boubou davana ia henia neganai, ia be mai ena hisihisi bada danu ia mase, unai dala mo sibona amo mauri hanaihanai ita abia diba. Unai ita diba neganai, iseda kudou ia hamareredia bona ita moale ia dekenai! Iehova Dirava bona Iesu danu ese dala idia kehoa guna. Ena be ai be kara dika taudia, to idia ese ai idia lalokau henia guna. (Roma 5:6-8; 1 Ioane 4:9-11) Aposetolo Paulo ia gwau: “Keriso ena lalokau” ita diba bona unai “ese diba ibounai ia hereaia.” (Efeso 3:19) Oibe, Iesu ena lalokau ese kwarana lalonai ita atoa diba tanobada aonegana ia hereaia momokani. Taunimanima ese idia itaia o idia mamia gaudia iboudiai amo, gau ta lasi ese unai lalokau ia hanaia diba.
2. Iesu ena lalokau ita dekenai idia koua diba lasi gaudia be dahaka dahaka?
2 Roma Keristen taudia ia toretore henidia neganai, Paulo ia henanadai, ia gwau: “Daika ese Keriso ena lalokau ita dekena amo do ia kokia diba? Nega dika ese, a? O hisihisi ese, a? O dagedage ese? O hitolo ese? O ogogami ese? O gari bada gauna ese? O mase ese?” Unai bamona karadia amo ta lasi ese Iesu ena lalokau ita dekenai ia koua diba. Paulo ma ia gwau: “Lau diba momokani . . . mase o mauri, o aneru, o lohia herea taudia, o guba ena siahu gaudia, o harihari idia noho gaudia, o gabeai do idia vara gaudia, o atai gaudia, o dobu gabuna gaudia, o tanobada dekenai karaia gaudia, ta ese Dirava ena lalokau, Keriso Iesu iseda Lohiabada ese ia hedinaraia vadaeni gauna, dekena amo ita do ia kokia diba lasi.”—Roma 8:35-39.
3. Dahaka mo sibona ese Iesu bona ena Tamana edia lalokau ita dekenai ia koua diba?
3 Iehova Dirava bona Iesu edia lalokau karana oi dekenai be ia bada herea momokani. Gau tamona sibona ese edia lalokau oi dekenai ia koua diba, unai gau be, oi sibona emu ura dainai oi ese edia lalokau oi dadaraia bona oi ura lasi edia hereva oi badinaia. Nega ta Dirava ena peroveta tauna ta be Iudea pavapavana ta dekenai ia gwau: “Iehova dekenai umui noho neganai, ia be umui dekenai do ia noho; bema Iehova umui tahua, do umui davaria, to bema umui rakatania, ia ese umui do ia rakatania.” (2 Sisiga 15:2) Iehova Dirava bona iena Natuna, Iesu Keriso, be hebogahisi turadia namodia dainai ita ura lasi idia ita dadaraia, ani?
Iesu Ena Lalokau Dainai Ita Karaia Karana
4, 5. (a) Iesu ese ita ia lalokau henia dainai, namona be iseda kara taunimanima dekenai be dahaka? (b) Iesu ese ita ia lalokau henia dainai, namona be daidia do ita lalokau henidia danu?
4 Iesu ena lalokau bada karana oi dekenai ia hahedinaraia dainai dahaka oi karaia? Bona dahaka dainai unai bamona oi karaia be maoro? Iesu ese ia hahedinaraia iena lalokau dainai taunimanima ita kara henia dalana namona be dahaka. Mai ena manau danu iena aposetolo taudia edia aedia ia huridia murinai, ia gwau: “Dala lau hedinaraia vadaeni umui dekenai, vadaeni umui ese danu lau karaia bamona do umui karaia.” Ma ia gwau: “Taravatu matamatana lau henia umui dekenai inai bamona, umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia.” (Ioane 13:15, 34) Iena hahediba taudia ese unai diba idia abia neganai, goada idia abia iena kara idia tohotohoa totona. Aposetolo Ioane ena toretore lalonai, ia gwau: “Lalokau ena toana be inai kara dekena amo do ita diba: Keriso ese ita dainai iena mauri ia atoa diho. Unai dainai ita ese iseda tadikakana dainai iseda mauri ita atoa diho danu be namo.”—1 Ioane 3:16.
5 To, bema Iesu ena kara ita tohotohoa neganai taunimanima sibona dekenai lalokau bona kara namo ita hahedinaraia, ita be iena mauri bona gaukara edia anina ita do diba namonamo lasi. Iesu ese ita ia lalokau henia bada dainai, namona be ia ita lalokau henia bona ena Tamana ita lalokau henia bada danu, badina ena Tamana ese Iesu ia diba gaudia ibounai ia hadibaia, ani? Keriso ena lalokau karana dainai oi ura ia bamona ena Tamana ena ura oi karaia, a?—Efeso 5:1, 2; 1 Petero 1:8, 9.
6. Iesu ese ia lalokau henia dainai aposetolo Paulo ese dahaka ia karaia?
6 Saulo, gabeai ena ladana idia hatoa Paulo, ena kara oi laloa. Guna, ia ese Iesu ia dagedage henia bona ia ese “diba tahua taudia hagaria bona alaia hereva momo ia gwauraia.” (Kara 9:1-5; Mataio 25:37-40) Paulo ese Iesu ia diba namonamo neganai, Iesu ese ena kerere ia gwauatao dainai, ia moale bada herea, unai dainai ena lalona ia hegeregere ia mase Iesu totona. Ia gwau: “Hari lau mauri noho be lauegu mauri lasi . . . Bona inai mauri, lauegu tauanina lalonai ia noho gauna, be Dirava ena Natuna lau abidadama henia dainai lau mauri noho. Ia ese lau ia lalokau henia, bona lau dainai iena mauri ia atoa diho.”—Galatia 2:20.
7. Iesu ese ita ia lalokau henia dainai, namona be dahaka ita karaia?
7 Iesu ena lalokau karana ita dekenai be siahu bada gauna iseda mauri lalonai be namo! Paulo ese Korinto taudia ia tore henidia neganai, ia gwau: “Keriso ena lalokau ese ai ia biagua noho . . . Unai dainai . . . ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna ena mauri bona iena ura gaudia do ita laloa bona karaia.” (2 Korinto 5:14, 15) Momokani, ita moale badina Iesu ese iena mauri ia henia ita mauri totona, unai dainai herevana dahaka ia ura to namona be ita karaia. Unai dala mo sibona amo ita hamomokania diba ita lalokau henia. Iesu ia gwau: “Bema lau dekenai umui lalokau henia, be lauegu taravatu do umui badinaia. Lauegu taravatu ia abia dae bona ia badinaia tauna, inai tau ese lau ia lalokau henia.”—Ioane 14:15, 21; 1 Ioane 2:3-5 itaia danu.
8. Iesu ese ia lalokau henidia dainai, kara dika taudia momo ese dahaka idia karaia?
8 Iesu ena taravatu idia diba neganai, idau negai Korinto taudia be Iesu ena lalokau dainai, sihari kava, heudahanai, tatau be tatau danu idia mahuta hebou, henaohenao, inuinu kekero, bona koikoi dalana amo moni idia henaoa karadia idia dadaraia. Paulo ese edia sivarai ia torea, ia gwau: “Umui haida be guna unai bamona umui karaia. To Dirava ese umui emui kara dika ia huria vadaeni, . . . hari Dirava ena vairana dekenai umui be maoromaoro, Lohiabada Iesu Keriso dainai.” (1 Korinto 6:9-11) Unai hegeregerena, hari inai nega lalonai, Keriso ena lalokau ese taunimanima momo ia hasiahudia edia mauri dalana idia haidaua totona. Idau negai idia vara gaudia ia tahua tauna John Lord ia gwau: “Keristen tomadihona ena kwalimu karana momokanina be dubu ena hahediba hereva idia abia dae taudia edia kara ia haidaua taunimanima namodia ai do idia lao totona. Sivarai amo ita diba idia be kara maoromaoro taudia, mauri ena taravatu idia badinaia, idia be hanua ena tau namodia, bona Keristen ena kara namodia idia karaia.” Iesu ena hahediba herevadia ese taunimanima momo idia durudia bada!
9. Iesu kamonai henia ena anina be dahaka?
9 Momokani, hari inai nega lalonai, Iesu Keriso ena mauri bona gaukara sivaraidia ita stadilaia be mai anina bada gauna, ma stadi ta ese unai stadi ia hereaia lasi. Aposetolo Paulo ese ita ia hagania, ia gwau: “Iseda matana Iesu dekenai do ita negea lao. . . . Iesu . . . laloa namonamo.” (Heberu 12:2, 3) Bona Iesu ena toana ia idau neganai, ena Natuna totona Dirava ese inai oda ia henia, ia gwau: “Iena hereva do umui kamonai henia.” (Mataio 17:5) To, mai anina bada gauna be inai, Iesu ena hereva ita kamonai sibona be hegeregere lasi. Namona be iena hereva ita badinaia, oibe, anina be Iesu ena kara bona unai kara ia karaia dalana ita tohotohoa. Iesu ena lalokau ita dekenai ia hahedinaraia dainai, namona be iena kara ita tohotohoa bona iena aena gabudia dekenai ita raka namonamo.
Iesu Ia Ura Ita Karaia Gaudia
10. Iesu be daidia ia hadibaia bona dahaka totona?
10 Iesu ese Dirava dekena amo gaukara ta ia abia, unai gaukara be iena Tamana ena Basileia ia harorolaia, bona danu ena hahediba taudia ia hadibaia unai gaukara idia karaia totona. Ena hahediba tauna ginigunadia dekenai ia gwau: “Namo ita lao hanua haida, unuseni lau ura haroro karaia, badina inai totona lau mai.” (Mareko 1:38; Luka 4:43) Gabeai, ena aposetolo taudia 12 ia hadibaia namonamo murinai, Iesu be idia dekenai ia gwau: “Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ ” (Mataio 10:7) Hua haida murinai, ma taunimanima 70 ia hadibaia murinai, ia siaidia lao bona idia dekenai ia gwau: “Umui hadibaia idia dekenai, do umui gwau, ‘Dirava ena Basileia be umui dekenai kahirakahira ia ginidae.’ ” (Luka 10:9) Vadaeni, ia hedinarai goevagoeva, Iesu ia ura iena hahediba taudia be haroro bona hahediba gaukaradia idia karaia.
11. (a) Iesu ena hahediba taudia edia gaukara be edena bamona Iesu ena gaukara do idia hereaia? (b) Iesu idia hamasea murinai, iena hahediba taudia be dahaka idia karaia?
11 Iesu ese ena hahediba taudia ia hadibaia noho unai gaukara do idia karaia totona. Ia do mase lasi adorahina ai, idia ia hagoadaia totona, ia gwau: “Lau dekenai ia abidadama henia tauna ese lau karaia karadia ibounai be do ia karaia, bona inai kara do idia hanaia karadia danu do ia karaia.” (Ioane 14:12) Iena hahediba taudia ese do idia karaia gaukaradia ese Iesu ena haroro gaukara do idia hanaia badina idia be tanobada ena kahana idauidau dekenai bona nega daudau lalonai taunimanima momo herea do idia haroro henidia. To, Iesu idia hamasea murinai, iena hahediba taudia idia gari dikadika dainai idia haroro lasi. Idia noho hehuni bona Iesu ese idia ia hadibaia gaukarana idia karaia lasi. Idia haida be edia haoda gaukarana idia hamatamaia lou. To, dala idauna ai, unai taunimanima 7 ia hadibadia namonamo, bena idia bona ena hahediba taudia iboudiai idia diba dahaka ia ura idia be do idia karaia.
12. (a) Galilea Gohuna dekenai Iesu ese dahaka hoa karana ia karaia? (b) Iesu be Petro dekenai ia gwau “lau oi ura henia bada, to inai oi ura henia maragi” ena anina be dahaka?
12 Iesu be taunimanima ena tauanina ia atoa bona Galilea Gohuna dekenai ia hedinarai. Aposetolo taudia 7 be vanagi dekenai idia lao haoda to hanuaboi ibounai dekenai gwarume ta idia davaria lasi. Iesu be kone kahana amo ia boiboi henidia, ia gwau: “Reke be vanagi ena idiba kahana dekenai umui negea diho, gwarume do umui abia.” Hoa dalana amo reke be gwarume amo ia honu dainai kahirakahira reke ia darea idia itaia neganai, vanagi dekenai idia guia taudia idia diba kone dekenai ia gini tauna be Iesu, bona kara haraga idia lao ia naria noho gabuna dekenai. Iesu ese daba anianina ia henidia, bena murinai reana reke lalonai idia abia gwarume momo ia raraia bona Petro ia nanadaia, ia gwau: “Simona, Ioane natuna e, lau oi ura henia bada, to inai oi ura henia maragi, a?” (Ioane 21:1-15, NW) Iesu ena henanadai ena anina be inai: Oi ese haoda gaukarana oi ura henia bada to oi lau henia gwauraia haroro gaukarana oi ura henia maragi, a?
13. Edena dala amo Iesu ese ia murinai idia raka taudia ia hadibaia namonamo iena lalokau dainai dahaka dahaka do idia karaia be namo?
13 Petro ia haere, ia gwau: “Lohiabada e, oi diba lau ura henia oi dekenai.” Iesu ia gwau: “Lauegu mamoe do oi ubua.” Nega iharuana ia henanadai henia, ia gwau: “Simona, Ioane natuna e, lau oi lalokau henia, a?” Petro ia haere, ia gwau: “Oibe, Lohiabada e, oi diba lau ura henia oi dekenai.” Iesu ese ia hagania lou, ia gwau: “Lauegu mamoe do oi naria.” Bena nega ihatoina ma ia nanadaia, ia gwau: “Simona, Ioane natuna e, oi ura henia lau dekenai, a?” Unai negai Petro ena lalona ia hisihisi. Reana ia laloa Iesu ia laloa do ia badinaia lasi, badina be dina haida gunanai Iesu idia kota henia neganai, nega toi Petro ia gwau Iesu ia diba lasi. Vadaeni, nega ihatoina Petro be reana mai ena noinoi danu, ia gwau: “Lohiabada e, oi be gau ibounai oi diba, oi diba vadaeni lau ura henia oi dekenai.” Iesu ma ia hagania, ia gwau: “Egu mamoe do oi ubua.” (Ioane 21:15-17, NW) Unai dala amo Iesu ese Petro bona ena bamodia ia hadibadia namonamo, dahaka ia ura do idia karaia, ani? Vadaeni, mai ena siahu bada ida, Iesu ese unai taudia—bona danu hari inai negai idia ura iena hahediba taudia ai idia lao taudia—ia hadibadia, bema ia idia lalokau henia, hahediba taudia karaia gaukarana do idia karaia!
14. Ma nega haida dekenai, Iesu ese iena hahediba taudia ia hamaorodia, ia lalokau henidia dainai namona be dahaka do idia karaia?
14 Unai kone dekenai idia herevahereva dina haida murinai, Iesu ese Galilea ena ororo ta dekenai ia hedinarai bona ia murinai idia raka taudia mai moaledia 500 bamona idia hebou neganai, idia dekenai ia gwau: “Do umui lao, bese ibounai be diba tahua taudia do umui halaoa. . . . Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20; 1 Korinto 15:6) Mani inai oi laloa! Tatau, hahine, bona natudia, iboudiai ese unai gaukara idia abia. Ma gabeai, kahirakahira guba dekenai do ia lao neganai, Iesu be ena hahediba taudia dekenai ia gwau: “Lauegu ladana do umui gwauraia hedinarai . . . tanobada ena kahana ibounai [dekenai].” (Kara 1:8) Unai sisiba ibounai idia abia dainai, lagani momo murinai, Petro ia gwau: “[Iesu be] ai dekenai ia hadibaia, taunimanima ibounai dekenai do ai haroro.”—Kara 10:42.
15. Dahaka gau ita daradaralaia diba lasi?
15 Iesu ena lalokau dainai do ita karaia gauna be ita daradaralaia lasi. Ia ese ena aposetolo taudia dekenai, ia gwau: “Bema umui ese lauegu taravatu do umui badinaia, vadaeni egu lalokau dekenai do umui noho . . . Lauegu taravatu do umui badinaia, unai dekena amo lauegu turana do umui lao.” (Ioane 15:10-14) To henanadai badana ta be inai, Iesu ena lalokau karana dainai oi ura iena hahegani oi badinaia bona taunimanima be hahediba taudia halaoa gaukarana oi karaia, a? Momokani, badina idauidau dainai unai gaukara oi karaia be reana ia auka. To Iesu dekenai unai gaukara be ia auka danu. Unai gaukara ia karaia totona ena mauri ia haidaua dalana mani oi laloa.
Iesu Ena Kara Oi Tohotohoa
16. Iesu ena haheitalai namona be dahaka?
16 Dirava ena vara edea Natuna be guba dekenai ia noho bona ia be aneru iboudiai edia dagi siahuna ia hereaia. Iena kohu be bada momokani! To mai ena ura dainai ia ese iena dagi badana ia negea bona ogogami ruma besena lalonai ia vara. Ia tubu ia lao neganai, ia be gorere bona mase taudia ihuanai ia noho. Aposetolo Paulo ia gwau ita totona unai bamona ia karaia, ia gwau: “Iseda Lohiabada Iesu Keriso ena hariharibada umui diba vadaeni. Ia be kohu momo tauna, to umui durua totona ogogami tauna bamona ia lao, iena ogogami dekena amo umui ese kohu momo do umui abia totona.” (2 Korinto 8:9; Filipi 2:5-8) Ia be haheitalai namona unai! Lalokau bada ia hahedinaraia unai! Taunimanima totona ia ese kohu bada ia negea bona hisihisi bada ia mamia, ma taunimanima ta lasi be unai bamona ia karaia. Bona ma taunimanima ta lasi ese dala ia kehoa taunimanima be inai kohu bada, oibe, tauanina goevadae ena mauri hanaihanai, idia henia totona!
17. Namona be dahaka do ita karaia, bona unai ita karaia neganai dahaka do ita davaria?
17 Ita be Iesu ena haheitalai namona ita tohotohoa diba bona unai amo taunimanima ita durudia diba. Nega momo, Iesu ese taunimanima ia hagoadaia ia murinai idia raka totona. (Mareko 2:14; Luka 9:59; 18:22) Oibe, Petro ia gwau: “Dirava ese umui ia boiria unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia do umui raka.” (1 Petero 2:21) Keriso ena lalokau dainai, oi ura ia hegeregerena iena Tamana ena hesiai gaukara oi karaia, ena be unai anina be reana hisihisi do oi ania, a? Unai bamona kara ese taunimanima haida ia durua bada diba! Momokani, bema Iesu ena haheitalai namona ita tohotohoa bona iena Tamana dekena amo ia abia hahediba herevadia ita badinaia, “oi sibona mauri do oi davaria, bona oi idia kamonai taudia danu mauri do idia davaria.”—1 Timoteo 4:16.
18. (a) Iesu ena kara taunimanima dekenai ese dahaka haheitalai namona ia hahedinaraia? (b) Iesu ena kara bona lalohadai toana dainai taunimanima be dahaka idia karaia?
18 Taunimanima durudia bada totona, namona be ita lalodia Iesu ese ia lalodia hegeregerena. Peroveta herevana ta ese Iesu ia gwauraia inai bamona: “Ia ese manokamanoka tauna bona ogogami tauna do ia bogaia hisi, bona ogogami tauna do ia hamauria.” (Salamo 72:13) Iena hahediba taudia idia itaia Iesu ia hereva henia taudia “ia ura henia” bona ia ura dikadika ia durudia. (Mareko 1:40-42; 10:21) Bible lalonai, ia gwau: “Taunimanima hutuma ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Kara dika rohoroho taudia ese iena lalokau karana idia mamia dainai ia dekenai idia mai. Iena gado regena, iena kara toana, bona iena hadibaia dalana be namo dainai idia gari henia lasi. Unai dainai, taunimanima be idia ura henia lasi takisi gogoa taudia bona ariara hahinedia be ia dekenai idia mai idia kamonai totona.—Mataio 9:9-13; Luka 7:36-38; 19:1-10.
19. Paulo ese Iesu ena kara ia tohotohoa dalana be dahaka, bona unai bamona ita karaia neganai dahaka do ia vara?
19 Iesu ena hahediba taudia ginigunadia ese iena lalokau karana idia tohotohoa. Paulo be ia durua taudia haida ia tore henidia, ia gwau: “Umui huanai ai be manau, iena natuna ia ubua hahine bamona . . . umui ta ta ai durua, tamana ese iena natuna ia durudia hegeregerena. . . . Unai dainai aiemai hereva goada dekena amo emui laloa ai hagoadaia noho.” (1 Tesalonika 2:7-12) Teritori dekenai idia noho taudia oi hebogahisi henidia momokani, lalokau tamadia bona sinadia ese edia lalokau natudia idia hebogahisi henidia hegeregerena, a? Basileia sivaraina oi harorolaia neganai, bema emu gado regena, emu vaira toana, bona emu kara idia hahedinaraia oi hebogahisi, mamoe bamona taudia do idia ura Basileia sivaraina idia kamonai henia.
20, 21. Hari inai negai, Iesu ena lalokau karana idia tohotohoa taudia edia sivarai haida be dahaka?
20 Keru dinana ta Spain lalonai, Witness hahine rua ese hahine burukana ta idia davaria, aena idia dika dainai au rua ia gaukaralaia bona iena ruma be ia keru momokani badina iena lahi auna idia ore. Ia naria noho ena natuna maruane be gaukara amo do ia giroa mai ma au haida do ia utudia totona. Unai Witness hahine ese ena au idia utudia, bona ia dekenai magasin haida idia rakatania ia duahia totona. Buruka hahine ena natuna ia giroa mai neganai, unai Witness hahinedia edia lalokau karana iena sinana dekenai ia hoalaia, unai dainai idia rakatania magasin ia duahidia, gabeai Bible ia stadilaia, bapatiso ia abia, bona daudau lasi murinai pioneer gaukara ia hamatamaia.
21 Australia dekenai Witness taudia idia vadivadi neganai, tau ta mai adavana ese idia hamaorodia idia be moni lasi edia ruma bese idia ubudia totona. Unai Witness taudia idia lao bona aniani idia hoia, natudia totona loli idia hoia danu. Unai tamana bona sinana idia tai, idia gwau idia lalo-hekwarahi bada herea dainai, idia laloa sibodia idia alaia mase be namo. Unai tau mai adavana be Bible idia stadilaia hamatamaia, bona vanegai hahine ese bapatiso ia abia. Hahine ta United States lalonai be Iehova ena Witness taudia ia ura lasi momokani, to idia ta ia hedavari henia neganai, ia gwau: “Lau laloatao lasi dahaka ai herevalaia, to lau laloatao gauna be iena hebogahisi karana lau dekenai, ia be mai ena heabidae bona mai ena manau. Ena kara dainai ia lau ura henia. Bona unai nega ia mai hari ai hetura heheni dainai lau moale.”
22. Iesu ena gaukara bona mauri sivaraidia ita tahua vadaeni, unai dainai ita gwau ia be edena bamona tauna?
22 Iesu ena lalokau dainai ita haroro ia karaia dalana bamona, unai neganai ita be hahenamo momo ita davaria! Ia hedinarai goevagoeva Iesu be tau badana bona ena kara dainai ita hoa. Ena kara dainai ita be Roma gavana, Pontio Pilato bamona ita gwau: “Itaia! Tauna be inai!” Oibe, idia mauri taudia iboudiai amo, unai ‘tau,’ be tau hereadaena.—Ioane 19:5.
Edena Bamona Do Oi Haere?
◻ Iesu ena lalokau karana ena bada be edena bamona?
◻ Iesu ese ita ia lalokau henia dainai, namona be daika ita lalokau henidia, bona iena lalokau karana dainai namona be dahaka do ita karaia?
◻ Iesu ia ura ita karaia gaukarana be dahaka?
◻ Dahaka dainai ita gwau diba Iesu be mai ena kohu momo, bona murinai dahaka dainai ia ogogami ai ia lao?
◻ Iesu ese taunimanima ia durudia dalana edena bamona ita tohotohoa be namo?
[Picture on page 15]
Iesu ese lalokau hahedinaraia karana ia haheitalaia
[Picture on page 17]
Iesu ese ia hahedinaraia goevagoeva edena bamona iena hahediba taudia ese edia lalokau karana ia dekenai idia hahedinaraia diba